Read idege ALA ILIVAYỊ 13 Bible Online

ALA ILIVAYỊ 13 - idege bible

ALA ILIVAYỊ 13

¹Ọọwa, Amkpaa-à byi iMosisi bala Erọn yẹkẹẹ,

²“Ó-ri ka ọngọhẹ-ẹ́ chị ẹbẹ lee ọ-kụ iyi lee ọ-da ugbe ọlẹ kọ ka jẹ-ẹ̀ yẹla ẹdụrụ olugba nya ịnyịrọ[5] ọ-chị kịla ọngịnyị myị aalẹ, ị ka kpọọ wẹ ẹga nya Erọn ọngọkiliya lee ọnyị nyamwụ ọlẹ kọ ri ọngọkiliya.

³Ọngọkiliya ọọwa ka wụla ịnyịrọ ọlẹga ọọwa yẹ. Ó-ri ká egbii ịlụwa-á pwowuru, ká ẹbẹ ọọwa-á kpoye ka eji nya ugba oluhye aalẹ, ẹdụrụ olugba nya ịnyịrọ ịnyị. Ọngọkiliya ọọwa ka ya dodehe ọngọwẹ nyị ri olibyi.

⁴Ọ́ tị ri ká ẹbẹ ọọwa-á la owuru, kọ tị ba u-ugba oluhye kem, ká egbii ịlụwa-á tị pwowuru ka aalẹ, ọngọkiliya ka chị ọngọọwa ịgọ hi angịkịla ẹnụtụrụ irwiye gbẹgbịlẹ.

⁵Ọọwa, ọngọkịliya-à ka wụlọọ yẹ myịmyị ẹnụtụrụ ọharwiye lẹlẹ. Ó-ri ká ẹbẹ ọọwa-á la abwabwọ nya ịlọmwụ, la ọ-pyẹ kịlahị ka aalẹ, ọ ka myịmyị-ị̀ chị ọlẹng ọwẹ ịgọ ẹ-ẹpwụ nya ẹnụtụrụ irwiye kịlahị.

⁶Ọngọkiliya ka wụlọọ yẹ myịmyị ẹnụtụrụ ọharwiye. Ó-ri ká ẹbẹ ọọwa-á gbu ahị, kọ pyẹ gụ olene ka aalẹ, ọ ka ya dodehe ya ọngọọwa nyị la charị-charị. Ẹbẹ nya-à chọọ kem lẹ. Ọọwa, ọngọọwa-à ka hụ ịwụrụ nyamwụ lẹ, ọ ka la charị-charị lẹlẹ.

⁷Ọ́ tị ri ká ẹbẹ nyamwụ pyẹ gụ ọọwa nyọlẹ ká ọngọkiliya wụlọọ yẹ kpụ ọ yoo dodehe nya ọngọ la charị-charị kpá aalẹ, ọ ka ka ẹga nya ọngọkiliya myịmyị.

⁸Ọngọkiliya ka wụlọọ yẹ myịmyị. Ó-ri kọ pyẹ kịlahị aalẹ, ọngọkiliya ka ya dodehe ọngọwẹ nyị ri olibyi. Ẹdụrụ ọọwa ri ẹdụrụ olugba nya ịnyịrọ.

⁹“Ó-ri ká ọngọhẹ-ẹ́ la ẹdụrụ olugba nya ịnyịrọ aalẹ, ị ka kpa ọngọọwa wẹ ẹga nya ọngọkiliya

¹⁰kọ ka wụlọọ yẹ. Ó-ri ẹbẹ ọlẹ kọ hu onyoowuru-onyoowuru kọ họ ká egbii ịlụwa-á pwowuru, ká ẹbẹ ọọwa-á ju ịwụ aalẹ,

¹¹ẹdụrụ onyobyi-obyi olugba nya ịnyịrọ à jwọọ-ọ̀ wẹ lẹ. Ọngọkiliya ka ya dodehe ọngọwẹ nyị ri olibyi. Ọ́ tụtụm ka chọọ ịgọ hi angịkịla ene kaka chajị ọ la gedegede nyori ọngọwẹ ri olibyi lẹ.

¹²“Ó-ri ká ẹdụrụ olugba nya ịnyịrọ ọwẹ-ẹ́ pyẹ tụ ịnyịrọ nyamwụ da bwu uhye ju wẹ eji

¹³aalẹ, ọngọkiliya ka myịmyị-ị̀ wụlọọ yẹ. Ó-ri kọ pyẹ yịrị ịnyịrọ nyamwụ yịrị wuu ịnyịlẹhị aalẹ, ọngọkiliya ka ya dodehe ya ọngọwẹ nyị la charị-charị. Ugba nya ịnyịrọ nyamwụ wuu-ú pwowuru lẹ aalẹ, ọ la charị-charị lẹ.

¹⁴Ọ́ tị ri ká ẹbẹ onyeewe-é hu aalẹ, ọ ri olibyi lẹ.

¹⁵Ọọwa, ọngọkiliya-à ka wụla ẹbẹ ọọwa yẹ lẹ, ọ ka ya dodehe ya ọngọwẹ nyị ri olibyi lẹlẹ. Ẹbẹ ọlịịwẹ ri ẹdụrụ olugba nya ịnyịrọ. Lẹẹlẹ, ọngọọwa ri olibyi.

¹⁶Ọ́ tị ri ká ẹbẹ ọọwa-à myị̀ kpá, kọ pwowuru aalẹ, ọ ka mwẹẹkpẹ wẹ ẹga nya ọngọkiliya

¹⁷kọ ka wụlọọ yẹ. Ó-ri ká ẹbẹ ọọwa-á pwowuru aalẹ, ọngọọwa la charị-charị. Ọngọkiliya ka ya dodehe ya ọngọwẹ nyị ri ọngọ charị-charị lẹ.

¹⁸“Ó-ri ká iyi-í kụ ọngịnyị, kọ myị̀ kpá,

¹⁹ká ugbe onyoowuru lee ugbe ọnyọmịla-á tị da ọngọọwa ẹ-ẹga ká iyi kwọọ ene mịlẹ-mịlẹ aalẹ, ọ ka kpa ịlọmwụ ka ẹga nya ọngọkiliya.

²⁰Ọngọkiliya ka wụlọọ yẹ. Ó-ri ká ugbe ọọwa-á kpoye ka eji nya ugba oluhye, ká egbii ịlụwa-á pwo owuru aalẹ, ọ ka ya dodehe ya ọngọwẹ nyị ri ọngọ chịrị. Ẹdụrụ nya ekpo à dọmwụ wẹ u-uhye nya iyi lẹ.

²¹Ọ́ tị ri ká ọngọkiliya-á wụlọọ yẹ, ká egbii ịlụwa-á pwowuru ka, ká ugbe ọọwa-á tị kpoye ka eji nya ugba oluhye ka, kọ gbu ahị aalẹ, ọngọkiliya ka chọọ ịgọ hi angịkịla ẹnụtụrụ irwiye gbẹgbịlẹ.

²²Ó-ri ká ugbe ọọwa-á pyẹ kịlahị aalẹ, ọngọkiliya ka ya dodehe ya ọngọwẹ nyị ri olibyi, chajị ẹdụrụ ọ-chị kịla ọngịnyị à jwọọ lẹ.

²³Ọ́ tị ri ká ugbe ọọwa-á la abwabwọ nya ịlọmwụ la ọ-pyẹ kịlahị ka aalẹ, ukpuru nya iyi ọlẹ kọ kwọọ ene à wẹ lẹ. Ọngọkiliya ka ya dodehe ya ọngọwẹ nyị la charị-charị.

²⁴“Ẹla chajị nya ọngọlẹ ká ila-á ba tị lẹ, ó-ri ká ọnụ-ẹbẹ nyamwụ-ụ́ pwowuru lee ọ-ga ọmịla aalẹ,

²⁵ọngọkiliya ka wụlọọ yẹ. Ó-ri ká egbii ịlụwa-á pwowuru, ká ọnụ nyamwụ-ụ́ kpoye ka eji nya ugba oluhye aalẹ, ẹdụrụ olugba nya ịnyịrọ à dọmwụ wẹ ẹ-ẹga ká ila bọọ lẹ. Ọngọkiliya ka ya dodehe ya ọngọwẹ nyị ri olibyi.

²⁶Ọ́ tị ri ká egbii ịlụwa-á pwowuru ka, ká ọnụ nyamwụ-ụ́ tị kpoye ka eji nya ugba oluhye ka, kọ gbu ahị aalẹ, ọngọkiliya ka chị ọngọọwa ịgọ hi angịkịla ẹnụtụrụ irwiye.

²⁷Ọngọkiliya ka myịmyị-ị̀ wụlọọ yẹ ẹnụtụrụ ọharwiye. Ó-ri ká ọnụ-ẹbẹ ọọwa-á juwa pyẹ kịlahị aalẹ, ẹdụrụ olugba nya ịnyịrọ ọ ri lẹ. Ọngọkiliya ka ya dodehe ya ọngọwẹ nyị ri olibyi.

²⁸Ọ́ tị ri ká ẹga ọọwa-á la abwabwọ nya ịlọmwụ, la ọ-pyẹ kịlahị ka, kọ gbu ahị aalẹ, ukpuru nya ila ọlẹ kọ bọọ kem ịnyị. Ọngọkiliya ka ya dodehe ya ọngọwẹ nyị la charị-charị.

²⁹“Ó-ri ká ẹbẹ-ẹ́ hu e-egbeju lee ịtịnchwọ nya ọnyang lee ọlẹng

³⁰aalẹ, ọngọkiliya ka wụlọọ yẹ. Ó-ri kọ yẹ ká ẹbẹ ọọwa-á kpoye ka eji nya ugba oluhye, ká inyi ịlụwa-á ga ịmịla họ gewu-gewu aalẹ, ẹdụrụ olugba nya ịnyịrọ ịnyị. Ọngọkiliya ka ya dodehe ya ọngọwẹ nyị ri olibyi.

³¹Ọ́ tị ri ká ọngọkiliya-á wụlọọ yẹ, ká ẹbẹ ọọwa-á kpoye ka eji nya ugba oluhye ka, ká inyi ịlụwa-á tị wulo hiigu ka aalẹ, ọngọkiliya ka chị ọngọọwa ịgọ hi angịkịla ẹnụtụrụ irwiye gbẹgbịlẹ.

³²Ọngọkiliya ka myịmyị-ị̀ wụla ẹbẹ ọọwa yẹ ẹnụtụrụ ọharwiye. Ó-ri kọ pyẹ kịlahị ka, ká inyi ịlụwa-á wulo dalawụlẹ, ka ẹbẹ ọọwa kpoye ka eji nya ugba oluhye ka aalẹ,

³³ọngọọwa ka pwọ inyi olegbeju nyamwụ kẹnẹ-kẹnẹ kaka hi ẹga ká ang họọ. Ọọwa, ọngọkiliya-à ka chọọ ịgọ hi angịkịla ẹnụtụrụ irwiye ọkịla myịmyị lẹlẹ.

³⁴Ẹnụtụrụ ọharwiye lẹ, ọngọkiliya-à ka wụlọọ yẹ myịmyị lẹlẹ. Ó-ri ká ẹbẹ ọọwa-á pyẹ kịlahị ka, kọ tị kpoye ka eji nya ugba oluhye ka aalẹ, ọngọkiliya ka ya dodehe ya ọngọwẹ nyị la charị-charị. Ọ ka hụ́ ịwụrụ nyamwụ lẹ, ọ ka la charị-charị lẹlẹ.

³⁵Ọ́ tị ri ká ẹbẹ ọọwa-á pyẹ kịlahị ụka kị ya dodehe ọngọọwa nyị la charị-charị dodehe kpá

³⁶aalẹ, ọngọkiliya ka myịmyị-ị̀ wụlọọ yẹ. Ó-ri ká ẹbẹ ọọwa-á pyẹ kịlahị aalẹ, ọ́ dọmwụ baba ọngọkiliya ka kpahị nya inyi igewu-gewu nyamwụ ene kaka, ọngọwẹ ri olibyi lẹ.

³⁷Bwula ọyẹyẹ nya ọngọkiliya lẹ, ó-ri kọ yẹ ká ẹbẹ ọọwa-á pyẹ kịlahị ka, ká inyi juwa wulo dalawụlẹ, ká ẹbẹ-ẹ́ myị̀ aalẹ, ọ ka ya dodehe ya ọngọọwa nyị la charị-charị.

³⁸“Ó-ri ká egbe inyiiwuru-ú kpehe ị-ịnyịrọ nya ọnyang lee ọlẹng,

³⁹ọngọkiliya ka wụla ọngọọwa yẹ. Ó-ri ká egbe ịịwa-á la hweehwee aalẹ, egbe ịlam-ịlam kem à dọọ wẹ lẹ. Ọ la charị-charị.

⁴⁰“Ó-ri ká inyi-í juwa ẹ-ẹpwayịrẹtẹ nya egbeju nya ọngịnyị ka aalẹ, ẹtẹ ọngọọwa à chị lẹ, ọ tị la charị-charị.

⁴¹Ọ́ tị ri ká inyi ịlịlahị nya egbeji nya ọngịnyị-ị́ juwa ka aalẹ, ehya ọngọọwa à nẹ lẹ. Ọwa ayịdang la charị-charị.

⁴²Ọ́ tị ri ká abẹ ị-chị iwuru chị ịnyịmịla-á kpehe ẹ-ẹga kọ chẹtẹ lee nehya aalẹ, ẹdụrụ olugba nya ịnyịrọ à wẹ lẹ.

⁴³Ọngọkiliya ka wụlọọ yẹ. Ó-ri ká abẹ ịịwa-á chị iwuru chị ịnyịmịla aalẹ,

⁴⁴ọngọkiliya ka ya dodehe ya ọngọwẹ nyị ri olibyi chajị ẹdụrụ olugba nya ịnyịrọ à wẹ lẹ.

⁴⁵“Ọngọlẹ ká ẹdụrụ olugba nya ịnyịrọ-ọ́ jụ ka kụrụ ịwụrụ i-gu ene jangjang. Ọ ka pẹhi inyi nyamwụ dachị-dachị. Ọ ka ya ang ke ịlọmwụ wẹ eji nya ahị kọ ka juwa ga juwa dakọ gboo yẹkẹẹ, ‘Olibyi ịnyị! Olibyi ịnyị!’

⁴⁶Ọ ka juwa la ibyi ọwẹ gbee jaabwọ ká ẹdụrụ nyamwụ ọwẹ-ẹ́ tata ka ba. Ọ ka kpehe hi ịkampụ kaka kụ ẹpwa nya ịlọmwụ datị-datị hi angịkịla.

⁴⁷“Ó-ri ká ebwubwu-ú[6] juwa ẹ-ẹpwụ nya ang ọkụrụ-kụrụ ọlẹ kị kpa egbii nya iyo họ lee ọlẹ kị nụnụ

⁴⁸lee ọlẹ kị họ la ụma nya ugba ọhẹ lee ọkịla lee ang ọnyị myị ọnyị kị họ la ugba nya iyo,

⁴⁹ká ang-ẹjẹẹ nyamwụ-ụ́ la ukpuukpo lee ọmịla u-uhye nya ang ọkụrụ-kụrụ ọọwa aalẹ, ebwubwu ịnyị. Ị ka mọọ jẹ ọngọkiliya.

⁵⁰Ọngọkiliya ka wụlọọ yẹ, kọ ka hu ang ọkụrụ-kụrụ ọlẹ ká ebwubwu daba nọ a-ang hwẹẹẹ ẹnụtụrụ irwiye lẹpwụ-lẹpwụ.

⁵¹Ọ ka wụlọọ yẹ myịmyị ẹnụtụrụ ọharwiye kọ ka jẹ ó-ri ká ebwubwu ọọwa-á pyẹ kịlahị. Ó-ri kọ pyẹ aalẹ, ebwubwu ịnyị. Ang ọkụrụ-kụrụ ọọwa ju ibyi lẹ.

⁵²Ọngọkiliya ka jụ ang ọkụrụ-kụrụ ọọwa ila chajị ebwubwu ọ-pyẹ kịlahị-ịlahị ọ ri lẹ.

⁵³“Ọ́ tị ri ká ọngọkiliya-á wụla ang ọọwa yẹ, ká ebwubwu ọọwa-á pyẹ kịlahị ẹ-ẹpwụ nya ang ọkụrụ-kụrụ ọọwa ka aalẹ,

⁵⁴ọ ka ya kị ka hwọọ chajị kị ka ya nọ a-ang hwẹẹẹ ẹnụtụrụ irwiye ọkịla myịmyị.

⁵⁵Ọọwa, ọ ka myịmyị-ị̀ wụlọọ yẹ lẹlẹ. Ó-ri ká ebwubwu ọwẹ-ẹ́ pyẹ kịlahị ka, ká ụwa-á tị la ukpuukpuukpo lee ọmịla abwabwọ nya ịlọmwụ wẹwẹ aalẹ, ang ọkụrụ-kụrụ ọọwa ju ibyi. Ó-ri ẹkpẹ ri lee ahị nyamwụ ká ebwubwu-ú jiji, ị ka chọọ ila.

⁵⁶Ó-ri ká ọngọkiliya-á wụlayẹ ká ebwubwu ọọwa-á pwọ ahịkpuru nyọlẹ kị hụ ang ọkụrụ-kụrụ ọọwa kpá aalẹ, ọ ka gu ẹga ọọwa ene hi bwu ẹpwụ nya ang ọkụrụ-kụrụ nya apwụ lee ugba ọọwa.

⁵⁷Ọ́ tị ri ká ebwubwu ọọwa-á chị ọmwẹji kpụ kọ juwa pyẹ aalẹ, ayịdang nya ang ọkụrụ-kụrụ ọọwa ka chọọ ila.

⁵⁸Ó tị ri kị hụ ang ọọwa kpụ ká ebwubwu-ú myị hyoo wẹwẹ aalẹ, ị ka hwọọ myịmyị ụka oheeye. Ọọwa, ọ ka la la charị-charị lẹlẹ.”

⁵⁹Ọwẹ à ri ehile chajị nya ebwubwu oluhye nya apwụ ọlẹ kị kpa egbii nya iyo họ lee ọlẹ kị nụnụ lee ang ọlẹ kị kpa ugba họ lẹlẹ. Ehile ọwẹ ri ọ-ka kpa chị eje ó-ri ká ang ọọwa-á la charị-charị lee ọ-ju ibyi.