Read idege IJeremaya 17 Bible Online

IJeremaya 17 - idege bible

IJeremaya 17

¹Amkpaa yẹkẹẹ, “Anụ ala iJuda ee, ang onyobyi nyanụ ka le— ị dọọ ju lang oloje-oje ọdụpwụ, ị gu ịna nyamwụ baanụ ọ-ọkịlẹtụ bala ịpyịyẹ-pyịyẹ ịlọ́kọ́nggọ nya ogidi nyanụ.

²Anyị nyanụ tịị nwụ adaa ị-kpụ ijiga, bala ọ-kpụ eteji ha ekpeku nya Achẹra ojiga ọnyang ọ-ọmwụ nya okoji ọ-kpụ ụrụrụ ọnyị myị ọnyị bala u-uhye nya ikiti,

³bala u-uhye nya ịgbọdọ bala ẹ-ẹpwụmẹ. M̀ ka họ aluji nyanụ ka wẹ kaka go ang-ụdụ bala ang ịlẹ kanụ la wuu kpa rụ, chajị nya ịhọbịrị ịlẹ kanụ họ wuu ọ-ọpyị nyanụ.

⁴Ọpyị kpá kam ya hanụ pyííì! Anụ tị wụ abwọ pịlẹ-pịlẹ hyọọ. M̀ ka yanụ ri anyịhị nya aluji nyanụ ọ-ọpyị ọlẹ kanụ jẹjẹ ka, chajị anụ họ ká agbama nyam wuru lala ila lẹ, ọ ka juwa wuru pyịyọọ.”

⁵Ọọwa, Amkpaa-à yẹkẹẹ, “M̀ gọlọ ju angịlẹ kị nyẹẹkpẹ dam kị dahịhile angịnyị, juwa dahịhile ọngịrị nya ọngịnyị ehe.

⁶Angịịwa lala ekpapwụ ịlẹ kịị bwu ẹ-ẹpwụmẹ ịlẹ kị kaa nwa ọ-ọpyị ọkanggba. Ị ka bwu ọ-ọpyị ọlịma-ịma ọlẹ ká ọngọngọhẹ-ẹ́ kụ ka.

⁷“Ọngọlẹ kọ tị dahịhile Amkpaa kọ ya irya nyamwụ nịrọọ aalẹẹ, ọngọọwa ka pyẹ̀ẹẹ.

⁸Ịnyịrọ ka kpụ angịịwa nyii lala okoji ọlẹ kọ bwu rịrị ọ-ọnụ nya ogo ká atẹ nyamwụ kaa da yahị da ka ẹga nya enyi. Ọọ chị uko nya inehe ka, chajị apwụ nyamwụ kaa ju jwọọjwọọ ụka wuu. Enyi-í dodo ka lụka ọtata, ọọ ryọọ ẹla ka, ọ kaa juwa nwụ egbe ịnyịnyịịnyị.

⁹“Ánụ jẹ ka aalẹ, ọkịlẹtụ nya ọngịnyị ehe à ju ọdahịhile-ka gụ ang wuu lẹ. Ọ byịbyị ka ịnwanị, oowo tị́ ka jẹ ịpyaatịra ọlẹpwụ nyamwụ weji-weji kpá myị-ị̀?

¹⁰Am Amkpaa kaa wụla irya omeme tụ ọkịlẹtụ nya ọngịnyị ehe yẹ kpete-kpete. M̀ kaa nwụ ọng myị ọng uri kpẹẹkpẹẹ jaabwọ ká abwẹla nyamwụ la bala jaabwọ ka ọhọhọ nyamwụ la.”

¹¹Ọngọ kpa ụdụ bwula ịbịrịbwọ ọhọhọ lala ẹwa ọlẹ kọọ kụ eji ịlẹ ká ọchịnụ ọkịla da. Ọngọọwa-á ka jẹ ọhịhị nyamwụ eji pwụ ẹhya kpá, ụdụ nyamwụ ọọwa ka gwọọ ta ayịreji, ụka ohyẹẹkpẹ, ị ka jọọ nya oluchi.

¹²Ube nyang ahụ Amkpaa lala ẹchị-adịrahụ ọlẹ kọ la ụmụmẹ bala ọ-la uhye gidogbo kọ yeji bwu ọmwụ-ọmwụ ọdada nyamwụ.

¹³Amkpaa, ahụ ọngọlẹ ká ala Isirẹlụ dahịhile ee, oyoyi ka ju angị nyẹẹkpẹ dang, ịwa angịlẹ kị jahị kpata hing. Ị ka myị yịra-yịra lala ịnyaa da ẹnyị nyaa u-ugburuja, chajị ị nyẹẹkpẹ dang ahụ Amkpaa ọlẹ ká ri ẹmwụ-enyi nya ọhịhị haa.

¹⁴Amkpaa ee, họm uda mẹ aalẹ, m̀ ka la gogo, chịm da mẹ aalẹ, m̀ ka la ịlọm. Ahụ m̄ kaa gwogbo ha lẹ.

¹⁵Wo jaabwọ ká angịnyị wẹẹ byim wẹ́ẹ̀-ị byim yẹkẹẹ, “Ang ịlẹ ká Amkpaa lẹẹ hwahwa jahị dahị tị́ lee mẹ? Ị họ jịra kahị yẹ-ẹ̀ wẹ mẹ-ẹ̀!”

¹⁶Amkpaa ee, ḿ rụnyẹ rụ hi ụkụrwọ ọlẹ ká ya ham lala ọngọgbikpịlọ ọkpẹhị rịrị angịnyị nyang ka, ḿ tị chị rịrịng nyọka kpa akama chaa ọgụ ụka ọhẹ lẹkoo. Ahụ ayịdang jẹ ọọwa, à jẹ ẹla myị ẹla ọlẹ kam ya wuu gede-gede.

¹⁷Ā chị uhi jum koo! Ahụ à ri ẹga ọkpịbaa nyam lụka nya akama lẹ.

¹⁸Họ ká oyoyi ā ju angị tụm pyịpyị, ā tị myị ká oyoyi ā jum ka. Chị uhi jwaa, ā tị chị uhi jum am koo, kpa akama ọ-mwụba-mwụba wẹ uhye nyaa, ká daa abwọ yịgẹ-yịgẹ.

¹⁹Amkpaa byim yẹkẹẹ, “IJeremaya ee, kele ka ya ẹla nyam je angịnyị ụ-ụwa Ogirigba nya Angịnyị ẹga ká ịdịrịhụ nya ala iJuda kaa jụ bwu ka epweji bala o-bwu kpehe mẹ. Aa kele ka ogirigba ịkịla wuu ịla iJerusalẹm ịnyịnyị.

²⁰Byi ịdịrịhụ nya ala iJuda bala ala iJuda tụ ala iJerusalẹm ịlẹ wuu kịị jụ bwu ogirigba ịịwa mẹ am Amkpaa yẹkẹẹ:

²¹Ó-ri ká ọhịhị nyanụ-ụ́ kọnụ ẹhị aalẹ, ānụ kpa olo ọhẹ-lọhẹ Ẹnụtụrụ Ọhịnyọ Lụkụrwọ lee ọ-kpa jụ koye nya ogirigba ịla iJerusalẹm kokoo.

²²Ānụ kpa olo ọhẹ-lọhẹ kpehe bwu ẹpwa nyanụ Ẹnụtụrụ Ọhịnyọ Lụkụrwọ ka. Ánụ ka họ ụkụrwọ ẹnụ ọwẹ ka. Anụ ka chị ịgọgọ jụ Ẹnụtụrụ Ọhịnyọ Lụkụrwọ jaabwọ kam da adanụ igogo anyị ehile nyọka họ.

²³Adanụ igogo anyị-ị́ tị myị wo ẹla nyam lee o-ke ụrụ lam ka. Ị la egbeju-ongịrị tam, ị́ myị wo ẹla nyam bala ọmẹjẹ nyam ka.”

²⁴“Am Amkpaa jam byinu ya yẹkẹẹ: Anụ ka ju ihi nya ehile nyam. Ánụ ka kpa olo ọhẹ-lọhẹ jụ kpoye nya ogirigba nya epweji ọlẹ Ẹnụtụrụ Ọhịnyọ Lụkụrwọ ka. Anụ ka kpẹhị ju Ẹnụtụrụ Ọhịnyọ Lụkụrwọ lala ẹnụ ọlịgọgọ. Ānụ họ ụkụrwọ ẹnụ ọọwa ka.

²⁵Ánụ họ ịnyị lẹ aalẹ, ịdịrịhụ bala alegbeju nyanụ ka bwu ogirigba ịwẹ ka epweji nya iJerusalẹm. Ị ka la ọngịrị nya ọpyị ọkpakpa ọlala ịnya iDevidi. Iwa wuu bala ala iJuda bala ala iJerusalẹm ka kụ ang ịrụnyẹ bala anyịrẹ. IJerusalẹm ka myị̀ la angịnyị kpọrịkọọ gbe oyi myị oyi.

²⁶Angịnyị ka warị bwu epweji nya iJuda bala epweji ịkịla ịlẹ kị dagaga ju iJerusalẹm bala bwu ọpyị nya iBenjamịn bala ọmwụ nya ịgbọdọ ịlọmwẹnụ-obyi bala epweji iluhye nya ịgbọdọ bala ọpyị oledii nya iJuda. Ị ka kpa iya ọ-rụ ila bala iya ịkịla bala iya nya ajẹ nya ang-ẹrụ bala iya nya ịtangare tụ iya nya obe ojiji warị wẹ Ube Ịgọgọ nyam.

²⁷Anụ tị ka ju ihi nyam kanụ ka kpa Ẹnụtụrụ Ọhịnyọ Lụkụrwọ lịgọgọ. Ánụ ka kpa olo ọhẹ-lọhẹ jụ kpoye nya ogirigba ịla iJerusalẹm Ẹnụtụrụ Ọhịnyọ Lụkụrwọ ka. Ó-ri kanụ ju ihi nya ehile ịwẹ ka aalẹ, m̀ ka jụ ogirigba ịwẹ ila. Ila ọọwa ka rụ ebe ịnyịịngịrị ịla iJerusalẹm wuu. Ọngọngọhẹ-ẹ́ ka jwọọ mịrị myị ka.”