Read idege IJeremaya 13 Bible Online

IJeremaya 13 - idege bible

IJeremaya 13

¹Ụka ọọwa, Amkpaa byim yẹkẹẹ, “Kele ka ra ịkaki ọlẹ kị ga lapwụ ọnụnụ ká ya ju mẹ. Ā ya ju enyi koo.”

²Ọọwa, m̄ ra ịkakị ọọwa jaabwọ ká Amkpaa byim lẹ, m̄ ya ju lẹlẹ.

³Ọọwa, Amkpaa-à myịmyị byim yẹkẹẹ,

⁴“Kpa ịkaki ọwẹ kele ka Ihu iYufuretisi, ká ya kpịbaa apewa nya ajwọ mẹ.”

⁵Ọọwa, m̄ hwọọ kpa kaka kpịbaa iYufuretisi jaabwọ ká Amkpaa byim lẹlẹ.

⁶Ụka kọ nọ chẹẹ ẹ-ẹkpẹ nya ọwẹ, Amkpaa byim yẹkẹẹ “Tịrẹkpẹ ka iYufuretisi kaka hu ịkaki ọlẹ ká ya kpịbaa ụ-ụwa mẹ.”

⁷Ụka kam tịrẹkpẹ kele, m̀ gbọọ kpehe bwu ẹga kam ya kpịbaa. Ịkaki ọọwa tị bịrị, chị pwẹẹpwẹẹ wuu, ju apyobwuna nya ịngịngịhyẹ kpong-kpong kaka.

⁸Ọọwa, Amkpaa-à byim yẹkẹẹ,

⁹“Ịwẹ-ịwẹ m̄ ka ta ọbọọchẹ ohihi nya ala iJuda bala ọbọọchẹ ọtụka nya ala iJerusalẹm ayịreji lẹlẹ.

¹⁰Angị inyibyi ịwẹ pwa nyọka jum ihi. Ị dịrẹ irya nya ịlaa bwula egbeju-ọnyọọngịrị nyaa juwa myị ẹrụ bala ọ-kpụ eteji ha ijiga. Lẹẹlẹ, ị ka lala ịkaki ọwẹ kọ ju apyobwuna nya ịngịngịhyẹ kpong-kpong ka.

¹¹Jaabwọ ká ịkaki kaa wu ọhị gbang-gbang-ǹg wẹẹ, ịnyịnịnyị ịnọ m̄ ya ala Isirẹlụ wuu tụ ala iJuda wuu chikirii ba ịlọm giri-giri lẹ. M̀ họ ịnyị chajị kị ka ri angịnyị nyam bala ọ-ka kpa ehe ọlala bala ogbo ogwogwo bala ihi wam. Ị́ tị myị ju ihi nyam ka.”

¹²Ụka ọọwa, Amkpaa Ohe Oluhye byim yẹkẹẹ, “IJeremaya ee, aa ya je ala Isirẹlụ mẹ, ị ka ya ere myị̀ ọta-ere ọnyị myị ọnyị. Ị ka wẹng yẹkẹẹ, ‘Ịnọọ, ahị jẹjẹ kị họ ọta-ere ọnyị myị ọnyị nyọka ya ere myọọ.’

¹³Ọọwa lẹ, ká byaa mẹ, am Amkpaa juwa ka ya ere ha alọpyị ọlẹ nwa gbee kị ka ya. Ọ ka lịnyị ẹ-ẹga nya ịdirihụ ịlẹ kị ri anyị ịtụma nya iDevidi bala angịkiliya bala alọmwụ bala tụ ọng myị ọng kọ kụ i-iJerusalẹm.

¹⁴Ọọwa, m̄ ka gyaa kpa da mịla awụlẹ lẹlẹ. M̀ ka go anyị bala adaa anyị da mịla awụlẹ. Ḿ ka yẹ ahyẹẹrwẹrwa lee o-jujwo nyaa kpụ m̄m̀ hwabwọ la ọ-taa ayịreji ka.”

¹⁵Ọọwa, m̄ byi ala iJuda yẹkẹẹ, “Anụ ala iJuda ee, Amkpaa ya ẹla lẹẹ! Anụ kpa ịlọnụ keji kanụ ke ụrụ lọọ mẹ.

¹⁶Anụ ju ihi nya Ohe Oluhye nyanụ, lahịgboo-ò wẹ mẹ. Anụ họ ịnyị ene kọ ka du ukpowu nya akama chịnụ ọgụ, ene kanụ ka juwa chị achụụ ẹ-ẹpwụ nya ukpowu tụ ịgbọdọ da. Anụ jwoo ihi ene kọ ka yẹ ahịgboo ọlẹ kanụ-ụ̀ tịtọ la ukpowu— ukpowu okpẹmkpẹm onyobyi-obyi mẹ.

¹⁷Ọ́ tị ri kanụ myị ke ụrụ ka aalẹ m̀ ka jida tu ẹpwụ-ẹpwụ ọọ-lajị nya ọbọọchẹ nyanụ, m̀ ka jida lẹhị bọja legbejida nyà bwọbwọọbwọ, chajị ị ka wunu anụ ịkpịlọ nya Amkpaa kpa rụ kaka ri alagba.”

¹⁸Ọọwa, Amkpaa-à byim yẹkẹẹ, “Aa byi adịrahụ bala ịnamwụ kị pẹhi ẹchị-adịrahụ nyaa mẹ, chajị ị ka nwụla okpo-adịrahụ ilihiihi nyaa hyaa.

¹⁹Alẹwụ ka chị urwe yẹ epweji iledii nya iJuda dada, ọngọngọhẹ-ẹ́ ka jẹ-ẹ̀ kpehe bwu ụwa lee ọ-jụ kele ka. Ị ka go ala iJuda wuu kpa rụ, kpaa rụ wuu kaka ri alagba.”

²⁰Ọọwa, m̄ yẹkẹẹ, IJerusalẹm ee, chị ẹhị kaka yẹ aluji nyang kị lalẹẹ wẹ bwu ẹtẹ. Iru nya angịnyị ịlepweji nyang bẹẹ—ịwa angịlẹ kaa kpa yaya tị́ lee mẹ?

²¹Ányị ā tị ka ya ụka ká Amkpaa-á go angịlẹ ká mẹ ang jẹ nyọka ri alakpa nyang dachichi kpaa kaka ri alegbeju nyang? Olujwo ọtọtọ ka chịng ọhị lala ọnyang ọ-hya ụma nya ọnyị ọmama.

²²À ka juwa tọ ịlọng wo ang ọ-kpụ ọmwụ nya akama ịwẹ, bala ang odudu kị gung ang ene hi ọmwụ-ọmwụ, chịng beji lala ọnyang. Ajị nya ang onyobyi okwookwee ịlẹ ká họ à du lẹ.

²³Ọngọ onyobiri ka jẹ-ẹ̀ yẹ ugba nya ịnyịro nyamwụ da-á? Ijwo ka jẹ-ẹ̀ hụ́ ịna ịnwụrụ-nwụrụ nyanwụ hụrụ-ụ̄ụ́? Ọ́ ka jẹ-ẹ̀ lịnyị lẹ ịnọ, anụ angị họ ang onyobyi jẹ ịpyọ nyamwụ tị́ ka yẹda kaka họ ang ọnyịịla lẹ.

²⁴Amkpaa yẹkẹẹ! M̀ juwa ka nyiinu epepe lala ewoo nya ang ịlẹ ká igbachịwụ o-bwu ugbileji kaa da hụrụ.

²⁵Ẹbyị ọlẹ kọ ka họnụ à wẹ lẹ, m̀ chị eje nya akama ọwẹ nọ gbenu lẹ, chajị anụ deeri nyam juwa dachichi dahịhile ịnịịkịla.

²⁶Am Amkpaa lịlọm ka yinu ịpwụ hi ọhị-ọhị, ká oyi ka junu u-ugbọdọda.

²⁷M̀ yẹ ang-ibyi ịlẹ wuu kanụ họ, bala akpara onyobyi-obyi nyanụ bala ijiga ọ-kpụ eteji ha tụ ikiti-ikiti bala ẹrụ da. Ala iJerusalẹm ee, anụ ri enyi gu obyi lẹ oo! Ụka oyina ānụ tị́ ka la charị-charị kpa-à wẹ mẹ?