Read idege ALA ILIVAYỊ 24 Bible Online

ALA ILIVAYỊ 24 - idege bible

ALA ILIVAYỊ 24

¹Ọọwa, Amkpaa-à byi iMosisi yẹkẹẹ,

²“Da ala Isirẹlụ ehile kị kpa ida nya olivu ọlahịchịng ọlẹ kọ la chire-chire wang, ká ya ju itinika chajị ká ila nyaa ka juwa wuru ụka wuu mẹ.

³Erọn ka ya ila ju itinika ịwẹ ẹnụ myị ẹnụ lobyi rịrị wẹ odehe nya apwụ okeke ọlịlahị nya Akpa nya Iro ọlẹ Ẹga Ọlịgọgọ Ọgụgụ wuu. Itinika ịwẹ ka juwa wuru gbee da ka alụtụrụ ịnyịnyịịnyị. Ọwẹ ri ehile ọlẹ ká anyị ịtụma nyanụ ka kpa gbe oyi myị oyi.

⁴Erọn ka kpahị ju itinika iluhye nya ang ọya itinika rịrị nya okpoko ịgọm ọwẹ yẹẹyẹẹ pyịyọọ ị-ịlahị nya Amkpaa.

⁵“Me okolo iwo kụrụ imiiye nya ọrụ nya ajẹ nya ang-ẹrụ, ká ya họ abẹ nya ịkaa iwo kụrụ imiiye mẹ.

⁶Ya abẹ nya ịkaa ịịwa guru ịgba imiiye u-uhye nya itebwuru ọlẹ kị kpụ́ okpoko ịgọm kụrụ rịrị ị-ịlahị nya Amkpaa wẹ mẹ. Ya ịrwọnyẹ nyaa guru ọgba ọhẹ, ká ya ịrwọnyẹ guru ọgba ọkịla.

⁷Chụ ịtangare guru ịkịka nya ọgba ọnyọnyọọnyị kị ka ya kịla iya ha Amkpaa bwula ọ-jwọọ ila nya ọnụ-odo wọnụ nya ịkaa ju.

⁸Ẹnụtụrụ Ọhịnyọ Lụkụrwọ ọnyị myị ọnyị, ọngọkiliya ka ya ịkaa guru ịịwẹ ị-ịlahị nya Amkpaa. Ọwẹ ri ụkụrwọ ọlẹ ká ala Isirẹlụ ka họ gbe oyi myị oyi.

⁹Ịkaa ịwẹ ri nya Erọn bala anyị ịtụma nyamwụ kị ka ya ri. Ẹga ọlịgọgọ ọhẹ ị ka hụ ryaa lẹ, chajị ịwẹ ri ebwo ọlịgọgọ ịlẹ kam ya ha angịkiliya bwu ẹpwụ nya iya ịlẹ kị kịla ham.”

¹⁰Ọlẹng ọhẹ juwa ká adamwụ bwu Ijipiti, ká ịnamwụ tị ri ọla Isirẹlụ. Ịnamwụ à ri iCelomiti ọnyị nya iDibiri ọla imwawụ nya ịDan lẹ. Ẹnẹhẹ ị-ịkampụ lẹ, ọlẹng ọọwa-à mwẹla ta ọlẹng nya ala Isirẹlụ ọhẹ lẹlẹ. Ụka kị juwa rwarụ ọwẹ, ọlẹng ọwẹ ká ịnamwụ ri ọla Isirẹlụ do Ohe Oluhye. Ọọwa, ị kpọọ wẹ ẹga nya iMosisi lẹ,

¹²ị chụ angịnyị gboo lẹ, ị juwa godayị gbe Amkpaa kọ ka ya jaa jaabwọ kị ka họ ọlẹng ọwẹ lẹlẹ.

¹³Ọọwa, Amkpaa-à byi iMosisi yẹkẹẹ,

¹⁴“Kpa ọlẹng ọwẹ kpehe ka ohwodehe nya ịkampụ mẹ. Angịlẹ kị kpa ụrụ nya ịlaa wo ụka kọ do ido ọọwa ka yụbwọ nịrọọ e-egbeju nya ibeenu oriri. Ọọwa lẹ, ká aluche wuu ā da ajwọ nwọọ mẹ.

¹⁵Aa byi ala Isirẹlụ mẹ, ọng myị ọng kọ do Ohe Oluhye aalẹ, ọwa ju ọmwụ nya akama ha ịlọmwụ lẹ.

¹⁶Ọng myị ọng kọ do Ohe Oluhye aalẹ, ị ka nwọọ. Alụma wuu à ka da ajwọ nwọọ lẹ. Ọngọọwa-á ri ọnyị ọlọpyị nya Isirẹlụ ayịdang lee ọ ri ọngga kụ am̀ kụ ta ala Isirẹlụ, ó-ri kọ dom am Amkpaa aalẹ, ọ ka gbu pyii.

¹⁷“Ọngọngọhẹ kọ nwụ ọngịnyị ehe ọngọkịla aalẹ, ị tị̀tị̀ ka nwọọ ịnyịnyị.

¹⁸Ọng myị ọng kọ nwụ iyo oleji nya ọngọkịla aalẹ, ọ ka nwụ uri tịrẹkpẹ ha ayịdang. Iyo ọlahị-lahị ọ ka ya kwiwa nyọlẹ kọ nwụ lẹ.

¹⁹Ó-ri ká ọngịnyị-ị́ họ ọngịnyị ehe ọọnamwụ ang, ị tị̀tị̀ ka họ ọngọọwa ang kwiwa jaabwọ ká ang ọlẹ kọ họ ọngọkịla la kaka ba.

²⁰Ó-ri ukpunogu nyamwụ kọ bene, ị tị̀tị̀ ka be ịnyamwụ ene ịnyịnyị. Ó-ri ẹhị nya ọngọlaanyị kọ bwuru, ị tị̀tị̀ ka bwuru ịnyamwụ ịnyịnyị. Ọ́ wo ọngọlaanyị ẹngịrị gbịlọgọ, ị tị̀tị̀ ka wo ịnyamwụ ịnyịnyị. Jaabwọ myị abwọ ká ang ọlẹ kọ họ ọngọlaanyị-ị́ lụmẹ kaka ba, ịnyịnyị ị tị̀tị̀ ka họọ kwiwa lẹ.

²¹Ọngọlẹ kọ nwụ iyo oleji ka nwụ uri tịrẹkpẹ ha ayịdang. Ọ́ tị ri ọngịnyị ehe kọ nwụ aalẹ, ị ka nwọọ ịnyịnyị.

²²Ehile ọlẹ ri nyanụ anụ ala Isirẹlụ tụ angga ịlẹ kị kụ tanụ kanụ ka kpa. Anụ tị́ jẹ lẹ, am a ri Amkpaa Ohe Oluhye nyanụ lẹ.”

²³Ụka ká iMosisi ya ehile ịwẹ wuu jẹ ala Isirẹlụ kpá lẹ, ị gba ọlẹng ọlẹ kọ do Ohe Oluhye kpehe hi ịkampụ lẹ, ị da ajwọ nwọọ lẹlẹ. Ịịwẹ ị họ jaabwọ ká Amkpaa da iMosisi ehile ya nyị họ lẹlẹ.