Read idege ALA ILIVAYỊ 27 Bible Online

ALA ILIVAYỊ 27 - idege bible

ALA ILIVAYỊ 27

¹Amkpaa byi iMosisi kọ ka ya ehile ịlẹ ha ala Isirẹlụ yẹkẹẹ,

²“Ụka kị hu ọngọngọhẹ nyanụ ham am Amkpaa nyọka họ ọnụ ọmyịmyị jịra aalẹ, ị ka jẹ-ẹ̀ nyẹ ọngọọwa tịrẹkpẹ lokpoko myị.

³O-hunọ nya okpoko ọlẹ kị ka nwụ̀ à lẹẹ lẹ. Ịnya ọlẹng ọngọgbahị ọlẹ ká ẹka ogugu nyamwụ pwụ iwo imiiye kele ka iwo ịrwọnyẹ ka ri okpoko onyoowuru iwo ịrụ.

⁴Ịnya ọnyang ọgbahị ọlẹ kọ pwụ ịkpa ọwẹ ka ri okpoko onyoowuru iwo ịta.

⁵Ịnya onjwo ọlẹng o-bwu ẹka ịrụ kele ka ẹka iwo imiiye ka ri okpoko onyoowuru iwo imiiye. Ịnya onjwo ọnyang ọlẹ kọ pwụ ịkpa ọwẹ ka ri okpoko iwo chiriri.

⁶Ịnya onjwo ọlẹng o-bwu ẹka ịrụ weji ka ri okpoko onyoowuru ịrụ. Ịnya onjwo ọnyang ọlẹ kọ ji ịkpa ọwẹ ka ri okpoko onyoowuru ịta.

⁷Okpoko ọlẹ kị ka ya nyẹ ọlẹng o-gu ẹka iwo ịrwọnyẹ kịlahị ka ri okpoko onyoowuru iwo kụrụ ịrụ. Ịnya ọnyang ọlẹ kọ ji ịkpa ọwẹ ka ri okpoko onyoowuru iwo chiriri.

⁸“Ó-ri ká ọngọhẹ nyanụ-ụ́ myị ọnụ-uri ọlịịwẹ, kọ tị jụ ụbwọ ka nwụ̀ chọnụ-chọnụ jaabwọ kị hunọ nyọka nyẹ ọngịnyị myị ka aalẹ, ọ ka kpa ọngọọwa ka ẹga nya ọngọkiliya. Ọọwa, ọngọkiliya-à ka chị okpoko weji jaabwọ ká ọngọ myị ọnụ ka jụ nwụ̀ kaka ba myị lẹlẹ.

⁹“Ó-ri ká ọnụ ọmyịmyị ọọwa-á ri nyọka ya iyo ọcharị-charị, ụma ọlẹ kọ pwoku ọ-ka ya kịla iya, ham am Amkpaa aalẹ, ang-ahị ọlẹ kị ya ha ọlịnyị wuu lịgọgọ.

¹⁰Ị́ ka ya iyo ọkịla nyẹ iyo okiliya ọọwa kpong-kpong ka. Ị́ ka ya iyo ọnyịịla nyẹ ọtịpyọ lee ọ-ya ọtịpyọ nyẹ ọnyịịla ka. Ọ́ tị ri kị jẹ ya iyo ọhẹ nyẹ ọkịla ene lẹ aalẹ, iyo nya ọgbanyẹ tụ ọlẹ kị ya nyọ́ọ̄ ri nya Amkpaa lẹ. Ị ka yaa ịwa imimiiye kịla iya pyii lẹ.

¹¹Ọ́-ri ká iyo ọlẹ kị myị ọnụ nyamwụ-ụ́ la charị-charị nyọka ya kịla iya ha Amkpaa ka aalẹ, ị ka kpa iyo ọọwa ka ẹga nya ọngọkiliya

¹²kọ ka wụlọọ yẹ nyọka jẹ jaabwọ kọ há lee há-ka ka ba. Jaabwọ ká ọngọkiliya-á hu ịnya nyamwụ nọ lẹ, ịnyị ọ ka ri lẹlẹ.

¹³Ó-ri kọ ri irya nya ọngọ ya iyo ọọwa ha nyọka nyọ́ọ̄ tịrẹkpẹ aalẹ, ọ ka nwụ̀ uri nyamwụ chọnụ-chọnụ ene kọ ka ya ebwo ookpokpo ẹ-ẹpwụ nya ịrụ nya ị̀nya nyamwụ haju.

¹⁴“Ó-ri ká ọngịnyị-ị́ hu ẹpwa nyamwụ ham am Amkpaa, ọngọkiliya ka kele kaka wụlọọ yẹ. Ụka kọ jẹ jaabwọ ká ẹpwa ọọwa há lee o-hi ọnụ kaka ba, kọ hu ị̀nya nyamwụ nọ lẹ, ịnyị ọ ka la lẹlẹ.

¹⁵Ọ́ tị ri kọ tịtọ nyọka nyẹ ẹpwa nyamwụ ọọwa tịrẹkpẹ, ọ ka nwụ̀ uri nyamwụ chọnụ-chọnụ ene kọ ka ya ebwo ookpokpo ẹ-ẹpwụ nya ịrụ nya ị̀nya nyamwụ haju. Ọọwa, ẹpwa-à ka tịrẹkpẹ kaka ri nyamwụ myịmyị lẹlẹ.

¹⁶“Ó-ri ká ọngọhẹ nyanụ-ụ́ hu ụpa nya ọpyị ọlẹ kọ ri nya ugbiyegu nyamwụ ham aalẹ, ị ka hu ị̀nya nyamwụ nọ jaabwọ ká ajẹ nya ang-ẹrụ ịlẹ kị ka jẹ-ẹ̀ ya hụ ụ-ụwa ka lụmẹ kaka ba. Okpoko onyoowuru iwo chiriri ị ka nwụ̀ u-uhye nya ọpyị ọlẹ kị ka ya okolo iwo imiiye nya ajẹ nya ịbali hụ lẹ.

¹⁷Ó-ri ẹpwụ nya Ẹka Ọtịrị Ang Ẹkpẹ ká ọngọọwa-á myị ọnụ ọwẹ wẹwẹ, ị̀nya ọlẹ kị hunọ nya ọpyị ọwẹ ka godayị ịnyịnyị.

¹⁸Ọ́ tị ri kọ hu ọpyị ọọwa ha ụka ká Ẹka Ọtịrị Ang Ẹkpẹ-ẹ́ kam kpá aalẹ, ọngọkiliya ka kụ ẹhị yẹ jaabwọ ká ị̀nya nyamwụ ka ri. Ọ́ wa ẹka ịlẹ kị hi da ka Ẹka Ọtịrị Ang Ẹkpẹ ọkịla lẹ, ọ ka chị ị̀nya nya ọpyị ọọwa pwurwabwọ lẹlẹ.

¹⁹Ọ́ ri ká ọngọ ya ọpyị ọọwa ha-á tịtọ nyọka nyọ́ọ̄ tịrẹkpẹ aalẹ, ọ ka nwụ̀ okpoko jaabwọ ká ọngọkiliya hunọ ene kọ ka ya ebwo ookpokpo ẹ-ẹpwụ nya ịrụ nya ị̀nya nyamwụ haju. Ọọwa, ọpyị à hi ri ịnyamwụ lẹlẹ.

²⁰Ọ́ tị ri kọ nyọ́ọ̄ tịrẹkpẹ ene ka kị hwoo ha ọngọkịla ra lẹ aalẹ, ọ́ ka jẹ-ẹ̀ nyọ́ọ̄ kaka.

²¹Ụka ká Ẹka Ọtịrị Ang Ẹkpẹ ọkịla-á wẹ lẹ, ọpyị ọwẹ à ka ri nya Amkpaa pyịyọọ. Angịkiliya-à ka lọọ lụbwọ-lẹta lẹlẹ.

²²“Ó-ri ká ọngịnyị-ị́ hu ọpyị ọlẹ kọ ra ham am Amkpaa, ká ọpyị ọọwa-á tị ri nya ugbiyegu nyamwụ ka aalẹ,

²³ọngọkiliya ka hu ị̀nya nyamwụ nọ yahị me ẹka ịlẹ kị hi da ka Ẹka Ọtịrị Ang Ẹkpẹ ọkịla. Ọngọọwa ka nwụ̀ uri nya ọpyị ọọwa ẹnụ alẹ-alẹ. Okpoko ọọwa ri ịnyam am Amkpaa.

²⁴Ụka ká Ẹka Ọtịrị Ang Ẹkpẹ-ẹ́ wẹ, ị ka tịrị ọpyị ọwẹ ẹkpẹ ha ọngọ ri ayịdang bwu ọmwụ lee anyị ịtụma nyamwụ.

²⁵Ị̀nya nya ang myị ang kị ka chị ka ba ọlẹ kị hunọ jẹ.

²⁶“Ọnyị nya ọgbanyẹ nya ịkpịlọ bala ịna nyanụ ri ịnyam am Amkpaa ene-ene lẹ. Lẹẹlẹ, ọngọngọhẹ-ẹ́ tụtụm ka hu ọhẹ nyaa ha ọhaha ham kaka. Ụgba nya ẹna lee ọnyị-ọkpịlọ lee ọnyị nya embiri ri ịnyam am Amkpaa.

²⁷Ọ́ tị ri ọnyị nya ọgbanyẹ iyo ọlẹ kọ la charị-charị ka aalẹ, ị ka nyọ́ọ̄ tịrẹkpẹ bwula ọ-nwụ̀ uri jaabwọ kị hu ị̀nya nyamwụ nọ bala ọ-ya ebwo ookpokpo ẹ-ẹpwụ nya ịrụ nya ị̀nya nyamwụ hajwoo. Ó-ri kị nyọ́ọ̄ tịrẹkpẹ ka aalẹ, ị ka hwoo ha ọngọkịla ra lị̀nya ọlẹ kị hunọ.

²⁸“Ịngịngịhyẹ ká ọngịnyị-ị́ ya ham am Amkpaa nya ọpyịyọọ lẹ aalẹ, ị́ ka jẹ-ẹ̀ hwoo ra lee ọ-nyọ́ọ̄ tịrẹkpẹ kaka. Ọ́ ri ọngịnyị ehe lee iyo oleji lee ọpyị riri, ọ ri ịnyam am Amkpaa pyịyọọ, chajị ang myị ang kị ya ha ịịwẹ lẹ, ọ ri ịnyam lẹ.

²⁹“Ọngịnyị ehe ọhẹ-lọhẹ kị ya ham am Amkpaa nya ọpyịyọọ lẹ aalẹ, ị́ ka jẹ-ẹ̀ nyọ́ọ̄ tịrẹkpẹ kaka. Ị ka nwụ ọngọọwa pyii.

³⁰“Ebwo ookpokpo ẹ-ẹpwụ nya iwo bwu ang-ẹrụ nyanụ wuu, ọ́ ri ajẹ nya ang-ẹrụ lee egbe nya ekeji wẹwẹ, ri ịnyam am Amkpaa.

³¹Ó-ri ká ọngọhẹ-ẹ́ tịtọ nyọka nyẹ ọhaha ookpoko ẹ-ẹpwụ nya iwo ọlẹ kọ ya ha tịrẹkpẹ aalẹ, ọ ka nwụ̀ jaabwọ kị hunọ ene kọ ka ya ebwo ookpokpo ẹ-ẹpwụ nya ịrụ hajwoo.

³²Iyo oleji ookpokpo ẹ-ẹpwụ nya iyo iwo ọnyọnyọọnyị ri ịnyam am Amkpaa. Ụka kị juwa kpa iyo wa, ọnyị myị ọnyị kị wa ju okiriwo lẹ aalẹ, ọ ri ịnyam lẹ.

³³Ọngọlala-á ka yile iyo ịlẹhị́-ịlẹhị́ guri hi ịtịpyọ kpụ ụbwọ ka chụ ịtịpyọ lee ọ-ka ya ọhẹ nyẹ ọkịla ka. Ó-ri kọ ya iyo ọhẹ nyẹ ọkịla lẹ aalẹ, ịwa imimiiye ri ịnyam am Amkpaa lẹ. Ị́ ka jẹ-ẹ̀ nyáā tịrẹkpẹ kaka.”

³⁴Ehile ịwẹ à ri ịlẹ ká Amkpaa ya ha iMosisi ọ-Ọgbọdọ nya ịSayịnayị kọ ka ya ha ala Isirẹlụ lẹlẹ.