Read idege ALA ILIVAYỊ 5 Bible Online

ALA ILIVAYỊ 5 - idege bible

ALA ILIVAYỊ 5

¹“ ‘Ó-ri kị wụrụ ọngịnyị nyọka họ ibeenu u-uhye nya ẹla ọlẹ kọ jẹ bwula ọ-kpẹhị nya ịlọmwụ yẹ lee o-wo lụrụ nya ịlọmwụ, kọ tị pwa ibeenu ọọwa ọhọhọ aalẹ, ọ ka yẹ akama chajị nya ọọwa.

²“ ‘Ó-ri ká ọngịnyị-ị́ ya ịnyịrọ kịla ang-ibyi lala ogu nya iyo ọlẹpwamẹ lee ogu nya ẹna lee ogu nya ang ọwụlọọ-wụlọ ị-ịpyị la ọjẹjẹ-ka aalẹ, ahyaahị kọ jẹ ibyi ọwẹ lẹ, ọwa ayịdang chịrị bala ọ-la abyị lẹ.

³“ ‘Ó-ri ká ọngịnyị-ị́ ya ịnyịrọ kịla ang-ibyi ọhẹ-lọhẹ ọlẹ kọ bwu ịnyịrọ nya ọngịnyị ehe la ọjẹjẹ-ka aalẹ, ahyaahị kọ jẹ ibyi ọwẹ lẹ, ọwa ayịdang la abyị lẹ.

⁴“ ‘Ó-ri ká ọngịnyị-ị́ nwa iro ọwaabwọ nya ẹla ọnyịịla lee ọtịpyọ aalẹ, ahyaahị kọ jẹ ụma nya iro ọlẹ kọ nwa wẹ lẹ aalẹ, ọ la abyị lẹ.

⁵“ ‘Ụka ká ọngịnyị-ị́ jẹ abyị nya ịlọmwụ bwula ụgbẹyị ọhẹ nya ịwẹ aalẹ, ọ ka ya ọhọbịrị ọlẹ kọ họ dodehe.

⁶Ọngọọwa ka kpa ọkpịlọ ọnyang lee embiri warị nyọka ya kịla iya ha Amkpaa nya akama ọyẹyẹ chajị nya ọhọbịrị ọlẹ kọ họ. Ọọwa, ọngọkiliya-à ka kịla iya ọ-hụ́ ọhọbịrị chajị nyamwụ lẹlẹ.

⁷“ ‘Ọ́ tị ri kọ họ ang kpụ ọkpịlọ lee embiri ka aalẹ, ọ ka nwụ uri chajị nya ọhọbịrị nyamwụ bwula ọ-kpa enewulo imiiye lee ẹchụ́ nya ikiripete imiiye wẹ ka kịla iya ha Amkpaa. Ị ka ya ọhẹ nya ịchịnụ imiiye ịịwa kịla iya ọ-hụ́ ọhọbịrị. Ị ka ya ọkịla kịla iya ọ-rụ ila.

⁸Ọ ka kpa ịchịnụ ịwẹ wẹ ọngọkiliya. Ọọwa, ọngọkiliya-à ka ya ọchịnụ ọhẹ kịla iya ọ-hụ́ ọhọbịrị jene lẹlẹ. Ọ ka pyọọ imyi dachị la ọ-chọọ egbeju eku hi ido nyamwụ ka.

⁹Ọ ka nyí ịwọ nyamwụ hụ ịkịka nya ogidi, kọ ka pá ịwọ ohihi nyamwụ hụ ọmwụ nya ogidi. Ọwẹ à ri iya ọ-hụ́ ọhọbịrị lẹ.

¹⁰Ọọwa, ọ ka ya ọchịnụ oheeye kịla iya jaabwọ ká ọhọhọ nya iya ọ-rụ ila ri lẹlẹ. Ịịwẹ ọngọkiliya-à ka bwu kịla iya ọ-hụ́ ọhọbịrị nya ọngọọwa lẹ, Amkpaa-à ka hịnyọhi họọ lẹlẹ.

¹¹“ ‘Ọ tị ri kọ họ ang kpụ enewulo imiiye lee ẹchụ́ nya ikiripete imiiye ka aalẹ, ọ ka kpa okolo ookpokpo nya ọrụ nya ajẹ nya ang-ẹrụ nyọka ya kịla iya ọ-hụ́ ọhọbịrị. Ọ́ ka ya ida lee ịtangare ju ọrụ nya ajẹ nya ang-ẹrụ ọọwa ka, chajị iya ọ-hụ́ ọhọbịrị à wẹ̄ lẹ, i-iya nya ajẹ nya ang-ẹrụ ọ ri ka.

¹²Ọ ka kpa wẹ ọngọkiliya lẹ, ọngọkiliya-à ka chụ ọrụ nya ajẹ nya ang-ẹrụ ọwẹ myị ẹpwụtụbwọ nya ọnụ-odo wọnụ nya ohihi ju lẹ, ọ ka jwọọ ila u-uhye nya ogidi bala iya ịkịla ịlẹ kị kịla ha Amkpaa lẹlẹ. Ọwẹ à ri iya ọ-hụ́ ọhọbịrị lẹ.

¹³Ịịwẹ ọngọkiliya-à ka bwu kịla iya ọ-hụ́ ọhọbịrị nya ọngọọwa lẹ, Amkpaa-à ka hịnyọhi họọ lẹlẹ. Ohihi nya ọrụ nya ang okiliya ọwẹ ri nya ọngọkiliya jaabwọ kọọ la ụka nya iya nya ajẹ nya ang-ẹrụ.’ ”

¹⁴Amkpaa byi iMosisi yẹkẹẹ,

¹⁵“Ó-ri ká ọngọhẹ-ẹ́ họ ang onyobyi lọmamachịng ka bwula ọ-kpa ọhaha ịlẹ kị ri nya Amkpaa kịlọọ ka aalẹ, ọ ka kpa ang okiliya ọ-wụ́ abyị hi ịlọmwụ wẹ Amkpaa. Iyo ọlẹ kọ ka kpa ri omilodo. Omilodo ọọwa ka ri ọlẹ ká ehe-é họ ka, kọ myẹhị pwoku okpoko onyoowuru ọlẹ kị hunọ.

¹⁶Ọ ka nwụ uri nya ọhaha ọlịgọgọ ọlẹ kọ pẹhi-ì wẹ bala ọ-ka ya ebwo ookpokpo ẹ-ẹpwụ nya irụ nya ọhaha ọọwa hajwoo. Ọ ka hwoo ha ọngọkiliya. Ọọwa, ọngọkiliya-à ka ya omilodo ọọwa kịla iya ọ-wụ́ abyị nya ọngọọwa lẹ, Amkpaa-à ka hịnyọhi họọ lẹlẹ.

¹⁷“Ó-ri ká ọngọhẹ-ẹ́ họ ang onyobyi lọmamachịng ka bwula ọ-bịrị ọhẹ ẹ-ẹpwụ nya ehile nya Amkpaa aalẹ, ọ la abyị. Ọ ka yẹ akama chajị nya ọọwa.

¹⁸Ọ ka kpa omilodo ọlẹ ká ehe-é họ ka, kọ myẹhị pwoku okpoko onyoowuru ọlẹ kị hunọ wẹ ọngọkiliya nya ang okiliya ọ-wụ́ abyị. Ọọwa, ọngọkiliya-à ka kịla iya ọ-hụ́ ọhọbịrị nyamwụ chajị nya ọhọbịrị ọlẹ kọ họ lẹ, Amkpaa-à ka hịnyọhi họọ lẹlẹ.

¹⁹Ọwẹ à ri iya ọ-wụ́ abyị hi ịlọmwụ chajị nya ọhọbịrị ọlẹ kọ họ ba Amkpaa lẹ.”