Read idege ALA ILIVAYỊ 21 Bible Online

ALA ILIVAYỊ 21 - idege bible

ALA ILIVAYỊ 21

¹Ọọwa, Amkpaa-à byi iMosisi yẹkẹẹ, “Aa byi angịkiliya anyị nya Erọn mẹ, ‘Ọngọngọhẹ nyaa ā ya ịlọmwụ ju ibyi bwula ọhọhọ ọlẹpwụ nya ida ụka ká ọọnaa-á gbu koo

²kẹnẹ-kẹnẹ ogu ọọwa-á ri nya ọngọ bọọ i-iyo chii lala ịnamwụ lee adamwụ lee ọnyị nyamwụ ọnyang lee ọlẹng lee

³ọnyịnamwụ ọnyang ọ-rwọ ọrụ lẹka ọlẹ kọ kụ ẹ-ẹpwa nyamwụ lẹ mẹ ịnyị.

⁴Ọ ya ju ibyi bwula ọhọhọ ọlẹpwụ nya ida nya angị ya ahụ họọ ye koo.

⁵Ọngọkiliya ọhẹ-lọhẹ ā pwọ inyi lee ọ-chị ịchwọ nyamwụ eku ọ-kpa ang gu ịnyịrọ nyamwụ ịna nya ang-ẹjẹẹ nya ida ọbaba koo.

⁶Ị ka la ịgọgọ ham am Ohe Oluhye nyaa la o-ju ẹnyị nyam ẹpẹ ka. Ịwa-à kaa kịla iya nya ang oriri ham lẹ. Ịnyị à du kị ka la ịgọgọ lẹ.

⁷Ị́ ka ye anyang ị-ya ịlaa ju ibyi bwula akpara ọhọhọ lee ọ-rụ ọpwapwa nya ịhụ nyaa ka. Angịkiliya la ịgọgọ.

⁸Anụ ka hwaa nya angị la ịgọgọ, chajị ịwa-à kaa kịla iya nya ang oriri ham am Ohe Oluhye nyanụ lẹ. Am à ri Amkpaa lẹ. M̀ la ịgọgọ, am à chị angịnyị nyam ịgọ ha ịlọm lẹ.

⁹“ ‘Ó-ri ká ọnyị ọnyang nya ọngọkiliya-á ya ịlọmwụ ju ibyi bwula ọ-họ akpara aalẹ, ọ ju adamwụ ẹpẹ. Ị ka chọọ ila.

¹⁰“ ‘Olegbeju okiliya tị lẹ, ị̄ yụbwọ nịrọọ e-egbeju bala ọ-chọọ ịgọgọ kọ ka kụrụ ịwụrụ nya ọngọkịla lẹ. Lẹẹlẹ, ọ́ ka pẹhi inyi nyamwụ dachị-dachị lee o-gu ịwụrụ nyamwụ ene nya ang-ẹjẹẹ nya owuru ọkpakpa ka.

¹¹Ọ́ ka jụ ka ẹpwang ọlẹ kị ya ogu nọ ka, ọ́-ri adamwụ lee ịnamwụ wẹwẹ. Ó-ri kọ họ ịnyị aalẹ, ọ ya ịlomwụ ju ibyi lẹ.

¹²Ọ́ ka kpa ibyi wẹ uhye nya Ọdụ Ọlịgọgọ bwula o-kpehe bwu ụwa ọọ-lajị nyọka ka ejida ka, chajị ọ ri ọngọlẹ kị chị ịgọgọ ju ham am Ohe Oluhye. Am à ri Amkpaa lẹ.

¹³“ ‘Onjwo ịyang kẹnẹ-kẹnẹ olegbeju okiliya-à ka ye lẹ.

¹⁴Ọ́ ka ye ahụ-ogu lee ọngọ pwa ọrụ lee ọlakpara ka. Onjwo ịyang ọlẹ kọ bwu imwawụ nyamwụ kẹnẹ-kẹnẹ ọ-ka ye lẹ.

¹⁵Ó-ri ịnyị ka aalẹ, anyị nyamwụ ka ri angị ju ibyi ẹ-ẹpwụ nya alimwawụ nyamwụ. À tị́ jẹ lẹ, am à ri Amkpaa lẹ. Am à chọọ ịgọ ha ịlọm lẹ.’ ”

¹⁶Ọọwa, Amkpaa-à byi iMosisi yẹkẹẹ,

¹⁷“Aa ya je Erọn ịịlẹ mẹ, ‘Ọlẹ ri ehile ọpyịyọọ ọlẹ kị ka kpa. Ọngọngọhẹ nya anyị ịtụma nyamwụ ọlẹ ká ehe-é họ-ọ́ ka myị ẹrụ ham lala ọngọkiliya ẹnẹnẹhẹ ka.

¹⁸Ọngọngọhẹ ká ehe-é họọ kọ ri olidu lee okuku lee o-ju ẹjẹẹ a-ahị lee ẹta nyamwụ ọhẹ ọ-la nwẹnwụrẹ gụ ọkịla lee

¹⁹ang ọ-họọ ẹ-ẹta lee ụbwọ-ọ́ ka kịla iya ka.

²⁰Ó-ri kọ kpụ igu lee o-ri ohedabya lee ang ọ-họọ ẹ-ẹhị lee ọ-la ẹdụrụ olugba nya ịnyịrọ lee ọ ri ọngọlẹ ká ajẹ nya igbipyị nyamwụ bene aalẹ, ọ́ ka kịla iya ka ịnyịnyị.

²¹Ọngọngọhẹ ọlẹ ká ehe họ ịịwẹ-ẹ́ ka myị ẹrụ ham Amkpaa lala ọngọkiliya kpụ ọ ka kịla iya ham ka.

²²Ọngọọwa tị ka ri ang oriri ọlịgọgọ tụ ọlịgọgọ gụ wuu ịlẹ kị ya kịla iya ham myị.

²³Ọọ-lajị nya ehe ọ-họọ họ tị lẹ, ọ́ ka jẹ ju apwụ okeke ọlịgọgọ chwẹẹ lee ọ-jẹ tụ ba ogidi ka. Ọ́ ka kpa ibyi wẹ uhye nya ang ịlịgọgọ ịwẹ ka. Am à ri Amkpaa ọlẹ kam chị angịkiliya ịgọ ha ịlọm lẹ.’ ”

²⁴Ẹla ịlẹ ká iMosisi ya jẹ Erọn bala anyị nya Erọn bala ala Isirẹlụ wuu à wẹ lẹlẹ.