Read idege ALA ILIVAYỊ 14 Bible Online

ALA ILIVAYỊ 14 - idege bible

ALA ILIVAYỊ 14

²“Ịlẹ ri ehile chajị nya ọhọhọ nya ọcharị-charị ọlala nya ọngọlẹ kọ hagụ bwu ẹpwụ nya ẹdụrụ olugba nya ịnyịrọ. Ẹnụ nya o-ya dodehe nya ọcharị-charị ọlala nyamwụ, ị ka kpọọ wẹ ọngọkiliya,

³ká ọngọkiliya ka kpọọ kpehe hi ịkampụ kaka wụla yẹ. Ó-ri ká ẹdụrụ ọọwa-á myị hyoo aalẹ,

⁴ọngọkiliya ka ya kị ka kpa ịchịnụ ịcharị-charị imiiye bala uke nya okoji nya isida bala ochiri ọnyọmịla bala ábwọ nya okoji nya ihisọpụ warị chajị nya ọngọlẹ kị wẹẹ̀ ka họ kọ ka la charị-charị.

⁵Ọọwa, ọngọkiliya-à ka ya kị ka nwụ ọhẹ nya ịchịnụ ịwẹ u-uhye nya ẹchụ-ọpyị ọlẹ ká enyi onyeewe ji lẹlẹ.

⁶Ọngọkiliya ka hu ọchịnụ ọkịla tụ ọwụ nya isida bala ochiri ọnyọmịla bala uke nya okoji ihisọpụ kọ ka yaa ju ịwọ nya ọchịnụ ọlẹ kị nwụ.

⁷Ọ ka nyí ịwọ ọwẹ pwáaa ugbabwọ irwiye hụ ọngọlẹ kị wẹẹ họ kọ ka la charị-charị lẹ, ọ ka ya dodehe ya ọngọwẹ nyị la charị-charị lẹ lẹlẹ. Ọ́ họ ịnyị kpá lẹ, ọ ka pẹhi ọchịnụ ọwẹ kọ ka hụ rụ lẹlẹ.

⁸“Ọngọọwa ka hụ́ ang ịkụrụ-kụrụ nyamwụ bala ọ-pwọ inyi nyamwụ wuu bala o-hyo enyi. Ọọwa, ọ ka la charị-charị lẹlẹ. Ọ ka nyà wẹ ịkampụ myị, ọ́ tị ka kụ ẹpwang nya ịlọmwụ ka jịra ụtụrụ irwiye gbẹgbịlẹ.

⁹Ẹnụtụrụ ọharwiye, ọ ka myịmyị-ị̀ pwọ inyi bala ịchwọ bala anyagị tụ egbii ịla ẹ̀ga ịkịla nya ịnyịrọ nyamwụ wuu. Ọ ka hụ́ ang ịkụrụ-kụrụ nyamwụ bala o-hyo enyi. Ọọwa, ọ ka la charị-charị lẹlẹ.

¹⁰“Ẹnụtụrụ ọhaneku ọngọọwa ka kpa ágba nya ịkpịlọ alẹng imiiye ịlẹ ká ehe-é họ ka bala ọkpịlọ ọnyang ookpokpo o-gu ẹka ookpokpo ọlẹ ká ehe-é họ ka warị. Ọ ka kpa okolo ịta nya ọrụ nya ajẹ nya ang-ẹrụ ọlẹ kị ya ida nya olivu kpịla lọọ bala eku nya ọchọja nya ida nya olivu warị ịnyịnyị.

¹¹Ọọwa, ọngọkiliya-à ka kpa ọngọọwa tụ ang nya ọhaha nyamwụ ịwẹ ka ẹga nya Amkpaa ọ-ọnang nya Ọdụ Ọlịgọgọ lẹlẹ.

¹²Ọọwa, ọngọkiliya-à ka ya ọkpịlọ ọlẹng ọhẹ bala ẹhya nya ọchọja nya ida ọwẹ kịla iya ọ-wụ́ abyị lẹlẹ. Ọ ka ya ang ịwẹ kịla iya o-nyí kile-kile bwula o-nyaa kile-kile ị-ịlahị nya Amkpaa ịnyịnyị.

¹³Ọ ka nwụ ọkpịlọ ọọwa ẹ-ẹga ọlịgọgọ ọlẹ kị kaa nwụ iyo nya iya ọ-hụ́ ọhọbịrị bala ịnya iya ọ-rụ ila. Ọ ka họ ịnyị chajị iya ọ-wụ́ abyị ọlẹ ri nya ọngọkiliya lala iya ọ-hụ́ ọhọbịrị. Iya ọwẹ la ịgọgọ lụmẹ.

¹⁴Ọngọkiliya ka gu ịwọ nya ọkpịlọ ọọwa chị ugbuurụ nya upwuriri bala ụkụchụ ọdụdụgba nya upwuriri bala ụchụụ ọdụdụgba nya upwuriri nya ọngọlẹ kị wẹ̄ẹ̀ ka họ ọhọhọ nya ọcharị-charị ọlala nyamwụ.

¹⁵Ọngọkiliya ka hu ida nya olivu kọ ka chọọ ju ịlọmwụ ẹ-ẹpwụtụbwọ nya ụpụpịla.

¹⁶Ọ ka ya ụkụchụ ọhẹ nya ụbwọ upwuriri gu ida ọlẹpwụtụbwọ nyamwụ kọ ka nyoo pwáaa ugbabwọ irwiye ị-ịlahị nya Amkpaa.

¹⁷Ọọwa, ọ ka gu ida ọlẹpwụtụbwọ nyamwụ chị ugbuurụ nya upwuriri bala ụkụchụ ọdụdụgba nya upwuriri bala ụchụụ ọdụdụgba nya upwuriri nya ọngọlẹ kị wẹ̄ẹ̀ ka họ ọhọhọ nya ọcharị-charị nyamwụ lẹlẹ.

¹⁸Ọ ka ya ida ohihi ọlẹpwụtụbwọ nyamwụ tudu ọngọọwa e-egbeju. Ịịwẹ ọ ka bwu họ ọhọhọ nya ọcharị-charị ọlala nya ọngọọwa lẹlẹ.

¹⁹“Ọọwa, ọngọkiliya-à ka kịla iya ọ-hụ́ ọhọbịrị bala ọ-ka họ ọhọhọ nya ọcharị-charị ọlala nya ọngọọwa lẹlẹ. Ụka kọ họ ọọwa kpá, ọ ka nwụ iyo okiliya ọ-rụ ila,

²⁰kọ ka yọọ bala ajẹ nya ang-ẹrụ kịla iya lawụlẹ u-uhye nya ogidi. Ịịwẹ ọngọkiliya-à ka bwu họ ọhọhọ nya ọcharị-charị ọlala nya ọngọọwa lẹ, ọ ka la charị-charị lẹlẹ.

²¹“Ọ́ tị ri ká ọngọọwa-á ri ọlẹbyahị, ká ụbwọ nyamwụ-ụ́ pwụ eji nya ang ịwẹ ka aalẹ, ọ ka kpa ụ́gba nya ọkpịlọ ọlẹng kem nya ang okiliya ọ-wụ́ abyị ká ọngọkiliya ka nyoo kile-kile ha Amkpaa. Ang ịkịla ịlẹ kọ ka kpa bọọ kem ri okolo ookpokpo nya ọrụ nya ajẹ nya ang-ẹrụ ọlẹ kị ya ida ju kị ka ya kịla iya nya ajẹ nya ang-ẹrụ bala eku nya ọchọja nya ida nya olivu.

²²Ọlẹ ká ụbwọ nyamwụ-ụ́ pwụ myị lẹpwụ nya enewulo imiiye lee ikiripete imiiye ọ ka kpa ịnyịnyị lẹ. Ọhẹ-ẹ́ ri nya a ọ-hụ́ ọhọbịrị, ọkịla ri nya iya ọ-rụ ila.

²³“Ẹnụtụrụ ọhaneku nya ọhọhọ nya ọcharị-charị ọlala nyamwụ ọwẹ, ọ ka kpa ang ịwẹ wẹ ọngọkiliya ọ-ọnang nya Ọdụ Ọlịgọgọ lẹ.

²⁴Ọọwa, ọngọkiliya-à ka hu ọkpịlọ bala ida kọ ka yaa kịla iya o-nyí kile-kile bwula o-nyaa kile-kile i-ijata nya Amkpaa lẹlẹ.

²⁵Ọ ka nwụ ọkpịlọ nya iya ọ-wụ́ abyị kọ ka gu ịwọ nyamwụ chị ọngọọwa u-ugbuurụ nya upwuriri bala ụkụchụ ọdụdụgba nya upwu riri bala ụchụụ ọdụdụgba nya upwuriri.

²⁶Ọọwa, ọngọkiliya-à ka chị ida ọwẹ ju ịlọmwụ ẹ-ẹpwụtụbwọ nya ụpụpịla lẹ,

²⁷ọ ka ya ụkụchụ ọhẹ nya upwuriri gu ida ọlẹpwụtụbwọ nyamwụ kọ ka nyoo pwáaa ugbabwọ irwiye ị-ịlahị nya Amkpaa lẹlẹ.

²⁸Ọ ka gu ida ọwẹ chị ugbuurụ nya upwuriri bala ụkụchụ ọdụdụgba nya upwuriri bala ụchụụ ọdụdụgba nya upwuriri jaabwọ kọ họ ịwọ nya ọkpịlọ okiliya ọ-wụ́ abyị.

²⁹Ọ ka ya ida ohihi ọlẹpwụtụbwọ nyamwụ tudu ọlẹng ọọwa e-egbeju. Ịịwẹ ọ ka bwu họ ọhọhọ nya ọcharị-charị ọlala nya ọngọọwa lẹlẹ.

³⁰Ó-ri enewulo lee ikiripete ká ụbwọ nya ọngọọwa-á pwụ myị lẹ, ọngọkiliya-à ka yaa kịla iya lẹlẹ.

³¹Ọhẹ ka ri nya iya ọ-hụ́ ọhọbịrị, ọkịla ka ri nya iya ọ-rụ ila ịlẹ kị ka kịla jula iya nya ajẹ nya ang-ẹrụ. Ịịwẹ ọngọkiliya-à ka bwu họ ọhọhọ nya ọcharị-charị ọlala nya ọngọọwa lẹlẹ.”

³²Ịwẹ à ri ehile chajị nya ọngọlẹ ká ẹdụrụ olugba nya ịnyịrọ jụ ká ụbwọ nyamwụ-ụ́ tị pwụ e-eji nya ang-abwọ ịlẹ wuu ịnọ kị kaa kpa kịla iya ọlụka nya ọhọhọ nya ọcharị-charị ọlala ka lẹ.

³³Amkpaa byi iMosisi bala Erọn yẹkẹẹ,

³⁴“Ịlẹ ri ehile ịlẹ kanụ ka kpa ụka kanụ pwụ ọpyị nya iKenan ọlẹ kam wẹẹ ka ya hanụ nya ang ọlala nyanụ kpá. Ụka ọọwa, ó-ri kam họ ká ebwubwu-ú da ba ẹpwa ọhẹ aalẹ,

³⁵ọngọ la ẹpwa ọọwa ka kele kaka ya je ọngọkiliya yẹkẹẹ, ‘M̀ yẹ ịngịhyẹ o-me ebwubwu lalẹẹ ẹ-ẹpwa nyam.’

³⁶Ụka ọọwa, ọngọkiliya ka ya nyị gba ang myị ang ịlẹpwang ọwẹ wuu kpehe ene kọ ka kele kaka wụlọọ yẹ chajị kọ ka wa ang ịlẹpwang ọọwa wuu nya ang i-ju ibyi kpịlọ ka. Ụka kị họ ịnyị kpá lẹ, ọ ka kele kaka wụla ẹpwang ọwẹ yẹ lẹlẹ.

³⁷Ó-ri kọ yẹ ká ugulọ ọlẹga ọọwa-á chị onyuukpuukpo lee ọnyọmịla kọ ri ugulọ jọọjọọ ka ẹpwụ aalẹ,

³⁸ọngọkiliya ka kpehe bwu ụwa kọ ka da ẹpwang ọwẹ chị jịra ẹnụtụrụ irwiye gbẹgbịlẹ.

³⁹Ẹnụtụrụ ọharwiye, ọ ka tịrẹkpẹ kaka wụla ẹpwang ọwẹ yẹ. Ó-ri ká ebwubwu ọọwa-á pyẹ tụ ugulọ da aalẹ,

⁴⁰ọ ka ya kị ka gba ajwọ ịlẹ kị yẹ ibyi ọwẹ u-uhye nyaa kị ka gyaa kpa kpehe hi epweji kaka chịịrụ ẹ-ẹga o-ju ibyi ọhẹ.

⁴¹Ọ ka ya kị ka pwọ ugulọ ọlẹpwụ nya ube ọwẹ kụrwọ-kụrwọ wuu, kị ka go ịpwọpwọ nyaa ju a-ang kpa kpehe hi epweji kaka hụrụ ẹ-ẹga o-ju ibyi ọhẹ.

⁴²Ụka kị họ ịnyị kpá lẹ, ị ya ajwọ ịkịla kwiwa nya ajwọ ịlẹ kị gba wẹ, kị du ugulọ nya ube ọwẹ onyeewe mẹ.

⁴³“Ó-ri ká ebwubwu ọọwa-á myịmyị hu kám ẹ-ẹpwang ọwẹ nyọlẹ kị gba ajwọ ịwẹ bala ọ-pwọ ugulọ nyamwụ bala o-du ugulọ nyamwụ kpá aalẹ,

⁴⁴ọngọkiliya ka kele kaka wụlọọ yẹ myịmyị. Ó-ri kọ pyẹ kịlahị aalẹ, ẹpwang ọwẹ ju ibyi, chajị ebwubwu o-ju ọmyịmyị ka-à wẹ lẹ.

⁴⁵Ị ka tụrụ ẹpwang ọọwa ju eji kị ka go ajwọ bala ekeji bala ene nya ugulọ nyamwụ wuu kpa kpehe hi epweji kaka hụrụ ẹ-ẹga o-ju ibyi ọhẹ.

⁴⁶“Ọ́ ba ọọwẹ ka, ó-ri ká ọngọhẹ-ẹ́ jụ ka ẹpwang ọwẹ lụka kị tọọ kụ lẹẹ aalẹ, ọngọọwa ka juwa libyi gbee da ka alobyi.

⁴⁷Ọngọngọhẹ kọ tị nọnọ lee o-ri ang u-ube ọwẹ ka hụ́ ang ịkụrụ-kụrụ nyamwụ.

⁴⁸“Ọ́ tị ri ká ọngọkiliya-á wụla ẹpwang ọọwa yẹ, ká ebwubwu ọwẹ-ẹ́ kpehe onyeewe nyọlẹ kị du ugulọ nyamwụ kpá ka aalẹ, ọ ka ya dodehe ya ẹpwang ọwẹ nyị la charị-charị, chajị ebwubwu ọọwa myị lẹ.

⁴⁹Ang ịlẹ kị ka kpa họ ọhọhọ nya ọcharị-charị ọlala nya ẹpwang ọọwa ri ịchịnụ imiiye bala ọwụ nya okoji nya isida bala ochiri ọnyọmịla bala uke nya okoji ihisọpụ.

⁵⁰Ọngọkiliya ka nwụ ọhẹ nya ịchịnụ ịwẹ u-uhye nya ẹchụ-ọpyị ọlẹ ká enyi onyeewe ji.

⁵¹Ọ ka hu ọwụ nya okoji isida bala ihisọpụ bala ochiri ọnyọmịla tụ ọchịnụ ọlahị-lahị ọwẹ kọ ka yaa ju ka ẹpwụ nya ịwọ nya ọchịnụ ọlẹ kị nwụ kọ juwa ẹ-ẹpwụ nya enyi onyeewe lẹ, ọ ka nyí ịwọ bala enyi ọwẹ hụ ẹpwang ọọwa ugbabwọ irwiye lẹlẹ.

⁵²Ịịwẹ ọ ka bwu kpa ịwọ nya ọchịnụ bala enyi onyeewe bala ọchịnụ ọlahị-lahị bala ọwụ nya isida bala ihisọpụ bala ochiri ọnyọmịla họ ká ẹpwang ọọwa ka la charị-charị lẹlẹ.

⁵³Ọọwa lẹ, kọ pẹhi ọchịnụ ọlahị-lahị kọ hụ rụ mẹ. Ịịwẹ ọngọkiliya-à ka bwu họ ọhọhọ nya ọcharị-charị ọlala nya ẹpwang ọọwa lẹ, ọ ka la charị-charị lẹlẹ.”

⁵⁴Ịwẹ à ri ehile chajị nya ẹdụrụ olugba nya ịnyịrọ lala

⁵⁵ẹbẹ lee ugbe lee iyi bala ịnya ebwubwu ọ-da ba ang ịkụrụ-kụrụ lee ẹpwang lẹ.

⁵⁶

⁵⁷Ehile ịwẹ ri ọ-ka kpa jẹ ụka ká ang ju ibyi bala ụka ká ang la charị-charị.