Read idege IJeremaya 10 Bible Online

IJeremaya 10 - idege bible

IJeremaya 10

¹Anụ ala Isirẹlụ ee, anụ ke ụrụ lẹla ọlẹ ká Amkpaa wẹẹ ya tanụ mẹ.

²Ọ yẹkẹẹ, “Ānụ ba ọhọhọ nya ẹpwụma ịkịla jẹ koo, ang-ẹjẹẹ ịlẹ kanụ-ụ̀ yẹ u-uhye-ọgba ā lanụ uhi-uhi ka, ịnyịlẹhị lẹ, ang ịwẹ kaa wu alẹpwụma ịkịla ejiri.

³Ịgba ọgbagba nya angịwẹ ri ang ohideeji, ị́ tụrụ okoji deeji i-ipyinu, ị kpa ịchọbọ kọọ ukpeku,

⁴ị họọ ịnyangga lokpoko ọnyọowuru bala okpoko ịgọm. Ị kpa ọjị ọ-hya ụwa gwoo iloo wu eji, chajị kọ ka rị mịla eji ka.

⁵Ekpeku ịlịnyị lala ẹchụ-okoji ọlẹ kị go ang kụrụ lala ọngịnyị dayị rịrị ẹ-ẹrụ nya ịbẹhị nyọka ju ịchịnụ uhi-uhi. Ị́ jẹ-ẹ̀ ya ẹla ka, ị kaa hwaa hu kpa bwu ẹgẹhẹ ka ẹga ọkịla, chajị ị́ jẹ jẹdịyẹ ka. Ānụ ju uhi nyaa koo, ị́ ka họnụ ang onyobyi ọhẹ họ myị ka, ị́ tị ka jẹ-ẹ̀ họ ẹla ọnyịịla ọhẹ hanụ myị ka ịnyịnyị.”

⁶Amkpaa ee, ọngọngọhẹ-ẹ́ lala ahụ ka. A la ụmụmẹ, ẹnyị nyang lụmẹ bala ọ-la ọngịrị.

⁷Oowo kpá à tị́ ka ju ihi nyang ka-à, ahụ Adịrahụ nya ẹpwụma ọnyị myị ọnyị? Ịnyị ọ chịla kị ka jung ihi lẹ, ẹ-ẹpwụ nya angị jẹ ẹla nya ẹpwụma ọnyị myị ọnyị, tụ ịdịrịhụ nyaa wuu ọngọ lala ahụ-ụ́ ji ka.

⁸Ịwa wuu chị uchi chị, ị ju ẹmwa ju, ịịyẹ ekpeku nya ekeji ịwẹ à tị ka jẹẹ-ẹ̀ mẹjaa?

⁹Ị ya okpoko onyoowuru ịlẹ kị ra bwu iSipeen bala okpoko onyoowuru ịlẹ kị kpa bwu Ufasị kpụ kụrụ ekpeku nyaa. Ụkụrwọ ká ikebenta bala alụdụwa họ, ị go ịwụrụ inyuukpuukpo bala ịnyịmịla gbuu kụrwaa, angị jẹ gá ang yẹẹyẹẹ à gá ịwụrụ ịịwa lẹ.

¹⁰Ahụ Amkpaa-à tị ri Ohe Oluhye nya ịlẹhị lẹ, a ri Ohe Oluhye ọlẹ kọ juwa hịhị bala Adịrahụ o-gbe oyi myị oyi. Á ju agbama odehe wuu kaa hụ́ jigi-jigi, ẹpwụma ọhẹ-lọhẹ-ẹ́ ka godayị gbe ila nya agbama nyang myị ka.

¹¹Anụ byi angị kaa kpụ eteji ha ekpeku ịwẹ yẹkẹẹ, “Iijiga nyanụ ịwẹ à họ uhye-ọgba bala odehe ka. Ị juwa ka ta ayịreji gbanggbang hi ẹga myị ẹga nya odehe ọlẹ.”[3]

¹²Amkpaa-à họ ọpyị bwula ọngịrị nya ịlọmwụ lẹ, ọ kpa ẹla ọjẹjẹ nyamwụ họ odehe, ọwa-à họ uhye-ọgba lẹ.

¹³Ọ́ kpụ ịkata, uhye-ọgba kaa gu arụ lenyi ododo, ọ họ ká egbamwụ hi ehe ẹ-ẹga myị ẹga nya odehe. Ọ họ ká apya chị lụka nya enyi ododo, ọ da igbachịwụ wẹ odehe bwu ẹga kọ wọọ kụrụ.

¹⁴Angịnyị ehe wuu gu onwu gu ọba chị uchi, jẹ ịngịngịhyẹ ka, oyoyi ju alụdụwa ị-họ ekpeku, chajị ekpeku ịlẹ kị họ ri abala nya ang, ị́ da ọhụ-ụ da pwee ka.

¹⁵Ị́ ju apyobwuna nya ịngịngịhyẹ ka, ị ri ang ị-ka kpa hu utungguru. Ụka ká Amkpaa-á wẹ nyọka yaa akama, ịwa wuu ka ta ayịreji.

¹⁶Ohe Oluhye nya iJekọbụ-ụ́ lala ekpeku ịwẹ koo, ọwa-à họ ang myị ang wuu lẹ. Isirẹlụ à ri angịlẹ kọ chụ nya angịnyị nya ịlọmwụ lẹ, Amkpaa Agụgụ à ri ẹnyị nyamwụ lẹ.

¹⁷Ọọwa, m̄ byi ala iJerusalẹm yẹkẹẹ, “Ala iJerusalẹm ee, anụ go olo nyanụ nyọka rụ hi ọpyị ọlẹ mẹ, aluji chị urwe junu kpá lẹẹ!

¹⁸Amkpaa yẹkẹẹ, ‘M̀ juwa ka danụ anụ lọpyị ọlẹ ẹjwọ chịịrụ, m̀ juwa ka kpa akama okwookwee chịnụ ọgụ gbee kọ ka wunu ọyị aalegu kanụ ka jẹ.’ ”

¹⁹Ala iJerusalẹm chị eko yẹkẹẹ, “Ahị gbu hụrụ lẹẹ! Ị họhị ang aboji-aboji lẹ! Akama ọlẹ-ẹ́ ri ịnya ọngọngọhẹ dala ahị kaka, olo nyamwụ ahị ka kpa kpọọ lẹlẹ.

²⁰Ị tahị ẹpwa ayịreji wuu lẹ, ang i-wu ịnawụ nyahị kpa-á juwa kaka. Ị go anyị nyahị kpa rụ wuu, ọngọ ka yụbwọ da ịnawụ nyahị wuleji-í ji kaka.”

²¹M̀ tị byaa yẹkẹẹ, “Alegbeju nyahị ri aluchi, ịị bịlẹ Amkpaa nyọka kpaa ụgbẹyị ka, ịnyị à du kị kịlahị ka lẹ, du kị nyi alịnyahị epepe wuu.

²²Anụ ke ụrụ wo wẹẹ! Oja ọhẹ pwụụhị eji lẹẹ! Iru ọtụka-ọtụka nya angịdẹwụ nya alọpyị ọlẹtẹ juwa tá, ị juwa wẹ kaka ta epweji ịla iJuda ayịreji, pẹhyaa kpụ egwawụ-egwawụ, kị ka ri ẹga ọ-ga ri nya iyo ịnyẹẹgẹga.”

²³“Amkpaa ẹẹ, m̀ jẹ ká ọhịhị nya ọngọngọhẹ-ẹ́ ji ẹpwụtụbwọ nya ịlọmwụ ka, ọọngịnyị à ka kpa ọhịhị nyamwụ jẹ jaabwọ kọ họ́ọ ka.

²⁴Nwụm rịrị lọdụmwọ, Amkpaa, ẹ-ẹpwụ nya agbama koo, ó-ri ịnyị ka m̀ ka ta ayịreji.

²⁵Ji agbama nyang kpata da ẹpwụma ịlẹ kị jẹng nyori ahụ à ri Ohe Oluhye lẹ ka, ịwa angịlẹ wuu kị kaa gbịgba hang ka. Ị nwụ anyị nya iJekọbụ angịnyị nyang, ị taa ayịreji gbanggbang, họ ká ọpyị nyaa kpụ egwawụ-egwawụ wuu lẹ.”