Read idege ALA ILIVAYỊ 11 Bible Online

ALA ILIVAYỊ 11 - idege bible

ALA ILIVAYỊ 11

¹Ọọwa, Amkpaa-à byi iMosisi bala Erọn yẹkẹẹ,

²“Anụ ya ehile ịlẹ da ala Isirẹlụ yẹkẹẹ, ‘Iyo ịlẹ kanụ ka ri ẹ-ẹpwụ nya iyo-ehe ri

³iyo ọlụchụ ọnyị myị ọnyị ká ụchụ nyamwụ-ụ́ be abiiye, kọ kaa ri ọ́wọ́.

⁴“ ‘Iyo ịhyẹ juwa kị kaa ri ọ́wọ́ kem lee ọ-la ụchụ o-be abiiye kem. Anụ ri iyo ịlịnyị koo. Ụnyịrẹ-ịkamẹlụ kaa ri ọ́wọ́, ụchụ nyamwụ-ụ́ tị be abiiye ka lẹ, ọ ju ibyi ẹ-ẹga nyanụ.

⁵Iyo-ọlẹjwọ kaa ri ọ́wọ́, ọ́ tị la ụchụ o-be abiiye ka lẹ, ọ ju ibyi ẹ-ẹga nyanụ.

⁶Abya kaa ri ọ́wọ́, ọ́ tị la ụchụ o-be abiiye ka lẹ, ọ ju ibyi ẹ-ẹga nyanụ.

⁷Okomba la ụchụ o-be abiiye, ọ́ tị kaa ri ọ́wọ́ ka lẹ, ọ ju ibyi ẹ-ẹga nyanụ.

⁸Ānụ ri iyo ịwẹ, lee ọ-ya ịnyịrọ gu ogu nyaa kpong-kpong ka. Ị ri iyo i-ju ibyi.

⁹“ ‘Anụ ka ri ụma nya iyo ọlẹpwụ nya enyi ọnyị myị ọnyị kọ ju ejwo ịlịkịka bala ego.

¹⁰Iyo ọnyị myị ọnyị kọ ji ẹpwụ nya enyi kọ tị ju ejwo ịlịkịka bala ego ka, ó-ri anyị-ihu lee ụma nya iyo ịlẹpwụ enyi ịkịla wẹwẹ aalẹ, ānụ tụ́ gwaa ka.

¹¹Iyo ịlịịwe rigọgọ nyanụ. Ānụ ryaa lee ọ-ya ịnyịrọ gu ogu nyaa kpong-kpong ka.

¹²Iyo ọlẹpwụ nya enyi ọnyị myị ọnyị kọ ju ejwo ịlịkịka bala ego ka aalẹ, ọ rigọgọ nyanụ.

¹³“ ‘Ánụ ka ri ịchịnụ ụma ịlẹ ka, chajị ị rigọgọ nyanụ. Ịchịnụ ịịwa ri idu bala ụma nya èpwu datị-datị

¹⁴bala uku-ogbe bala ụma nya igbe datị-datị

¹⁵bala ụma nya okpe datị-datị

¹⁶bala ọgbangkịrọ bala ụ̀pa-odu bala ọchịnụ-enyi bala ụma nya àpa datị-datị

¹⁷bala ụma epwii datị-datị,

¹⁸

¹⁹bala ịchịnụ-enyi datị-datị bala erwo.

²⁰“ ‘Ang ịwụlọọ-wụlọ i-bwu arụrụ ịlẹ kịị kpa ata inine jẹdịyẹ wuu rigọgọ nyanụ,

²¹kẹnẹ-kẹnẹ ịlẹ kị ju ata ịlẹ kị jẹ-ẹ̀ kpa gbajị mẹ ịnyị. Ịlịnyị kẹnẹ-kẹnẹ anụ ka ri lẹ.

²²Anụ ka ri ịyịrị ụma ọnyị myị ọnyị bala ọnọọchịrị ụma ọnyị myị ọnyị bala ụ̀gá ụma ọnyị myị ọnyị myị.

²³Ang ịwụlọọ-wụlọ i-bwu arụrụ ịkịla ịlẹ kịị kpa ata inine jẹdịyẹ wuu rigọgọ nyanụ.

²⁴“ ‘Iyo ịlẹ wuu kà họ kanụ ka chịrị myị. Ọng myị ọng kọ ya ịnyịrọ gu ogu nya iyo ịlẹ ka ji la ibyi gbee da ka alobyi.

²⁵Ọngọngọhẹ kọ hu ogu nyaa ka hụ́ ang ịkụrụ-kụrụ nyamwụ cheri-cheri. Ọ tị ka ji la ibyi gbee da ka alobyi.

²⁶“ ‘Iyo ọlụchụ ọnyị myị ọnyị ká ụchụ nyamwụ-ụ́ be abiiye ka bala ọ-kaa ri ọ́wọ́ ka wuu ri iyo i-ju ibyi ẹ-ẹga nyanụ. Ọng myị ọng kọ ya ịnyịrọ gwaa ka ri olibyi.

²⁷Ẹ-ẹpwụ nya iyo ị-la ata ine wuu, ịlẹ kị la ụtụbwọ la ibyi ẹ-ẹga nyanụ. Ọng myị ọng kọ ya ịnyịrọ gu ogu nyaa ka ji la ibyi gbee da ka alobyi.

²⁸Ọngọngọhẹ kọ hu ogu nyaa ka hụ́ ang ịkụrụ-kụrụ nyamwụ cheri-cheri. Ọ tị ka ji la ibyi gbee da ka alobyi. Iyo ịlịịwẹ wuu ri i-ju ibyi ẹ-ẹga nyanụ.

²⁹“ ‘Iyo ichiche ị-ga tụ ịpyị da ịlẹ kị ri ibyi ẹ-ẹga nyanụ ri ịchị-ẹgba bala ijiga bala ikponjiyo ụma datị-datị

³⁰bala apịrịmama bala ewoo bala ikponjiyo bala anyanya.

³¹Iyo ịlẹ kị ri ibyi ẹ-ẹga nyanụ bwu ẹ-ẹpwụ nya iyo ị-ga tụ ịpyị da à wẹ lẹ. Ọngọngọhẹ kọ ya ịnyịrọ gu ogu nyaa ka ji la ibyi gbee da ka alobyi.

³²Ó-ri ká ogu nya ọhẹ-lọhẹ nyaa-á chabwọ mịla ịngịhyẹ aalẹ, ang ọọwa ka ji la ibyi gbee da ka alobyi. Ịnyịnyị ọ ka la ẹ-ẹga nya ang-abwọ ọnyị myị ọnyị kị họ la okoji lee apwụ lee ugba lee awụtọọ lẹ. Ụma nya ụkụrwọ ọnyị myị ọnyị kị kaa kpa ang-abwọ ọọwa họhọ, ị ka hwoo ju enyi. Ọ tị ka juwa la ibyi gbee da ka alobyi ene kọ ka la charị-charị.

³³Ọ́ tị ri ká ogu nya ọhẹ-lọhẹ nyaa-á chabwọ da ka ẹpwụ nya ẹchụ ọpyị, ang ịlẹpwụ nya ẹchụ ọọwa wuu ka ri ibyi. Anụ ka hu ẹchụ ọọwa bene.

³⁴Ang oriri ọnyị myị ọnyị kị ka jẹ-ẹ̀ ya ri myị, ká enyi ọlẹchụ ọlịnyị-ị́ tị chị hụ lẹ aalẹ, ang oriri ọọwa ri ibyi lẹ. Ang ọnwanwa ọnyị myị ọnyị kọ tị ji ẹpwụ nya ẹchụ ọlịnyị lẹ aalẹ, ọ ri ibyi lẹ.

³⁵Ang myị ang ká ogu nya iyo ọlịnyị-ị́ chabwọ mịla ka ri ibyi. Ó-ri aya lee iyegu ọlẹ kị meme, ị ka boo ene hụrụ. Ị ri ibyi lẹ, anụ ka hwaa lala ang iribyi.

³⁶Ọ́ ri ẹmwụ nya enyi lee ịwẹẹlụ aalẹ, ị la charị-charị. Ang ọkịla ọhẹ-lọhẹ kọ tị ya ịnyịrọ gu ogu nya iyo ọlịnyị ka ri ibyi.

³⁷Ọ́ tị ri ká ogu nya ọhẹ nyaa-á chabwọ mịla ajẹ nya ang ịlẹ kị juwa ka ya tọ wẹwẹ, ajẹ ịịwa la charị-charị.

³⁸Ma, ó-ri kị ya ajẹ nya ang ịịwa ju enyi, ká ogu nyaa ọhẹ-ẹ́ chabwọ mịlaa aalẹ, ajẹ ịịwa ri ibyi ẹ-ẹga nyanụ lẹ.

³⁹“ ‘Ó-ri ká iyo ọlẹ kii ri-í gbu, ọng myị ọng kọ ya ịnyịrọ gu ogu nyamwụ ka juwa la ibyi gbee da ka alobyi.

⁴⁰Ọng myị ọng kọ ri iyo ọọwa ka hụ́ ang ịkụrụ-kụrụ nyamwụ cheri-cheri. Ọ tị ka ji la ibyi gbee da ka alobyi. Ọngọlẹ kọ hu ogu nya nyamwụ ka hụ́ ang ịkụrụ-kụrụ nyamwụ cheri-cheri ịnyịnyị. Ọ tị ka ji la ibyi gbee da ka alobyi.

⁴¹“ ‘Iyo ichiche ịlẹ kịị wụlọọ-wụlọ ị-ịpyị wuu rigọgọ nyanụ. Anụ ryaa ka.

⁴²Ānụ ri iyo ịwụlọọ-wụlọ ị-ịpyị ịwẹ kịị kpa apwụ gbileji lee ọ-jẹdịyẹ lata inine lee ọla iru nya ata ka. Ị rigọgọ nyanụ.

⁴³Ānụ ya ịlọnụ ju ibyi bwula o-ri iyo ịlịịwẹ koo.

⁴⁴Am à ri Amkpaa Ohe Oluhye nyanụ lẹ. Anụ hu ịlọnụ ham, kanụ la ịgọgọ, chajị am ayịdang la ịgọgọ. Ānụ ya ịlọnụ ju ibyi bwula o-ri iyo i-ju ibyi ịwẹ koo.

⁴⁵Am à ri Amkpaa ọlẹ kọ gbanụ kpehe bwu ọpyị nya ala Ijipiti chajị kam ka ri Ohe Oluhye nyanụ lẹ. Lẹẹlẹ, anụ ka la ịgọgọ chajị m̀ la ịgọgọ.’ ”

⁴⁶Ịwẹ à ri ehile chajị nya iyo-ehe bala ịchịnụ bala iyo ịlẹpwụ nya enyi bala iyo ịwụlọọ-wụlọ ị-ịpyị lẹlẹ.

⁴⁷Anụ ka jẹ ang ọcharị-charị datị hi ang-ibyi bala ọ-jẹ ọdatị nya iyo iriri bala ịlẹ kanụ ka ri ka.