Read idege ALA ILIVAYỊ 25 Bible Online

ALA ILIVAYỊ 25 - idege bible

ALA ILIVAYỊ 25

¹Ụka ká iMosisi juwa ọ-Ọgbọdọ nya ịSayịnayị, Amkpaa ya ẹla tọọ yẹkẹẹ,

²“Aa ya ehile ịlẹ ha ala Isirẹlụ mẹ, ‘Ụka kanụ pwụ ọpyị ọlẹ kam wẹẹ ya hanụ, anụ ka hịnyọ la ọ-kpa ọpyị ọọwa họ ang ẹka ookpokpo ẹ-ẹpwụ nya ẹka irwiye ọnyị myị ọnyị nyọka chị ihi ju Amkpaa.

³Anụ ka wu ọpyị nyanụ ẹrụ bala ọ-ma alakọnụ nyanụ ábwọ bala ọ-wụ ang-ẹrụ nyanụ jịra ẹka ịrwọnyẹ gbẹgbịlẹ.

⁴Ma, ẹka ọharwiye ri ẹka ọlẹ ká ọpyị ka kpụba nyọka chị ihi ju Amkpaa. Ẹka ọwẹ wuu lẹpwụ-lẹpwụ, ānụ ya ang tọ lee ọ-ma alakọnụ nyanụ ábwọ kokoo.

⁵Ānụ dọmwụ hyà egbe ịlẹ ká ang-ẹrụ ịlẹ kị gụụnụ chị e-eji bwu ẹka ọlẹkpẹ nwụ hanụ lee ọ-hyà alakọnụ ịlẹ kanụ pẹhi rịrị ẹ-ẹrụ koo. Ẹka ọwẹ wuu lẹpwụ-lẹpwụ ri ọ-ka pẹhi ọpyị kọ ka kpụba gbanggbang.

⁶Arụrụ nya ang ịlẹ kị ka bwu ọ-ọpyị nyanụ lẹka ọwẹ tị lẹ, anụ bala anyịhị nyanụ bala alụkụrwọ ịlẹ kanụ diroo-diro bala angga ịlẹ kị kụ tanụ

⁷tụ iyo ileji nyanụ bala iyo ịlẹpwamẹ ịlọpyị nyanụ wuu ka ri ajẹ nyaa myị. Anụ ka ri ang myị ọng ọlẹ kọ bwu rịrị ọ-ọpyị lẹka ọwẹ.

⁸“ ‘Anụ ka wa ẹka irwiye-irwiye jịra ugbabwọ irwiye ịnyịnyị ọlẹ ká ọtụchawụlẹ nyaa ka ri ẹka iwo ine kụrụ ihikichu gbẹgbịlẹ.

⁹Ẹnụ Ọbịlẹ Ọhịnyọhi ọlẹ kọ ri ẹnụtụrụ okiriwo nya ọya ọharwiye nya ẹka ọlẹ kọ ri iwo ịrụ tị lẹ, à ka du angịhyẹ kị chị ẹkụrwẹ tụ ẹga myị ẹga nya ọpyị nyanụ da wuu.

¹⁰Anụ-ụ̀ chị ịgọ ju ẹka ọwẹ ha Amkpaa, kanụ ya dodehe ya ọng myị ọng ọlẹ kọ kụ ọpyị ọlẹ nyị lịlọmwụ lẹ mẹ. Ẹka ọwẹ ri ẹka ọlẹ kị ka tịrị ang myị ang ọlẹ kị ya ra ẹkpẹ ha ayịdang olene lee anyị nyamwụ. Angịlẹ wuu kị wu ra lala anyịhị ka nyà tịrẹkpẹ chị alẹpwa nyaa ọgụ.

¹¹Ẹka iwo ịrụ ọwẹ kpangga ka rị ẹka nya ọkẹkẹnị ọchịchị hanụ. Ānụ ya ajẹ nya ịngịngịhyẹ tọ ọ-ọpyị nyanụ ẹka ọwẹ lee ọ-wụ ang ịlẹ kị bwu ọ-ọpyị lịlaa-ịlaa lee ọ-hyà alakọnụ nyanụ ịlẹ kanụ ma ábwọ nyaa ka lẹ koo.

¹²Ẹka ọwẹ wuu lẹpwụ-lẹpwụ ri ẹka ọlẹ kanụ ka kpa lịgọgọ. Ang ịlẹ kị bwu lịlaa ẹ-ẹrụ nyanụ kẹnẹ-kẹnẹ anụ ka ri lẹ.

¹³“ ‘Ẹ-ẹpwụ nya ẹka ọlẹ, ọng myị ọng tụ ang myị ang ka nyà tịrẹkpẹ ka iwe olene nyamwụ.

¹⁴“ ‘Ụka kanụ ya ọpyị nyanụ ha ọla Isirẹlụ ọọnanụ ra, ānụ họ awụlẹ ri koo.

¹⁵Ụka kanụ juwa ka ra opyi, ị ka chị ịnya jwọọ yahị me ẹka ịlẹ kị ka jẹ-ẹ̀ kpa họ ang ene ká Ẹka Ọtịrị Ang Ẹkpẹ ọkịla ka pwụ eji.

¹⁶Ẹka-á hi ju iru, ịnya nyamwụ ka hu hwaa. Ẹka-á tị la wure-wure, ịnya nyamwụ ka pwuru weji, chajị anụ tị́ jẹ, ọọpyị ayịdang ị wẹẹ ya ra abwọhẹ ka. Ang-ẹrụ ịlẹpwụ nya ẹka ịmanyị-ịmanyị ịwẹ ị wẹẹ ya ra lẹ.

¹⁷Ānụ họ ọla Isirẹlụ ọọnanụ ri koo. Anụ ju ihi nyam Amkpaa Ohe Oluhye nyanụ mẹ.

¹⁸“ ‘Ánụ-ụ̀ ju ihi nya ehile bala ọmẹjẹ nyam Amkpaa wuu, chajị kanụ ka kụ lokpunyi ọ-ọpyị ọlẹ mẹ.

¹⁹Ọpyị nyanụ ka há ẹrụ kanụ ka ye ang ri jaabwọ kọ haanụ bala ọ-ka kụ ụwa lokpunyi.

²⁰Ọngọhẹ ka tọ wo ya ịyẹ ịwa nyaa tị́ ka ye ri lẹka ọharwiye ọlẹ ká ẹrụ owuwu lee ang-ẹrụ ọwụwụ nyị́ wẹẹ ka ji kaka myị.

²¹Ọwẹwẹ nya ọọwa ri am Amkpaa ka wahị kụrụ ọpyị ẹ-ẹpwụ nya ẹka ọharwọnyẹ kpụ ang-ẹrụ nyanụ ka há kpụ ọ-ka nwanụ jịra ẹka ịta lẹpwụ-lẹpwụ myị.

²²Ụka kanụ wẹẹ wu ẹrụ ẹka ọhaneku, ang oriri ịlẹ kanụ kpa bwu ẹrụ nyanụ ẹka ọharwọnyẹ dọmwụ ka hi anụ ka juwa kpa ri gbee da ka ẹka ohikichu ọlẹ kanụ ka wụ ang inyeewe ịlẹ kanụ wu lẹka ọhaneku.

²³“ ‘Ánụ ka ya ọpyị ọhẹ-lọhẹ ra nya ọpyịyọọ koo. Anụ tị́ jẹ lẹ, ọpyị-ị́ ri nyanụ lụbwọ-lẹta ka, am Amkpaa-à la ọpyị lẹ. Anụ kụ ụwa lụka okpii juwa kpa họ ang ịnyị.

²⁴Ọpyị ọnyị myị ọnyị kị ka ya ra, anụ ka ya neeji nya o-ri ayịdang ka jẹ-ẹ̀ rọọ tịrẹkpẹ ha ịlọmwụ myị wẹẹ.

²⁵“ ‘Ó-ri ká ekuru ku ọngọngọhẹ nyanụ anụ ala Isirẹlụ kpụ ká ọngọọwa-á ya ọpyị nyamwụ bọkpà, ọọnamwụ ọlẹ kọ bọọ i-iyo chii ka kele kaka nyọ́ọ̄ tịrẹkpẹ.

²⁶Ọhẹka ọngọọwa-á ka la ọọnịna ọlẹ kọ ka nyẹ ọpyị ọọwa tịrẹkpẹ họọ ka. Ó-ri kọ tị maga gbee kọ la okpoko kpụ ọ-ka nyẹ ọpyị ọọwa tịrẹkpẹ lịlọmwụ aalẹ,

²⁷ọ ka nyọ́ọ̄ tịrẹkpẹ myị. Ọ ka wa ẹka ịlẹ kị kam wuu bwu ụka kọ ya ọpyị ọọwa bọkpà. Ọọwa, ọ ka nwụ uri wọnụ nya ẹka ịlẹ kị hi ene ká Ẹka Ọtịrị Ang Ẹkpẹ ka pwụ eji lẹ, ọ ka nwụ uri wọnụ nya ẹka ịịwa ju lẹlẹ. Ọ́ nyọ́ọ̄ tịrẹkpẹ kpá lẹ, ọpyị ọọwa-à ka ri nyamwụ myịmyị lẹlẹ.

²⁸Ọ́ tị ri kọ ye ang ka nyẹ ọpyị ọọwa lịlọmwụ ka aalẹ, ọpyị ọọwa ka ri nya ọngọlẹ kọ rọọ gbee da ka Ẹka Ọtịrị Ang Ẹkpẹ. Ọọwa, ọ ka ye ọpyị nyamwụ tịrẹkpẹ lẹka ọọwa lẹlẹ.

²⁹“ ‘Ó-ri ká ọngịnyị ya ẹpwa nyamwụ olepweji ọlẹ kị me ugulọ dagaga ju ra, ọ liwe nyọka nyọ́ọ̄ tịrẹkpẹ ẹ-ẹpwụ nya ẹka nya ọgbanyẹ ọwẹ kọ ya ẹpwa ra myị.

³⁰Ọ́ tị ri kọ nyọ́ọ̄ tịrẹkpẹ ka gbee kọ gu ẹka lẹpwụ-lẹpwụ lẹ, ọ́ liwe nyọka nyọ́ọ̄ tịrẹkpẹ kaka. Ẹpwa ọọwa ka ri nya ọngọ rọọ ra bala anyị ịtụma nyamwụ pyịyọọ lẹ. Ị́ ka tịrọọ ẹkpẹ họọ Ẹka Ọtịrị Ang Ẹkpẹ kpong-kpong ka.

³¹Jaabwọ kịị họ ẹ-ẹga nya ọpyị ọlẹ kị ya ra ị tị ka họ ẹ-ẹga nya ẹpwa ọlẹ kọ ji epweji ọlẹ kị me ugulọ dagaga ju-ka lẹ. Ị ka jẹ-ẹ̀ nyẹ ẹpwa ọlịnyị tịrẹkpẹ myị. Ị ka tịraa ẹkpẹ ẹ-ẹpwụ nya Ẹka Ọtịrị Ang Ẹkpẹ.

³²“ ‘Ala iLivayị tị lẹ, ịwa liwe nyọka nyẹ ẹpwa nyaa ọnyị myị ọnyị kọ ji epweji ịlẹ kị ri nyaa tịrẹkpẹ ụka kọ háa myị.

³³Ẹpwa ọnyị myị ọnyị nyaa kị nyẹ tịrẹkpẹ ka aalẹ, ị ka tịrị ọọwa ẹkpẹ haa ẹ-ẹpwụ nya Ẹka Ọtịrị Ang Ẹkpẹ. Anụ tị́ jẹ lẹ, ẹpwa nya ala iLivayị ịlẹ kị ji epweji ịlẹ kị ri nyaa ri ang ọlala nyaa lụbwọ-lẹta pyịyọọ ẹ-ẹpwụ nya ala Isirẹlụ lẹ.

³⁴Ẹga ọ-kpa iyo ileji ri ịlẹ kị ịdagaga ju epweji nyaa ri ọpyị nyaaa lụbwọ-lẹta pyịyọọ. Í ka ya ọpyị ọlịnyị ra kpong-kpong ka.

³⁵“ ‘Ó-ri ká ekuru-ú ku ọla Isirẹlụ ọọnanụ ọhẹ-lọhẹ gbee kọ jụ ịlọmwụ kpa myị ka aalẹ, anụ ka kpahị jwoo jaabwọ kanụ-ụ̀ kpahị ju ọngga, kanụ ya ẹga da họọ kọ kụ tanụ.

³⁶Anụ chọọ ụbwọ nyọka ya ang neeji ene lee ọ-ka haju u-uhye nya okpoko ọlẹ kanụ ya kpịlọọ koo. Anụ tụ́tụ́ ju ihi nyam am Ohe Oluhye kanụ ya ẹga da ká ọọnanụ ā kụ tanụ.

³⁷Anụ ya okpoko kpịlọọ nyọka ya jwoo ọhị ka. Anụ ya ang oriri họọ-ọ̄ ra nyọka ye apyobwuna ka ịnyịnyị.

³⁸Am Amkpaa-à ri Ohe Oluhye nyanụ ọlẹ kọ gbanụ kpehe bwu ọpyị nya Ijipiti nyọka ya ọpyị nya iKenan hanụ bala ọ-ka ri Ohe Oluhye nyanụ lẹ.

³⁹“ ‘Ó-ri ká ekuru-ú ku ọla Isirẹlụ ọọnanụ ọhẹ gbee kọ ya ịlọmwụ hanụ ra, ānụ kpọọ họ ụkụrwọ lala ọnyọhị koo.

⁴⁰Ọ ka hụ tanụ lala ọlụkụrwọ ọlẹ kị diroo-diro lee ọngga gbee da ka Ẹka Ọtịrị Ang Ẹkpẹ ọkịla.

⁴¹Ụka ọọwa lẹ, ọwa bala anyị nyamwụ à ka la ịlaa bwu ụbwọ nyanụ kị ka rụ tịrẹkpẹ chị ugbiyegu nyaa ọgụ kele ka kụ ẹga kọ ri ọpyị nya adaa anyị lụbwọ-lẹta lẹlẹ.

⁴²Anụ tị́ jẹ lẹ, ala Isirẹlụ ri anchẹ nyam am Amkpaa ịlẹ kam gba kpehe bwu ọpyị nya Ijipiti. Lẹẹlẹ, ị́ ka gyaa ra nya anyịhị ka.

⁴³Anụ kpaa yẹ ụhị nmaanmaa ka. Anụ-ụ̀ ju ihi nya Ohe Oluhye nyanụ mẹ.

⁴⁴“ ‘Ó-ri kanụ tịtọ nyọka la anyịhị aalẹ, epwụma ịkịla ịlẹ kị kụ dagaga junu anụ ka raa bwu lẹ.

⁴⁵Ọ́ haanụ, anụ ka ra anyị nya angga ịlẹ kị kụ tanụ-ụ̀ wẹ anyị nyaa ịlẹ kị ma ọ-ọpyị nyanụ myị. Anyị nyaa ịlịnyị ka ri ang ọlala nyanụ

⁴⁶ịlẹ kanụ ka pẹhi ha anyị Isirẹlụ yanụ lala ang ugu myị. Ị ka myị ẹrụ ha anyị nyanụ jaabwọ myị abwọ kị hị tata kaka ba. Ānụ tị kpa ọla Isirẹlụ ọọnanụ ọhẹ-lọhẹ yẹ ụhị nmaanmaa koo.

⁴⁷“ ‘Ọ chịkpẹẹ ọngga ọhẹ ọlẹ kọ kụ tanụ ka kpụ ụdụ, ekuru tị ka ku ọla Isirẹlụ ọọnanụ ọhẹ myị. Ó-ri ká ọla Isirẹlụ ọọwa-ụ́ ya ịlọmwụ ha ọngga ọlụdụ ọlaanyị lee ọngọhẹ bwu ugbiyegu nya ọngga ra nya ọnyọhị aalẹ,

⁴⁸ọ liwe kị ka jẹ-ẹ̀ nyọ́ọ̄ tịrẹkpẹ myị wẹẹ. Ọngọhẹ nya aanamwụ

⁴⁹ọlẹ kọ ri ọnyịnịna nya adamwụ lee ọnyị nya ọnyịnịna nya adamwụ lee ọngọ bọọ i-iyo chii ọhẹ ka nyọ́ọ̄ myị. Ọwa lịlọmwụ-ụ́ tị ju ụbwọ aalẹ, ọ ka nyẹ ịlọmwụ myị.

⁵⁰Ọwa bala ọngọlẹ kọ ya ịlọmwụ ha ra ka wa jaabwọ ká ẹka la bwu ụka kọ ya ịlọmwụ ra gbee da ka ụka Ẹka Ọtịrị Ang Ẹkpẹ ọkịla. Ọọwa, ọ ka nwụ uri ha ọngọọwa jaabwọ kọ pwoku kị ka nwụ ọlụkụrwọ odiroo-diro uri ka ba jịra ẹka ịịwa lẹlẹ.

⁵¹Ó-ri ká ẹka-á hi chẹẹ da ka Ẹka Ọtịrị Ang Ẹkpẹ, okpoko ọlẹ kị ka ya nyọ́ọ̄ tịrẹkpẹ ka la chẹẹ jaabwọ kị rọọ ka ba.

⁵²Ọ́ tị ri kọ hi ẹka ịmanyị-ịmanyị da kele aalẹ, okpoko ọlẹ kị ka ya nyọ́ọ̄ ka la pwụchẹkẹ jaabwọ ká ẹka ihihi la ịnyịnyị.

⁵³Ọngga ọlẹ kọ ri ayịbamwụ-ụ̀ wẹ ka kpọọ lala ọlụkụrwọ ọlẹ kị diroo-diro nyọka nwọọ uri ẹkẹkẹẹka. Ānụ myị ká ọngga ọ-kụ tanụ ā kpa ọla Isirẹlụ ọọnanụ yẹ ụhị nmaanmaa koo.

⁵⁴“ ‘Ó-ri kị jẹ nyẹ ọla Isirẹlụ tịrẹkpẹ lụgbẹyị ọhẹ lẹpwụ nya ịwẹ ka aalẹ, ọwa bala anyị nyamwụ ka lịlaa pyii ụka ká Ẹka Ọtịrị Ang Ẹkpẹ-ẹ́ pwụ.

⁵⁵Anụ tị́ jẹ lẹ, anụ ala Isirẹlụ à ri anchẹ nyam ịlẹ kam gba kpehe bwu ọpyị nya Ijipiti lẹ. Am à ri Amkpaa Ohe Oluhye nyanụ lẹ.’ ”