Read idege IJeremaya 15 Bible Online

IJeremaya 15 - idege bible

IJeremaya 15

¹Ụka ọọwa, Amkpaa byim yẹkẹẹ, “Ó-riri ká iMosisi bala ịSamwẹlụ-ụ́ wẹ kaka godayị ị-ịlahị nyam juwa bịlẹm-bịlẹ, ḿ ka yẹ ahyẹẹrwẹrwa nya angịlẹ kaka. Byaa kị rụ mẹ! Ị rụ tụkịnyaa hi ẹhị nyam mẹ!

²Ó-ri kị tọng wo yẹkẹẹ, ‘Ale ahị tị́ ka rụ ka mẹ?’ aa byaa mẹ, am nyị yẹkẹẹ: “Ịwa angịlẹ ká igu nya ẹdụrụ ka ri ogu nyaa ā rụ kele kaka gbu igu nya ẹdụrụ mẹ. Ịwa angịlẹ ká ẹwụ ka ri ā rụ kele kaka gbu igu nya ẹwụ mẹ. Ịwa angịlẹ ká igu nya imyi ka ri ogu nyaa ā rụ kele kaka gbu igu nya imyi mẹ. Ịwa angịlẹ ká agba ọkaka ka ri ogu nyaa ā rụ kele ka agba mẹ.

³“Am Amkpaa cheje nyọka yaa akama lụgbẹyị ine: Ị ka nwaa ẹ-ẹwụ, ibwu ka gbile egu nyaa hụla-hụla, ịchịnụ bala iyo ịnyẹẹgẹga ka ryaa wuu gbanggbang.

⁴M̀ ka họ ká akama ọlẹ kọ wẹẹ ka chaa ọgụ ka wu ẹpwụma datị-datị nya odehe ọlẹ wuu ejiri ọọ-lajị nya ang inyibyi ịla ká ịManasẹ ọnyị nya iHesekaya họ i-iJerusalẹm lụka kọ ri adịrahụ nya iJuda.”

⁵Amkpaa yẹkẹẹ, “Ala iJerusalẹm ee, oowo kpá anụ tị́ ka la ahyẹẹrwẹrwa-à wẹẹ? Oowo à tị́ ka jida chajị nyanụ-ụ̀ wẹ ene-è? Ọngọngọhẹ-ẹ́ ka chẹhị gee nyọka towo yẹkẹẹ, ‘Anụ há gbalẹ me’ ka.

⁶Anụ tị́ pwam lẹ, anụ nyẹẹkpẹ dam. Ḿ ka gbu ọ-hịnyọhiinu pyịyọọ kaka, ịnyị à du kam yụbwọ gu ẹla nyanụ, wẹẹ tanụ ayịreji lẹ.

⁷M̀ hịrịịnụ hịrị e-epweji ọnyị myị ọnyị nyanụ lala ajẹ nya ang-ẹrụ. M̀ tanụ anụ angịnyị nyam ayịreji, nwụnụ anyị wuu, chajị anụ myị kpụba lang onyobyi ọhọhọ ka.

⁸Ịhụ-ẹgụ ịlọpyị nyanụ ka ju iru gụ ugburuja ilihu. M̀ ka nwụ ikolobya hi ẹnụ tuhyẹ, olujwo tọ ịnịna lụmẹ. Lụka ọmwaaa, m̀ ka kpa ọjụjụ bala uhi ojuju chaa ọgụ.

⁹Ịnịna ọ-ma anyị irwiye chayama, da ịhụ gu awụlẹ myị kaka, odu hyọọ lẹnụ ẹ-ẹpwayịrẹtẹ, oyi jọọ lòdunyamwụ ru ịrụ. M̀ ka yanụ anụ angị hi lọhịhị ju aluji ụ-ụbwọ kị ka nwụnụ. Am Amkpaa-à ya ẹlẹwẹ lẹ!”

¹⁰Ọọwa, m̄ yẹkẹẹ, “Cháhòhóò! Inyiribyi à kpụm lẹẹ-ẹẹ́! Ịyẹ tị́ du ká ịnam mam wẹ odehe ọlẹ lẹẹ ene-è? M̀ ri ọlarụ nya ọng myị ọng ọ-ọpyị ọlẹ, ḿ ya ang kpịla ọngọhẹ, juwa chị rịrọọ lee ọ-kpịla ang bwu ẹga nya ọngọhẹ, pwa ọgbagba kpá kaka, ọng myị ọng wuu tị juwa pwọm lido pwụrwọ-pwụrwọ.”

¹¹Ọọwa, Amkpaa-à wẹ yẹkẹẹ! “Ọ ri opyii kam ka gbanụ kpehe chajị nya ọhagụ. M̀ ka họ aluji nyanụ ka bịlẹnụ ụbwọ ọdada lụka nya akama bala ọjụjụ.”

¹²“Ọngịnyị ehe ka jẹ-ẹ̀ mwụ oje eku myị-ị̄ị́? Ọ́ chịkpẹẹ ka! Ọgụgụ ri oje ọlẹ kọ kpịla loje ọnyọmịla ọlẹ kọ bwu ẹtẹ.

¹³M̀ ka du aluji ka go ụdụ ọkpụkpụ bala ang ịlẹ kanụ la wuu kpa rụ. Ọọwa ri ọ-ka yẹnụ akama, chajị nya ịhọbịrị ịlẹ kanụ họ wuu ọ-ọpyị nyanụ.

¹⁴M̀ ka yanụ ri anyị nya aluji nyanụ ọ-ọpyị ọlẹ kanụ jẹjẹ kpong-kpong ka, chajị agbama nyam lala ila ọlẹ kọ kaa wuru gbe oyi myị oyi.”

¹⁵Ọọwa, m̄ yẹkẹẹ, “Amkpaa ee, à tị́ yẹ ẹla nyam dụwẹ lẹ, kpịtịya nyam ká dam ụbwọ. Aa họ angị wẹẹ tụm pyịpyị kwiwa ham, ā ju ugbodu hụ chịng kị nwụm daarụ koo, à tị́ jẹ lẹ, ajị nyang à du kị wẹẹ dom ịịwẹ lẹ.

¹⁶Ụka ká ya ẹla, m̀ wo kpẹẹkpẹẹ, ẹla nyang ya ọkẹkẹnị ham, lọkịlẹtụ kpụm nyiii, chajị m̀ ri nyang ahụ Amkpaa Ohe Oluhye Agụgụ.

¹⁷Ḿm̀ yẹjula angị juwa yụya hụlọ ahụ pyaaááà ka, m̀ hụhụ nyam lokem, juwa ju ihi nya ehile nyang, chajị à họ ká agbama myị ẹpwụ nyam.

¹⁸Ịyẹ tị́ du ka akama nyam-ḿ kpụba ka-à wẹẹ? Ẹbẹ nyam ri ẹbẹ-ọgọja lẹ-ẹ́? Ịyẹ tị́ du kọ ka myị̀ ka? À ka yam chayama ụka kam tịtọ nyang lala ọ̀bá ọlẹ kọ kaa nwụ linehe lee lala ụgbụ ọlẹ ká enyi ọlụwa kaa nwụ-ụ́?”

¹⁹Ajị nya ọọwa lẹ, Amkpaa yẹkẹẹ, “Ó-ri ká nyà tịrẹkpẹ chịm ọgụ, m̀ ka yeng tịrẹkpẹ, à ka myịmyị-ị̀ rị ọnchẹ nyam. Á juwa ya ẹla ọnyịịla ọkọkọ nya uguru-ẹla aalẹ, à ka ri ọlọmwụ nyam. Angịwẹ ka jahị kpata wẹ ẹga nyang, ahụ ā họ lala ịwa ka.

²⁰M̀ ka họ ká ka la ọngịrị lala ugulọ ẹ-ẹga nya angịwẹ— ugulọ ọlẹ kị me loje ọnyọmịla. I ka mwẹla tang myị, ị́ tị ka kụrụng myị ka, m̀ juwa tang. M̀ ka chẹwụ keng kam ka chịng da. Am Amkpaa-à ya ẹlẹwẹ lẹ.

²¹M̀ ka gbang kpehe bwu ụbwọ nya alọkwọ, m̀ ka chịng da bwu ụbwọ nya alabwẹga.”