Read idege IJeremaya 18 Bible Online

IJeremaya 18 - idege bible

IJeremaya 18

¹Ụka ọọwa, Amkpaa byi iJeremaya yẹkẹẹ,

²“Kele ka ẹpwa nya ọngọ me ang wẹẹ. M̀ ka ya ẹrụ ọhẹ jeng ụ-ụwa.”

³Ụka ọọwa, m̀ ka ẹpwa nya ọngọ me ịta. M̀ yọọ kọ juwa họ ụkụrwọ ẹ-ẹga o-me ang nyamwụ.

⁴Ụka kọ yẹ ká ang ọlẹ kọ me-é la jaabwọ kọ tịtọ ka, ọ kaa dà ume ọọwa ju lawụlẹ ya me ang ọkịla jaabwọ kọ họọ.

⁵Ọọwa, Amkpaa-à byim yẹkẹẹ,

⁶“Anụ ala Isirẹlụ ee, ḿ la ongịrị nyọka họnụ jaabwọ ká ọngọ me ang-ng họ la ume nyamwụ ka-á? Jaabwọ ká ume la ụ-ụbwọ nya ọngọ me ang, ịnyịnyị-ịnyịnyị anụ la ẹ-ẹpwụtụbwọ nyam lẹ.

⁷Ụka kam hwahwa nyọka hu ẹpwụma ọhẹ latẹ-latẹ, dọọ abwọ yịgẹ-yịgẹ, tọọ ayịreji,

⁸ká alẹpwụma ọọwa-á yẹ irya da hi ang onyobyi ọhọhọ nyaa aalẹ, ḿ ka họọ ang ọlẹ kam hwahwa jahị dọọ ka.

⁹Ọ́ tị ri kam myị ọnụ nyọka ya ẹpwụma ọhẹ yeji giri-giri, họọ kọ ka ri ẹpwụma ọtụka,

¹⁰ká alẹpwụma ọọwa-á mwọọgịlẹ ju ihi nyam ka, kị juwa họ ang onyobyi aalẹ, ḿ ka họ ang ịnyịịla ịlẹ kam ya ẹla rụ nyọka họ haa ka.

¹¹Lẹẹlẹ, byi ala iJuda bala ala iJerusalẹm mẹ, am Amkpaa jam me obyi jwaa nyọka kpa akama wẹ uhye nyaa lẹ. Byaa kị hịnyọ la ọhịhị onyobyi nyaa ọlẹ kị wẹẹ hị, kị nwụ ọhịhị nyaa rịrị mẹ.

¹²Ị tị ka wẹ bying yẹkẹẹ, ‘Ā kpa ịhụ ọdada nyang myị kaka. Ahị ka hịhị jaabwọ ká irya nyahị ri. Ahị ka ba aruwoka ọlọkịlẹtụ nyahị jẹ, juwa họ ang onyobyi jaabwọ kọ tọhị.’ ”

¹³Lẹẹlẹ, am Amkpaa jam bying yẹkẹẹ, “Tọ wo tụ ẹpwụma-ẹpwụma da wẹẹ, ọngọhẹ wo ẹla ọlịịlẹ ẹnẹhẹ lẹ-ẹ́? Ala Isirẹlụ họ ẹla ọtipyọ okwookwee lẹ!

¹⁴Ekpawẹ ihule-hule ka jẹ-ẹ̀ myị hi achinege nya ịgbọdọ nya iLibanọn ẹnẹnẹhẹ-ẹ́? Enyi okpunyi ọlẹ kọọ mwụ bwu ụwa ka jẹ-ẹ̀ nwụ kịrẹ-kịrẹ ẹnẹnẹhẹ-ẹ́?

¹⁵Angịnyị nyam tị deeri him, ị ju ịtangare ila ha ekpeku. Ị yụbwọ lụgbẹyị ọnyịịla onyogo beji, juwa dịrẹ ụgbẹyị ọchakụ-chakụ ọlẹ kọ ri nya ọhọbịrị.

¹⁶Ị ju ọpyị nyanụ àgụgụ lẹ, angịnyị ka tọọ ịmyị-ọnụ gbe oyi myị oyi, angị chịpwụrụ bwu ụwa wuu ka wu ejiri, chị egbeju pyiipyii nya ahị ọ-haa bwuu.

¹⁷Ụka ká aluji nyaa-á wẹ, m̀ ka nyaa epepe lala ekuruwa ịlẹ ká igbachịwụ o-bwu ọmwẹnụ-ụtụrụ kaa kpa jẹ. M̀ ka ji ẹkpẹ daa, gu ahị gboo hyaa ẹnụ ká akama ka chaa ọgụ.”

¹⁸Ụka ọọwa, angịnyị yẹkẹẹ, “Anụ kẹwẹ kahị tụ iJeremaya kịnyaa mẹ. Ahị ka la angịkiliya ịlẹ kị ka mẹ ehile jẹẹhị bala angị jẹ ẹla ịlẹ kị ka juhi irya bala alọmwụ ịlẹ kị ka ya ẹla nya Ohe Oluhye jehi kịlahị-ịlahị. Lẹẹlẹ, ahị chị ala bọọ, kahị hịnyọ la o-ke ụrụ lẹla nyamwụ mẹ.”

¹⁹Ọọwa, m̄ raabwọ yẹkẹẹ, “Amkpaa ee, wo abwọ ọrịrị nyam ká wo ẹla ká aluji nyam wẹẹ chị bam wẹẹ.

²⁰Ang onyobyi ị ka ya nwụm uri nya ang ọnyịịla lẹ-ẹ́? Ị tị chị ụjẹ da kam ka chabwọ kpụ̀. Kpịtịya jaabwọ kam wẹ ẹga nyang kaka bịlẹ chajị nyaa ká ka tụ agbama nyang kịnyaa hyaa wẹẹ.

²¹Amkpaa ee, họ ká anyị nyaa-ā gbu igu nya imyị, ya ẹga da ká ẹwụ ā ryaa, họ ká ịhụ nyaa-ā gbu ọrụ gbu, gbu anyị gbu. Họ ká ẹdụrụ ā nwụ alẹng nyaa, ká ikolobya nyaa-ā gbu ẹ-ẹwụ.

²²Kpa aluji kaka baa ẹpwa, ká eko onyoowuru ā kpehe bwu ẹpwa nyaa. ị chị ụjẹ da kam ka chabwọ kpụ ẹpwụ nyamwụ, ị da anya kam ka kpa ata kaka wu.

²³Amkpaa ee, à jẹ obyi ọlẹ kị me-è wẹ nyọka nwụm. Ā hịnyọhi ang onyobyi nyaa koo, ā yẹ ọhọbịrị nyaa chịng koo. Họ kị kụrwaa chẹẹchẹẹ chahị jung, yaa akama ụka ká ju agbama.”