Read idege ALA ILIVAYỊ 6 Bible Online

ALA ILIVAYỊ 6 - idege bible

ALA ILIVAYỊ 6

¹Ọọwa, Amkpaa-à byị iMosisi yẹkẹẹ,

²“Ọhẹka ọngọhẹ nyanụ ka họ ang onyobyi ba Amkpaa bwula ọ-họ ọhẹ nya ịhọbịrị ịlẹ myị. Ọ ka me ọnọọkịla je ọngịnyị ọọnamwụ ya ang ọlẹ kịị nyị ya nọ a-ang ẹ-ẹga nyọwa lẹẹ nyị byi lẹ lee nyị hwoo yi oyi lẹ lee ọ-họ ọọnamwụ ọọwa ri kịrọrọ myị.

³Ọ tị ka ye ang ọlẹ kọ byi, juwa pwarwarụ lee ọ-nwa iro ọnọọkịla lee ọ-họ ụma nya ọhọbịrị ọkịla o-me ọlịnyị myị.

⁴Ó-ri kọ họ ang onyobyi ọlịịwẹ ọhẹ aalẹ, ọ la abyị. Ọ ka tịrị ang ọlẹ kọ hu yi oyi lẹẹ o-ye la bwula ịkọnị lee ọlẹ kị ya nọ a-ang ẹ-ẹga nyamwụ lee ang obyibyi ọlẹ kọ ye lee ang myị ang ọlẹ kọ nwa iro ọnọọnkịla u-uhye nyamwụ ẹkpẹ ha ayịdang.

⁵Ọ ka tịrị ang ọkịla ọnyị myị ọnyị ọlẹ kọ nwa iro ọnọọkịla chajị nyamwụ ẹkpẹ ịnyịnyị. Ọ ka nwụ uri nya ang ọọwa kpangga jịra tịrẹkpẹ ha ayịdang nyamwụ bala ọ-ka ya ebwo ookpokpo ẹ-ẹpwụ nya ịrụ nya ang ọọwa hajwoo ẹnụ kọ ka kịla iya ọ-wụ́ abyị hi ịlọmwụ.

⁶Ọ ka kpa omilodo ọlẹ ká ehe-é họ ka, kọ myẹhị pwoku ọlẹ kị hunọ wẹ ọngọkiliya nyọka ya kịla iya ọ-wụ́ abyị hi ịlọmwụ ha Amkpaa.

⁷Ọọwa, ọngọkiliya-à ka kịla iya ọ-hụ́ ọhọbịrị wọnụ nyamwụ ju lẹ, Amkpaa-à ka hịnyọhi họọ lẹlẹ.”

⁸Amkpaa byi iMosisi yẹkẹẹ,

⁹“Ya ehile ịlẹ da Erọn bala anyị alẹng nyamwụ ká byaa yẹkẹẹ, ‘Ehile chajị nya iya ị-rụ ila ọkịlaakịla à lẹẹ lẹ. Ị ka pẹhi iyo okiliya ọ-rụ ila nọ u-uhye nya ogidi lodu-odu gbee da ka ahị ọpyẹpyẹ ọọnamwụ, la ila juwa wuru jwoo ụka wuu.

¹⁰Ọọwa, ọngọkiliya-à ka hu awụrụ ogbileji nyamwụ kụrụ bala ọ-ya ịbante ju lẹ, ọ ka go agbụ nya iya ọwẹ bwu uhye nya ogidi kọ ka ya guru ịkịka nya ogidi lẹlẹ.

¹¹Ọọwa, ọ ka pwọ ang ịkụrụ-kụrụ ịwẹ, go ịkịla kụrụ lẹ, ọ ka go agbụ ịịwa kpa kpehe hi ịkampụ kaka guru ẹ-ẹga ọcharị-charị ọhẹ lẹlẹ.

¹²Ila oluhye nya ogidi ọwẹ kà juwa wuru ụka wuu. Ị́ ka pẹ hyoo myị̀ ụka ọhẹ-lọhẹ ka. Ọngọkiliya ka chụ ịwụ jwoo lụtụrụ ẹnụ myị ẹnụ kọ ka ya iyo okiliya ọ-rụ ila guru memeeme u-uhye nyamwụ bala ọ ka jụ eyo nya iyo nya iya nya ọhọlawụlẹ ila ịnyịnyị.

¹³Ila oluhye nya ogidi ọwẹ kà juwa wuru ụka wuu. Ị́ ka pẹ hyoo myị̀ ụka ọhẹ-lọhẹ ka.

¹⁴“ ‘Ehile chajị nya iya nya ajẹ nya ang-ẹrụ à lẹẹ lẹ. Ọngọkiliya ọnyị nya Erọn ọhẹ à ka kịla iya ọwẹ ha Amkpaa ị-ịlahị nya ogidi lẹ.

¹⁵Ọ ka chụ ọrụ nya ajẹ nya ang-ẹrụ ọọwa lida-lida bala ịtangare oluhye nyamwụ myị ẹpwụtụbwọ. Ọọwa, ọ ka jwoo ila nya ọnụ-odo wọnụ nya ohihi ju u-uhye nya ogidi ha Amkpaa lẹlẹ.

¹⁶Ohihi nya ọrụ nya ajẹ nya ang-ẹrụ ọọwa ri nya Erọn bala anyị alẹng nyamwụ kị ka ya ri. Ị tị ka ya họ ịkaa ọmịrịị-mịrị-ka kpá ene. Ẹga ọlịgọgọ ọlẹ kọ ri ọdọda nya Ọdụ nya Amkpaa mịlẹ-mịlẹ ị ka hụ ryoo lẹ.

¹⁷Ị́ ka ya ang ọ-mịrị ịkaa dala ịkaa ọwẹ kpa họ ka. Am Amkpaa ya ebwo ọwẹ haa bwu ẹpwụ nya iya ịlẹ kị kịla ham. Iya ọwẹ la ịgọgọ lụmẹ jaabwọ ká iya ọ-hụ́ ọhọbịrị bala iya ọ-wụ́ abyị hụrụ la.

¹⁸Ọnyị ọlẹng ọtụma ọnyị myị ọnyị nya Erọn ka ri ebwo nya ang okiliya ọwẹ myị kịlahị-ịlahị pyịyọọ, chajị ọwẹ ri ọlẹ kị hunọ bwu ẹpwụ nya iya ịlẹ kị kịla ha Amkpaa. Ọngọngọhẹ lee ịngịngịhyẹ ọkịla kọ ya ịnyịrọ gu iya ọwẹ aalẹ, ọ kpụhị lẹ, ọ ka yẹ akama chajị nya ọọwa.’ ”

¹⁹Amkpaa byi iMosisi yẹkẹẹ,

²⁰“Ang okiliya ọlẹ ká ọngọngọọng nya Erọn bala anyị alẹng nyamwụ ka hu ha Amkpaa ẹnụ kị ka yụbwọ nịraa e-egbeju nyọka ri angịkiliya ri okolo ookpokpo nya ọrụ nya ajẹ nya ang-ẹrụ. Ọ ka ya ang ọwẹ kịla iya ẹnụ myị ẹnụ. Ọ́ ya ẹhya nyamwụ ọhẹ kịla iya lụtụrụ, ọ ka ya ẹhya ọkịla kịla iya lobyi.

²¹Ị ka ya ida dalọọ kpa họ u-udiyo. Ị ka bwoo hwẹẹhwẹẹ ene kị ka ya kịla iya ọlẹ kọ ka chị Amkpaa oru kwọkwọ.

²²Ọnyị ọlẹng ọtụma ọnyị myị ọnyị nya Erọn ọlẹ kị ya ida hụ nyọka ri olegbeju okiliya ku ọmwakpa nyamwụ ka kịla iya ọwẹ kịlahị-ịlahị pyịyọọ. Ị ka jụ iya ọwẹ ila wuu lẹpwụ-lẹpwụ ha Amkpaa.

²³Ị ka jụ iya nya ajẹ nya ang-ẹrụ ọnyị myị ọnyị ka ọngọkiliya-á kpa warị ila wuu lẹpwụ-lẹpwụ. Ị́ ya ụpịlẹ nyamwụ ọhẹ-lọhẹ ri kpong-kpong ka.”

²⁴Amkpaa byi iMosisi yẹkẹẹ,

²⁵“Ya ehile ịlẹ da Erọn bala anyị alẹng nyamwụ ká byaa yẹkẹẹ, ‘Ehile chajị nya iya ọ-hụ́ ọhọbịrị ọkịlaakịla à lẹẹ lẹ. I-ijata nya Amkpaa ẹ-ẹga kị nwụ iyo nya iya ọ-rụ ila ị ka nwụ iyo nya iya ọ-hụ́ ọhọbịrị ịnyịnyị lẹ. Iya ọwẹ la ịgọgọ lụmẹ.

²⁶Ọngọkiliya ọlẹ kọ kpa ụbwọ kịla iya ọwẹ ka ya iyo nya iya ọọwa ri ẹ-ẹga ọlịgọgọ ọlẹ kọ ri ọdọda nya Ọdụ nya Amkpaa.

²⁷Ọngọngọhẹ[3] ọkịla kọ ya ịnyịro gu iya ọwẹ aalẹ, ọ kpụhị. Ọ́-ri ká ịwọ nyamwụ-ụ́ da hụ ang ọkụrụ-kụrụ ọhẹ aalẹ, ị ka hwọọ ẹ-ẹga ọlịgọgọ.

²⁸Ó-ri kị kpụ́ ang okiliya ọọwa ẹ-ẹpwụ nya ẹchụ nya ọpyị aalẹ, ị ka be ẹchụ ọọwa ene. Ọ́ tị ri ẹchụ nya oje kị kpa kpọọ aalẹ, ị ka hwọọ la ichocho kị ka ya enyi wụlọọ.

²⁹Ọlẹng ọnyị myị ọnyị bwu ugbiyegu nya angịkiliya kà ri iyo ọọwa myị. Iyo ọọwa la ịgọgọ lụmẹ.

³⁰Iyo okiliya ọ-hụ́ ọhọbịrị ọnyị myị ọnyị kị tị kpa ịwọ nyamwụ ka ẹpwụ nya Ọdụ nya Amkpaa kaka kịla iya ẹ-Ẹga Ọlịgọgọ aalẹ, ị́ ka ryoo kaka. Ị ka jwọọ ila.