Read idege ALA ILIVAYỊ 23 Bible Online

ALA ILIVAYỊ 23 - idege bible

ALA ILIVAYỊ 23

²“Ya ehile ịlẹ wuu je ala Isirẹlụ ká byaa yẹkẹẹ, ‘Ehile ịlẹ kanụ ka kpa chajị nya ọhụhụ ị-kpa kpịtịya nya ụka ká ala Isirẹlụ ka tụguru nyọka gbịgba ham am Amkpaa-à lẹẹ lẹ.

³Ẹnụtụrụ ịrwọnyẹ ānụ ka kpa họ ụkụrwọ nyanụ lẹ. Ẹnụtụrụ ọharwiye ri Ẹnụtụrụ Ọhịnyọ Lụkụrwọ kanụ ka la ọjịra-jịra ham. Ẹga myị ẹga kanụ kụ, ānụ họ ụkụrwọ ẹnụ ọọwa kokoo, chajị Ẹnụtụrụ Ọhịnyọ Lụkụrwọ ọwẹ ri nya Amkpaa.

⁴“ ‘Ọhụhụ ịkịla ịlẹ kanụ ka kpa kpịtịya à lẹẹ lẹ. Ánụ-à kpịtịya nya lụka ohunọ nya ọnyọnyọọnyị nyaa.

⁵Anụ la ọhụhụ nya Ang Oriri Ọchịpwụrụ lewu-obyi nya ẹnụtụrụ iwo da ine nya ọya ọhọhẹ nya ẹka ọwawa nyanụ.

⁶Ọhụhụ nya Ịkaa Ọmịrịị-mịrị-ka dọmwụ ẹnụtụrụ iwo da ịrụ nya ọya ọwẹ-ọwẹ. Ọhụhụ ọwẹ la ẹnụtụrụ irwiye gbẹgbịlẹ. Lụka ọwẹ wuu, ánụ ka ri ịkaa ọhẹ-lọhẹ ọlẹ kị ya ang ọ-mịrị ịkaa ju ka.

⁷Ẹnụ nya ọgbanyẹ-ọgbanyẹ nya ọhụhụ ọwẹ, ànụ ka tụguru gbịgba ham. Ānụ họ ụkụrwọ ọhẹ ẹnẹwẹ ka.

⁸Ànụ ka kịla iya ha Amkpaa ẹnụ myị ẹnụ jịra ẹ-ẹnụtụrụ irwiye nya ọhụhụ ọwẹ. Ẹnụtụrụ ọharwiye lẹ, ànụ myịmyị tụguru kanụ gbịgba ham mẹ. Ānụ họ ụkụrwọ ọhẹ ẹnụ ọọwa kokoo.’ ”

⁹Amkpaa byi iMosisi yẹkẹẹ,

¹⁰“Ya ehile ịlẹ je ala Isirẹlụ ka byaa yẹkẹẹ, ‘Ụka kanụ pwụ ọpyị ọlẹ kam wẹẹ ka ya hanụ, kanụ wụ ang-ẹrụ nyanụ ịlụwa, ànụ ka kpa ẹhị nya ajẹ nya ang-ẹrụ nya ọhọhẹ-họhẹ kịla ọngọkiliya.

¹¹Ọọwa, ọngọkiliya-à ka hwaa ham bwula o-nyaa kile-kile chajị kam ka yenu lẹlẹ. Ẹnụtụrụ ọlịlahị ba Ẹnụtụrụ Ọhịnyọ Lụkụrwọ ba ọ ka ya iya ọọwa ham lẹ.

¹²Ẹnẹwẹ-ẹnẹwẹ, ànụ ka ya ụ́gba nya ọkpịlọ ọlẹng o-gu ẹka ookpokpo ọlẹ ká ehe-é họ ka kịla iya ọ-rụ ila ham.

¹³Ànụ ka ya okolo imiiye nya ọrụ nya ajẹ nya ang-ẹrụ ọlẹ kị ya ida nya olivu dala kịla iya nya ajẹ nya ang-ẹrụ ịnyịnyị. Oru nya iya ọlẹ kaa chịm am Amkpaa oru kwọkwọ. Ànụ ka ya ere ọ-myị̀ eku nya ịgalụwa kịla iya ta ang ịwẹ jẹ.

¹⁴Ānụ ri ajẹ nya ang-ẹrụ nyanụ lee ịngịngịhyẹ ịlẹ kị kpa họ ka gbee kanụ ka kpa iya ọlẹ wam am Ohe Oluhye nyanụ ene. Ehile ọlẹ ri ọlẹ ka anyị ịtụma nyanụ ka kpa pyịyọọ ẹ-ẹga myị ẹga kị kụ.

¹⁵“ ‘Ànụ ka wa epwihi irwiye lẹpwụ-lẹpwụ cheeji dọmwụ bwu ẹnụtụrụ ọ-ba Ẹnụtụrụ Ọhịnyọ Lụkụrwọ ba ọlẹ kanụ kpa ẹbwọ nya ajẹ nya ang-ẹrụ kaka kịla iya o-nyí kile-kile.

¹⁶Ẹnụtụrụ ọ-ba Ẹnụtụrụ Ọhịnyọ Lụkụrwọ ọharwiye ba à ka ri ẹnụtụrụ iwo ịrụ gbẹgbịlẹ ẹ-ẹpwụ nya ọwawa ọwẹ lẹ. Ẹnụ ọọwa kpangga ānụ ka kpa ọhaha nya ajẹ nya ang-ẹrụ inyeewe wẹ Amkpaa lẹ.

¹⁷Ugbiyegu ọnyọnyọọnyị ka kpa abẹ nya ịkaa imiiye kị ka ya kịla iya ha Amkpaa bwula o-nyaa kile-kile họọ. Okolo imiiye nya ọrụ nya ajẹ nya ang-ẹrụ bala ang ọ-mịrị ịkaa ị ka kpa họ ẹbẹ nya ịkaa ọnyọnyọọnyị lẹ. Ọọwa, ị ka ya ha ọhaha nya egbe nya ọgbanyẹ ha Amkpaa lẹlẹ.

¹⁸Ang ịlẹ ká alụma wuu ka ya ha dala ịkaa ịlẹ ri ágba nya ịkpịlọ irwiye ịlẹ kị gu ẹka ookpokpo bala ẹna ookpokpo bala imilodo imiiye. Ehe-é ka họ ọhẹ-lọhẹ nyaa koo. Ị ka ya iyo ịwẹ kịla iya ọ-rụ ila ham am Amkpaa jula iya nya ajẹ nya ang-ẹrụ bala iya nya ere. Iya ọwẹ kaa chị Amkpaa oru kwọkwọ.

¹⁹Anụ ka ya oyichi ookpokpo kịla iya ọ-hụ́ ọhọbịrị, kanụ ka ya anyị-ịkpịlọ imiiye i-gu ẹka ookpokpo kịla iya nya ọhọlawụlẹ ịnyịnyị.

²⁰Ọọwa, ọngọkiliya-à ka hu ịkaa bala anyị-ịkpịlọ imiiye ịwẹ kọ ka yaa kịla iya ham bwula o-nyaa kile-kile lẹlẹ. Ang ikiliya ịwẹ ri ịnyam Amkpaa ịlẹ kam ya ha ọngọkiliya.

²¹Ẹnẹwẹ kpangga anụ ka la ọhụhụ nya ịgba ọgbagba. Ánụ ka họ ụkụrwọ ẹnụ ọọwa ka. Ọwẹ ri ehile ọlẹ ká anyị ịtụma nyanụ ka kpa pyịyọọ ẹ-ẹga myị ẹga kị kụ.

²²“ ‘Ụka nya ang-ẹrụ ọwụwụ nyanụ, ānụ wụ ajẹ nya ang-ẹrụ nyanụ wuu gwọka-gwọka ka, ānụ tị tịrẹkpẹ kaka dụmwọ nya ịlẹ kanụ pẹhi kaka. Anụ pẹhi ịịwa ha alẹbyahị bala angga. Am à ri Amkpaa Ohe Oluhye nyanụ lẹ.’ ”

²³Amkpaa byi iMosisi ịnyịnyị yẹkẹẹ,

²⁴“Ya je ala Isirẹlụ yẹkẹẹ, ‘Ẹnụtụrụ ọhọhẹ nya ọya ọharwiye ka ri ẹnụ ọhịnyọ lụkụrwọ ọhọhọ nya ala Isirẹlụ. Ị ka tụguru kị ka gbịgba ụka kị wo omyị nya ẹkụrwẹ ọchịchị.

²⁵Ānụ họ ụkụrwọ ẹnẹwẹ kokoo. Ánụ-ụ̀ kịla iya ju ila ha Amkpaa mẹ.’ ”

²⁶Amkpaa byi iMosisi yẹkẹẹ,

²⁷“Ẹnụtụrụ okiriwo nya ọya ọharwiye à ri ẹnụ ọbịlẹ ọhịnyọhi lẹ. Ẹnụ ọọwa anụ hụ limyi, kanụ tụguru nyọka gbịgba bala ọ-kịla iya ju ila ham am Amkpaa.

²⁸Ānụ họ ụkụrwọ ẹnụ ọọwa ka chajị ọ ri ẹnụ ọbịlẹ ọhịnyọhi nya ịhọbịrị nyanụ ẹ-ẹga nya Amkpaa Ohe Oluhye nyanụ.

²⁹Ọng myị ọng kọ myị hụ limyi ẹnẹwẹ ka aalẹ, ị ka be ọngọọwa deeji hi ẹpwụ nya ala Isirẹlụ.

³⁰Ọng myị ọng lẹpwụ nyanụ kọ họ ụkụrwọ ọhẹ-lọhẹ ẹnẹwẹ aalẹ, m̀ ka nwụ ọngọọwa.

³¹Ụkụrwọ ọhọhọ ā ji ẹnẹwẹ kpong-kpong kokoo. Ọwẹ ri ehile ọlẹ ká anyị ịtụma nyanụ ka kpa gbe oyi myị oyi ẹ-ẹga myị ẹga kị kụ.

³²O-bwu ewu-obyi nya ẹnụtụrụ ohikichu nya ọya ọwẹ kele ka ewu-obyi nya ẹnụtụrụ okiriwo nyamwụ ri ẹnụ ọhịnyọ lụkụrwọ. Anụ ka hụ limyi ẹnụ ọọwa.”

³³Amkpaa byi iMosisi yẹkẹẹ,

³⁴“Ya je ala Isirẹlụ yẹkẹẹ, ‘Ẹnụtụrụ iwo kụrụ ịrụ nya ọya ọharwiye Ọhụhụ nya Adáa ọ-chị ihi ju Amkpaa-à ka dọmwụ lẹ. Anụ tị ka lọọ jịra ẹnụtụrụ irwiye gbẹgbịlẹ.

³⁵Ẹnụtụrụ ọhọhẹ-họhẹ nya ọhụhụ ọwẹ, ánụ-ụ̀ tụguru nyọka gbịgba ham. Ānụ họ ụkụrwọ ọhẹ ẹnẹwẹ kokoo.

³⁶Ẹnụtụrụ ọnyọnyọọnyị jịra ẹnụtụrụ irwiye, anụ ka kịla iya ju ila ham Amkpaa. Ẹnụtụrụ ọhaneku tị lẹ, anụ ka tụguru kanụ ka gbịgba bala ọ-ka kịla iya ju ila ham. Ẹnẹwẹ ri ẹnụ nyọka gbịgba. Ánụ ka họ ụkụrwọ ọhẹ-lọhẹ ka.

³⁷(“ ‘Ịwẹ à ri ọhụhụ ịlẹ kam hunọ kanụ ka kpa chị ihi jum Amkpaa bwula ọ-wẹ kaka tụguru gbịgba ham bala ọ-kịla iya i-ju ila ịlẹ kị ri iya ị-rụ ila bala iya nya ajẹ nya ang-ẹrụ bala iya nya ang o-riri bala ere jaabwọ kị hunọ nya ahyẹnụ ọnyọnyọọnyị lẹlẹ.

³⁸Ọhụhụ ịwẹ ri ọ-da ịnya Ẹnụtụrụ Ọhịnyọ Lụkụrwọ ọlẹ kanụ-ụ̀ la epwihi-epwihi u-uhye. Iya ịwẹ tị ri ọ-dala ang-ahị bala ọhaha nya ọnụ ọmyịmyị ọ-họ jịra bala ọhaha o-bwu irya nyanụ ịlẹ kanụ-ụ̀ kpa wẹ Amkpaa ịnyịnyịịnyị.)

³⁹“ ‘Anụ kpịtịya mẹ, ụka kanụ wụ ang-ẹrụ nyanụ kpá lẹ, anụ la Ọhụhụ nya Adáa dọmwụ bwu ẹnụtụrụ iwo kụrụ ịrụ nya ọya ọharwiye jịra ẹnụtụrụ irwiye gbẹgbịlẹ mẹ. Ẹnụ nya ọgbanyẹ bala ẹnụ ohyẹẹkpẹ ọlẹ kọ ri ẹnụtụrụ ọhaneku nya ọhụhụ ọwẹ ka ri ẹnụ ọhịnyọ lụkụrwọ gbanggbang.

⁴⁰Ẹnụ ọọwa, anụ ka hyà egbiji[9] nyanụ bala ọ-chị abajị nya ịrị bala ọ-hụla ábwọ nya ekeji lapwụ-lapwụ bala ekpapwụ bwu ọnụ-ogo kanụ ka kpaa lụka nya ọhụhụ nya ọkẹknị ọ-chị ihi jum Amkpa Ohe Oluhye nyanụ ọwẹ.

⁴¹Anụ ka la ọhụhụ ọwẹ jịra ẹnụtụrụ irwiye gbẹgbịlẹ ẹka ọnyị myị ọnyị. Ọwẹ ri ẹhile ọlẹ ká anyị ịtụma nyang ka kpa pyịyọọ.

⁴²Angị ri ala Isirẹlụ wuu ka kụ a-adáa ẹnụtụrụ irwiye ịịwa,

⁴³chajị ká anyị ịtụma nyanụ ka jẹ kam yanụ anụ adaa igogo kụ ẹpwụ nya adáa lụka kam gbanụ kpehe bwu ọpyị nya Ijipiti. Am à ri Amkpaa Ohe Oluhye nyanụ lẹ.’ ”

⁴⁴Ịịwẹ iMosisi à ya je ala Isirẹlụ jaabwọ kị ka bwu la ọhụhụ ị-kpa chị ihi ju Amkpaa lẹlẹ.