Read idege ALA ILIVAYỊ 22 Bible Online

ALA ILIVAYỊ 22 - idege bible

ALA ILIVAYỊ 22

¹Ọọwa, Amkpaa-à byi iMosisi yẹkẹẹ,

²“Byi Erọn bala anyị nyamwụ kị kpihi ju ang ịlịgọgọ ịlẹ ká ala Isirẹlụ kaa kpa warị kaka ha ọhaha ham. Ị́ ka kpa oyoyi ka ju ẹnyị nyam ka. Am à ri Amkpaa lẹ.

³Ó-ri ká ọnyị ọtụma nyanụ ọhẹ-ẹ́ juwa libyi kọ tị jẹ tụ ka ẹga nya ang ịlịgọgọ ịlẹ ká ala Isirẹlụ ya ha ọhaha ham aalẹ, ọngọọwa-á ka kịla iya ẹnẹnẹhẹ gụ ọwẹ kaka. Ehile ọwẹ ri ọlẹ kanụ ka kpa pyịyọọ. Am à ri Amkpaa lẹ.

⁴“ ‘Ọngọngọhẹ ẹ-ẹpwụ nya anyị ịtụma nya Erọn kọ la ẹdụrụ olugba nya ịnyịrọ-ọ́ jụ lee ká alẹng nyamwụ-ụ́ juwa nyà enyi aalẹ, ọngọọwa-á ka ri ang nya iya ịlịgọgọ ka gbee da ka ụka kọ la charị-charị. Ọ ka juwa libyi ịnyịnyị ó-ri kọ ya ịnyịrọ gu ịngịngịhyẹ ọlẹ kọ ju ibyi bwula ang ọọwa ọ-ya ịnyịrọ gu ogu lee gu ọngọlẹ ká enyi nya ịnyịrọ nyamwụ da chịram

⁵lee ọ-ya ịnyịrọ gu ang ọwụlọọ-wụlọ lee ọngịnyị ehe ọlẹ kọ du ká ọngọọwa ju ibyi.

⁶Ọngọkiliya ọhẹ-lọhẹ kọ ri olibyi ka juwa libyi ọọwa gbee da ka alobyi. Ọ́ ka ri ang nya iya ịlịgọgọ ka gbee kọ ka hyo enyi ene.

⁷Ụka ká ẹnụ-ụ́ byi kpá lẹ, ọ ka ri ang nya iya ịlịgọgọ ịlẹ kị ri ang oriri nya angịkiliya lẹlẹ.

⁸Ọ́ ka ri ogu nya iyo ọhẹ-lọhẹ kọ gbu igu-adoohe lee ọlẹ ká iyo ịnyẹẹgẹga nwụ ka. Ọọwa ka du kọ ka ri olibyi. Am à ri Amkpaa lẹ.

⁹“ ‘Angịkiliya wuu ka kpa ehile ịlẹ kam ya haa-à wẹ kpẹẹkpẹẹ. Ó-ri kị họ ịnyị ka, ị ka la abyị, ị ka gbu chajị nyọlẹ kị ju ehile ịịwa ẹpẹ. Am à ri Amkpaa ọlẹ kam chaa ịgọ ha ịlọm lẹ.

¹⁰“ ‘Ọngọ ri alugbiyegu nya angịkiliya kẹnẹ-kẹnẹ à ka ri ang nya iya ịlịgọgọ lẹ. Ọngọkịla ọhẹ-lọhẹ-ẹ́ ka ka ri ka, ó-riri ká ọngọọwa hụ ta ọngọkiliya lee o-ri ọlụkụrwọ ọlẹ kọ diroo-diro.

¹¹Ọnyọhị ọlẹ ká ọngọkiliya ra lokpoko nya ịlọmwụ lee ọlẹ kị ma ẹ-ẹpwa nyamwụ tị ka ri ang iya ịlịgọgọ ịlẹ kị kaa ya ha ọngọkiliya ọọwa myị.

¹²Ó-ri ká ọnyị ọnyang nya ọngọkiliya-á rụrwọ ọngọlẹ kọ ri ọngọkiliya ka aalẹ, ọnyị ọnyang ọọwa-á ka ri ang nya iya ịlịgọgọ ka.

¹³Ọ́ tị ri ká ọnyị ọnyang nya ọngọkiliya-á ri ahụ-ogu lee pwa ọrụ kọ ma anyị ka, kọ nyà kaka chụgba ẹ-ẹpwa adamwụ lala ọnyị ọlata nya adamwụ aalẹ, ọ ka ri ang nya iya nya Amkpaa ịlẹ kị kaa ya ha adamwụ. Angị ri alugbiyegu nya angịkiliya kẹnẹ-kẹnẹ à ka ri ang ịwẹ lẹlẹ.

¹⁴“ ‘Ó-ri ká ọngọ ri alugbiyegu nya angịkiliya-ka á ri ang nya iya lọjẹjẹ-ka aalẹ, ọ-ka nwụ uri nya ang oriri ọọwa lẹpwụ-lẹpwụ tịrẹkpẹ ha ọngọkiliya ọọwa bala ọ-ka ya ebwo ookpokpo ẹ-ẹpwụ nya ịrụ haju ba uri ọlẹ kọ nwụ u-uhye.

¹⁵Angịkiliya-á ka ya ẹpẹ ju ang ịlịgọgọ ịlẹ ká ala Isirẹlụ wẹẹ ya ha Amkpaa

¹⁶bwula ọ-ya ẹga da ha angị pwoku-ka nyọka ri ang ịwẹ ka. Ó-ri ịnyị ka, ị ka la abyị ọlẹ kọ kpa akama ọyẹyẹ wẹ uhye nya ọngọ lịnyị. Am à ri Amkpaa ọlẹ kam chị angịkiliya ịgọ ha ịlọm lẹ.’ ”

¹⁷Ọọwa, Amkpaa-à byi iMosisi yẹkẹẹ,

¹⁸“Ya ehile ịlẹ je Erọn bala anyị nyamwụ bala ala Isirẹlụ wuu mẹ, ‘Ụka ká ọngọngọhẹ nyanụ anụ ala Isirẹlụ lee ọngga ọlẹ kọ kụ ọ-ọpyị nyanụ-ụ́ ka kịla iya ọ-rụ ila ọlẹ kọ ri nya ọ-họ ọnụ ọmyịmyị nyamwụ jịra lee ọhaha o-bwu ọkịlẹtụ nyamwụ aalẹ,

¹⁹iyo okiliya ọọwa ọlẹ ká am Ohe Oluhye ka ye ka ri ẹna ọlẹng lee omiliodo lee oyichi ọlẹ ká ehe-é họ ka.

²⁰Ó-ri kanụ ya iyo ọhẹ-lọhẹ ọlẹ ká ehe họ kịla iya aalẹ, Am Amkpaa-á ka myị-ị̀ ye ka.

²¹Ọ́ tị ri ká ọngọngọhẹ-ẹ́ ka kịla iya nya ọhọlawụlẹ nyọka họ ọnụ ọmyịmyị nyamwụ jịra lee ọhaha o-bwu ọkịlẹtụ aalẹ, iyo okiliya ọọwa ọlẹ ká Amkpaa ka myị-ị̀ ye ka ri ọlẹ ịngịngịhye-ẹ́ họ ka.

²²Ānụ ya iyo ọ-kpụ idu lee ọ-chị okuku lee ọ-mwụ ẹga nya ịnyịrọ ọhẹ lee ọ-chị ẹbẹ lee ọ-da egbe lee ọ-chị ịkịrakịra kịla iya ham Amkpaa koo. Ānụ ya ụma nya iyo ịlịịwẹ kịla iya nya ang oriri họọ ka ịnyịnyị.

²³Ọ́ tị ri iya o-bwu ọkịlẹtụ nyanụ aalẹ, anụ ka ya iyo o-ri ohedabya lee ọlẹ ká ẹta ọhẹ nyamwụ la nwẹ̀nwụrẹ gụ ịkịla ha myị. Ma, anụ tị ya ọlịnyị ha nya iya ọ-họ ọnụ ọmyịmyị jịra koo.

²⁴Iyo ọhẹ-lọhẹ ká ajẹ nya igbipyị nyamwụ-ụ́ bene lee kị gbaa gba aalẹ, anụ ya ọlịnyị kịla iya ha Amkpaa ka. Anụ ya iyo ọlịnyị kịla iya ọ-ọpyị nyanụ ka.

²⁵Anụ ya iyọ ụma ịlịịwẹ ịlẹ kanụ ra bwu ẹga nya angga kịla iya nya ang oriri ham Ohe Oluhye nyanụ ka. Iyo ịịwa ri ịlẹ kị ju ẹjẹẹ lẹ, ḿ ka ye ka.’ ”

²⁶Ọọwa, Amkpaa-à ya ẹla ta iMosisi kịlahị yẹkẹẹ,

²⁷“Ụka ká ẹna lee ẹmwụ-ụ́ ma ọnyị, ị́ ka hyọọ hi ịnamwụ ka gbee jịra ẹnụtụrụ irwiye. Bwu ẹnụtụrụ ọhaneku kịlahị tị lẹ, iyo ọọwa chịla kị ka jẹ-ẹ̀ ya kịla iya nya ang oriri ha Amkpaa myị lẹ.

²⁸Ānụ ya ẹna bala ọnyị nyamwụ lee ẹmwụ bala ọnyị nyamwụ kịla iya lawụlẹ ẹnụ alẹ-alẹ ka.

²⁹“Ụka kanụ ka kịla iya nya obe ojiji ham Amkpaa, ánụ-ụ̀ họọ kpẹẹkpẹẹ chajị kam ka yenu mẹ.

³⁰Ẹnụ-ẹnụ ọlẹ kị kịla iya ọwẹ ị ka ri iyo ọọwa wuu lẹ. Ānụ hi ụpịlẹ nyamwụ da ka ahị ọpyẹpyẹ ọọnamwụ koo.

³¹“Ánụ-ụ̀ ju ihi nya ehile nyam mẹ. Am à ri Amkpaa lẹ.

³²Ānụ ya ẹpẹpẹ ju ẹnyị ọlịgọgọ nyam koo. Ala Isirẹlụ wuu ka jẹm nya ọngọ lịgọgọ. Am à ri Amkpaa ọlẹ kam chịnụ ịgọ lẹ.

³³M̀ gbanụ kpehe bwu ọpyị nya Ijipiti kam ka ri Ohe Oluhye nyanụ. Am à ri Amkpaa lẹ.”