Read idege ALA ILIVAYỊ 3 Bible Online

ALA ILIVAYỊ 3 - idege bible

ALA ILIVAYỊ 3

¹“ ‘Ó-ri ká ọngọhẹ-ẹ́ ka ya ẹna kịla iya nya ọhọlawụlẹ[2] aalẹ, ẹna ọlẹng lee ọnyang ọlẹ ká ehe-é họ ka, ọ ka ya kịla iya ha Amkpaa lẹ.

²Ọngọọwa ka yụbwọ ba ẹna ọwẹ e-egbeju kọ ka nwọọ ọ-ọnang nya Ọdụ nya Amkpaa. Ọọwa, angịkiliya anyị nya Erọn à ka ya ịwọ nyamwụ hụ ịkịka inine nya ogidi wuu lẹlẹ.

³Ẹ̀ga nya iyo okiliya nya ọhọlawụlẹ ọwẹ ịhyẹ ka ri ịlẹ kọ ka ya kịla iya ọ-rụ ila ha Amkpaa. Ẹ́ga ịịwa ri eyo iluhye nya ang-ẹpwụ wuu

⁴bala egbachị imimiiye tụ eyo oluhye nyaa ẹ-ẹga nya ọhị bala ụbẹẹ ọlẹ kọ ka gba legbachị-egbachị.

⁵Ọọwa, angịkiliya-à ka jwaa ila wuu u-uhye nya iya ọ-rụ ila oluhye nya ogidi lẹlẹ. Ọwẹ à ri iya ọ-rụ ila lẹ. Iya ọwẹ kaa chị Amkpaa oru kwọkwọ.

⁶“ ‘Ọ́ tị ri ẹmwụ kọ ka ya kịla iya nya ọhọlawụlẹ ha Amkpaa aalẹ, ẹmwụ ọlẹng lee ọnyang ọlẹ ká ehe-é họ ka ọ ka kpa lẹ.

⁷Ó-ri ọkpịlọ kọ ka ya kịla iya, ọ ka kpọọ wẹ ijata nya Amkpaa.

⁸Ọ ka yụbwọ ba ọkpịlọ ọọwa e-egbeju lẹ, ọ ka nwọọ ị-ịlahị nya Ọdụ nya Amkpaa lẹlẹ. Angịkiliya ka ya ịwọ nyamwụ hụ ịkịka inine nya ogidi wuu.

⁹Ẹ̀ga nya iyo nya iya nya ọholawụlẹ ọwẹ ịlẹ kọ ka ya ha Amkpaa ri eyo bala itọọgbẹ ochii ọlẹ kị ka chị ju ọmwụ nya ukpunogu ọlabẹkpẹ chwẹẹ bala eyo oluhye nya ang-ẹpwụ wuu

¹⁰bala egbachị imimiiye tụ eyo oluhye nyaa ọ-ba ọhị ba bala ụbẹẹ ọlẹ kọ ka gba legbachị-egbachi.

¹¹Ọọwa, ọngọkiliya-à ka jwaa ila wuu u-uhye nya ogidi lẹlẹ. Ọwẹ à ri iya nya ang oriri ọ-kịla ha Amkpaa lẹ.

¹²“ ‘Ó-ri embiri kọ kpa kaka kịla iya ha Amkpaa aalẹ,

¹³ọ ka yụbwọ ba embiri ọọwa e-egbeju lẹ, ọ ka nwọọ ị-ịlahị nya Ọdụ nya Amkpaa lẹlẹ. Angịkiliya ka ya ịwọ nyamwụ hụ ịkịka inine nya ogidi wuu.

¹⁴Ẹ̀ga nya iyo ịlẹ kọ ka ya kịla iya ju ila ha Amkpaa ri eyo oluhye nya ang-ẹpwụ wuu

¹⁵bala egbachị imimiiye tụ eyo oluhye nyaa ẹ-ẹga nya ọhị bala ụbẹẹ ọlẹ kọ ka gba legbachị-egbachị.

¹⁶Ọọwa, ọngọkiliya-à ka jwaa ila wuu u-uhye nya ogidi lẹlẹ. Ọwẹ à ri iya nya ang oriri ọ-kịla ha Amkpaa lẹ. Iya ọwẹ chị Amkpaa oru kwọkwọ. Eyo nya ang okiliya wuu ri nya Amkpaa.

¹⁷“ ‘Anụ ala Isirẹlụ-ụ́ ka ri eyo lee ịwọ nya iyo kpong-kpong ka. Ọwẹ ri ehile ọlẹ kanụ ka kpa gbe oyi myị oyi ẹ-ẹga myị ẹga kanụ kụ.’ ”