Read idege IJeremaya 21 Bible Online

IJeremaya 21 - idege bible

IJeremaya 21

¹Ụka ọọwa, iSedekaya Adịrahụ nya ala iJuda du ịPachihu ọnyị nya ịMalụkiya bala ịSẹfaniya ọnyị nya ịMaaseya kaka bịlẹm yẹkẹẹ,

²“Chuchuu ya ẹla ta Amkpaa hahị kọ dahị ụbwọ wẹẹ. INebukadinesa[4] adịrahụ nya ala ịBabịlọn kpa angịdẹwụ nyamwụ warị lẹẹ yẹ epweji nya iJerusalẹm dada. Ọhẹka Amkpaa ka họ ụkụrwọ ẹbyẹbyị jaabwọ kọọ họ ene-ene ọ ka kwaa rụ hiihi myị.”

³Amkpaa tị ya ẹla tam lẹ, m̄ byi alẹrụ nya iSedekaya yẹkẹẹ, “Anụ tịrẹkpẹ kele kaka byi iSedekaya mẹ,

⁴Amkpaa Ohe Oluhye nya ala Isirẹlụ yẹkẹẹ, ‘Ang-abwọ nya ẹwụ ịlẹ ká angịdẹwụ nyang wẹẹ kpa mwẹla ta adịrahụ nya ala ịBabịlọn bala angịnyị nyamwụ wẹẹ, m̀ juwa ka yaa kpata jahị dang. M̀ ka ta ang-abwọ ịwẹ wuu guru gbudum ẹ-ẹpwarịrị nya epweji mịlẹ-mịlẹ.

⁵M̀ juwa ka kpa ọngịrị nya ịlọm wuu mwẹla tang lagbama, jaabwọ ká ikẹjẹ wụm kaka ba.

⁶M̀ ka gu ọng myị ọng olepweji ọlẹ ụbwọ tụ iyo ileji wuu. Ẹdụrụ onyobyi ka nwaa bẹlẹ-bẹlẹ.

⁷Ahụ bala alụkụrwọ nyang ịlẹ kị ka be bwu ẹwụ bala imyi ọnwụnwụ bala ẹdụrụ onyobyi tị lẹ, m̀ ka yanụ ha iNebukadinesa Adịrahụ bala aluji nyanụ ịlẹ kị tịtọ nyọka nwụnụ. INebukadinesa-á juwa jujwo lee ọ-yẹ ahyẹẹrwẹrwa nya ọngọngọhẹ nyanụ ka. Ọ ka nwụnụ wuu.’

⁸“Amkpaa myịmyị ya am nyị byinu yẹkẹẹ, ‘Am Amkpaa jam hu ụgbẹyị nya ọhịhị bala ịnya igu deeji hanụ lẹ. Ọlẹ kọ haanụ lẹ, anụ chụ mẹ.

⁹Ọng myị ọng kọ hụ am̀ ẹ-ẹpwụ nya epweji ka gbu igu nya imyi lee ẹdụrụ lee ẹwụ ka ryọọ. Ọngọ tị kpehe kele kaka kụ eji ha ala ịBabịlọn aalẹ, ọngọọwa ka kpa ọhịhị nyamwụ be.

¹⁰M̀ chị eje ene nyọka yẹ epweji nya iJerusalẹm chịng kaka lẹ. Adịrahụ nya ala ịBabịlọn ka wẹ kaka ye jubwọ, chọọ ila wuu kpụ agbụ-agbụ. Am Amkpaa-à ya ẹlẹwẹ lẹ.”

¹¹Amkpaa byim am nyị byi alugbiyegu nya adịrahụ ọla iJuda yẹkẹẹ! Anụ wo ẹla ọlẹ kam wẹẹ ya mẹ.

¹²“Anụ leje ọkpapa ẹnụ myị ẹnụ, kanụ gba ọngọlẹ kị wẹẹ yẹba kpehe bwu ẹpwụtụbwọ nya ọngọlẹ kọ wẹẹ yọọ ba. Ánụ họ ịnyị kaa aalẹ, agbama nyam ka wuru lala ila ọlẹ kị ka jụ mịrị myị ka.

¹³IJerusalẹm ee, ahụ epweji ọ-kụ gede hi ọkpọọ, ahụ ká kụ lala ẹjwọ ụ-ụwa ụteeji, kanụ wẹẹ chị ọgọm nyori ọngọngọhẹ nyị ka beenu ẹpwa myị ka. M̀ juwa ka mwẹla tanụ lẹ.

¹⁴Am Amkpaa ka yẹnụ akama jaabwọ kọ pwokunu, m̀ ka jụ ẹpwa nya adịrahụ nyanụ ila, ịla ọọwa ka rụ ang myị ang dagaga ju wuu.”