Read idege ALA ILIVAYỊ 7 Bible Online

ALA ILIVAYỊ 7 - idege bible

ALA ILIVAYỊ 7

¹“ ‘Ehile chajị nya iya ọ-wụ́ abyị hụrụ ọkịlaakịla à lẹẹ lẹ. Iya ọwẹ la ịgọgọ lụmẹ.

²Ẹga kịị nwụ iyo okiliya ọ-rụ ila mịlẹ-mịlẹ ị ka nwụ iyo nya iya ọlẹ ịnyịnyị lẹ. Ị ka ya ịwọ nyamwụ yẹ hụ ịkịka inine nya ogidi okiliya.

³Ị ka ya eyo ọlẹ̀ga ọnyị myị ọnyị nyamwụ wuu kịla iya tụ itọọgbẹ ochii bala eyo ọlẹ kọ kụrụ ang-ẹpwụ

⁴bala egbachị imimiiye tụ eyo oluhye nyaa ba ọhị ba bala ụbẹẹ ọlẹ kọ ka gba legbachị-egbachị.

⁵Ọngọkiliya ka jụ eyo ịwẹ wuu ila u-uhye nya ogidi ha Amkpaa. Ọwẹ à ri iya ọ-wụ́ abyị hụrụ lẹlẹ.

⁶Ọlẹng ọnyị myị ọnyị bwu ugbiyegu nya ọngọkiliya ka ri iyo nya iya ọọwa myị. Ẹga ọlịgọgọ ị tị ka hụ ryoo lẹ, chajị iya ọwẹ la ịgọgọ lụmẹ.

⁷“ ‘Ehile ookpokpo ọlẹ kọ ri nya iya ọ-hụ́ ọhọbịrị bala iya ọ-wụ́ abyị ri yẹkẹẹ, iyo ọ-kpa kịla iya ụma imimiiye ịwẹ ri nya ọngọkiliya ọlẹ kọ kpa ụbwọ kịla iya ọọwa.

⁸Ugba nya iyo ọlẹ kị ya kịla iya ọ-rụ ila ri nya ọngọkiliya ọlẹ kọ kịla iya ọọwa.

⁹Iya nya ajẹ nya ang-ẹrụ ọnyị myị ọnyị kị họ i-ila lee ọ-kpụ́ ẹ-ẹchụ lee ọ-ga udiyo ka ri nya ọngọkiliya ọlẹ kọ kịla iya ọọwa.

¹⁰Ma, iya nya ajẹ nya ang-ẹrụ ọlịmẹ-lịmẹ wuu ọlẹ kị ya ida jwoo lee o-ri ọlọrụ ka ri nya anyị alẹng nya Erọn angịkiliya. Ị ka gọọ wuu lawụlẹ memeeme.

¹¹“ ‘Éhile chajị nya iya nya ọhọlawụlẹ ịlẹ kị ka kịla ha Amkpaa-à lẹẹ lẹ.

¹²Ó-ri ká ọngịnyị ka kịla iya ọlẹ nya ọ-ji Amkpaa obe aalẹ, ang ọlẹ kọ ka hu ha bala iyo okiliya ọwẹ ri ịkaa ọlẹ kị ya ang ọmịrị ịkaa ju ka, kị tị ya ida jwoo. Ọ ka kpa ịkama ịlẹ kị gu ida tudu bala ịkịra ịlẹ kị kpa ọrụ nya ang ọnyịịla-ọnyịịla ọlẹ kị ya ida ju yẹẹyẹẹ họ ịnyịnyị.

¹³Ọ́ ba ang ịwẹ kem ka, ọngọọwa ka kpa abẹ nya ịkaa ịmịrịị-mịrị wẹ ka ha ịnyịnyị.

¹⁴Ọ ka hu ẹbẹ nya ịkaa ookpokpo bwu ẹpwụ nya ebwo nya ịkaa ọnyọnyọọnyị ịwẹ ha ọhaha ha Amkpaa. Ọọwa ka ri nya ọngọkiliya ọlẹ kọ ya ịwọ nya iyo nya iya nya ọhọlawulẹ ọwẹ yẹ hụ ogidi.

¹⁵Ị ka ri iyo ọlẹ kị ya kịla iya ọwẹ ẹnụ alẹ-alẹ ọọwa. Ụpịlẹ nyamwụ-ụ́ ka hi ọchacha kpong-kpong ka.

¹⁶“ ‘Ọ́ tị rị ká iya nya ọhọlawụlẹ nya ọngọọwa-á ri nyọka họ ọnụ ọmyịmyị nyamwụ jịra lee ịnyọka hu ha jaabwọ kọ họọ bwu ọkịlẹtụ nya ịlọmwụ aalẹ, í-iyo ọọwa wuu ị̄ ka ri ẹnụ alẹ-alẹ pyiipyii ka. Ị ka ya ohihi nyamwụ ri ahị ọpyẹpyẹ ọọnamwụ myị.

¹⁷Ọnyị myị ọnyị nya iyo ọwẹ kọ tị hi da ka ẹnụtụrụ ọhata aalẹ, ị ka chọọ ila hụrụ.

¹⁸Ó-ri kị hu ọhẹ-lọhẹ nya iyo ọwẹ kọ hi da ka ẹnụtụrụ ọhata-à wẹ ri aalẹ, Ohe Oluhye-é ka ye iya ọkịlaakịla ọwẹ ka. Ị́ tị ka hu iya ọwẹ lala ang ọnyịịla ọhọhọ nya ọngọlẹ kọ kpa ọhaha ọwẹ warị ka, chajị ọ chịrị lẹ. Ọng myị ọng kọ hwoo ri ka yẹ akama chajị nya ọọwa.

¹⁹“ ‘Ó-ri ká iyo nya ang okiliya ọwẹ-ẹ́ ya ịnyịrọ kịla ịngịngịhyẹ ọlẹ kọ ri ang-ibyi aalẹ, ị́ ka ryoo kaka. Ị ka chọọ ila hụrụ.

²⁰Ma, ọngọ kpa ịnyịrọ libyi kaka ri iyo ọlẹ kị ya kịla iya ha Amkpaa aalẹ, ị ka be ọngọọwa deeji hi ẹpwụ nya ala Isirẹlụ.

²¹Ó-ri ká ọngọngọhẹ-ẹ́ ya ịnyịrọ gu ụma nya ang-ibyi ọhẹ-lọhẹ ọlẹ kọ bwu ịnyịrọ nya ọngịnyị ehe lee ịnya iyo oleji, kọ tị hu iyo ọlẹ kị ya kịla iya ha Amkpaa ri aalẹ, ị ka be ọngọọwa deeji hi ẹpwụ nya ala Isirẹlụ.’ ”

²²Amkpaa byi iMosisi yẹkẹẹ

²³“Aa byi ala Isirẹlụ mẹ, ‘ọngọngọhẹ nyanụ-ụ́ ka ri eyo nya ẹna lee ịnya ọkpịlọ lee ịnya embiri koo.

²⁴Ánụ ka ri eyo nya iyo ọlẹ kọ gbu igu-adoohe lee ịnya ọlẹ ká iyo ọnyẹẹgẹga nwụ ka. Ma, anụ ka kpa họ ang ọkịla myị.

²⁵Ọngọngọhẹ kọ ri eyo nya iyo ọlẹ kị ka jẹ-ẹ̀ ya kịla iya ju ịla Amkpaa aalẹ, ị ka be ọngọọwa deeji hi ẹpwụ nya ala Isirẹlụ.

²⁶Ọ́ ba ọọwẹ ka, ẹga myị ẹga kaanụ ala Isirẹlụ-ụ́ kụkụ, anụ ri ịwọ nya ọchịnụ lee ịnya iyo oleji kpong-kpong ka.

²⁷Ọngọngọhẹ kọ ri ịwọ lẹ aalẹ, ị ka be ọngọọwa deeji hi ẹpwụ nya ala Isirẹlụ.’ ”

²⁸Amkpaa byi iMosisi yẹkẹẹ,

²⁹“Aa byi ala Isirẹlụ mẹ, ‘Ọng myị ọng kọ ka kịla iya nya ọhọlawụlẹ, ka kpa ebwo ọhẹ nya ang okiliya ọwẹ wẹ Amkpaa nya ang-ahị ọdatị-datị.

³⁰Ọngọọwa-à ka kpa ang okiliya ọ-rụ ila ọwẹ warị lụbwọ nya ịlọmwụ lẹ. Ọ ka kpa eyo bala ẹmẹ nya iyo ọwẹ warị kọ ka yaa kịla iya o-nyí kile-kile ha Amkpaa bwula o-nyaa kile-kile i-ijata nyamwụ.

³¹Ọngọkiliya ka ju eyo ọọwa ila u-uhye nya ogidi. Ẹmẹ tị ka ri nya angịkiliya anyị nya Erọn.

³²Ugbẹta nya upwuriri à ri ẹ̀ga ọlẹ kị ka hu ha ọngọkiliya bwu ẹpwụ nya iya nya ọhọlawụlẹ lẹ.

³³Ọngọkiliya ọlẹ kọ kpa ụbwọ hu ịwọ bala eyo nya iya ọwẹ ha à ka la ugbẹta nya upwuriri ọọwa lẹ.

³⁴Am Amkpaa ye ẹmẹ ọlẹ kị ya ha nya ang-ahị ọdatị-datị bala ugbẹta ọlẹ kị hu ha wẹ ịnyịnyị bwu ẹga nyanụ anụ ala Isirẹlụ lẹ. M̀ tị gyaa ha Erọn bala anyị alẹng nyamwụ angịkiliya lẹ. Ebwo ọlẹ kanụ ka ya ha angịkiliya à wẹ pyịyọọ lẹlẹ.’ ”

³⁵Ebwo ọlẹ kịị ya ha Erọn bala anyị alẹng nyamwụ bwu ẹpwụ nya iya ịlẹ kịị kịla ha Amkpaa bwu ẹnụ-ẹnụ kị hwaa nyọka ri angịkiliya à wẹ lẹ.

³⁶Ẹnụ ọọwa, Amkpaa-à da ala Isirẹlụ ehile nyọka ya ebwo ịwẹ haa bwu ẹpwụ nya iya ịlẹị kịla kị ka ri ịnyaa pyịyọọ lẹ.

³⁷Ịwẹ wuu à ri ehile chajị nya iya ọ-rụ ila bala iya nya ajẹ nya ang-ẹrụ bala iya ọ-hụ́ ọhọbịrị bala iya ọ-wụ́ abyị bala iya nya ida ọ-hụ ọngịnyị hụ bala iya nya ọhọlawụlẹ lẹlẹ.

³⁸Amkpaa-à ya ehile ịlẹ wuu ha iMosisi ọ-Ọgbọdọ nya nya ịSayịnayị u-ugbileji ẹnụ kọ byi ala Isirẹlụ ya nyị kịla iya họwa mẹ lẹ.