Read idege ALA ILIVAYỊ 8 Bible Online

ALA ILIVAYỊ 8 - idege bible

ALA ILIVAYỊ 8

¹Ọọwa, Amkpaa-à byi iMosisi yẹkẹẹ,

²“Kpa Erọn bala anyị alẹng nyamwụ wẹ ọnang nya Ọdụ Ọlịgọgọ, ká go ang ịkụrụ-kụrụ nya angịkiliya bala ida ọlịgọgọ bala ẹna ọlẹng ọlẹ kị ka ya kịla iya ọ-hụ́ ọhọbịrị bala imilido imiiye bala udo nya ịkaa ịmịrịị-mịrị-ka warị mẹ.

³Ọọwa lẹ, ká wụrụ ala Isirẹlụ wuu kaka jịra ụ-ụwa mẹ.”

⁴IMosisi họ jaabwọ ká Amkpaa dọọ ehile nyị họ lẹ, ala Isirẹlụ à tụguru ọ-ọnang nya Ọdụ nya Amkpaa lẹlẹ.

⁵Ọọwa, ọ byaa yẹkẹẹ, “Ang ọlẹ ká Amkpaa da ehile nyị họ a lẹẹ kam wẹẹ ka họ lẹ.”

⁶Ọọwa, iMosisi à kpa Erọn bala anyị alẹng nyamwụ wẹ ịlahị lẹ, ọ hyaa enyi lẹlẹ.

⁷Ọ hu awụrụ ọlẹ kị nọmwụ ju bala ọlẹ kọ ri ogbileji kụrụ Erọn. Ọ ya apwụ ọchọhị chọọ. Ọọwa, ọ ya awụrụ nya ẹfọdụ dọọ u-uhye bala o-wu ori ọlẹ kị nụ yẹẹyẹẹ nya ẹfọdụ ọwẹ do bwọọ ọ-ọhị lẹlẹ.

⁸Ọ ya ang ọdọkịlẹtụ kụrwọọ lẹ, ọ ya Urim bala iTumim[4] jwoo ẹ-ẹpwụ lẹlẹ.

⁹IMosisi hu apwụ ọkụrụ egbeju kụrụ Erọn. Ọọwa, ọ ya ang ọpapịla nya okpoko ịgọm ọhẹ ba apwụ ọkurụ egbeju ọwẹ nya ang-ẹjẹẹ nya ọchụchụ nya Erọn jaabwọ ká Amkpaa dọọ ehile nyị họ lẹlẹ.

¹⁰Ọọwa, iMosisi à hu ida ọlịgọgọ lẹ, ọ ya hụ Ọdụ nya Amkpaa bala ang ịlẹpwụ nyamwụ wuu lẹlẹ. Ịịwẹ ọ bwu chaa ịgọgọ ha Amkpaa lẹ.

¹¹Ọ nyí ida ọlịgọgọ ọwẹ hụ ogidi ugbabwọ irwiye nyọka chọọ ịgọgọ bala ang-abwọ ị-kpa họ ụkụrwọ u-uhye nyamwụ wuu bala ẹja ọtabwọ bala ọmwụ nyamwụ ha Amkpaa.

¹²Ọ chị Erọn ịgọgọ bwula ọ-ya ida ọlịgọgọ hwọọ e-egbeju.

¹³Ọọwa, iMosisi à kpa anyị alẹng nya Erọn wẹ ịlahị lẹlẹ. Ọ ya ịwụrụ kụrwaa, ya ịpwụ ịchọhị chaa bala ọ-ya ikpo kụrwaa jaabwọ ká Amkpaa dọọ ehile ya nyị họ.

¹⁴Ọọwa, iMosisi à kpa ẹna ọlẹng ọlẹ kị ka ya kịla iya ọ-hụ́ ọhọbịrị warị lẹ, Erọn bala anyị alẹng nyamwụ à yabwọ bọọ e-egbeju lẹlẹ.

¹⁵IMosisi nwụ ẹna ọọwa, ọ chị ịwọ nyamwụ lẹ, ọ kpa ụkụchụ nya ịlọmwụ gu ịwọ chị ịpyịyẹ-pyịyẹ ịlịkpanggọ nya ogidi dagaga jwoo nya ọ-họ kọ ka la charị-charị lẹlẹ. Ọ ya ịwọ ohihi hụrụ ọ-ọmwụ nya ogidi. Ịịwẹ ọ bwu chị ogidi ịgọgọ nwụlọọ nọ gbe iya ọkịlaakịla lẹlẹ.

¹⁶IMosisi gba eyo iluhye nya ang-ẹpwụ wuu bala ụbẹẹ bala egbachị imimiiye tụ eyo oluhye nyaa lẹ, ọ jwaa ila wuu u-uhye nya ogidi lẹlẹ.

¹⁷Ọ go ẹga ihihi nya ẹna ọwẹ tụ ugba bala iyo bala ang-ẹpwụ ihihi wuu kpa kpehe hi ịkampụ lẹ, ọ chaa ila jaabwọ ká Amkpaa dọọ ehile nyị họ lẹlẹ.

¹⁸Ụka ká ọwẹ myị kpa, iMosisi kpa omilodo ọlẹ kị ka ya kịla iya ọ-rụ ila warị. Erọn bala anyị alẹng nyamwụ yabwọ bọọ e-egbeju lẹ,

¹⁹iMosisi à nwọọ lẹlẹ. Ọ ya ịwọ nyamwụ yẹ hụ ịkịka inine nya ogidi.

²⁰Ọ wọ iyo nyamwụ guru ẹ̀gẹgẹẹga. Ọ hụ́ ang-ẹpwụ bala ata nyamwụ lenyi lẹ, ọ jụ egbeju bala eyo bala ẹ̀ga ihihi nya omilodo ọwẹ wuu ila u-uhye nya ogidi jaabwọ ká Amkpaa da ehile ya nyị họ lẹlẹ. Ọwẹ à ri iya ọ-rụ ila lẹ. Iya ọwẹ kaa chị Amkpaa oru kwọkwọ.

²²Ọọwa lẹ, iMosisi à kpa omilodo ọkịla ọlẹ kọ ri nya ọhọhọ nya ụbwọ ọnịrọọ-nịrọ e-egbeju nya angịkiliya warị lẹ, Erọn bala anyị alẹng nyamwụ à yabwọ bọọ e-egbeju lẹlẹ.

²³IMosisi nwụ omilodo ọwẹ lẹ, ọ gu ịwọ nyamwụ chị ugbuurụ nya upwuriri bala ụkụchụ ọdụdụgba nya upwuriri bala ụchụụ ọdụdụgba nya upwuriri nya Erọn lẹlẹ.

²⁴Ọ kpa anyị alẹng nya Erọn wẹ ịlahị lẹ, ọ gu ịwọ nya omilodo ọwẹ chaa e-egbaarụ nya upwuriri bala a-akachụ ịdụdụgba nya upwuriri bala a-achụụ ịdụdụgba nya upwuriri lẹlẹ. Ụka ká iMosisi họ ọwẹ kpá, ọ ya ịwọ ohihi hụ ịkịka inine nya ogidi.

²⁵Ọọwa lẹ, ọ gba eyo bala itọọgbẹ ochii bala eyo oluhye nya ang-ẹpwụ wuu bala ụbẹẹ bala egbachị imimiiye tụ eyo oluhye nyaa bala ugbẹta nya upwuriri lẹlẹ.

²⁶Ọ hu ẹbẹ nya ịkaa ookpokpo bwu ẹpwụ nya udo nya ịkaa ịmịrịị-mịrị-ka ọlẹ kị ya ha Amkpaa bala ẹbẹ nya ịkaa ookpokpo ọlẹ kị ya ida ju bala ịkama ookpokpo lẹ, ọ yaa guru eyo bala ugbẹta nya upwuriri nya iyo u-uhye lẹlẹ.

²⁷Ọ go ang iriri ịwẹ wuu ha Erọn bala anyị alẹng nyamwụ kpa ụ-ụbwọ lẹ, ị ka yaa kịla iya o-nyí kile-kile bwula o-nyaa kile-kile i-ijata nya Amkpaa lẹlẹ.

²⁸Ọọwa, iMosisi à ye ang ịwẹ bwu ụbwọ nyaa lẹ, ọ jwaa ila u-uhye nya ogidi ba iya ọ-rụ ila u-uhye ha Amkpaa nya iya nya ụbwọ ọnịrọ e-egbeju lẹlẹ. Iya ọwẹ chị Amkpaa oru kwọkwọ.

²⁹IMosisi hu ẹmẹ nya iyo ọwẹ lẹ, ọ ya kịla iya o-nyí kile-kile bwula o-nyoo kile-kile i-ijata nya Amkpaa lẹlẹ. Ọwẹ à ri ẹ̀ga ọlẹ ká iMosisi la bwu ẹpwụ nya omilodo ọlẹ kị nwụ nya iya nya ọhọhọ nya ụbwọ ọnịrọ angịkiliya e-egbeju jaabwọ ká Amkpaa dọọ ehile lẹ.

³⁰Ọọwa, iMosisi à chị ida ọlịgọgọ bala ịwọ oluhye nya ogidi lẹ, ọ nyoo hụ Erọn bala anyị alẹng nyamwụ bala ịwụrụ nyaa wuu lẹlẹ. Ịịwẹ ọ bwu chaa bala ịwụrụ nyaa ịgọgọ ha Amkpaa lẹ.

³¹Ọọwa, iMosisi à byi Erọn bala anyị alẹng nyamwụ yẹkẹẹ, “Anụ ya iyo ọwẹ kpụ́ ọ-ọnang nya Ọdụ nya Amkpaa mẹ. Ụwa anụ ka hụ ryoo ịnyịnyị bala ịkaa ọlẹpwụ nya udo ọlẹ kị ya ang ikiliya nya ụbwọ ọnịrọọ-nịrọ e-egbeju ju lẹ. Jaabwọ ká Amkpaa dam ehile ya anụ nyị họ à wẹ lẹ.

³²Anụ-ụ̀ chị ohihi nya iyo bala ịkaa ịwẹ ila mẹ.

³³Ánụ ka rụ hi ọnang nya Ọdụ nya Amkpaa ka jịra ẹ-ẹnụtụrụ irwiye gbẹgbịlẹ chajị ụka ọwẹ ọhọhọ nya ụbwọ ọnịrọọ-nịrọ e-egbeju nyanụ à ka cheju wẹ́ẹ̀ lẹ.

³⁴Ang ọlẹ kahị họ-ọ̀ wẹ alẹ ri ẹla ọlẹ ká Amkpaa byihi ya nyị họ chajị nyọka bịlẹ ọhịnyọhi nya ịhọbịrị nyanụ.

³⁵Anụ ka hụ ụwa ọ-ọnang nya Ọdụ Ọlịgọgọ tụ ẹnụ tụ odu jịra ẹ-ẹnụtụrụ irwiye juwa họ ang ọlẹ ká Amkpaa ya nyị họ. Ó-ri kanụ họ ịnyị ka aalẹ, anụ ka gbu. Ehile ọlẹ ká Amkpaa dam à wẹ lẹ.”

³⁶Ịnyị, Erọn bala anyị alẹng nyamwụ à họ ang myị ang ịlẹ ká Amkpaa daa ehile bwula iMosisi ya nyị họ lẹlẹ.