Read idege ALA ILIVAYỊ 4 Bible Online

ALA ILIVAYỊ 4 - idege bible

ALA ILIVAYỊ 4

¹Ọọwa, Amkpaa-à byi iMosisi yẹkẹẹ,

²“Ya ehile ịlẹ wuu je ala Isirẹlụ yẹkẹẹ, ‘Ehile ịlẹ kanụ ka kpa ó-ri ká ọhọbịrị-ị́ gụ ọngọngọhẹ gụ họ bwula ọ-bịrị ọhẹ ẹ-ẹpwụ nya ehile nya Amkpaa-à lẹẹ lẹ.

³“ ‘Ó-ri olegbeju okiliya kọ họ ang onyobyi kpa abyị kaka chịchị alụma aalẹ, ọ ka kpa ụgba nya ẹna ọlẹng ọlẹ ká ehe-é họ ka kaka kịla iya ha Amkpaa chajị nya ọhọbịrị nyamwụ.

⁴Ọ ka kpa ẹna ọọwa wẹ ọnang nya Ọdụ nya Amkpaa. Ọ ka yụbwọ bọọ e-egbeju, kọ ka nwọọ i-ijata nya Amkpaa.

⁵Ọọwa, olegbeju okiliya-à ka chị́ ịwọ nya ẹna ọwẹ kpa ka ẹpwụ nya Ọdụ nya Amkpaa lẹlẹ.

⁶Ọ ka ya ụkụchụ ju ịwọ ọwẹ kọ ka nyoo pwáaa i-ijata nya Amkpaa ị-ịlahị nya ápwụ okeke ọlịgọgọ ugbabwọ irwiye.

⁷Ọọwa, olegbeju okiliya-à ka gu ịwọ ọwẹ chị ịpyịyẹ-pyịyẹ ịlịkpanggọ nya ogidi nya iya nya ịtangare ẹ-ẹpwụ nya Ọdụ nya Amkpaa lẹlẹ. Ọ ka ya ịwọ ohihi hụrụ ọ-ọmwụ nya ogidi nya iya ọ-rụ ila ọ-ọnang nya Ọdụ nya Amkpaa.

⁸Ọ ka gba eyo nya ẹna okiliya ọ-hụ́ ọhọbịrị ọwẹ wuu tụ eyo oluhye nya ang-ẹpwụ

⁹bala egbachị imimiiye bala eyo oluhye nyaa ẹ-ẹga nya ọhị bala ụbẹẹ ọlẹ kọ ka gba legbachị-egbachị.

¹⁰Ọọwa, ọngọkiliya-à ka jụ ẹ̀ga ịwẹ ila u-uhye nya ogidi nya iya ọ-rụ ila jaabwọ kọ kaa họ eyo nya iyo okiliya nya iya nya ọhọlawụlẹ lẹlẹ.

¹¹Ma, ọ ka hu ugba nya ẹna ọwẹ bala iyo nyamwụ wuu tụ egbeju bala ata bala ang-ẹpwụ tụ igbeene,

¹²tụ ẹ̀ga ihihi nya ẹna ọwẹ wuu kpa kpehe hi ịkampụ kele ka ẹga ọcharị-charị ọlẹ kii go agbụ chị. Ọọwa lẹ, kọ ka jwaa ila u-uhye nya ịwụ oluhye nya úgbùdù nya agbụ mẹ.

¹³“ ‘Ó-ri ká aluche nya Isirẹlụ wuu-ú họ ang onyobyi lọmamachịng ka bwula ọ-bịrị ọhẹ ẹ-ẹpwụ nya ehile nya Amkpaa aalẹ, ị la abyị.

¹⁴Ahyaahị kị jẹ ịwa nyị họ ang onyobyi lẹ, ị wu ụgba nya ẹna ọlẹng kpa warị nyọka ya kịla iya ọ-hụ́ ọhọbịrị mẹ. Ị ka kpa ẹna ọọwa wẹ ọnang nya Ọdụ nya Amkpaa.

¹⁵Ịgabwọ nya ala Isirẹlụ ka yabwọ ba ẹna ọwẹ e-egbeju lẹ, ị ka nwọọ ụ-ụwa lẹlẹ.

¹⁶Olegbeju okiliya ka chị́ ịwọ nya ẹna ọwẹ kpa ka ẹpwụ nya Ọdụ nya Amkpaa.

¹⁷Ọ ka ya ụkụchụ ju ịwọ ọwẹ kọ ka nyoo pwáaa ugbabwọ irwiye i-ijata nya Amkpaa ị-ịlahị nya ápwụ okeke ọlịgọgọ.

¹⁸Ọ ka gu ịwọ ọwẹ chị ịpyịyẹ-pyịyẹ ịlịkpanggọ nya ogidi nya iya nya ịtangare ẹ-ẹpwụ nya Ọdụ nya Amkpaa. Ọọwa, ọ ka ya ịwọ ohihi hụrụ ọ-ọmwụ nya ogidi nya iya ọ-rụ ila ọ-ọnang nya Ọdụ nya Amkpaa lẹlẹ.

¹⁹Ọ ka gba eyo nya ẹna ọwẹ wuu kọ ka jwaa ila u-uhye nya ogidi.

²⁰Jaabwọ kọọ họ ụgba nya ẹna ọlẹ kị ya kịla iya ọ-hụ́ ọhọbịrị, ịnyịnyị-ịnyịnyị ọ ka họ ẹna ọlẹ lẹ. Ịịwẹ ọ ka bwu kịla iya ọ-hụ́ ọhọbịrị nya alụma lẹ, Amkpaa-à ka hịnyọhi haa lẹlẹ.

²¹Ọ ka hu ẹna ọwẹ kpa kpehe hi ịkampụ kọ ka jwọọ ila jaabwọ kịị jụ ọlẹ kọ ri nya iya ọ-hụ́ ọhọbịrị nya olegbeju okiliya. Ọwẹ à ri iya ọ-hụ́ ọhọbịrị nya alụma lẹ.

²²“ ‘Ó-ri ká olegbeju-ú họ ang onyobyi lọmamachịng ka bwula ọ-bịrị ọhẹ ẹ-ẹpwụ nya ehile nya Amkpaa Ohe Oluhye nyamwụ aalẹ, ọ la abyị.

²³Ahyaahị kị mẹ abyị nyamwụ jọọ, ọ ka kpa oyichi ọlẹ ká ehe-é họ ka warị nya ang ọkiliya nyamwụ.

²⁴Ọ ka yụbwọ ba oyichi ọọwa e-egbeju. Ọọwa, ọ ka nwọọ i-ijata nya Amkpaa ẹ-ẹga kịị nwụ iyo nya iya ọ-rụ ila lẹlẹ. Ọwẹ à ri iya ọ-hụ́ ọhọbịrị lẹ.

²⁵Ọngọkiliya ka ya ụkụchụ gu ịwọ nya oyichi ọọwa chị ịpyịyẹ-pyịyẹ ịlịkpanggọ nya ogidi nya iya ọ-rụ ila. Ọọwa, ọ ka ya ịwọ ohihi hụrụ ọ-ọmwụ nya ogidi ọọwa lẹlẹ.

²⁶Ọ ka jụ eyo nyamwụ wuu ila u-uhye nya ogidi jaabwọ kọọ họ eyo nya iyo okiliya nya ọhọlawụlẹ. Ịịwẹ ọngọkiliya-à ka bwu kịla iya ọ-hụ́ ọhọbịrị nya olegbeju lẹ, Amkpaa-à ka hịnyọhi họọ lẹlẹ.

²⁷“ ‘Ó-ri ká ọngọhẹ bwu ẹpwụ nya ala Isirẹlụ-ụ́ họ ang onyobyi lọmamachịng ka bwula ọ-bịrị ọhẹ ẹ-ẹpwụ nya ehile nya Amkpaa aalẹ, ọ la abyị.

²⁸Ahyaahị kị mẹ abyị nyamwụ jọọ, ọ ka kpa embiri ọlẹ ka ehe-é họ ka warị nya ang okiliya nyamwụ.

²⁹Ọ ka yụbwọ ba embiri ọọwa e-egbeju. Ọọwa, ọ ka nwọọ ẹ-ẹga kịị nwụ iyo nya iya ọ-rụ ila lẹlẹ.

³⁰Ọngọkiliya ka ya ụkụchụ gu ịwọ nya embiri ọọwa chị ịpyịyẹ-pyịyẹ ịlịkpanggọ nya ogidi nya iya ọ-rụ ila. Ọọwa, ọ ka ya ịwọ ohihi hụrụ ọ-ọmwụ nya ogidi ọọwa lẹlẹ.

³¹Ọngọọwa ka gba eyo nyamwụ wuu jaabwọ kịị gba eyo nya iyo okiliya nya ọhọlawulẹ. Ọọwa, ọngọkiliya-à ka jwaa ila u-uhye nya ogidi, ká iya ọwẹ ka chị Amkpaa oru kwọkwọ lẹlẹ. Ịịwẹ ọngọkiliya-à ka bwu kịla iya ọ-hụ́ ọhọbịrị nya ọngọọwa lẹ, Amkpaa-à ka hịnyọhi họọ lẹlẹ.

³²“ ‘Ọ́ tị ri ọkpịlọ kọ la nya ang okiliya ọ-hụ́ ọhọbịrị nyamwụ aalẹ, ọkpịlọ ọnyang ọlẹ ká ehe-é họ ka ọ ka kpa lẹ.

³³Ọ ka yụbwọ bọọ e-egbeju lẹ, ọ ka nwọọ ẹ-ẹga kịị nwụ iyo ị-kpa kịla iya ọ-rụ ila lẹlẹ.

³⁴Ọngọkiliya ka ya ụkụchụ gu ịwọ nya ọkpịlọ ọọwa chị ịpyịyẹ-pyịyẹ ịlịkpanggọ nya ogidi nya iya ọ-rụ ila lẹ, ọ ka ya ohihi nyamwụ hụrụ ọ-ọmwụ nya ogidi ọọwa lẹlẹ.

³⁵Ọ ka gba eyo nyamwụ jaabwọ kọ họ ịnya ọkpịlọ ọlẹ kị ya kịla iya nya ọhọlawụlẹ. Ọọwa lẹ, ọ ka jwaa ila ogidi u-uhye nya iya nya ang oriri ịlẹ kị kịla ha Amkpaa lẹlẹ. Ịịwẹ ọngọkiliya-à ka bwu kịla iya ọ-hụ́ ọhọbịrị nya ọngọọwa lẹ, Amkpaa-à ka hịnyọhi họọ lẹlẹ.