Read idege IJeremaya 2 Bible Online

IJeremaya 2 - idege bible

IJeremaya 2

¹Ụka ọhẹ, Amkpaa byim

²am nyị ya ẹrụ ọlẹ je ala iJerusalẹm wuu yẹkẹẹ, “Am Amkpaa kpịtịya jaabwọ kanụ kaa họ kpẹẹkpẹẹ lụka nya enjwo nyanụ, m̀ haanụ jaabwọ ká ahụ onyeewe kaa la ọháha ẹ-ẹga nya ọrụmwụ, anụ dịrẹm kpẹẹkpẹẹ u-ugbileji, bwu ọpyị ọlẹ ká ọngọhẹ-ẹ́ wu ẹrụ ụ-ụwa ka.

³Isirẹlụ ee, anụ ri ịnyam am Amkpaa, anụ à ri anyị nya ọgbanyẹ kam ma lẹ. Ọngọngọhẹ kọ chịnụ ingiri, m̀ kaa du akama kpụ ọngọọwa. Am Amkpaa-à ya ẹlẹwẹ lẹ.”

⁴Anụ anyị ịtụma nya iJekọbụ kanụ ri alimwawụ datị-datị nya ala Isirẹlụ ee, anụ ke ụrụ lẹrụ ọlẹ ká Amkpaa du lẹẹ mẹ.

⁵Amkpaa yẹkẹẹ, “Ang onyobyi oyina kpakpaakpa adanụ igogo anyị à tị́ wum ụ-ụbwọ lẹchị nyamwụ-ụ̀? Ịyẹ tị́ ju ọmwụ kị rụ him hwẹ̀ẹẹ ịnyị? Ị dịrẹ ijiga ihideeji gbee kịịwa lịlaa tịtị yẹ kaka ri angị ihideeji ịnyịnyị.

⁶Ị́ chẹhị gee nyam chị kpong-kpong ka, am Amkpaa-à tị gbaa kpehe bwu Ijipiti lẹ. M̀ kpaa ụgbẹyị bwu ugbileji, ọpyị ọkanggba oluhi-uhi, ọpyị ọchọhụ onyobyi ọọwa, ọlẹ ká ọngọngọhẹ-ẹ́ kụ lee ọ-kaa chịpwụrụ bwu ka.

⁷M gbaa kpehe ka ọpyị o-ju eyo, kị ka ri ang-ẹrụ bala ang ịkịla ịlọpyị ọọwa. Ụka kị tị pwụ ọpyị ọọwa, ị tị ju ọpyị ọọwa ọlẹ kam ya haa àgụgụ, họ ọ-mwọọgịlẹ ju ibyi.

⁸Angịkiliya-á towo nyam kpá chẹẹ yẹkẹẹ, ‘Amkpaa tị́ ji alẹ-è ụpẹnị-ụpẹnị ka. Angị kaa mẹ ehile jẹ-ẹ́ jẹm jẹ ka, alegbeju la egbeju-ọngịrị tam. Alọmwụ kaa yẹ ọmwụ lẹnyị nya ịBaalụ, juwa dịrẹ ang ịlẹ kị ju apyobwuna ka.’ ”

⁹Ajị nya ọọwa lẹ, am Amkpaa jam wụrụụnụ eje myịmyị wẹẹ. M̀ ka kpa eje ọọwa ta anyị ịtụma nyanụ wuu.

¹⁰Anụ kpoye ka ọmwẹnụ-obyi ka ọpyị ọkịlọlọ nya ịSayịpịrọsị, kanụ du ẹrụ ka ọmwẹnụ-ụtụrụ ka ọpyị nya iKedaa kaka yẹ ịnyịnyị wẹẹ. Ẹla o-me ịnyanụ-ụ́ ji ẹgẹgẹhẹ ẹnẹnẹhẹ lẹka.

¹¹Ẹpwụma ọhẹ-lọhẹ kpa ijiga nyaa kaka nyẹ anụ wo-ó, ijiga ịịwa-á ri ịngịngịhyẹ ri ka kpá nyàà lẹ? Angịnyị nyam tị kpam kaka nyẹ—am Ohe Oluhye ọlẹ kam ri ụmụmẹ nyaa, ị gbam ugu da ka ọka go ijiga ihideeji ju ụbwọ.

¹²Lẹẹlẹ, uhye-ọgba ee, ẹlẹwẹ ā wung ejiri, kọ lang ahịbwuu bala ọ-họng ohu mẹ.

¹³Achẹ nya ang inyibyi imiiye angịnyị nyam à họ lẹ: ị nyẹẹkpẹ dam am ẹmwụ-enyi nya ọhịhị nyaa, kele kaka wụ ẹmwụ ịlẹ kịị chị ụ̄ka ha ịlaa, ịlẹ ká enyi-íì barịrị ụ-ụwa myị ka.

¹⁴“Isirẹlụ-ụ́ ri ọnyọhi lee ọ ri ọngọlẹ kị ma nya ọnchẹ ka. Ịiyẹ tị́ tị tị du ká aluji nyamwụ wọọ kpa rụ wẹ mẹ?

¹⁵Aluji warụ jwọọ lala egabẹ, Ị họ ọpyị nyamwụ yẹ ri ugbileji, epweji nyamwụ kpụ egwawụ-egwawụ, ọngọngọhẹ-ẹ́ kụ ụwa kaka.

¹⁶Ala ịMẹmfisi bala ala ịTapanẹsị be ogo nya egbeju nyamwụ ene lẹ.

¹⁷Isirẹlụ ee, ahụ à da ẹla ọlẹ ha ịlọng lẹ, à nyẹẹkpẹ dam Amkpaa Ohe Oluhye nyang ụka kam juwa kpang ụgbẹyị.

¹⁸Apyobwuna oyina-ā tị́ la bwula o-wu Ijipiti bajẹ, nyọka nwa enyi ọla Ihu ịNayịlị? Apyobwuna oyina o-wu Asiriya bajẹ à tị́ kpụ hang, nyọka nwa enyi ọla Ihu iYufuretisi?

¹⁹Ang onyobyi ọlẹ ka họ ka yẹng akama, ẹta o-gbile ẹkpẹ-ẹkpẹ nyang ka yalibyi lang. À ka jẹ jaabwọ kọ ri ang ọjụjụ bala ang ọtịpyọ nyọka nyẹẹkpẹ dam Amkpaa Ohe Oluhye nyang. Á ju uhi nyam bala ọ-la kpẹẹkpẹẹ ham kaka. Am Ọngọlahị Amkpaa Agụgụ à ya ẹlẹwẹ lẹ.”

²⁰Amkpaa Agụgụ yẹkẹẹ, “Isirẹlụ ee, lụka lụrụ lẹ ká tụụbwọ him chị ịlọng ebwo hi ọngịrị nyam. À pwa nyọka ju ihi nyam bala ọ-gbịgba ham. Ikiti ọnyị myị ọnyị bala ọmwụ nya okoji ọnyị myị ọnyị ri ẹga kaa kpụ eteji ha ijiga.

²¹Ịnọ m̀ yang tọ lala alakọnụ ọnyịịla, ẹjẹ ọlahịchịng m̄ ya tọ lẹ. Anyị ọ tị́ la ká mwọọgịlẹ yẹ kaka ri anyịhị nya alakọnụ ịlẹpwamẹ mẹ?

²²Aa wo myị̀myị mẹ, á kpa ụcha ọlahịchịng hụ ịlọng hụ́, m tị ka myịmyị-ị̀ yẹ ịrị ọchịchị nya abyị nyang wẹẹ, am Ọngọlahị Amkpaa-à ya ịnyị lẹ.

²³À juwa pwarwarụ yẹkẹẹ, ‘Eheehe, ḿ ya ịlọm ju ibyi koo, ḿ kpụ eteji ha ịBaalụ koo.’ Yẹ ụma nya ang ịlẹ ká họ ọ-ọkpọọ ịlọpyị ọlẹ, ká yẹ ịhọbịrị ịlẹ ká họ wuu wẹẹ, à lala ụnyịrẹ-ịkamẹlụ ọlẹpwamẹ ọlẹ kọọ rụnyẹ kele-warị juwa tịtọ nya ocheche.

²⁴À lala obyiyó ọnyang ọlẹpwamẹ kọọ kpa okwinyi tọ oru lụka nya ocheche. Ụka ọlịnyị oowo tị́ ka wọọ kpa myị? Ọngọ tịtọ nyang-ńg ka nwụ ịlọmwụ pịlahị nyang ene kaka, chajị à kele kaka tọọ lẹ.

²⁵Họ́ọ̀họ́! Ajị nya ijiga ọkpụkpụ anụ-ụ̀ jẹdịyẹ lẹta hị ori lẹ-ẹ́? Ụkpụrọkọ chịnụ ọhụ kịra-kịra wuu lẹ! Anụ tị juwa yẹkẹẹ, ‘Eheehe, áhị ka tịrẹkpẹ ka, ijiga nya ija ịkịla-à haahị la ọkpụkpụ lẹ, ịwa ahị ka ba jẹ lẹ.”

²⁶Amkpaa yẹkẹẹ, Jaabwọ kị kaa chị oyoyi ju oyi ụka kị wọọ, ịnyịnyị ị ka chị oyoyi junu anụ ala Isirẹlụ lẹ. Ị ka chị oyoyi ju ịdịrịhụ bala alegbeju nyanụ bala angịkiliya tụ alọmwụ nyanụ wuu lawụlẹ-awụlẹ.

²⁷Anụ wụrụ ukpeku kị kpa okoji kọ adanụ, anụ wụrụ ukpeku kị be bwu ẹjwọ ịnanụ, du kanụ nyẹẹkpẹ nyanụ dam ọkọkọ nyọka jahị kpata wẹ ẹga nyam. Ánụ tị ji ẹpwụ nya akama, anụ tịị bịlẹm kam ka chịnụ da.

²⁸Ijiga ịlẹ kanụ họ ha ịlọnụ tị́ ji ale? Ị̄ kẹwẹ kaka chịnụ da mẹ-ẹ̀! Anụ ala iJuda ee, jaabwọ ká epweji nyanụ ju iru kaka ba, anụ la ijiga chaa ọnụ wuu.

²⁹Anụ tị́ị̀ chị ẹla bam tu ịyẹ wẹẹ? Anụ tị́ la egbeju-ọngịrị jahị dam am Amkpaa lẹ.

³⁰M̀ yẹnụ akama yẹ, ọọwa tị ri ododu, ọ́ ri enyi ọ-jụ eji nyanụ ka. Anụ-anụ kụ ụwa nwụ alọmwụ nyanụ lala ugẹbẹ ọlụrụrụ.

³¹Anụ ala Isirẹlụ ee, anụ wo ẹla ọlẹ kam wẹẹ ya mẹ, am Amkpaa lala ugbileji ẹ-ẹga nyanụ-ụ̄ụ́? M̀ lala ọpyị oluhi-uhi ochowu kpemkpem-ḿ? Ányị tị́ tị̀ tị̄ du kanụ wẹẹ yẹkẹẹ, Ahị ka ga ri ka ẹga myị ẹga kọ haahị lẹ, áhị ka tịrẹkpẹ wẹ ẹga nyang ẹnẹnẹhẹ kaka mẹ?

³²Ọyẹẹnọ ka jẹ-ẹ̀ deeri lịjang nyamwụ-ụ́? Ahụ onyeewe ka jẹ-ẹ̀ deeri lawụrụ nya ọrụ nyamwụ-ụ́? Angịnyị nyam tị́ deeri nyam gbanggbang, ị́ ka jụ ẹnụtụrụ ịlẹ kị deeri nyam wa kpá kaka.

³³À chakpa jẹ ụgbẹyị ọ-kpa wu angị háng há igu! Anyang ị ri ọnggwọ nya akpara ọhọhọ dọmwụ ka jẹ-ẹ̀ wẹ kaka jẹ ang bwu ẹga nyang myị lẹ.

³⁴Ịwọ nya ikpehika ị-da ẹlẹlẹhẹ-ka ịlẹ ká nwụ rịng ị-ịwụrụ wuu, ị́ tị beng ẹpwa be ju warị lagbụrụ ka. Ọwẹ-ẹ́ tị dung ugbii ka,

³⁵à juwa yẹkẹẹ, “Eje nya ẹlẹwẹ-ẹ́ wum koo, Amkpaa-á wụ ẹjẹ tam kaka.” Am Amkpaa tị juwa ka yẹng akama, chajị à ya ọwa nyị́ họ ang onyobyi ọhẹ ka.

³⁶Ahyu! À chakpa hu ịlọng tẹbẹlẹ juwa tịtọ nya ụbwọ ọdada nya alụma ọhẹ bala ọkịla. Ala Ijipiti ịlẹ ká rigu ta-à ka ya oyoyi jung jaabwọ ká ala Asiriya ya oyoyi jung lẹ.

³⁷À ka rụ nyà bwu ẹga nya iJipiti yụbwọ bọmwụ-begbeju, chajị am Amkpaa pwa ẹpwụma ịlẹ ká wẹẹ dahịhile, ị́ ka jẹ-ẹ̀ dang ụbwọ kpong-kpong ka.