Read idege ALA ILIVAYỊ 9 Bible Online

ALA ILIVAYỊ 9 - idege bible

ALA ILIVAYỊ 9

¹Ẹnụtụrụ ọhaneku ọlẹ kọ ri ahị ọpyẹpyẹ ọ-ba ẹnụ ká ọhọhọ nya ụbwọ ọnịrọ angịkiliya cheju kpá, iMosisi wụrụ Erọn bala anyị alẹng nyamwụ bala ịgabwọ nya ala Isirẹlụ kaka jịra lẹ,

²ọ byi Erọn yẹkẹẹ, “Wu ụgba nya ẹna ọlẹng bala omilodo ịlẹ ká ehe-é họ ka, ká ya kịla iya ha Amkpaa mẹ. Ụgba nya ẹna ọlẹng ọọwa ri nya iya ọ-hụ́ ọhọbịrị. Omilodo ri nya iya ọ-rụ ila.

³Aa byi ala Isirẹlụ kị wu oyichi ọlẹ kị ka ya kịla iya ọ-hụ́ ọhọbịrị bala ụgba nya ẹna o-gu ẹka ookpokpo bala ọnyị-ọkpịlọ o-gu ẹka ookpokpo ịlẹ ká ehe-é họ ka kị yaa kịla iya ọ-rụ ila mẹ.

⁴Ị ka wu ẹna bala omilodo kị ka ya kịla iya nya ọhọlawụlẹ jula iya nya ajẹ nya ang-ẹrụ ọlẹ kị ya ida ju. Aa byaa kị kịla iya ịwẹ mẹ, chajị Amkpaa juwa ka chị ịlọmwụ ehe mẹjaa alẹ.”

⁵Ọọwa, ala Isirẹlụ à kpa ang ịlẹ ká iMosisi ya wẹ wuu kịlahị nya Ọdụ Ọlịgọgọ lẹ, ịwa wuu à wẹ kaka jịra ụ-ụwa kị ka gbịgba ha Amkpaa lẹlẹ.

⁶Ọọwa, iMosisi à byaa yẹkẹẹ, “Amkpaa byinu anụ nyị họ ịịwẹ chajị ká ahịgboo ọ-hụ́ myịrị-myịrị nya ụmụmẹ ọlala nyamwụ ka jẹ-ẹ chị ehe mẹ jẹẹnụ.”

⁷Ọọwa, iMosisi à byi Erọn yẹkẹẹ, “Kele ka ẹga nya ogidi, ká kịla iya ọ-hụ́ ọhọbịrị bala iya ọ-rụ ila chajị nyọka bịlẹ ọhịnyọhi nya ịhọbịrị nya ịlọng bala ịnya aluche wuu mẹ. Aa kịla iya ọlẹ chajị nya ọbịlẹ ọhịnyọhi nya ịhọbịrị nya alụma jaabwọ ká Amkpaa da ehile ya nyị họ mẹ.”

⁸Ịnyị, Erọn à kele ka ẹga nya ogidi lẹ, ọ nwụ ụgba nya ẹna ọlẹ kọ ri nya iya ọ-hụ́ ọhọbịrị nya ịlọmwụ lẹlẹ.

⁹Anyị alẹng nyamwụ kpa ịwọ nya ẹna ọọwa warị wọọ. Ọ ya ụkụchụ jwoo lẹ, ọ gwoo chị ịpyịyẹ-pyịyẹ ịlịkpanggọ nya ogidi lẹlẹ. Ọ ya ohihi nya ịwọ ọọwa hụrụ ọ-ọmwụ nya ogidi.

¹⁰Ọ jụ eyo bala egbachị bala ụbẹẹ nya iyo okiliya ọwẹ ila u-uhye nya ogidi jaabwọ ká Amkpaa da iMosisi ehile ya nyị họ.

¹¹Iyo ayịdang bala ugba nyamwụ tị lẹ, ọ jwaa ila ụ-ụwa odehe nya ịkampụ.

¹²Ọọwa, Erọn à nwụ iyo ọlẹ kọ ri nya iya ọ-rụ ila nya ịlọmwụ lẹ, anyị alẹng nyamwụ à kpa ịwọ nyamwụ warị wọọ lẹlẹ. Ọ yọọ hụ ịkịka inine nya ogidi lẹlẹ.

¹³Ị go ẹ̀gẹgẹẹga nya iyo ọwẹ họọ tụ egbeju. Ọọwa, ọ jwaa ila u-uhye nya ogidi lẹlẹ.

¹⁴Ọ hụ́ ang-ẹpwụ bala ata nyamwụ lẹ, ọ jwaa ila u-uhye nya ogidi ba iya ọ-rụ ila ọkịla u-uhye lẹlẹ.

¹⁵Ụka ká ọwẹ kam kpá, Erọn kịla iya ịlẹ kị ri nya alụma. Ọ wu oyichi ọlẹ kọ ri nya iya ọ-hụ́ ọhọbịrị nya alụma. Ọ nwọọ lẹ, ọ ya kịla iya jaabwọ kọ họ iyo nya ọgbanyẹ ọlẹ kọ ya kịla iya ọ-hụ́ ọhobịrị nya ịlọmwụ lẹlẹ.

¹⁶Ọ wu iyo okiliya ọ-rụ ila ha ịnyịnyị. Ọọwa, ọ ya kịla iya jaabwọ ká ọhọhọ nya iya ọkịlaakịla ọọwa ri lẹlẹ.

¹⁷Ọ kpa iya nya ajẹ nya ang-ẹrụ warị ịnyịnyị. Ọ chụ ọrụ nyamwụ myị ẹpwụtụbwọ lẹ, ọ jwọọ ila u-uhye nya ogidi da iya ọ-rụ ila ọlẹ kịị kịla ẹnụ myị ẹnụ lụtụrụ u-uhye lẹlẹ.

¹⁸Erọn nwụ ẹna bala omilodo ịlẹ kị ri nya iya nya ọhọlawụlẹ nya alụma. Ọọwa, anyị alẹng nyamwụ à kpa ịwọ nya iyo ịwẹ wọọ lẹ, ọ yọọ hụ ịkịka inine nya ogidi lẹlẹ.

¹⁹Ọ go ẹ̀ga i-ju eyo nya ẹna bala omilodo ịịwa lala itọọgbẹ ochii bala ang-ẹpwụ bala egbachị bala ụbẹẹ wuu lẹ,

²⁰ị ya guru amẹ nya iyo ịwẹ u-uhye nya ogidi lẹlẹ. Ọ jụ eyo ila u-uhye nya ogidi.

²¹Ọ ya amẹ bala ugbẹta nya upwuriri kịla iya o-nyí kile-kile bwula o-nyaa kile-kile i-ijata nya Amkpaa jaabwọ ká iMosisi ya nyị họ.

²²Ụka ká Erọn kịla iya ọ-hụ́ ọhọbịrị bala iya ọ-rụ ila bala iya nya ọhọlawụlẹ kpá, ọ kpa abwọ ka uhye jahị da alụma juwa wahị kụrwaa wuu. Ọọwa, ọ hireji bwu ogidi lẹlẹ.

²³Ọọwa, iMosisi bala Erọn à jụ kele ka ẹpwụ nya Ọdụ Ọlịgọgọ lẹlẹ. Ụka kị kpehe bwu ụwa, ị wahị kụrụ angịnyị wuu. Ọọwa, ahịgboo nya ụmụmẹ nya Amkpaa-à chị ehe mẹjẹ angịnyị wuu lẹlẹ.

²⁴Ahyaahị, Amkpaa du ila kaka rụ iya ọ-rụ ila bala eyo iluhye nya ogidi ọọwa. Ụka ká angịnyị yẹ ẹlẹwẹ, ịwa wuu da iwuru lẹ, ị hirikpẹẹ nyọka gbịgba ha Amkpaa lẹlẹ.