Read idege IJeremaya 11 Bible Online

IJeremaya 11 - idege bible

IJeremaya 11

¹Ụka ọọwa, Amkpaa byim yẹkẹẹ

²“Ke ụrụ la ehile chajị nya iro ọlẹ kam nwa ta ala Isirẹlụ, ká kpa ka ya je ala iJuda bala angị kụ iJerusalẹm mẹ.

³Aa byaa mẹ, am Amkpaa Ohe Oluhye nya ala Isirẹlụ jam yọnụ deeji ha ọng myị ọng ọlẹ kọ pwa nyọka kpa ehile nya iro ọlẹ.

⁴Ehile ịịwa-à ri ịlẹ kam ya da adanụ igogo e-eji ụka kam gbaa kpehe bwu ọpyị nya Ijipiti ọlẹ kọ laa lala ila nya utiyo lẹ. M̀ byaa kị ka ju ihi bala ọ-họ ang myị ang ọlẹ kam byaa nyọka họ. M̀ byaa ma ó-ri kị ju ihi nya ehile nyam aalẹ, ị ka ri angịnyị nyam, m̀ ka ri Ohe Oluhye nyaa.

⁵Aalẹ, m̀ ka họ ọnụ ọlẹ kam myị haa jịra nyọka ya ọpyị o-ju eyo bala ọ-há ang haa. Ọpyị ọọwa ānụ kụ-ụ̀ wẹ daalẹ lẹ.” Ọọwa, m̄ wẹ byi Amkpaa yẹkẹẹ, “Ee ịnyị ọ la ịlẹhị lẹ.”

⁶Ọọwa, Amkpaa-à byim yẹkẹẹ, “Kele tụ epweji ịla iJuda bala opeje ịla iJerusalẹm da. Kpa ẹla nyam ịwẹ pyebile ụ-ụwa, ká byaa kị ke ụrụ la ehile nya iro ọnwanwa bala o-ju ihi nyaa mẹ.

⁷Ụka kam gba adaa igogo anyị kpehe bwu Ijipiti lẹ, m̀ daa ọna nya ịlẹhị-ịlẹhị nyọka ju ihi nyam. Ịnyịnyị m̄ tị wẹẹ daa ọna pyịyọọ daalẹ lẹ.

⁸Ị́ tị myị ke ụrụ ke lee o-ju ihi nyam ju ka. Ọngọngọọng juwa dịrẹ aruwoka ọlọkịlẹtụ onyobyi nya ịlọmwụ. Ajị nyọlẹ kị myị ju ihi ka-à du kam kpa akama ịlẹ wuu ká ehile nya iro ọọwa ya warị chaa ọgụ lẹ.”

⁹Ọọwa, Amkpaa-à byim yẹkẹẹ, “Ala iJuda bala ala iJerusalẹm kọ ju awụlẹ yahị dam lẹ-ẹ̄.

¹⁰Ị tịrẹkpẹ ka ẹpwụ nya ịhọbịrị nya adaa igogo anyị ịlẹ kị pwa ọ-ka họ irya nyam. Ị kpụ ijiga. Ala iJuda bala ala Isirẹlụ bịrị iro ọlẹ kam nwa ta adaa igogo anyị.

¹¹Ọọ-lajị nya ọọwa lẹ, ya jaa mẹ, am Amkpaa juwa ka kpa ayịreji ọtata chaa ọgụ lẹ. Ị́ ka be hi akama ọọwa myị ka. Ị́ chị eko nya ụbwọ ọdada chị wẹwẹ, ḿ ka dọnụ waa ka.

¹²Ọọwa, ala iJuda bala ala iJerusalẹm à ka rụ kaka bịlẹ ụbwọ ọdada bwu ẹga nya ijiga ịlẹ kị kaa kịla iya nya ịtangare ha lẹlẹ. Ijiga ịịwa-á tị ka chaa da ụka ká akama ọọwa-á pwụ eji myị ka.

¹³Jaabwọ ká epweji ịla iJuda ju iru kaka ba, ịnyịnyị alụwa-à la ijiga taa da wuu lẹ. Ala iJerusalẹm tịtị me adaa i-ju ịtangare ila ha ojiga ịBaalụ tụ opeje ọnyị myị ọnyị nyaa da wuu.

¹⁴“IJeremaya ee, ā raabwọ ham lee ọ-bịlẹm chajị nya angịwẹ kaka. Ụka ká akama-á chaa ọgụ kị be ẹkọ wụrụm nyọka daa ụbwọ, ḿ ka dọnụ waa ka.

¹⁵“Anụ angịnyị ị-hám há chakpa họ ang inyibyi, ọngịrị oyina anụ tị́ tụtụm la nyọka wẹ Ube Ịgọgọ nyam myịmyị wẹẹ? Anụ me ká ọnụ ọ-ka myịmyị bala ọ-kịla iya ka da akama ọlẹ kọ wẹẹ wẹnụ yi myị-ị̄ị́? Ọkẹkẹnị anụ wẹẹ chị ju ang onyobyi ododu lẹ.

¹⁶“Am Amkpaa wụrụụnụ Olivu o-ju jwọọjwọọ kpá ẹnẹhẹ legbe nwụ dọdọọdọ lẹ-ẹ̄, ọlẹẹlẹẹ tị lẹ, bwula ịkata lala ịkpala ọkpụkpụ, m̀ ka jụụnụ ila hụlaanụ ábwọ hwẹẹhwẹẹ.

¹⁷Am Amkpaa Agụgụ à yanụ anụ Isirẹlụ bala iJuda yeji lẹ. M̀ tị da ehile kị ka tanụ ayịreji ugbẹnyị lẹ, chajị anụ họ ang onyobyi. Anụ du agbama jum bwula o-ju iya nya ịtangare ila ha ojiga ịBaalụ.”

¹⁸Amkpaa ya jem jaabwọ ká aluji nyam juwa me obyi onyobyi jum.

¹⁹Ene nya ụka ọwẹ m̀ lala ọnyị-ọkpịlọ ọ-jẹ ẹlẹlẹhẹ-ka ọlẹ kị juwa kpa jẹ kaka nwụ. Am ā ka jẹjẹ nyori am ị lẹẹ me obyi ju lẹ ka. Ị lẹẹ yẹkẹẹ, “Āhị ta okoji ọlẹ ayịreji legbe-legbe nyamwụ mẹ, āhị nwụ ọlẹng ọlẹ ká ọngọngọhẹ ka wo ẹnyị nyamwụ kaka mẹ.”

²⁰Ọọwa, m̄ raabwọ yẹkẹẹ, “Amkpaa Agụgụ ọngọlẹjẹ kpakpa ee, à kaa wụla ọkịlẹtụ bala irya nya angịnyị yẹ, m̀ ya ịlọm chị ụbwọ-lẹta hang lẹ, họ angịwẹ kwiwa kam kpẹhị nya ịlọm yẹ.”

²¹Ala Anatotu tịtọ nyọka nwụm. Ị lẹẹ byim am nyị́ hịnyọ la o-ya ẹrụ nya Amkpaa pyẹ ka aalẹ, ịwa nyị ka nwụm kẹhị-kẹhị.

²²Lẹẹlẹ, Amkpaa Agụgụ yẹkẹẹ, “M̀ ka yaa akama. Ikolobya nyaa ka gbu ẹ-ẹwụ, anjwo ichiche nyaa ka gbu igu nya imyi.

²³M̀ ka kpa akama warị chị ala Anatotu ọgụ. Ụka ká ụka ọọwa-á pwụ, ọngọngọhẹ nyaa-á ka hi lahị-lahị ka.”