Read idege ALA ILIVAYỊ 2 Bible Online

ALA ILIVAYỊ 2 - idege bible

ALA ILIVAYỊ 2

¹“ ‘Ụka ká ọngọhẹ-ẹ́ ka kịla iya nya ajẹ nya ang-ẹrụ ha Amkpaa aalẹ, ọ ka gò ajẹ nya ang-ẹrụ ịịwa kpọrụ pwụrẹ-pwụrẹ wuu ene. Ọ ka gu ida nya olivu jwoo bala ọ-ya ịtangare hwọọ u-uhye.

²Ọọwa lẹ, kọ kpa wẹ angịkiliya anyị alẹng nya Erọn mẹ. Ọngọkiliya ka chụ ọrụ nya ajẹ nya ang ọwẹ lida-lida bala ịtangare ọlụwa myị ẹpwụtụbwọ. Ọọwa, ọ ka jwọọ ila nya ọnụ-odo wọnụ nya ohihi ju u-uhye nya ogidi ha Amkpaa lẹlẹ. Ọwẹ à ri iya ọ-rụ ila lẹ. Iya ọwẹ kaa chị Amkpaa oru kwọkwọ.

³Ohihi nya ang okiliya ọwẹ ri nya Erọn bala anyị nyamwụ anyị kị ri angịkiliya. Ọọwa ri ebwo ọlịgọgọ ọgụgụ o-bwu ẹpwụ nya iya ọlẹ kị kịla ha Amkpaa.

⁴“ ‘Ó tị ri ịkaa ọlẹ kị họ i-ila kanụ ka hu ha aalẹ, ị ka họ ịkaa ọọwa la ọ-ya ang ọ-mịrị ịkaa jwoo ka. Ịkaa ọmịrịị-mịrị ka ọọwa ka ri ọlẹ kị ya ida nya olivu ju ọrụ nya ang ọlẹ kị kpa họọ lee ọ ka ri ịkama ịlẹ kị gu ida tudu.

⁵“ ‘Ó-ri ká ọhaha nyanụ-ụ́ tị ri ịkaa ọlẹ kịị họ u-udiyo ọ-kpa họ ịkịra aalẹ, ọrụ nya nya ajẹ nya ang-ẹrụ ọlẹ kị ya ida ju, la ọ-ya ang ọ-mịrị ịkaa jwoo ka anụ ka kpa lẹ.

⁶Anụ-ụ̀ bwu ịkaa ọọwa hwẹ́ẹ̀hwẹẹ kanụ ya ida hwọọ mẹ. Ọwẹ à ri iya nya ajẹ nya ang-ẹrụ ọkịlaakịla lẹlẹ.

⁷“ ‘Ó-ri ká ọhaha nyanụ-ụ́ tị ri ịkaa ọlẹ kị họ ẹ-ẹchụ aalẹ, ọrụ nya ajẹ nya ang-ẹrụ bala ida ị ka kpa họọ lẹ.

⁸Anụ-ụ̀ hu iya nya ang-ẹrụ ọọwa kpa wẹ Amkpaa kanụ ya ju ọngọkiliya ụ-ụbwọ mẹ. Ọọwa, ọ ka kpa ka ẹga nya ogidi lẹlẹ.

⁹Ọngọkiliya ka bwu ang nya iya ọwẹ jẹẹrịị kọ ka jwọọ ila nya ọnụ-odo wọnụ nya ohihi ju u-uhye nya ogidi ha Amkpaa. Ọwẹ à ri iya ọ-rụ ila lẹlẹ. Iya ọwẹ kaa chị Amkpaa oru kwọkwọ.

¹⁰Ohihi nya ang okiliya ọwẹ ri nya Erọn bala anyị nyamwụ anyị kị ri angịkiliya. Ọọwa ri ebwo ọlịgọgọ o-bwu ẹpwụ nya iya ọlẹ kị kịla ha Amkpaa.

¹¹“ ‘Ānụ ya ang ọ-mịrị ịkaa ju iya nya ajẹ nya ang-ẹrụ ịlẹ kanụ ka kpa wẹ Amkpaa koo. Ānụ kpa ang ọ-mịrị ịkaa lee inwa kịla iya ha Amkpaa kpong-kpong koo.

¹²Ma, anụ ka kpa ang ịwẹ wẹ Amkpaa nya ọhaha nya egbe nya ọgbanyẹ myị. Ị́ tị ka jwaa ila u-uhye nya ogidi nya iya ochoru kwọkwọ ka.

¹³Anụ ka ya ịma ju iya nya ajẹ nya ang-ẹrụ nyanụ ọnyị myị ọnyị. Ịma-à ri ang-ẹjẹẹ nya iro ọlẹ kanụ nwa bala Ohe Oluhye lẹ. Lẹẹlẹ, anụ-ụ̀ ya ịma ju iya nyanụ ọnyị myị ọnyị mẹ.

¹⁴“ ‘Ó-ri ká iya nya ajẹ nya ang-ẹrụ ịlẹ kanụ ka kịla ha Amkpaa-á bwu ẹpwụ nya egbe nya ọgbanyẹ aalẹ, ajẹ inyeewe ịlẹ kị rú kpá lee ọ-hya i-ila anụ ka kpa lẹ.

¹⁵Anụ-ụ̀ gu ida jwoo bala ọ-ya ịtangare hwọọ u-uhye.

¹⁶Ọọwa, ọngọkiliya-à ka jụ ebwo nya ang okiliya ọwẹ ila nya ọnụ-odo wọnụ nya ohihi ju tụ ịtangare ọọwa wuu u-uhye nya ogidi nya iya o-ru ila ha Amkpaa lẹlẹ.”