Read idege IJeremaya 14 Bible Online

IJeremaya 14 - idege bible

IJeremaya 14

¹Amkpaa ya ẹla tam am iJeremaya chajị nya enyi ọ-ka do ka yẹkẹẹ,

²“Ala iJuda juwa bida, alepweji ịlụwa kpụ egu-egu, alụwa nọnọ ị-ịpyị ẹ-ẹpwụ nya ọjụjụ, ị be ẹkọ ida ngịrọrọọrọ wụrụm bwu iJerusalẹm.

³Alihi ịlụwa du anchẹ nyaa ka ogo, ị kele ka ịwẹẹlụ ị́ tị ye enyi ụ-ụwa ka. Ị nyà lehwo nya ịta, ọkịlẹtụ kpaa enyi lahị haa bwuu, ị ya ahị cheji.

⁴Ajị nyọọlẹ ká enyi-í do ka lẹ, ọpyị chị ọhụ kịra-kịra, ọkịlẹtụ kpụ alẹrụ enyi, ịwa ya ahị cheji ịnyịnyị.

⁵Ụ-ụwa ẹ-ẹpwụmẹ, ịnịna nya apyị nyẹẹkpẹ da anyị nyamwụ, chajị amẹ-ẹ́ ji kaka.

⁶Ibyiyó ịlẹpwamẹ godayị i-ikiti juwa chị ịhụ lala ikirom, ahị nyaa họ rweee, chajị ị́ ye ang ri kaka.”

⁷Ọọwa, angịnyị à yẹkẹẹ, “Amkpaa ee, ịnyịlẹhị lẹ, ang inyibyi nyahị gbe ẹla juhi lẹ, tị dahị ụbwọ ajị nya ẹnyị nyang ọ-ka la ihi mẹ, ahị nyẹẹkpẹ dang kịla ụka ohu kụrụ iwo, ahị họ ọhọbịrị bang.

⁸Ahụ kẹnẹ-kẹnẹ ala Isirẹlụ à dahịhile lẹ, ahụ à kaa chaa da lụka nya akama lẹ. Ányị tị́ ká-à bịbanụ ẹ-ẹga nyahị lala ọngga-āà? À juwa họ lala ọlẹdịyẹ ọlẹ kọọ pẹ kaka nune lodu gbe ụtụrụ kem.

⁹Ányị tị́ ká juwa họ lala ọngọlẹ ká ẹla bwọọ agaga, lala ọgẹwụ ọlẹ kọ chị angịnyị nyamwụ da myị ka? Amkpaa ee, à jam tahị, ahị tị ri angịnyị nyang, ā nyẹẹkpẹ dahị ka chuchuu!”

¹⁰Ọọwa, Amkpaa-à ya ẹla chajị angịnyị nyamwụ yẹkẹẹ, “Ọ-hwahị rụ him chakpa háa lụmẹ, ị́ị̀ wu ịlaa kpa chẹẹ ka. Lẹẹlẹ, ẹla nyaa-á hám kaka, m̀ ka kpịtịya nya ang ịtịpyọ ịlẹ kị họ wuu, kam ka yaa akama chajị nya ọọwa lẹ.”

¹¹Ọọwa, Amkpaa-à byim yẹkẹẹ, “Ā bịlẹm nyọka da angịlẹ ụbwọ kaka.

¹²Ó-ri kị dọmwụ hụ limyi juwa bịlẹm-bịlẹ, ḿ ka dọnụ waa ka. Ị́ kịla iya ị-rụ ila bala iya nya ajẹ nya ang-ẹrụ ham wẹwẹ, ḿ ka yaa nya angịnyị nyam kaka. Ọkọkọ nya ọọwa lẹ, m̀ ka nwaa ẹ-ẹwụ bala limyi bala lẹdụrụ.”

¹³Ọọwa, m̄ wọọ yẹkẹẹ, “Ọngọlahị Amkpaa ee, alọmwụ ịkịla kaa byaa ya ẹwụ ọdada lee imyi ọnwụnwụ nyị́ ka ji ka. Ị ya ahụ nyị myị ọnụ ya ọwa nyị ka ya okpunyi haa am̀ ọ-ọpyị ọlẹ.”

¹⁴Ọọwa, Amkpaa-à wẹm yẹkẹẹ, “Alọmwụ ịịwa juwa me ọnọọkịla lẹnyị nyam ịnyị. Ḿ daa ẹrụ nyọka ya ẹlẹlẹhẹ lẹnyị nyam koo. Ọyị ọọ-yẹ a-arụrụ nya ọnọọkịla ị wẹẹ yẹ kpa kaka yẹ ọmwụ lẹ. Ọyị ododu ịlẹ kị kụ irya nyaa bwu ọkịlẹtụ nya ịlaa kpehe ịnyị.

¹⁵Lẹẹlẹ, wo ẹla ọlẹ kam wẹẹ ya mẹ, ịwa alọmwụ ịwẹ kam du ẹrụ du ka, kị tị wẹẹ yẹ ọmwụ lẹnyị nyam juwa byi angịnyị ya ẹwụ lee imyi nyị́ ka ji ọpyị ọlẹ ka-à wẹẹ, ẹwụ-ẹwụ bala imyi à ka kpaa ụ-ụbwọ lẹ.

¹⁶Angịlẹ kị tị wẹẹ ke ụrụ lọmwụ ọyẹyẹ nyaa-à lẹ, ị ka go egu nyaa chị ka odehe o-opeje ịla iJerusalẹm. Igu nya ẹwụ bala imyi à ka nwaa lẹ, ọngọngọhẹ-ẹ́ tị ka juwa nyọka jwaa eji ka. Ẹbyị ọwẹ ka haa tụ ịhụ nyaa bala anyị alẹng bala anyị anyang nyaa. Ang onyobyi nyaa m̄ ka kpa yaa akama lẹ.”

¹⁷Ọọwa, Amkpaa-à byim yẹkẹẹ! IJeremaya ee, aa ya je angịnyị ịịlẹ mẹ! Egbejida myịm a-ahị tụ odu tụ ẹnụ, ḿ hwabwọ lida ojeje myị ka, chajị ị họ angịnyị nyam ang aboji-aboji, hi ụkụchụ ookpokpo kị ka gbu lẹ.

¹⁸Ḿ kpehe ka ugumẹ, m̀ yẹ egu nya angịlẹ ká ẹwụ nwụ chụwa bẹlẹ-bẹlẹ, M̀ tụ gaaa bwu epweji ọhẹ ka ọkịla, m̀ yẹ angịlẹ kị wẹẹ gbu igu nya imyi! Alọmwụ bala angịkiliya juwa họ ụkụrwọ nyaa la ọ-jẹ ang ọlẹ kị juwa họ datị ka.

¹⁹Ọọwa, m̄ yẹkẹẹ! Amkpaa ee, à nyẹẹkpẹ da iJuda gbanggbang lẹ-ẹ́? Ala ịSayọn tụng ànyị lẹ-ẹ́? Ọ tị́ lanyị ká họhị ang aboji-aboji ọlịịwẹ kpụ āhị ka go hwóò myị kaka mẹ? Ahị ya ẹhị rịrị gbe okpunyi, ịngịhyẹ ọnyịịla-á tị pẹhị ẹpwa ka. Ahị ya ẹhị rịrị gbe uda ọhọhọ, uhi onyobyi-obyi kem à tị lẹẹ chịhị ọhị lẹ.

²⁰Amkpaa ee, ahị jam ya ang onyobyi nyahị tụ ịnya adahị igogo anyị dodo. Ahị wuu họ ọhọbịrị bang.

²¹Ajị nya ẹnyị nyang lẹ, ā nyẹẹkpẹ dahị ka, ā ya oyoyi ju ẹchị-adịrahụ ọlụmẹ-ụmẹ nyang ka. Kpịtịya nya iro ọlẹ ká nwà tahị wẹẹ, ā bịrọọ ka.

²²Ijiga ihideeji nya alẹpwụma ịkịla do enyi ẹnẹhẹ lẹ-ẹ́? Uhye-ọgba ka jẹ-ẹ̀ kụ ụwa lịlọmwụ-ịlọmwụ do enyi-í? Ahụ Amkpaa Ohe Oluhye nyahị à kaa do enyi lẹ, ahụ āhi dahịhile lẹ, chajị ahụ ụbwọng à kaa họ ang ịwẹ lẹ.