Read idege ALA ILIVAYỊ 17 Bible Online

ALA ILIVAYỊ 17 - idege bible

ALA ILIVAYỊ 17

¹Ọọwa Amkpaa-à byi iMosisi yẹkẹẹ,

²“Ya ehile ịlẹ ha Erọn bala anyị nyamwụ bala ala Isirẹlụ wuu mẹ.

³‘Ó-ri ká ọngọngọhẹ nyanụ anụ ala Isirẹlụ-ụ́ nwụ ẹna lee ọkpịlọ lee embiri nyọka ya kịla iya ham, ká ọngọọwa-á tị nwọọ ẹ-ẹga ọkịla ọhẹ datị hi ọnang nya Ọdụ nyam am Amkpaa aalẹ, ị ka hu ọngọọwa lala ọngọ chị ịwọ chị eji. Ị ka be ọngọọwa deeji hi ẹpwụ nya alụma nyamwụ.

⁵Ehile ọlẹ ri ọ-ka họ ká ala Isirẹlụ ka kpa iyo okiliya nyaa ịlẹ kịị nwụ ene-ene odehe gbagbịla wẹ ẹga nya Amkpaa. Ị ka kpa wẹ ọngọkiliya ọ-ọnang nya Ọdụ Ọlịgọgọ kị ka ya kịla iya nya ọhọlawụlẹ.

⁶Ọngọkiliya ka ya ịwọ nya iyo okiliya yẹ hụ ịkịka ọnyị myị ọnyị nya ogidi ọlọnang nya Ọdụ Ọlịgọgọ. Ọọwa, ọ ka jụ eyo nyamwụ ila chajị kọ ka chị Amkpaa oru kwọkwọ lẹlẹ.

⁷Ọngọngọhẹ nya ala Isirẹlụ-ụ́ tụtụm ka nyẹẹkpẹ da Amkpaa juwa hu iya ọkịlaakịla nyamwụ kpa kịla ekpeku nya ịmwụ[8] kaka. Ị ka kpa ehile ọlẹ kpẹẹkpẹẹ gbe oyi myị oyi.’

⁸“Ọngọngọhẹ nyanụ anụ ala Isirẹlụ lee ọngga ọhẹ-lọhẹ kọ kụ ẹ-ẹpwụ nyanụ kọ kịla iya ọ-rụ ila lee ụma nya iya ọkịla

⁹ha Amkpaa ẹ-ẹgẹgẹhẹ kọ kpa wẹ ọnang nya Ọdụ Ọlịgọgọ ene ka aalẹ, ị ka be ọngọọwa deeji hi ẹpwụ nya angịnyị nya Ohe Oluhye.

¹⁰“ ‘Ọngọngọhẹ nyanụ anụ ala Isirẹlụ lee ọngga ọhẹ-lọhẹ kọ kụ tanụ kọ ri iyọ lịwọ-lịwọ aalẹ, m̀ ka nyẹẹkpẹ da ọngọọwa bala o-boo deeji hi ẹpwụ nya alụma nyamwụ.

¹¹Ẹ-ẹpwụ nya ịwọ ọhịhị nya ang ọdịhụ ọnyị myị ọnyị à ji lẹ. Ịwọ ọọwa m̄ ya hanụ nyọka ya hụ ogidi kọ ka tụ ịhọbịrị nyanụ kịnyaa lẹ. Ịwọ ọlẹ kọ ri ọhịhị wẹ̄ à kaa tụ ịhọbịrị nya kịnyaa lẹ.

¹²Ịnyị à tịtị du kam pwa ọngọngọhẹ nyanụ anụ ala Isirẹlụ lee ọngga ọlẹ kọ kụ ọ-ọpyị nyanụ ā ri iyo lịwọ-lịwọ ka lẹ.

¹³“ ‘Ó-ri ká ọngọngọhẹ nyanụ anụ ala Isirẹlụ lee ọngga ọlẹ kọ kụ ọ-ọpyị nyanụ-ụ́ ka urwe kọ nwụ iyo oleji lee ọchịnụ ọlẹ kọ la charị-charị aalẹ, ọngọọwa ka pá ịwọ nya iyo ọọwa hụrụ kọ ka tụ ịpyị kụrwọọ.

¹⁴Ọhịhị nya ang ọdịhụ ọnyị myị ọnyị wuu juwa ẹ-ẹpwụ nya ịwọ nyamwụ. Ịnyị à du kam pwa anụ ala Isirẹlụ ā ri iyo lịwọ-lịwọ ka bala ọ-byinu ya ọngọlẹ kọ họ ịnyị, ị ka boo deeji hi ẹpwụ nya alụma nyamwụ lẹ.

¹⁵“ ‘Ọngọngọhẹ nyanụ anụ ala Isirẹlụ lee ọngga kọ ri ogu nya iyo ọlẹ kọ gbu igu-adoohe lee ọlẹ ká iyo ịnyẹẹgẹga nwụ aalẹ, ọ ka hụ́ ang ịkụrụ-kụrụ nyamwụ bala o-hyo enyi cheri-cheri. Ọngọọwa tị ka juwa libyi ọwẹ gbee da ka alobyi ene kọ ka la charị-charị.

¹⁶Ọ́ tị ri kọ hụ́ ang ịkụrụ-kụrụ nyamwụ lee o-hyo enyi ka aalẹ, ọ ka yẹ akama chajị nya ọọwa.’ ”