Read idege ALA ILIVAYỊ 15 Bible Online

ALA ILIVAYỊ 15 - idege bible

ALA ILIVAYỊ 15

¹Ọọwa, Amkpaa-à byi iMosisi bala Erọn yẹkẹẹ,

²“Anụ ya ehile ịlẹ je ala Isirẹlụ kanụ byaa yẹkẹẹ, ‘Ọlẹng ọhẹ-lọhẹ ká alẹng nyamwụ-ụ́ juwa nyà enyi aalẹ, enyi ọọwa ri ang-ibyi.

³Ó-riri ká enyi ọọwa-á juwa nyànya lụka ọọwa lee ọ-kpụba la ọnyànya wẹwẹ aalẹ, ọ ju ibyi.

⁴Ịbẹẹdị ọhẹ-lọhẹ ká ọlẹng ọọwa-á nọ lee ang ọnyị myị ọnyị kọ hụ ka ri ang-ibyi.

⁵Ọngọkịla ọhẹ-lọhẹ kọ ya ịnyịrọ gu ịbẹẹdị nya ọlẹng ọwẹ

⁶lee ọ-hụhụ o-okoji ọnyị myị ọnyị ká ọlẹng ọwẹ-ẹ́ hụ aalẹ, ọ ka hụ́ ịlọmwụ bala o-hyo enyi cheri-cheri. Ọ tị ka juwa libyi ọwẹ gbee da ka alobyi.

⁷“ ‘Ọngọkịla ọhẹ-lọhẹ kọ ya ịnyịrọ gu ọlẹng ọlẹ ká alẹng nyamwụ nyà enyi-ì wẹ kà hụ́ ang ịkụrụ-kụrụ nyamwụ bala ọ-ka hyo enyi cheri-cheri. Ọ tị ka juwa libyi ọwẹ gbee da ka alobyi.

⁸“ ‘Ó-ri ká ọlẹng ọlẹ ká alẹng nyamwụ nyà enyi-ì wẹ-ẹ́ chị ide hụ ọngọkịla ọhẹ ọlẹ kọ la charị-charị aalẹ, ọngọkịla ọọwa ka hụ́ ang ịkụrụ-kụrụ nyamwụ bala ọ-ka hyo enyi cheri-cheri. Ọ tị ka juwa libyi ọwẹ gbee da ka alobyi.

⁹“ ‘Ang myị ang ká ọlẹng ọlẹ ká alẹng nyamwụ nyà enyi-ì wẹ-ẹ́ hụhụ ka ri ang-ibyi.

¹⁰Ọngọkịla ọhẹ-lọhẹ kọ ya ịnyịrọ gu ang ọlẹ ká ọlẹng ọwẹ ya dahụhụ aalẹ, ọngọkịla ọọwa ka juwa libyi ọwẹ gbee da ka alobyi. Ọng myị ọng kọ hu ang ọdahụhụ ọlẹ ká ọlẹng ọwẹ hụ ka hụ́ ang ịkụrụ-kụrụ nyamwụ bala ọ-ka hyo enyi cheri-cheri. Ọ tị ka juwa libyi ọwẹ gbee da ka alobyi.

¹¹Ó-ri ká ọlẹng ọlẹ ká alẹng nyamwụ nyà enyi-ì wẹ-ẹ́ ya ịnyịrọ gu ọngọkịla la ọ-tọ abwọ ene ka aalẹ, ọngọkịla ọọwa ka hụ́ ang ịkụrụ-kụrụ nyamwụ bala ọ-ka hyo enyi cheri-cheri. Ọ tị ka juwa libyi ọwẹ gbee da ka alobyi.

¹²Ẹchụ-ọpyị ọhẹ-lọhẹ ká ọlẹng ọwẹ-ẹ́ ya ịnyịrọ gu aalẹ, ị ka boo ene. Ọ́ tị ri ẹja ọlẹ kị kpa okoji kọ kọ́ ya ịnyịrọ gu aalẹ, ị ka hu ẹja ọọwa hụ́.

¹³“ ‘Ụka ká ọlẹng ọọwa-á hagụ kpá, ọ ka hụ ẹnụtụrụ irwiye gbẹgbịlẹ. Ọọwa, ụka kọ hụ́ ang ịkụrụ-kụrụ nyamwụ bala o-hyo enyi onyeewe lẹ, ọ ka la charị-charị lẹlẹ.

¹⁴Ẹnụtụrụ ọhaneku, ọ ka kpa enewulo imiiye lee ẹchụ́ nya ikiripete imiiye kele ka ọnang nya Ọdụ Ọlịgọgọ kọ ka ya ha ọngọkiliya.

¹⁵Ọngọkiliya ka yaa kịla iya. Ọhẹ ka ri nya iya ọ-hụ́ ọhọbịrị, ọwụlẹ ka ri nya iya ọ-rụ ila. Ịịwẹ ọngọkiliya-à ka bwu họ ọhọhọ nya ọcharị-charị ọlala nya ọlẹng ọwẹ ị-ịlahị nya Amkpaa lẹ.

¹⁶“ ‘Ó-ri ká enyi nya ọlẹng-ńg da chịram aalẹ, ọlẹng ọọwa ka hyo enyi yẹẹyẹẹ. Ọ tị ka juwa libyi ọwẹ gbee da ka alobyi.

¹⁷Ị ka hụ́ apwụ lee ugba ọnyị myị ọnyị ká enyi ọọwa-á da hụ. Ang ọọwa tị ka juwa libyi ọwẹ da ka alobyi.

¹⁸Ụka ká ọlẹng bala ọnyang-ńg ka ẹga nya awụlẹ kpá, ịwa angị imimiiye ka hyo enyi. Ị tị ka juwa libyi nyaa ọwẹ gbee da ka alobyi.

¹⁹“ ‘Ụka ká ọnyang-ńg ji odehe, ọ ka ji iwe-ahụrụ nya odehe ojiji ọwẹ jịra ẹ-ẹnụtụrụ irwiye gbẹgbịlẹ. Ọngọngọhẹ kọ ya ịnyịrọ gu ọnyang ọọwa ka juwa libyi ọọwa gbee da ka alobyi.

²⁰“ ‘Ịngịngịhyẹ ọlẹ ká ọnyang ọwẹ-ẹ́ hụhụ lee ọ-nọnọ uhye nyamwụ lụka nya odehe ojiji nyamwụ ọwẹ ri ang-ibyi.

²¹Ọngọngọhẹ kọ ya ịnyịrọ gu ịbẹẹdị nya ọnyang ọwẹ kà hụ́ ang ịkụrụ-kụrụ nyamwụ bala o-hyo enyi cheri-cheri. Ọ tị ka juwa libyi ọwẹ gbee da ka alobyi.

²²Ọng myị ọng kọ ya ịnyịrọ gu ịngịngịhyẹ ọlẹ ká ọnyang ọwẹ ya dahụhụ kà hụ́ ang ịkụrụ-kụrụ nyamwụ bala o-hyo enyi cheri-cheri. Ọ tị ka juwa libyi ọwẹ gbee da ka alobyi

²³Ó-ri ịbẹẹdị ri lee okoji ká ọnyang ọwẹ-ẹ́ ya dahụhụ, ọngọ ya ịnyịrọ gwoo ka juwa libyi gbee da ka alobyi.

²⁴“ ‘Ó-ri ká ọlẹng ọhẹ-ẹ́ ka ẹga nya ọnyang ọwẹ lụka nya odehe ojiji nyamwụ aalẹ, ọ ka ri olibyi lala ọnyang ọwẹ. Ọ ka juwa libyi ọwẹ jịra ẹ-ẹnụtụrụ irwiye. Ịbẹẹdị ọnyị myị ọnyị kọ nọnọ ka ju ibyi.

²⁵“ ‘Ó-ri ká ọnyang-ńg hụ ịwọ lụka ododu ọlẹ kọ ri ụka nya odehe ojiji nyamwụ ka lee ọ-hụ ịwọ kpoye nya ụka nya odehe ojiji nyamwụ aalẹ, ọ ju ibyi. Jaabwọ myị abwọ ká ịwọ ọhụhụ ọwẹ-ẹ́ tata ka ba, ọ ri olibyi lụka ọọwa jaabwọ kọọ la lụka nya odehe ojiji nyamwụ.

²⁶Ịbẹẹdị ọnyị myị ọnyị kọ nọnọ lee okoji ọnyị myị ọnyị kọ hụhụ lụka ọwẹ aalẹ, ang ọọwa ju ibyi jaabwọ kọọ la lụka nya odehe ojiji nyamwụ.

²⁷Ọngọngọhẹ kọ ya ịnyịrọ gu ang ịwẹ aalẹ, ọngọọwa ka hụ ang ịkụrụ-kụrụ nyamwụ bala ọ-ka hyo enyi cheri-cheri. Ọ tị ka juwa libyi ọwẹ gbee da ka alobyi.

²⁸“ ‘Ụka ká ịwọ ọhụhụ nyamwụ-ụ́ chị kpá, ọ ka hụ ẹnụtụrụ irwiye gbẹgbịlẹ. Ọọwa, ọ ka la charị-charị lẹlẹ.

²⁹Ẹnụtụrụ ọhaneku, ọ ka kpa enewulo imiiye lee ẹchụ́ nya ikiripete imiiye kele kịla ọngọkiliya ọ-ọnang nya Ọdụ Ọlịgọgọ.

³⁰Ọngọkiliya ka ya ọhẹ nyaa kịla iya ọ-hụ́ ọhọbịrị. Ọ ka ya ọkịla kịla iya ọ-rụ ila. Ịịwẹ ọngọkiliya-à ka bwu họ ọhọhọ nya ọcharị-charị ọlala nya ọnyang ọwẹ lẹ.

³¹“ ‘Ịịwẹ anụ ka chị ala Isirẹlụ ịgọ lụka kị ji la ibyi chajị kị ka ju Ọdụ Ọlịgọgọ nyam ọlẹpwarịrị nya ịkampụ ibyi kaka lẹlẹ. Ó-ri kị jwoo ibyi aalẹ, ị ka gbu.’ ”

³²Ehile chajị nya ọlẹng ọlẹ ká alẹng nyamwụ nyà enyi bala ịnya ọlẹng ọlẹ ká enyi nya ịnyịrọ nyamwụ da chịram bala ịnya

³³ọnyang lụka nya odehe ojiji nyamwụ lee ọlẹng ọlẹ kọ ka ẹga nya ọnyang lụka ká ọnyang ọọwa ji la ibyi à wẹ lẹlẹ.