Read idege ALA ILIVAYỊ 19 Bible Online

ALA ILIVAYỊ 19 - idege bible

ALA ILIVAYỊ 19

¹Amkpaa byi iMosisi yẹkẹẹ,

²“Ya ẹla ta aluche nya ala Isirẹlụ wuu yẹkẹẹ, ‘Anụ ka la ịgọgọ chajị am Amkpaa Ohe Oluhye nyanụ la ịgọgọ.

³“ ‘Anụ ju adanụ bala ịnanụ ihi, kanụ kpịtịya nya Ẹnụtụrụ Ọhịnyọ Lụkụrwọ nyam. Am à ri Amkpaa Ohe Oluhye nyanụ lẹ.

⁴“ ‘Ānụ jahị kpata him juwa gbịgba ha ijiga lee ọ-họ ekpeku nya oje-oje ha ịlọnụ koo. Am à ri Amkpaa Ohe Oluhye nyanụ lẹ.

⁵“ ‘Ụka kanụ ka ya iyo kịla iya nya ọhọlawụlẹ, ánụ-ụ̀ ba ọhọhọ nya iya ọọwa jẹ kpẹẹkpẹẹ chajị kam ka ye iya nyanụ ọọwa mẹ.

⁶Ẹnụ-ẹnụ ọlẹ kị kịla iya ọwẹ ānụ ka ya iyo nyamwụ ri lee ahị ọpyẹpyẹ ọọnamwụ lẹ. Ụpịlẹ nyamwụ ọhẹ-lọhẹ kọ hi da ka ẹnụtụrụ ọhata aalẹ, ị ka jwọọ ila hụrụ.

⁷Ó-ri kọ hi da ka ẹnụtụrụ ọhata lẹ aalẹ, ọ ju ibyi lẹ. Lẹẹlẹ, ó-ri ká ọngọhẹ-ẹ́ ri iyo ọwẹ aalẹ, ḿ ka ye iya ọọwa kaka.

⁸Ọngọlẹ kọ ri iyo ọọwa ka yẹ akama chajị nyọlẹ kọ hu ẹpẹ ju iya ọlẹ kị ya ham. Ị ka be ọngọọwa deeji hi ẹpwụ nya alụma nyamwụ.

⁹“ ‘Ụka nya ang-ẹrụ ọwụwụ nyanụ, ānụ wụ ajẹ nya ang-ẹrụ nyanụ wuu gwọka-gwọka ka, ānụ tị tịrẹkpẹ kaka dụmwọ nya ịlẹ kanụ pẹhi kaka.

¹⁰Ānụ hya alakọnụ ịlẹrụ nyanụ wuu kẹnị-kẹnị lee o-yile egbe nya ịlẹ kị wo cheeji ka. Anụ pẹhi ịịwa ha alẹbyahị bala angga. Am à ri Amkpaa Ohe Oluhye nyanụ lẹ.

¹¹“ ‘Ānụ yi oyi lee o-me ọnọọkịla lee ọ-họ awụlẹ ri ka.

¹²“ ‘Ānụ kpa ẹnyị nyam myị ọnụ ọnọọkịla u-uhye nya ịngịngịhyẹ ka. Ọọwa ri ọ-ya ẹpẹpẹ jum. Am à ri Amkpaa Ohe Oluhye nyanụ lẹ.

¹³“ ‘Ā họ ọngịnyị ehe ọọnang ri lee ọ-họọ agbụrụ ka. Ā wu uri nya ọlụkụrwọ nya ahyẹẹnụ ọlẹ ká diro kpa ụ-ụwa lodu gbe ụtụrụ koo.

¹⁴“ ‘Ā gọlọ ju ọlịla lee ọ-ya ang da ị-ịlahị nya olidu chajị kọ ka kịlata koo. Aa ju ihi nyam mẹ. Am à ri Amkpaa Ohe Oluhye nyang lẹ.

¹⁵“ ‘Aa ya ẹla nya ịlẹhị ụka ká ka chị eje nya ẹla. Ā chị oku oyoye ẹ-ẹga nya ọlẹbyahị lee ọlụdụ ka.

¹⁶“ ‘Ā ga kpa ọnọọkịla pyebile chajị nya ọngịnyị ehe ọọnang ka. Ā họ ibeenu-ọnọọkịla ọlẹ kọ ka ya eje nya igu wu ọngịnyị ehe ọọnang ka. Am à ri Amkpaa lẹ.

¹⁷“ ‘Ā kpa ẹla ẹ-ẹpwa jahị da ọnyịnang ka. Ya alibyi la ọngịnyị ọọnang chajị ká ka la abyị lala ọwa kaka mẹ.

¹⁸“ ‘Ā họ kwiwa lee ọ-kpa ẹla-ẹpwụ ẹ-ẹga nya ọngọhẹ nya alịnyanụ ka. Ma, ọngịnyị ọọnang ka hán̄g lala ịlọng. Am à ri Amkpaa lẹ.

¹⁹“ ‘Anụ ju ihi nya ehile nyam. Ānụ ya ụma nya iyo ịdatị hi awụlẹ dawụlẹ ka. Ānụ ya ụma nya ang-ẹrụ imiiye wu ẹ-ẹrụ ookpokpo ka. Ānụ tị kụrụ ang ọkụrụ-kụrụ ọlẹ kị kpa ụma nya iwu imiiye nụ ka.

²⁰“ ‘Ó-ri ká ọlẹng-ńg doru kịla ọnyọhị ọlẹ ká ọlẹng ọkịla juwa ya ẹla nyọka ye nya ahụ-ọnchẹ kọ tị nwụ uri nya ọnyọhị ọọwa kpụ ọ la ịlọmwụ ene lẹka aalẹ, ị ka yaa akama. Ị́ ka nwaa ka, ọnyang ọọwa ri ọnyọhị lụka ọwẹ wẹ́ẹ̀.

²¹Ọlẹng ọọwa ka kpa omilodo wẹ ọnang nya Ọdụ Ọlịgọgọ kị ka ya kịla iya ọ-wụ́ abyị ham am Amkpaa.

²²Ọngọkiliya ka kpa omilodo ọwẹ họ ọhọhọ nya ọcharị-charị nyọka tụ ọhọbịrị nya ọlẹng ọọwa kịnyaa. Ọọwa, Ohe Oluhye à ka hịnyọhi ọhọbịrị nyamwụ lẹlẹ.

²³“ ‘Ụka kanụ jụ ka ọpyị nya iKenan kanụ wu ẹrụ nya ekeji ị-nwụ egbe datị-datị, anụ ka hu egbe nyaa lala ang i-ju ibyi ẹ-ẹpwụ nya ẹka ịta nya ọgbanyẹ-ọgbanyẹ. Ánụ ka hyaa ri lụka ọọwa ka.

²⁴Ẹ-ẹpwụ nya ẹka ohene, anụ ka ya egbe nya ekeji ịịwa wuu ha ọhaha nya obe ojiji ham Amkpaa.

²⁵Ẹka ọharụ tị lẹ, anụ ka ri egbe nya ekeji ịlẹrụ nyanụ. Ánụ họ ịịwẹ lẹ, ang-ẹrụ nyanụ à ka pyebile kịlahị-ịlahị lẹlẹ. Am à ri Amkpaa Ohe Oluhye nyanụ lẹ.

²⁶“ ‘Ānụ ri ụma nya iyo ọhẹ-lọhẹ lịwọ-lịwọ ka. Ānụ yẹ ugono lee ọ-mwụ ịnwa ka.

²⁷“ ‘Ānụ pwọ egbii ịlábaà nyanụ lee ọ-pwọ ịchwọ lee

²⁸ọ-ba ịnyịrọ nyanụ ẹma nya ang-ẹjẹẹ nya ida ọbaba chajị nya ogu oleji koo. Am à ri Amkpaa lẹ.

²⁹“ ‘Ānụ ju anyị anyang nyanụ ẹpẹ bwula o-gyaa ju ụkụrwọ nya akpara ọhọhọ u-ube ịgọgọ ka. Ó-ri kanụ họ ịnyị, alọpyị ọlẹ ka jahị kpata da akpara ọhọhọ bala ọ-myị̀ la abwẹla onyobyi ọhọhọ.

³⁰“ ‘Ánụ-ụ̀ kpịtịya nya Ẹnụtụrụ Ọhịnyọ Lụkụrwọ nyam, kanụ chihi ju ẹga kịị gbịgba ham. Am à ri Amkpaa lẹ.

³¹“ ‘Ānụ ka ẹga nya ọlọmwụ lee ẹga nya angị kaa ya ẹla ta egu koo. Ọọwa ka họ kanụ ka ju ibyi. Am à ri Amkpaa Ohe Oluhye nyanụ lẹ.

³²“ ‘Ánụ-ụ̀ hirikpẹẹ ha angịgbahị, kanụ jwaa ihi. Ánụ-ụ̀ jum am Ohe Oluhye nyanụ ihi. Am à ri Amkpaa lẹ.

³³“ ‘Ānụ kpa ọngga ọhẹ-lọhẹ ọlẹ kọ kụ tanụ lụbwọ onyobyi ka.

³⁴Anụ kpọọ kini-kini jaabwọ kanụ kaa kpa ala Isirẹlụ aananụ, kọ haanụ lala ịlọnụ. Anụ tị́ kpịtịya kaanụ ayịdang ri angga ọ-ọpyị nya Ijipiti ẹnẹhẹ lẹ̀. Am à ri Amkpaa Ohe Oluhye nyanụ lẹ.

³⁵“ ‘Ānụ họ ọngịnyị ri bwula ọ-kpa ang ọ-jẹ ẹla me ịngịngịhyẹ ha ọngịnyị ka.

³⁶Anụ kpa ang i-me ang ịlahịchịng me ang ha angịnyị. Am à ri Amkpaa Ohe Oluhye nyanụ ọlẹ kam gbanụ kpehe bwu ọpyị nya Ijipiti lẹ.

³⁷“ ‘Ánụ-ụ̀ ju ehile nyam wuu ihi bala ọ-ba ọmẹjẹ nyam jẹ mẹ. Am à ri Amkpaa lẹ.’ ”