Read idege IJeremaya 16 Bible Online

IJeremaya 16 - idege bible

IJeremaya 16

¹Ụka ọọwa, Amkpaa myịmyị ya ẹla tam yẹkẹẹ,

²“IJeremaya ee, ā ye ahụ lee ọ-ma anyị am̀ ọ-ọpyị ọlẹ koo.

³M̀ ka ya jeng ang ọlẹ kọ ka họ ta anyị ịlẹ kị ma ẹgẹlẹ tụ ịnaa bala adaa anyị.

⁴Ẹdụrụ onyobyi ka nwaa. Ọngọngọhe-ẹ́ ka bida nyaa ka. Ị́ ka jwaa eji ka. Egu nyaa ka chụwa màma ri ọtẹwụụ. Ị ka gbu ẹ-ẹwụ bala o-gbu igu nya imyi. Egu nyaa ka ri ang oriri nya ịchịnụ bala iyo ịlẹpwamẹ.

⁵“Am Amkpaa jam bying ịnyịnyị yẹkẹẹ, ā ka ẹpwa ọlẹ kị juwa họ ida ka. Ā kele nyọka da ogogo-ẹdụrụ chajị nya angịwẹ koo. M̀ hịnyọ la ọ-ka ya okpunyi bala ọhaha bala ahyẹẹrwẹrwa nyam haa lẹ.

⁶Alụdụ tụ alẹbyahị ka gbu am̀ ọ-ọpyị ọlẹ. Ọngọngọhẹ-ẹ́ tị ka jwaa eji lee o-bida chajị nyaa ka. Ọngọhẹ-ẹ́ ka kọ ịlọmwụ ẹma ị-ịnyịrọ lee ọ-pwọ inyi hi ẹtẹtẹ nyọka mẹjẹ nyori ị juwa bida nyaa ka.

⁷Ọngọngọhẹ-ẹ́ ka kpụ́ ang oriri kịla angịlẹ ká onyobyi la nyọka kpaa ẹjẹ ka. Ọngọngọhẹ-ẹ́ ka kpa ere kịla ọngọlẹ ká adamwụ lee ịnamwụ gbu nyọka kpọọ ẹjẹ ka.

⁸“Ā ka ẹpwa ọlẹ ká angịnyị juwa la ọhụhụ ka. Ā hụhụ nyọka nwa ere taa koo.

⁹Ẹla ọlẹ ká am Amkpaa Agụgụ Ohe Oluhye nya ala Isirẹlụ wẹẹ ya jeng ri: m̀ ka tụ ọmọnyọ nya ụya ọyaya bala ọkẹkẹnị ọchịchị ọlọhụhụ nya ịhụ oyeye ọlọpyị ọlẹ ku. Ahụ bala angịkịla ihihi ka hị kpụ anụ ka kpa ẹhị nya ịlọnụ yẹ ẹlẹwẹ.

¹⁰“Ụka ká tịrọnụ nya ẹlẹwẹ jaa wuu, ị ka juwa tọng wo yẹkẹẹ, ‘Ịyẹ tị́ du ká Amkpaa juwa hwahwa nya akama onyobyi ọlịịwẹ yahị dahị ịnyị-ị̄ị̀? Ahị tị́ họọ anyị kpá-à wẹ mẹ? Ọhọbịrị oyina ahị tị́ họ ba Amkpaa Ohe Oluhye nyahị-ị̀?

¹¹Ụka ọọwa lẹ, à byaa mẹ am nyị ya ang odudu nyị ri yẹkẹẹ, adaa igogo anyị nyẹẹkpẹ dam rụ kele kaka kpụ eteji bala ọ-myị ẹrụ ha ijiga ịkịla. Ị gwahị gboo him, pwa ọ-ka ju ihi nya ọmẹjẹ nyam.

¹²Anụ tị họ tịpyọ gụ adanụ anyị wẹẹ. Anụ wuu ba aruwoka ọlọkịlẹtụ nyanụ jẹ du kanụ myị jum ihi ka.

¹³Lẹẹlẹ, m̀ kunu kpehe hi ọpyị ọlẹ rụ ka ọpyị ọkịla ọlẹ kaanụ lee adanụ igogo anyị-ị́ jẹjẹ ka. Ụ-ụwa ānụ ka kpụ eteji ha ijiga lẹnụ bala alodu lẹlẹ. Ḿ ka yẹ ahyẹẹrwẹrwa nyanụ kpong-kpong ka.’”

¹⁴Amkpaa yẹkẹẹ, “Ụka tị juwa wẹ kanụ ka nwa iro lẹnyị nyam ya am nyaa ri Ohe Oluhye ọlẹ kọ juwa hịhị kọ gbanụ kpehe bwu ọpyị nya Ijipiti lẹ kaka wẹẹ.

¹⁵Ụka ọọwa lẹ, ụgbẹyị ọlẹ kanụ ka kpa nwa iro ka ri: ‘M̀ kpa ẹnyị nya Amkpaa ọlẹ kọ juwa hịhị kọ kpahị nyà bwu ọpyị ọlẹtẹ bala ẹpwụma datị-datị ịlẹ kọ nyiihi epepe chị ka wuu ya nya ịlẹhị-ịlẹhị yẹkẹẹ.’ M̀ juwa ka kpanụ nyà tịrẹkpẹ wẹ ọpyị ọlẹ kọ ri nyanụ lụbwọ-lẹta ọlẹ kam ya ha adanụ igogo anyị.”

¹⁶Amkpaa yẹkẹẹ, “M̀ juwa du ẹrụ tọ iru nya alurwenyi kị ka warị kaka wunu. M̀ ka du ẹrụ tọ iru nya ịmwụkpẹ kị ka wẹ kaka durwe nyanụ tụ ịgbọdọ-ịgbọdọ bala uku nya ajwọ da.

¹⁷M̀ yẹ ang myị ang ịlẹ kanụ wẹẹ họ wuu gede-gede. Ịngịngịhyẹ nyanụ-ụ́ kpịbaa him ka. Ịhọbịrị nyanụ-ụ́ kpịbaa kpụ m̄ ka yaa ka lẹ ka.

¹⁸M̀ ka yẹnụ akama mwụ aba ba kwiwa nya ịhọbịrị bala ang onyobyi ịlẹ kanụ họ, chajị anụ chị ọpyị nyam ịrị bwula ekpeku nya ijiga ị-la ọhịhị ka nyanụ ịwẹ kị lala egu. Anụ ya ijiga nya ịnịịkịla nyanụ myị ọpyị nyam wuu pwẹẹpwẹẹ lẹ!”

¹⁹Ọọwa, m̄ yẹkẹẹ, “Amkpaa ee, ahụ à ri ọngọ ya ọngịrị ham bala ọngọ chẹwụ kem lẹ. À ri ẹga ọkpịbaa nyam lụka nya akama. Alẹpwụma ọnyị myị ọnyị ka wẹ ẹga nyang, ị ka wẹ bwu ọbaba nya odehe kaka yẹkẹẹ, ‘Adahị igogo anyị-ị́ la ịngịhyẹ dala ijiga ịnịịkịla ka, ị kpụ eteji ha ekpeku i-ju apyobwuna nya ịngịngịhyẹ ka.

²⁰Ọngịnyị ehe ka jẹ-ẹ̀ họ ojiga, wụụrwọọ ohe nya ịlọmwụ-ụ́? Ịgọgọ ẹnẹnẹhẹ! Ijiga kem ị wẹẹ họ lẹ.’ ”

²¹Amkpaa yẹkẹẹ, “Ajị nya ọọwa lẹ, m̀ ka mẹ ọngịrị bala ụmụmẹ nyam jaa. Lẹ ị ka jẹ ká am kpakpaakpa à ri Amkpaa lẹlẹ.”