Read idege ALA ILIVAYỊ 26 Bible Online

ALA ILIVAYỊ 26 - idege bible

ALA ILIVAYỊ 26

¹Amkpaa byi iMosisi yẹkẹẹ, “Anụ họ ekpeku lee ajwọ iweji lee ịlẹ kị kọkọ nyọka gbịgba ha ka. Am à ri Amkpaa Ohe Oluye nyanụ lẹ.

²“Ánụ-ụ̀ kpa ehile nya Ẹnụ Ịhịnyọ Lụkụrwọ nyam, kanụ juwa chị ihi ju ẹga kịị gbịgba nyam. Am à ri Amkpaa.

³“Ó-ri kanụ hị ba ehile nyam jẹ, kanụ juwa ju ihi nya ọmẹjẹ nyam aalẹ,

⁴m̀ ka do enyi hanụ ụka opwoku chajị ká ọpyị ka há ang, ká ekeji ịlẹrụ nyanụ ka nwụ egbe.

⁵Ang-ẹrụ nyanụ ka há lụmẹ-lụmẹ. Igbi nyanụ ka myị la ọchịchị ene ká alakọnụ nyanụ ka kpụ ọhyahya ka. Anụ ka juwa kpa alakọnụ nyanụ hya gbee da ka ụka ká igbi inyeewe ka kpụ owuwu. Anụ ka ye ang ri kpụ ịlọnụ. Anụ ka kụ lokpunyi ọ-ọpyị nyanụ.

⁶“M̀ ka ya okpunyi hanụ ọ-ọpyị nyanụ. Anụ ka nune la ọ-chị uko nya ọngọngọhẹ kpong-kpong ka. M̀ ka ku iyo ịnyẹẹgẹga rụ hi ọpyị nyanụ. Ẹwụ ọdada-á ka juwa kaka.

⁷Anụ ka ku aluji nyanụ, kanụ ka kụrwaa chẹẹchẹẹ.

⁸Angị ịrụ amamadiroko nyanụ ka kụrụ aluji angị ohu (100) myị. Angị ohu nyanụ tị ka jụ aluji angị ụnọ iwo (10,000) kụrụ myị.

⁹M̀ ka wahị kụrụụnụ, kanụ ka ma iru nya anyị. M̀ ka họ iro ọlẹ kam nwa tanụ jịra.

¹⁰Ang-ẹrụ nyanụ ka há gbee, anụ ka ye ang ri gbee ká ẹka ka myị. Ọ ka la kpụ anụ ka nwụ̀ ang iriri nyanụ inyogo nyanụ guru ka ọka hi ẹga ha inyeewe.

¹¹M̀ ka kụ ẹpwarịrị nyanụ. Ḿ ka nyẹẹkpẹ danụ ẹnẹnẹhẹ ka.

¹²M̀ ka juwa tanụ. M̀ ka ri Ohe Oluhye nyanụ. Anụ ka ri angịnyị nyam.

¹³Am Amkpaa Ohe Oluhye nyanụ à gbanụ kpehe bwu ọpyị nya Ijipiti chajị kanụ ka ri anyịhị kaka lẹ. M̀ yi ògbilo ọlẹ kị ya danụ o-omyi ene-ene hiinu du kanụ jẹ wẹẹ dagba lẹ.”

¹⁴Amkpaa yẹkẹẹ, “Ọ́ tị ri kanụ kpa ehile nyam ka,

¹⁵kanụ myị ba ehile bala ọmẹjẹ nyam jẹ ka, kanụ bịrị iro ọlẹ kam nwa tanụ aalẹ,

¹⁶m̀ ka yẹnụ akama. M̀ ka kpa akama bala ẹdụrụ inyibyi datị-datị wẹ kaka jụụnụ, kị ka kpụnụ idu chwiichwii, ta ọhịhị nyanụ ayịreji. Anụ ka họ ang ẹ-ẹrụ myị, ọ tị ka ri ọ-kpa abwọ nwụ ododu, chajị aluji nyanụ ka wẹ kaka nunu ang ịlẹrụ nyanụ ri wuu.

¹⁷M̀ ka nyẹẹkpẹ danụ, chajị kị ka kụrụụnụ. Angị kaa baanụ ẹtẹ ka mwọọgịlẹ ri alegbeju ịkpẹhị rịrịịnụ. Uhi ka junu gbee kanụ ka juwa rụnyẹ rụ ụka ká ọngọngọhẹ-ẹ́ kunu ku ka.

¹⁸“Ó-ri kanụ chịpwụrụ bwu ẹpwụ nya akama ịwẹ wuu kpá, kanụ myịmyị jum ihi ka aalẹ, m̀ ka yẹnụ akama gụ ịwẹ ugbabwọ irwiye chajị nya ang onyobyi ọhọhọ nyanụ.

¹⁹M̀ ka ta ọbọọchẹ ọ-kpa la egbeju-ọngịrị nyanụ ọwẹ ayịreji. Enyi-í ka do ka. Ọpyị nyanụ ka chọhụ kịra-kịra bala ọ-la ọngịrị lala ọgọdọ.

²⁰Ụkụrwọ ọnyọọngịrị ọhọhọ nyanụ-ụ́ ka kpụ ịngịhyẹ hanụ ka, chajị ọpyị-ị́ ka há ang há ka, ekeji nyanụ-ụ́ ka nwụ egbe nwụ ka ịnyịnyị.

²¹“Ó-ri kanụ kịnyaa la o-nyẹẹkpẹ dam juwa jum ihi ka aalẹ, m̀ ka myịmyị-ị̀ ha ju akama nyanụ ịwẹ ugbabwọ irwiye chajị nya ang onyobyi ọhọhọ nyanụ.

²²M̀ ka du iyo ịlụrụ-ụrụ wẹ ẹga nyanụ. Ị ka nwụnụ anyị bala ọ-ta iyo ileji nyanụ ayịreji. Anụ ka hi wure-wure gbee ká agbayị nyanụ ka chịnyooo.

²³“Ó-ri kanụ yẹ akama ịwẹ wuu, kanụ tị myị ju ihi nyam ka kịlahị-ịlahị, kanụ kịnyaa juwa ya ẹhị dam bwee aalẹ,

²⁴am lịlọm ka jahị danụ, kam ka yẹnụ akama ị-gụ ilene ugbabwọ irwiye.

²⁵M̀ ka kpa ẹwụ ọdada chịnụ ọgụ chajị nyọlẹ kanụ bịrị iro ọlẹ kahị nwa lawụlẹ. Ó-ri kanụ rụnyẹ rụ ka epweji ịtụka nyanụ ẹga kanụ ka be, m̀ ka du ẹdụrụ inyibyi baanụ wẹ ụwa gbee ká aluji nyanụ ka kụrụụnụ chẹẹchẹẹ.

²⁶M̀ ka họ ká ang oriri ka ganụ amwụ gbee ká anyang angị iwo ka bá iyegu ookpokpo bá nyọka họ ang oriri ọpyịnyẹng ọlẹ kị la. Ị ka ya ori me ang oriri me kpa họ. Anụ ka ri, ọ́ tị ka jẹ-ẹ̀ kpụnụ myị ka.

²⁷“Ó-ri kanụ myịmyị kịnyaa juwa ya ẹhị dam bwee la o-ju ihi nyam ka aalẹ,

²⁸m̀ ka jahị danụ lagbama kam ka họ ká akama nyanụ ka tịpyọ gụ ilene ugbabwọ irwiye.

²⁹Imyi ka nwụnụ gbee kanụ ka go anyị nya ịlọnụ nwụ ri.

³⁰M̀ ka ta ẹga ịgbịgba nyanụ ilikiti ịwẹ ayịreji bala ọ-tụrụ ogidi i-ju ịtangare nyanụ ila ịwẹ ju eji. M̀ ka go egu nyanụ guru ekpeku nyanụ ịwẹ u-uhye. M̀ ka pwanụ.

³¹M̀ ka họ ká epweji nyanụ ka kpụ egwawụ-egwawụ. M̀ ka ta ẹga ịgbịgba nyanụ ayịreji. Ḿ ka my-ị̀ ye iya ichoru kwọkwọ nyanụ kaka.

³²M̀ ka ta ọpyị nyanụ ayịreji weji-weji kpụ aluji nyanụ ịlẹ kị ka wẹ kaka kụ ụwa ka yẹ, ọ ka waa ejiri.

³³M̀ ka kpa ẹwụ ọdada jahị danụ kam ka nyiinu epepe pwụụpwụụpwụụ ju ka ẹpwụma datị-datị. Ọpyị nyanụ ka da hwooo la epweji nyanụ kpụ egwawụ-egwawụ.

³⁴Ụka ọọwa, ẹpwụ nya ẹka ịlẹ wuu kanụ wẹẹ ka ri alagba ị-ịpyị ịkịla, ọpyị nyanụ ọlẹ kanụ myị-ị̀ pẹhi mwụ ịnyọ ẹka ọharwiye ka à la ịlọmwụ bwu ẹpwụ nya ẹrụ ọ-kpa lẹlẹ.

³⁵

³⁶“Anụ angị hi lọhịhị ịlẹ kanụ ri alagba ị-ịpyị ịkịla lẹ, m̀ ka chị uhi junu ọtụka-ọtụka gbee ká anụ nya uguru-ụpwụ amamadiroko ka họ kanụ ka rụnyẹ. Anụ ka mwụ ata bịmwụ lala angị juwa rụnyẹ hi ẹwụ. Anụ ka da mileji la oluji ọhẹ o-juju chwẹẹ ka.

³⁷Ọngọngọhẹ-ẹ́ kunu ku ka, anụ ka rụnyẹ chị ụchụụ bwu uhye nya awụlẹ lala ẹwụ nyaa juwa kunu. Ánụ ka lọngịrị bá ẹla ta aluji nyanụ myị ka.

³⁸Anụ ka gbu ẹ-ẹpwụma ẹga kanụ ri anyịhi. Anụ ka myị́ kụrwa-kụrwa wuu ị-ịpyị nya aluji nyanụ.

³⁹Angị ịmanyị-ịmanyị nyanụ ịlẹ kị ka hi lọhịhị ọ-ọpyị nya aluji nyanụ ka ta ayịreji hụrụ dụmwọ-dụmwọ ọọ-lajị nya ang onyobyi ọhọhọ nyanụ bala ịnya adanụ igogo anyị.

⁴⁰“Ụka ohyẹẹkpẹ, anyị ịtụma nyanụ ka ya ang onyobyi ọhọhọ nyaa bala ịnya adaa igogo anyị nyị tịwa olujwo nyọlẹ kị la egbeju-ọngịrị jahị dam am Ohe Oluhye.

⁴¹Ang onyobyi nyaa ịịwa du kam wụ ẹjẹ taa kwaa rụ ka ịpyị nya aluji nyaa. Ụka ohyẹẹkpẹ ká egbeju ọnyọọngịrị nyaa-á pwuru kị yẹ akama chajị nya ang onyobyi ịlẹ kị họ lẹ,

⁴²m̄ ka họ iro ọlẹ kam nwa ta iJekọbụ bala Ayịsiki bala Ebiraham jịra bala ọ-ka chị ọnụ ọlẹ kam myị nyọka ya ọpyị ọlẹ ha angịnyị nyam ahị lẹlẹ.

⁴³Ene nya ọọwa tị lẹ, ọpyị ọlẹ ka la ịnyọ ọmwụmwụ lụka ká angịnyị rụ hyoo. Ị ka yẹ akama pwụ ọbaba chajị nyọlẹ kị nyẹẹkpẹ da ehile bala ọmẹjẹ nyam.

⁴⁴Ọ tị la ịịwẹ la kpá nyaa lẹ, ḿ ka nyẹẹkpẹ daa gbanggbang lee ọ-taa ayịreji ụka kị juwa ẹ-ẹpwụ nya ọnyọhị oriri ka. Ọ́ ri ịnyị ka iro ọlẹ kam nwa taa ka tụbiri. Am à ri Amkpaa Ohe Oluhye nyaa lẹ.

⁴⁵M̀ ka chị iro ọlẹ kam nwa ta adaa igogo anyị ahị. M̀ gba adaa igogo anyị kpehe bwu Ijipiti gede-gede a-ahị nya ẹpwụma ilodehe wuu chajị kam Amkpaa ka ri Ohe Oluhye nyaa.”

⁴⁶Ehile bala ọmẹjẹ ịlẹ ká Amkpaa ya ha iMosisi ọ-Ọgbọdọ nya iSayịnayị nyọka ya ha ala Isirẹlụ à wẹ lẹlẹ.