Read idege IJeremaya 20 Bible Online

IJeremaya 20 - idege bible

IJeremaya 20

¹Ụka ọọwa, ịPachịhuu ọnyị nya Imẹẹ à ri ọngọkiliya bala olegbeju nya Ube nya Amkpaa lẹ. Ọ wo ẹla ịlẹ kam ya wẹ.

²Ọọwa, ọ ya lẹ, ị nyim bala ọ-tụm jube ụ-ụwa Ogirigba nya iBenjamịn u-Ube nya Amkpaa lẹlẹ.

³Ahị ọpyẹpyẹ ọọnamwụ kọ gbam kpehe lẹ, m̄ byọọ yẹkẹẹ, “ỊPachịhuu ee, Amkpaa yẹ ẹnyị nyang da lẹ. Ahụ à ri Ódòdó Ọlẹga myị ẹga lẹlẹ.

⁴Amkpaa lịlọmwụ yẹkẹẹ, ‘M̀ ka họ kaahụ ayịdang ka ri ódòdó nya ịlọng tụ ịnya aligu nyang. A ka kpa ẹhị nya ịlọng yaa ụka ká aluji ka nwaa. M̀ ka ya ala iJuda wuu ju adịrahụ nya ala ịBabịlọn ụ-ụbwọ. Ọ ka go angịhyẹ nyaa kpa rụ ka ịBabịlọn. Ọ ka nwụ angịkịla kẹhị-kẹhị.

⁵M̀ ka ya iwe da ká aluji nyanụ ka wẹ kaka go ang-ụdụ bala ang ịnyịịla ịlẹ ká ịdịrịhụ nya ala iJuda la wuu kpa rụ ka ịBabịlọn

⁶Ahụ ịPachịhuu tị lẹ, ị ka wung bala alugbiyegu nyang wuu kpa rụ ka ịBabịlọn. Ụ-ụwa ā ka gbu lẹ. Ụwa ị ka jung eji tụ aligu nyang wuu ịlẹ ká kaa me ịnịịkịla je lẹ.’ ”

⁷Amkpaa ee, à pịrịm ju lẹ, m̄ myị kwẹẹ ịnyịlẹhị lẹlẹ. À la ọngịrị gụm lẹ, à kụrụm lẹ. M̀ ri ang ọ-kpa hụlọ ẹhụ ju nya angịnyị, ị jam kpam hu utungguru ụka wuu.

⁸Ụka myị ụka kam ka ya ẹla akọ m̄ kaa da lẹ. M̀ dakọ byi angịnyị yẹkẹẹ, “Ẹwụ nya abwẹga bala ayịreji ọtata wẹẹ wẹ lẹẹ.” Amkpaa ee, ẹla nyang ọlẹ kam kaa ya du ká angịnyị kpam hu utungguru, kpam do ụka wuu.

⁹Ḿ tị yẹkẹẹ, “Ḿ ka gu ẹnyị nya Amkpaa lee o-ya ẹla lẹnyị nyamwụ kaka,” ẹla nyang tị lam lala ila ọhẹ à juwa rụm ọ-ọkịlẹtụ, ọlala ila ẹ-ẹpwụ nya ekpinegu nyam! M̀ maga nyọka tụ ang kụrwọọ, ḿ tị họọ myị ka.

¹⁰M̀ wo ká angịnyị juwa chayị yẹkẹẹ, “Ódòdó-ódòdó ẹ-ẹga myị ẹga nyang ọlẹ-ẹ́ẹ̀! Ahị kpa ẹla nyamwụ kaka ya je alegbeju mẹ!” Aligu nyam wuu juwa yẹhị nọ kam ka chị ụchụụ. Ị yẹkẹẹ, “Ị ka pịrọọ ju myị lẹẹ, ahị-ị kụrwọọ ka-á? Ọọwa, āhị họọ ku iwa lẹlẹ.”

¹¹Ahụ Amkpaa tị jam tam lala ọngọdẹwụ ọtụka, angị tụm pyịpyị ka mileji, ị́ ka kụrụm myị ka, oyoyi ka jwaa pyịyọọ, chajị obyi omeme nyaa-á ka kịlahị ka. Oyi ọlẹ kọ ka jwaa-á ka myị́ kpá ẹnẹnẹhẹ kaka.

¹²Ahụ Amkpaa Agụgụ, ee, à kaa wụla ọhọhọ nya angị ịnyịịla yẹ, à jẹ ọkịlẹtụ bala irya nyaa, họ aluji nyam kwiwa kam yẹ mẹ, chajị m̀ ya ẹla nyam jung ẹ-ẹpwụtụbwọ lẹ.

¹³Anụ mwu eje ha Amkpaa mẹ! Anụ gwogbo ha Amkpaa! Ọ gba okpehika kpehe hi ẹpwụtụbwọ nya ọlọkwọ lẹ.

¹⁴Inyiribyi ā kpụ ẹnụtụrụ ọlẹ kị mam, ọngọngọhẹ ā họ pyẹ̀ẹẹ kụrụ ẹnụtụrụ ọlẹ ká ịnam mam kpong-kpong ka.

¹⁵Inyiribyi ā kpụ ọngọ họ ká ọkịlẹtụ kpụ adam nyii bwula ọ-kpa oja kaka mileji yẹkẹẹ, “Ẹhẹẹ, ẹhẹẹ, à ma ọnyị ọlẹng lẹ!”

¹⁶Ọngọọwa-ā lala epweji ịlẹ ká Amkpaa ta ayịreji la o-jujwo nyaa ka. Eko nya ang ọjụjụ ā chọọ ahị lụtụrụ, kọ wo eko nya ẹwụ lẹnụ ẹ-ẹpwayịrẹtẹ,

¹⁷chajị nyọlẹ kọ nwụm ju ịnam ẹ-ẹpwụ ka. Ịnọ ẹpwụ nya ịnam à tị́ ka ri iworu nyam lẹ.

¹⁸Ịyẹ tị́ du kị dọmwụ mam? Ajị nyọka yẹ akama, kam ka gbu ẹ-ẹpwụ nya ọjụjụ bala oyoyi lẹka-á?