Read idege IJeremaya 19 Bible Online

IJeremaya 19 - idege bible

IJeremaya 19

¹Ụka ọhẹ, Amkpaa byim yẹkẹẹ, “Kele kaka ra ọta nya ọpyị bwu ẹga nya ọngọ me ang wẹẹ. Wụrụ ịgabwọ nya alịnyanụ ịhyẹ bala angịkiliya ịgbẹgbịlẹ ịhyẹ ba ịlọng

²kanụ kpoye bwu Ogirigba nya Egbiniidiyo kele ka Ọkpọọ nya ịBẹn-ihinọm. Aa ya ẹrụ ọlẹ kam dung ụ-ụwa mẹ.

³Aa byaa mẹ, am Amkpaa yẹkẹẹ: Anụ ịdịrịhụ nya ala iJuda bala anụ ala iJerusalẹm ee, am Am Amkpaa Agụgụ Ohe Oluhye nya ala Isirẹlụ jam byinu ya m̀ juwa ka kpa akama ọtụka-ọtụka chị ẹgẹlẹ ọgụ. Ọng myị ọng ọlẹ kọ wo ẹla ọọwa, arụ ka chọọ ije.

⁴Ang odudu kam ka họ ịnyị ri, angịnyị nyẹẹkpẹ dam. Ị ju ẹgẹlẹ ibyi bwụla ọ-kịla iya ha ijiga-ijiga ịlẹ kịịwa ayịdang lee adaa igogo anyị tụ ịdịrịhụ nya ala iJuda-á jẹjẹ ene ka. Ị ya ịwọ nya angị da ẹlẹlẹhẹ-ka ịlẹ kị chị myị ẹgẹlẹ pwẹẹpwẹẹ.

⁵Ị me ogidi okiliya ha ojiga ịBaalụ chajị kị ka ya anyị nyaa kịla iya ọ-rụ ila họọ ụ-ụwa. Ḿ ya ehile daa e-eji nyọka kịla iya ụma ịlịnyị ka. Ẹla ọlịnyị-ị́ dọmwụ ji ẹpwụ nya irya nyam kpong-kpong ka.

⁶Lẹẹlẹ, ụka juwa warị kị ka wụrụ ẹgẹlẹ iTofẹtị lee Ọkpọọ nya ịBẹn-ihinọm kaka wẹẹ. Ị ka wụrwọọ Ọkpọọ nya Angịnyị Ọnwụnwụ.

⁷Am̀ ẹgẹlẹ, m̄ da obyi omeme nya ala iJuda bala ala iJerusalẹm ẹkpa chọpyị lẹlẹ. M̀ ka họ aluji nyaa ka kụrwaa chẹẹchẹẹ, gyaa nwụ ẹẹ-ẹwụ. M̀ ka pẹhi egu nyaa chị ha ịchịnụ bala iyo ịlẹpwamẹ nya ang oriri nyaa.

⁸M̀ ka họ iJerusalẹm ka kpụ egwawụ-egwawụ. Ejiri ka wu ọng myị ọng kọ chịpwụrụ bwu ẹgẹlẹ. Ị ka da alụwa ịkwẹ churum.

⁹Aluji ka chị urwe dagaga ju epweji nyaa gbee ká ang oriri ka myị gbanggbang. Ị ka tịtọ nyọka ta angịnyị ayịreji. Angịnyị ila epweji Iwe-ahụrụ nyaa ka tịpyọ gbee kị ka juwa nwụ awụlẹ bala anyị nya ịlaa ri.”

¹⁰Amkpaa byim ịnyịnyị yẹkẹẹ, “Ụka ọọwa lẹ, à ya ọta nya ọpyị ọlẹ ká kpa bene ị-ịlahị nya angịlẹ kanụ bajẹ lawụlẹ-ẹ̀ wẹ,

¹¹ká byaa mẹ, am Amkpaa Agụgụ yẹkẹẹ: Jaabwọ ká ya ọta ọwe bene-è wẹ, ịnyịnyị-ịnyịnyị m̄ ka be alẹpwụma bala alepweji ọlẹ ene yịgẹ-yịgẹ lala ọta nya ọpyị ọlẹ kị ka jẹ-ẹ̀ go ene nyamwụ ku awụlẹ kaka lẹlẹ. Angịnyị dọmwụ ka ju egu nya angịnyị nyaa eji i-iTofẹtị, chajị ẹgẹgẹẹhẹ-ẹ́ ka ji ị ka ye nya o-ju egu eji kaka.

¹²Jaabwọ kam ka họ epweji ọlẹ a wẹ lẹlẹ. M̀ ka họ kọ ka ju agụgụ lala iTofẹtị.

¹³Ẹpwa ịla iJerusalẹm wuu bala ẹpwa nya ịdịrịhụ ịla iJuda bala ẹpwa ịlẹ wuu kị ju ịtangare ila u-uhye nyaa ha ịdịchụ bala ẹga kị ya ere kịla iya ha ijiga wuu ka ju ibyi lala iTofẹtị.”

¹⁴Ọọwa, am iJeremaya-à nyà bwu iTofẹtị ẹga ká Amkpaa dum ẹrụ kaka yẹ ọmwụ lẹlẹ. M̀ kele ka ọdọda nya Ube nya Amkpaa lẹ, m̄ byi angịnyị wuu yẹkẹẹ,

¹⁵“Amkpaa Agụgụ Ohe Oluhye nya ala Isirẹlụ lẹẹ byinu yẹkẹẹ, ‘M̀ juwa ka kpa akama ịlẹ wuu kam hwahwa nyọka kpa chị epweji nya iJerusalẹm bala epweji ịlọnaabwọ wuu ọgụ warị lẹ, chajị anụ la egbeju-ọngịrị, ánụ myị ke ụrụ lẹla ọlẹ kam ya ka.’ ”