Read idege IJeremaya 12 Bible Online

IJeremaya 12 - idege bible

IJeremaya 12

¹“Amkpaa ee, ḿ kpa eje nya ẹla nyam wẹ ẹga nyang, à kaa chị eje ọkpakpa. Tị kpọkpọọkpọ, m̄ tọng ịtọ u-uhye nya ẹla ọkpakpa wẹẹ: Ịyẹ tị́ du ká angị họ ang onyobyi kaa pyẹpyọọ ịnyị-ị̄ị̀? Ịyẹ tị́ du ká angị la kpẹẹkpẹẹ-ka kaa ka ịlahị-ị̀?

²Ahụ à yaa yeji lala ekeji du kị da ụtẹ weji lẹ, ị nwa, ị nwụ egbe. Ịị mịla oja ọnyịịla hang kpá, ọkịlẹtụ nyaa tị ji hwẹ̀ẹẹ hing.

³Amkpaa ee, à tị jẹm, à kaa yẹm bala ọ-ma irya nyam yẹ jaabwọ kam-m̀ dịrẹng kpẹẹkpẹẹ kaka ba. Aa gbile angị inyibyi ịwẹ kpịla-kpịla kpa rụ lala ọkpịlọ ọlẹ kị juwa kpa kaka nwụ, ká kpaa ụ-ụwa gbe ụka kị ka nwaa.

⁴Ọpyị nyahị tị́ ka chị ọhụ kịra-kịra, la amẹ wuu gbu womboo ịịlẹ tata ka ba anyị-ị̀? Iyo ileji tụ ịchịnụ gbu kụrwa-kụrwa wuu ọọ-lajị nya ọkwọ ọlala nya alịnyahị. Ị tị kụ ụwa juwa yẹkẹẹ, ‘Amkpaa-á yẹ ang ịlẹ kahị wẹẹ họhọ ka.’ ”

⁵Ọọwa, Amkpaa-à wẹ yẹkẹẹ, “IJeremaya ee, á chị ogbilo nya ụnyẹ ta angịnyị ehe, ká ịnyịrọ-ọ́ chịng pyẹpyẹ, à tị́ ka họ anyị ká ka kụ ụnyẹ ta anyịrẹ myị? Ó-ri ká chị mịla eji ẹ-ẹga ogede-gede, à tị́ ka họ anyị i-ipyinu ọlọnụ nya Ihu ịJọdan?

⁶Aanang kị ri alugbiyegu nyang mịlẹ-mịlẹ wẹwẹ lẹ, ị tị́ họ jung, yẹkpẹ chị awụlẹ yahị dang. Ị́ kpa ọnụ gẹnẹ-gẹnẹ ya ẹla ya tang, ā dahịhilaa koo.”

⁷Ọọwa, Amkpaa-à yẹkẹẹ, “M̀ nyẹẹkpẹ da angịnyị nyam lẹ, ẹpwụma pyii kam hu nya ang ọlala nya ịlọm. M̀ pẹhi angịnyị ilikẹjẹ nyam ju aluji nyaa ẹ-ẹpwụtụbwọ lẹ.

⁸Ahyu! Angịnyị kam chụ ha ịlọm jahị mịlanya dam lala ijwo ilipyinu. Ị hu ọnụ dam lịkata họ́nghọ́ng, lẹẹlẹ, ị tụm ànyị lẹ.

⁹Ọọwa ri angịnyị ịlẹ kam chụ ha ịlọm ri akịrakpa ịlẹ ká ikirom hụla hwẹẹhwẹẹ, lepwu juwa denggbe ju lẹ-ẹ́? Ee, anụ wụrụ iyo ịnyẹẹgẹga wuu kị wẹ kaka ri jaabwọ kọ háa mẹ.

¹⁰Iru nya alegbeju nya alẹpwụma ịkịla bịrịm ẹrụ lẹ, ị tụ ata tudu eji la alakọnụ nyam wuu. Ị họ la ọpyị ọnyịịla nyam yẹ la ugbileji ọ-há ịngịngịhyẹ kaka lẹ.

¹¹Ị họ la ọpyị nyam kpụ egwawụ-egwawụ, ọ chị eko nya ụbwọngee jum. Ọpyị wuu lẹpwụ-lẹpwụ yẹ ri ugbileji lẹ, ọ́ tị ri ọngọngọhẹ ẹla ka.

¹²Alẹwụ ị-ta ang ayịreji wẹ kaka pyẹ yịrị ịgbọdọ ilugbileji wuu. Am Amkpaa du alẹwụ kị ka tanụ ayịreji bwu ọbaba nya ọpyị ọhẹ kele ka ọkịla. Ongọngọhẹ-ẹ́ ka be myị ka.

¹³Anụ angịnyị nyam ya ịrayịsị iwiite hụ, ejwo-ejwo à tị ye iwe ku kịrịnyọọọ lẹ. Anụ họ ụkụrwọ chị ẹpẹtẹkẹẹ, ánụ tị yẹ ịngịngịhyẹ bwu ụwa ka. Ang-ẹrụ ịlẹ kanụ ye wụ la oyoyi, chajị m̀ wụ ẹjẹ tanụ.”

¹⁴Amkpaa yẹkẹẹ, “M̀ la ẹlẹhẹ ka ya u-uhye nya ẹpwụma aluji ịdagaga ju Isirẹlụ ịlẹ kị ya kpa ụbwọ ka ọpyị ọlẹ kam ya ha ala Isirẹlụ angịnyị nyam nya ang ọlala nyaa. M̀ ka hu ẹpwụma inyibyi ịwẹ latẹ-latẹ lala okoji kpa rụ bwu ọpyị nyaa. Ọọwa, m̄ ka gba ala iJuda kpehe bwu ẹpwụtụbwọ nyaa lẹlẹ.

¹⁵Ụka kam kpaa rụ ịnyị kpá, m̀ ka yẹ ahyẹẹrwẹrwa nyaa, kam ka kpaa nyà tịrẹkpẹ ka ọpyị nya ịlaa-ịlaa bala ẹpwụma nya ịlaa-ịlaa.

¹⁶Alẹppwụma ịwẹ lẹẹ mẹjẹ angịnyị nyam nyọka nwa iro lẹnyị nya ojiga ịBaalụ ẹnẹhẹ lẹ. Ugbẹnyị tị lẹ, ó-ri kị myị ba ụgbẹyị nya ịgbagba nya angịnyị nyam jẹ, ị ka juwa nwa iro lẹnyị nyam ya, ‘M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị yẹkẹẹ’. Ụka ọọwa, ịwa-à tịtị ka yẹ ri angịnyị nyam ịnyịnyị lẹlẹ.

¹⁷Ẹpwụma ọhẹ-lọhẹ kọ myị ju ihi ka aalẹ, m̀ ka hwoo latẹ-latẹ lala okoji kam ka tọọ ayịreji. Am Amkpaa-à ya ẹlẹwẹ lẹ.”