Read idege ALA ILIVAYỊ 12 Bible Online

ALA ILIVAYỊ 12 - idege bible

ALA ILIVAYỊ 12

¹Ọọwa, Amkpaa-à byi iMosisi yẹkẹẹ,

²“Ya ehile ịlẹ wuu je ala Isirẹlụ yẹkẹẹ, ‘Ụka ká ọnyang-ńg ma ọnyị ọlẹng kpá, ọ ka juwa la ịhyá nya ọnyị ọmama ẹ-ẹpwụ nya ẹnụtụrụ irwiye gbẹgbịlẹ jaabwọ kọọ hụ lụka nya odehe ojiji nyamwụ.

³Ẹnụtụrụ ọhaneku ị ka da ọnyị ọọwa ụwụwụ lẹ.

⁴Ọ ka ri ẹnụtụrụ iwo ịta da ịta (33) lẹpwụ-lẹpwụ ene kọ ka la charị-charị bwu ẹpwụ nya ịwọ ọhụhụ nya ọnyị ọmama. Ọ́ ka ya ịnyịro gu ang ọlịgọgọ ọhẹ-lọhẹ lee ọ-ka Ọdụ Ọlịgọgọ lụka ọwẹ ka gbee ká ụka ọlẹ kị hunọ nya ọhọhọ nya ọcharị-charị ọlala nyamwụ ka chọnụ.

⁵“ ‘Ọ́ tị ri ọnyị ọnyang kọ ma aalẹ, ọ ka juwa la ịhyá nya ọnyị ọmama nyamwụ jaabwọ kọọ hụ lụka nya odehe ojiji nyamwụ. Ọ tị ka hụ ẹnụtụrụ iwo kụrụ ine gbẹgbịlẹ. Ọọwa, ọ ka myịmyị-ị̀ hụ ẹnụtụrụ iwo ịrwọnyẹ kụrụ ịrwọnyẹ (66) ene kọ ka la charị-charị bwu ẹpwụ nya ịwọ ọhụhụ nya ọnyị ọmama lẹlẹ.

⁶“ ‘Ụka ká ụka nya ọhọhọ nya ọcharị-charị ọlala nyamwụ-ụ́ jịra kpá, ó-ri ịnya ọnyị ọlẹng lee ịnya ọnyị ọnyang ọlẹ kọ ma wẹwẹ, ọ ka kpa ụgba nya ọkpịlọ ọlẹ kọ gu ẹka ookpokpo bala ẹchụ nya okiripete lee enewulo wẹ ọngọkiliya ọ-ọnang nya Ọdụ Ọlịgọgọ. Ụgba nya ọkpịlọ ri nya iya ọ-rụ ila. Okiripete lee enewulo ri nya iya ọ-hụ́ ọhọbịrị.

⁷Ọọwa, ọngọkiliya-à ka hu ọhaha nya ọnyang ọọwa ha Amkpaa bala ọ-ka họ ọhọhọ nya ọcharị-charị ọlala nyamwụ lẹ, ọ ka la charị-charị bwu ẹpwụ nya ịwọ ọhụhụ nya ọnyị ọmama lẹlẹ. Jaabwọ ká ọnyang ka họ ụka kọ ma ọnyị kpá à wẹ lẹlẹ.

⁸“ ‘Ọ́ tị ri kọ họ ang kpụ ụgba nya ọkpịlọ myị ka aalẹ, ọ ka kpa enewulo imiiye lee ẹchụ nya ikiripete imiiye. Ọhẹ ka ri nya iya ọ-rụ ila. Ọkịla ka ri nya iya ọ-hụ́ ọhọbịrị. Ọọwa, ọngọkiliya-à ka bịlẹ wọnụ nyamwụ ju lẹ, ọ ka la charị-charị lẹlẹ.’ ”