Read idege ALA ILIVAYỊ 18 Bible Online

ALA ILIVAYỊ 18 - idege bible

ALA ILIVAYỊ 18

¹Ọọwa, Amkpaa-à byi iMosisi yẹkẹẹ,

²“Ya ẹla ta ala Isirẹlụ ká byaa yẹkẹẹ, ‘Am à ri Amkpaa Ohe Oluhye nyanụ lẹ.

³Ānụ ba abwẹla ọhọhọ nya ala Ijipiti ịlẹ kanụ kụ ọ-ọpyị nyaa ẹnẹhẹ lẹ lee ịnya ala iKenan ẹga kam wẹẹ kpanụ jẹ ka koo.

⁴Ánụ-ụ̀ ju ihi nya ehile nyam bala ọmẹjẹ nyam ịlẹ wuu kam wẹẹ ya hanụ mẹ. Am à ri Amkpaa Ohe Oluhye nyanụ lẹ,

⁵Anụ-ụ̀ ba ọhọhọ bala ehile ịlẹ kam ya hanụ-ụ̀ wẹ jẹ mẹ. Bwula ọọwa anụ ka hịhị lẹ. Am à ri Amkpaa lẹ.

⁶“ ‘Ọngọngọhẹ nyanụ ā doru kịla ọngọlẹ kọ bwu bala anụ koo. Am à ri Amkpaa lẹ.

⁷“ ‘Ā hu ẹpẹpẹ ju adang bwula ọ-kpa ịnang ka ube koo. Ịnang kpangga-à wẹ lẹ. Ā kpọọ ka ube ẹnẹnẹhẹ koo.

⁸“ ‘Ā doru kịla ahụ nya adang ka. Ọọwa ri ọ-ya ẹpẹpẹ ju adang.

⁹“ ‘Ā doru kịla ọnyịnang ọnyang lee ọnyadang ọnyang ọlẹ kaahụ bala ọwa nwa lawụlẹ ọdọda ookpokpo lee ọlẹ kị kpa nwa odehe ka.

¹⁰“ ‘Ā doru kịla ọnyị ọnyang nya ọnyị ọlẹng nyang lee ọnyị ọnyang nya ọnyị ọnyang nyang ka. Ọọwa ri ọ-ya ẹpẹpẹ ju ịlọng.

¹¹“ ‘Ā doru kịla ọnyị ọnyang ọlẹ ká ahụ nya adang ma ha adang ka, chajị ọnyịnang ọnyang à wẹ ịnyịnyị lẹ.

¹²“ ‘Ā doru kịla ọnyịnịna ọnyang nya adang lee ọnyịnịna ọnyang nya ịnang ka. Ọnyịnịna ọnyang nya adang lee ịnang ọ ri lẹ.

¹⁴“ ‘Ā ya ẹpẹpẹ ju ọnyịnịna ọlẹng nya adang bwula o-ji igu ta ahụ nyamwụ ka. Ọnyịnịna ọnyang nya adang à wẹ ịnyịnyị lẹ.

¹⁵“ ‘Ā doru kịla ọ́gọ̀ng ka. Ahụ nya ọnyị nyang ọ ri lẹ.

¹⁶“ ‘Ā doru kịla ahụ nya ọnyịnang ka. Ọọwa ri ọ-ya ẹpẹpẹ ju ọnyịnang.

¹⁷“ ‘Ó-ri ká doru kịla ọnyang lẹ aalẹ, ā tụtụm doru kịla ọnyị ọnyang nyamwụ lee ọnyị ọnyang nya ọnyị ọlẹng nyamwụ lee ọnyị ọnyang nya ọnyị ọnyang nyamwụ kaka. Angịwẹ ri angị bwu chiii balọọ. Ọhọhọ ọlịịwẹ ri ang onyobyi.

¹⁸“ ‘Ā ye ọnyịnịna nya ahụ nyang nya ahụ oheeye kpọọ kaka bá ụpwụ ta ahụ nyang lụka ká ahụ nyang juwa lọhịhị wẹ́ẹ̀ koo.

¹⁹“ ‘Ā doru kịla ọnyang lụka nya odehe ojiji nyamwụ ka, chajị ọ ji libyi lụka ọọwa.

²⁰“ ‘Ā doru kịla ahụ nya ọngịnyị ọọnang ọkịla ka. Ọlịnyị ka họ ká ka ri olibyi.

²¹“ ‘Ā ya ọngọngọhẹ nya anyị nyang ha kị ka ya kịla iya ju ila ha ojiga iMolẹkị koo. Ọọwa ka ya ẹpẹpẹ jum am Amkpaa Ohe Oluhye nyanụ.

²²“ ‘Alẹng-alẹng ā ka ẹga nya awụlẹ koo. Ọlịnyị ri ibyi.

²³“ ‘Ọlẹng lee ọnyang ọhẹ-lọhẹ bala iyo oleji ā ka ẹga nya awụlẹ koo. Ọgụ ọ-kpa ka hwahị ọwẹ ri ibyi.

²⁴“ ‘Ānụ ya ịlọnụ ju ibyi bwula abwẹla ịlịịwẹ koo, chajị ịịwẹ alụma ị-jẹ Ohe-ka ịlẹ kị kụ ẹgẹlẹ ene nyanụ, kam wẹẹ ku rụ hi ẹga da hanụ, à ya ịlaa ju ibyi ịwẹ lẹ.

²⁵Abwẹla nyaa họ ka ọpyị ju ibyi ịnyịnyị. Lẹ, m̀ yẹ ọpyị ọwẹ akama du ká ọpyị pwa angị kụ ụwa kụ.

²⁶Ị họ ang ịtịpyọ ịwẹ wuu kpa ibyi wẹ ọpyị ọlẹ. Anụ ala Isirẹlụ tị lẹ, ọng myị ọng nyanụ tụ angga ịlẹ kị kụ tanụ ka ju ihi nya ehile bala ọmẹjẹ nyam. Ānụ họ ang ịwẹ koo.

²⁸Ọ́ tị ri kanụ kpa ibyi wẹ ọpyị ọlẹ, ọpyị ọlẹ tịtị ka pwanụ jaabwọ kọ pwa angị kụ ụwa jene nyanụ.

²⁹“ ‘Ọngọngọhẹ kọ họ ọhẹ-lọhẹ nya ang ịtịpyọ ịwẹ aalẹ, ị ka boo deeji hi ẹpwụ nya alụma nyamwụ.

³⁰Ánụ-ụ̀ kpa ehile nyam ịwẹ mẹ. Ānụ ba abwẹla ọhọhọ nya angị kụ ọpyị ọwẹ jene nyanụ ka. Ānụ ya ịlọnụ ju ibyi bwula abwẹla nyaa ịwẹ koo. Am à ri Amkpaa Ohe Oluhye nyanụ lẹ.’ ”