Read idege ALA ILIVAYỊ 16 Bible Online

ALA ILIVAYỊ 16 - idege bible

ALA ILIVAYỊ 16

¹Ụka ká anyị imiiye nya Erọn ịlẹ kị kpa ila ịlịgọgọ-ka ka ịlahị nya Amkpaa gbu kpá, Amkpaa ya ẹla ta iMosisi.

²Ọ byoo yẹkẹẹ, “Byi Erọn ọnyịnang mẹ, ụka opwoku kem ọ ka jụ kpoye nya apwụ okeke kele ka Ẹga Ọlịgọgọ Ọgụgụ lẹ, chajị ụwa m kaa chị ịlọm ehe ẹ-ẹpwụ nya egbamwụ u-uhye nya ẹchị nya ahyẹẹrwẹrwa ọlẹ kọ ri ọnụ nya Akpa nya Iro lẹ. Ó-ri kọ ju ihi nya ẹlẹwẹ ka aalẹ, ọ ka gbu.

³“Ene kọ ka jụ ka Ẹga Ọlịgọgọ Ọgụgụ wuu, ọ ka ya ụgba nya ẹna kịla iya ọ-hụ́ ọhọbịrị bala ọ-ya omilodo kịla iya ọ-rụ ila.

⁴Ọ ka hyo enyi bala ọ-ka gọ ang ịkụrụ-kụrụ nya ọngọkiliya kụrụ. Ang ịịwa ri ịbante bala awụrụ ogbileji bala apwụ ọkụrụ egbeju bala apwụ ọchọhị.

⁵Aluche nya Isirẹlụ wuu ka ya embiri imiiye họọ nya ang nya iya ọ-hụ́ ọhọbịrị bala omilodo ookpokpo nyọka ya kịla iya ọ-rụ ila.

⁶“Erọn ayịdang ka ya ẹna kịla iya ọ-hụ́ ọhọbịrị nya ịlọmwụ bala ịnya ugbiyegu nyamwụ.

⁷Ọọwa, ọ ka kpa embiri imiiye ịịwa kele ka ọnang nya Ọdụ Ọlịgọgọ nya Amkpaa lẹlẹ.

⁸Ọ ka da iwo ju embiri imiiye ịwẹ. Iwo ọhẹ ka ri nya Amkpaa. Ọkịla ka ri nya Asasẹlụ[7]

⁹Erọn ka wu ẹmwụ ọlẹ ká iwo chụ ha Amkpaa kọ ka ya kịla iya ọ-hụ́ ọhọbịrị.

¹⁰Ẹmwụ ọlẹ ká iwo chụ ha Asasẹlụ tị lẹ, ị ka kpọọ lahị-lahị wẹ Amkpaa ene kị ka kwoo rụ ka ugbileji kịla Asasẹlụ nyọka tụ ịhọbịrị nya aluche kịnyaa.

¹¹“Erọn ka ya ẹna kịla iya ọ-hụ́ ọhọbịrị nya ịlọmwụ bala ịnya ugbiyegu nyamwụ.

¹²Ọọwa, ọ ka chụ awụrụ-ila bwu ogidi myị ẹja nya ịtangare bala ọrụ nya ịtangare myị ẹpwụtụbwọ imiiye kpa ka ẹpwụ nya Ẹga Ọlịgọgọ Ọgụgụ lẹlẹ.

¹³Ọ ka ya ịtangare ọọwa guru ila ká ịmwụ onyinyi nyamwụ ka ke ẹchị nya ahyẹẹrwẹrwa ọlẹ kọ ri ọnụ nya Akpa nya Iro hi ịlọmwụ ẹ-ẹhị, chajị ó-ri kọ yọọ ọ ka gbu.

¹⁴Ọ ka chị ịwọ nya ẹna ọọwa kọ ka ya ụkụchụ jwoo bala o-nyoo pwáaa hụ ịlahị nya ẹchị ọlẹ kọ ri ọnụ nya Akpa nya Iro. Ọ ka nyoo hụ ịlahị nya Akpa nya Iro ayịdang ugbabwọ irwiye ịnyịnyị

¹⁵“Ang ọkịla ọlẹ kọ ka họ ri ọ-ka nwụ ẹmwụ ọlẹ kọ ri nya iya ọ-hụ́ ọhọbịrị nya alụma. Ọ ka kpa ịwọ nyamwụ ka ẹpwụ nya Ẹga Ọlịgọgọ Ọgụgụ kọ ka nyoo pwáaa hụ ọnụ nya Akpa nya Iro bala ịlahị nya Akpa nya Iro ayịdang jaabwọ to họ lịwọ nya ẹna.

¹⁶Ịịwẹ ọ ka bwu họ ọhọhọ ká Ẹga Ọlịgọgọ Ọgụgụ ka la charị-charị bwu ẹpwụ nya ibyi bala ịhọbịrị nya ala Isirẹlụ wuu lẹlẹ. Ọ ka họọ ịịwẹ ka ẹga ohihi nya Ọdụ nya Amkpaa wuu chajị ẹ-ẹpwarịrị nya ịkampụ nya ala Isirẹlụ ọ rịrị lẹ. Ịkampụ nyaa ayịdang tị ju ibyi.

¹⁷Ọngọngọhẹ-ẹ́ ka juwa ẹ-ẹpwụ nya Ọdụ nya Amkpaa bwu ụka ọlẹ ká Erọn ka jụ ka ẹpwụ nya Ẹga Ọlịgọgọ Ọgụgụ nyọka họ ọhọhọ nya ọcharị-charị ọwẹ ka gbee kọ ka kpehe bwu ụwa. Ụka kọ họ ọhọhọ nya ọcharị-charị wọnụ nya ịlọmwụ ju bala ugbiyegu nyamwụ tụ alụma kpá.

¹⁸“Ọ ka kpehe ka ẹga nya ogidi nya iya ọ-rụ ila kọ ka họ ọhọhọ nya ọcharị-charị ọlala nyamwụ. Ọ ka gu ịwọ nya ẹna bala ịnya ẹmwụ tudu ịpyịyẹ-pyịyẹ inine nya ogidi wuu.

¹⁹Ọ ka ya ụkụchụ ju ịwọ ọwẹ kọ ka nyoo pwáaa hụ ogidi ugbabwọ irwiye. Ịịwẹ ọ ka bwu họ ká ogidi ka la charị-charị bwu ẹpwụ nya ịhọbịrị nya ala Isirẹlụ, kọ ka chị ịgọgọ jwoo lẹlẹ.

²⁰“Ụka ká Erọn-ń họ ọhọhọ nya ọcharị-charị ọlala nya Ẹga Ọlịgọgọ Ọgụgụ bala ẹga ohihi nya Ọdụ Ọlịgọgọ tụ ogidi kpá, ọ ka kpa ẹmwụ ọlahị-lahị ọlẹ ká iwo chụ ha Asasẹlụ wẹ Amkpaa.

²¹Ọ ka ya abwiye-abwiye nyamwụ ba ẹmwụ ọwẹ e-egbeji kọ ka ya ịhọbịrị bala ang onyobyi bala egbeju-ọngịrị ọlala nya ala Isirẹlụ wuu dodehe u-uhye nya ẹmwụ ọwẹ. Bwula ọ-họ ịnyị, olo nya ịhọbịrị ịwẹ wuu ka ji uhye egbeju nya ẹmwụ ọwẹ. Ọọwa, ọlẹng ọhẹ ọlẹ kị chụ à ka kpa ẹmwụ ọwẹ rụ ka ugbileji lẹlẹ.

²²Ẹmwụ ọọwa ka kpa olo nya ịhọbịrị nya aluche rụ kele ka ẹga onweee ọhẹ u-ugbileji lẹ, ọngọọwa-à ka yoo da ụ-ụwa lẹlẹ.

²³“Ụka ká ọwẹ-ẹ́ myị kpá, Erọn ka kpehe wẹ ẹpwụ nya Ọdụ Ọlịgọgọ kọ ka pwọ ang ịkụrụ-kụrụ nya ọngọkiliya ịlẹ kọ kụrụ ene kọ lẹẹ ka ẹpwụ nya Ẹga Ọlịgọgọ Ọgụgụ guru ụ-ụwa.

²⁴Ọ ka hyo enyi ẹ-ẹga ọlịgọgọ ọhẹ kọ ka go ịwụrụ nya ịlọmwụ kụrụ. Ọọwa lẹ, kọ kpehe kaka kịla iya ọ-rụ ila nyọka hụ́ ọhọbịrị nya ịlọmwụ bala ịnya aluche mẹ.

²⁵Ọ ka jụ eyo nya iyo nya iya ọ-hụ́ ọhọbịrị ila ogidi.

²⁶“Ọlẹng ọlẹ kọ kpa ẹmwụ okpibyi ka ugbileji kaka yori da ha Asasẹlụ ka hụ́ ang ịkụrụ-kụrụ nyamwụ bala o-hyo enyi cheri-cheri ene kọ ka nyà we ịkampụ.

²⁷Ẹna bala ẹmwụ ịlẹ kị ya kịla iya ọ-hụ́ ọhọbịrị kị kpa ịwọ nyaa ka Ẹga Ọlịgọgọ Ọgụgụ kaka bịlẹ ọhịnyọhi tị lẹ, ị ka gyaa kpa kpehe hi ịkampụ kị ka chaa ila. Ị ka chị egba bala iyo bala ang-ẹpwụ nyaa ila.

²⁸Ọngọ kpụbwọ chaa ila ka hụ́ ịwụrụ nyamwụ cheri-cheri bala o-hyo enyi kpengkpeng ene kọ ka nyà wẹ ịkampụ.

²⁹“Ehile ọlẹ kanụ ka kpa pyịyọọ à lẹẹ lẹ. Ẹnụtụrụ iwo nya ọya ọharwiye, anụ ala Isirẹlụ wuu tụ angga ịlẹ kị kụ tanụ ka hụ limyi la ọ-họ ụkụrwọ ọhẹ-lọhẹ ka.

³⁰Ẹnụ ọọwa kpangga ị ka họ ọhọhọ nya ọcharị-charị ọlala nyọka hụ́ụnụ bwu ẹpwụ nya ịhọbịrị nyanụ wuu kanụ ka la charị-charị ẹ-ẹga nya Amkpaa lẹ.

³¹Ẹnụ ọọwa ka ri ẹnụ ọhịnyọ lụkụrwọ ọlịgọgọ. Anụ ka hụ limyi la ọ-họ ụkụrwọ ọhẹ-lọhẹ kpong-kpong ka. Anụ ka kpa ehile ọwẹ gbe oyi myị oyi.

³²Olegbeju okiliya ọlẹ kị yụbwọ nịrọ e-egbeju chị ịgọgọ ju nyọka ye iwe nya adamwụ ku à ka họ ọhọhọ nya ọcharị-charị ọlẹ lẹ. Ọ ka ya ang ịkụrụ-kụrụ nya ọngọkiliya kụrụ

³³kọ ka họ ọhọhọ nya ọcharị-charị ọlala nya Ẹga Ọlịgọgọ Ọgụgụ bala ẹga ịkịla nya Ọdụ Ọlịgọgọ bala ogidi bala angịkiliya bala uche nya ala Isirẹlụ wuu.

³⁴Ehile ịwẹ ri ịlẹ kanụ ka kpa gbe oyi myị oyi. Anụ ka họ ọhọhọ ọwẹ ụka ookpokpo ẹ-ẹpwụ nya ẹka ọnyị myị ọnyị nyọka họ ká ala Isirẹlụ ka la charị-charị bwu ẹpwụ nya ịhọbịrị nyaa wuu.” Ọọwa, iMosisi à họ jaabwọ ká Amkpaa dọọ ehile lẹlẹ.