Read idege ALA ILIVAYỊ 20 Bible Online

ALA ILIVAYỊ 20 - idege bible

ALA ILIVAYỊ 20

¹Ọọwa Amkpaa-à byi iMosisi yẹkẹẹ,

²“Ya je ala Isirẹlụ yẹkẹẹ, ‘Ọngọngọhẹ nyanụ lee ọngga ọlẹ kọ kụ tanụ kọ ya ọnyị nyamwụ ha nyọka kpụ eteji ha ojiga ịMọlẹkị aalẹ, aluche wuu ka da ajwọ nwụ ọngọọwa.

³M̀ ka nyẹẹkpẹ da ọngọọwa bala o-boo deeji hi ẹpwụ nya alụma nyamwụ chajị ọ họ ká Ọdụ Ọlịgọgọ nyam ju ibyi bala ọ ya ẹpẹpẹ ju ẹnyị ọlịgọgọ nyam bwula ọ-ya anyị nyamwụ ha ojiga ịMọlẹkị.

⁴Ọ́ tị ri ká aluche-é yahị chọka hi ọngọọwa, kị myị nwọọ ka aalẹ,

⁵m̀ ka nyẹẹkpẹ da ọlẹng ọọwa bala alugbiyegu nyamwụ wuu tụ angịlẹ wuu kị myị jwoo ẹ-ẹpwụ nya ịgba ọgbagba ha ịMọlẹkị. M̀ ka be angịwẹ wuu deeji hi ẹpwụ nya angịnyị nyam.

⁶“ ‘Ọngọngọhẹ kọ ka ọlọmwụ ka ẹga nya angị kaa ya ẹla ta egu aalẹ, m̀ ka nyẹẹkpẹ dọọ bala ọ-ka be ọngọọwa deeji hi ẹpwụ nya alụma nyamwụ.

⁷“ ‘Anụ hu ịlọnụ ham, kanụ la ịgọgọ chajị am à ri Amkpaa Ohe Oluhye nyanụ lẹ.

⁸Anụ ju ihi nya ehile nyam. Am à ri Amkpaa ọlẹ kam chịnụ ịgọ ha ịlọm lẹ.

⁹“ ‘Ọngọngọhẹ kọ gọlọ ju adamwụ lee ịnamwụ aalẹ, ị ka nwụ ọngọọwa. Ọwa-à ju ọmwụ-igu nya ịlọmwụ lẹ.

¹⁰“ ‘Ó-ri ká ọngọhẹ nyanụ-ụ́ họ ụya ta ahụ nya ọngọkịla ọlẹ kọ ri ọla Isirẹlụ ọọnamwụ aalẹ, ị ka nwụ ọlẹng ọọwa bala ọnyang ọọwa.

¹¹“ ‘Ọngọngọhẹ kọ doru kịla ahụ nya adamwụ aalẹ, ọ ya ẹpẹpẹ ju adamwụ. Ị ka nwụ ọlẹng ọọwa bala ahụ nya adamwụ ọwẹ. Ịwa-à ju ọmwụ-igu nya ịlaa lẹ.

¹²“ ‘Ó-ri ká ọlẹng-ńg doru kịla ọ́gọ̀ọ aalẹ, ị ka nwaa ịwa angị imimiiye. Ẹbyị à wẹ kị jẹ ta awụlẹ lẹ. Ịwa-à ju ọmwụ-igu nya ịlaa lẹ.

¹³“ ‘Ó-ri ká ọlẹng-ńg ka ẹga nya ọlẹng-ọlẹng ọkịla lala ọnyang nyaa ri aalẹ, ị họ ẹla-ibyi. Ị ka nwaa ịwa angị imimiiye. Ịwa-à ju ọmwụ-igu nya ịlaa lẹ.

¹⁴“ ‘Ó-ri ká ọlẹng-ńg ye ọnyị bala ịnamwụ nya ịhụ nyamwụ aalẹ, ang onyobyi à wẹ kị họ lẹ. Ị ka chaa ịwa angị ịtịta ila chajị ká ang onyobyi ọlịịwẹ-ẹ́ ka kịnyaa ẹ-ẹpwarịrị nyanụ ka.

¹⁵“ ‘Ó-ri ká ọlẹng-ńg ka ẹga nya iyo oleji aalẹ, ị ka nwụ ọlẹng ọọwa nwụ, ị tịtị ka nwụ iyo ọọwa nwụ ịnyịnyị.

¹⁶“ ‘Ó-ri ká ọnyang-ńg maga kọọwa bala iyo oleji ka ka ẹga nya awụlẹ aalẹ, ị ka nwụ ọnyang ọọwa bala iyo oleji ịnyịnyị. Ịwa-à ju ọmwụ-igu nya ịlaa lẹ.

¹⁷“ ‘Ó-ri ká ọlẹng-ńg ya ọnyịnamwụ lee ọnyadamwụ ọnyang ye kpụ kị ka ẹga nya awụlẹ aalẹ, ẹla oloyoyi à wẹ kị họ lẹ. Ị ka chị oyoyi jwaa u-ugbọdọda bala o-baa deeji hi ẹpwụ nya alụma nyaa. Ọlẹng ọwẹ ka yẹ akama chajị nya ang onyobyi ọlẹ kọ họ.

¹⁸“ ‘Ó-ri ka ọlẹng-ńg doru kịla ọnyang lụka nya odehe ojiji nyamwụ aalẹ, ị ka be angị imimiiye ịwẹ deeji hi ẹpwụ nya alụma nyaa chajị ị họ ẹla-ibyi.

¹⁹“ ‘Ọngọngọhẹ ā doru kịla ọnyịnịna ọnyang nya adamwụ lee ịnya ịnamwụ koo. Ọọwa ri ẹbyị ọjẹjẹ. Ọlẹng bala ọnyang ịlẹ kị họ ịnyị ka yẹ akama chajị nya ọọwa.

²⁰“ ‘Ó-ri ká ọlẹng-ńg doru kịla ahụ nya ọnyịnịna nya adamwụ aalẹ, ọ ya ẹpẹpẹ ju ọnyịnịna nya adamwụ ọọwa. Ọlẹng ọọwa bala ọnyang ọọwa ka yẹ akama chajị nya ọọwa. Ị́ ka ma ọnyị ka.

²¹“ ‘Ó-ri ká ọlẹng-ńg ya ahụ nya ọnyịnamwụ ye aalẹ, ẹla-ibyi à wẹ lẹ. Ọ ya ẹpẹpẹ ju ọnyịnamwụ. Ọwa bala ọnyang ọọwa-á ka ma ọnyị ka.

²²“ ‘Anụ ka ju ihi nya ehile bala ọmẹjẹ nyam wuu kpẹẹkpẹẹ chajị ká ọpyị nya iKenan ọlẹ kam wẹẹ kpanụ ka-á ka pwanụ ka.

²³Ānụ ba ọhọhọ nya alọpyị ịlẹ kam wẹẹ ku rụ hi iwe hanụ jẹ koo. Ị họ ang inyibyi lụmẹ du kịịwa ayịdang wụm ẹjẹ.

²⁴Anụ tị lẹ, m̀ myị ọnụ nya ọpyị o-ju eyo bala ọ-há ang hiigu-hiigu ọwẹ hanụ nya ang ọlala nyanụ lẹ. Am à ri Amkpaa Ohe Oluhye nyanụ ọlẹ kam chịnụ ebwo hi alepwoja ịkịla lẹ.

²⁵“ ‘Lẹẹlẹ, ànụ ka họ ká ọdatị ka ji ẹpwarịrị nya iyo bala ịchịnụ ịcharị-charị bala ịlẹ kị ju ibyi. Ānụ ya ịlọnụ ju ibyi bwula o-ri iyo ọhẹ-lọhẹ ọlẹ kam hu nya iyo o-ju ibyi ẹ-ẹga nyanụ koo.

²⁶Anụ ka la ịgọgọ ham chajị am Amkpaa la ịgọgọ. M̀ chịnụ ebwo hi alepwoja ịkịla chajị kanụ ka ri ịnyam.

²⁷“ ‘Ọlẹng lee ọnyang ọhẹ-lọhẹ kọ ka wo ẹla bwu ẹga nya egu aalẹ, ị ka da ajwọ nwụ ọngọọwa. Ọwa-à ju ọmwụ-igu nya ịlọmwụ lẹ.’ ”