Read idege IJeremaya 22 Bible Online

IJeremaya 22 - idege bible

IJeremaya 22

¹Ọọwa, Amkpaa-à byim yẹkẹẹ, “Kele kaka ya ẹla ta adịrahụ nya iJuda yẹkẹẹ,

²‘Ahụ adịrahụ nya ala iJuda ọnyị ọtụma nya iDevidi ee, alegbeju ịtụkụ ying bala angịnyị nyang ā wo ẹla ọlẹ ká Amkpaa wẹẹ ya tanụ mẹ.

³Anụ họ ẹla opwoku bala ọ-la kpakpa. Anụ gba ọngọlẹ kị wẹẹ yọọ ba kpehe bwu ụbwọ nya ọngọlẹ kọ wẹẹ yẹ ọngọọwa ba. Ānụ họ ẹla ọkịrọrọ lee ẹla nya abwẹga ẹ-ẹga nya ọngga lee ọnyị-ogu lee ahụ-ogu koo. Anụ nwụ ọngịnyị ọ-da ẹlẹlẹhẹ ka ọ-ọpyị ọlẹ koo.

⁴Ánụ họ jaabwọ kam ya wẹ aalẹ, anyị ịtụma nya iDevidi ka kịnyaa la adịrahụ oriri. Ịwa bala alegbeju ịtụkụ yaa bala angịnyị nyaa ka kịnyaa juwa chịpwụrụ bwu ogirigba nya ẹpwa nya adịrahụ ịlẹ lang ịrụnyẹ bala anyịrẹ nyaa ịnyịnyịịnyị.

⁵Ọ́ tị ri kanụ ju ihi nya ẹla nyam ka aalẹ, m̀ yọnụ deeji hanụ nyori ẹpwa nya adịrahụ ọlẹ ka kpụ egwawụ-egwawụ. Am Amkpaa-à ya ẹlẹwẹ lẹ.’

⁶“Ẹ-ẹga nyam lẹ, ẹpwa nya adịrahụ ọla iJuda há ụhị kpá lala ọpyị nya iGiliyadị bala lala ịgbọdọ nya iLibanọn. M̀ tị ka tọọ ayịreji pẹ hyọọ da eyiri-eyiri la ọngọngọhẹ kụ ụwa ka.

⁷M̀ wẹẹ du angịnyị kaka tọọ ayịreji. Ị ka wẹ la eje i-be ọwụ kị ka tụrụ ekeji nya isida iweji ịnyịịla ịwẹ wuu, kị ka gyaa ju ila.

⁸“Ụka ọọwa, angga bwam-bwale ịlẹ kị ka chịpwụrụ bwu ẹgẹlẹ ka juwa tọ awụlẹ wo yẹkẹẹ, ‘Ahyu! Anyị tị́ du ká Amkpaa họ epweji ọtụka ọlẹ ụma nya ẹla ọlịịwa kpá-à wẹẹ.’

⁹Ị ka kụ ụwa wẹ awụlẹ yẹkẹẹ, ‘Ajị nyọlẹ kị bịrị iro ọlẹ kị nwa ta Amkpaa Ohe Oluhye nyaa bwula ọ-kpụ eteji ha ijiga à du lẹ.’ ”

¹⁰Anụ ala iJuda ee, iJosaya Adịrahụ gbu lẹẹ, ānụ tị jida chajị nyamwụ kaka, ānụ bida nyamwụ koo. Anụ tụ́tụ́ bida nya iJehowahasị Adịrahụ ọnyị nyamwụ, ị wẹẹ gbilọọ kpa rụ nya ọlagba, ọ́ tị ka nyà ẹnẹnẹhẹ kaka, ọ́ ka nyà kaka yẹ egeji nya adamwụ ẹnẹnẹhẹ kaka.

¹¹Amkpaa ya ẹla rụ iJehowahasị ọlẹ kọ ri adịrahụ kwiwa nya iJosaya adamwụ yẹkẹẹ, “Ọ rụ bwu ẹgẹlẹ lẹẹ, ọ́ ka nyà tịrẹkpẹ kaka.

¹²Ẹga ka jwọọ agba kpọọ rụ ka ọ ka gbu lẹlẹ. Ọ́ ka ya ẹhị nyamwụ gu ọpyị ọlẹ myịmyị kaka.”

¹³IJehoyakim ri enyi gu obyi lẹ. Ọ nwụ ẹpwa nyamwụ bwula ọ-họ angịnyị kịrọrọ, ju ẹpwa nyamwụ ẹpwụ gbamgbam bwula ọ-họ ri. Ọ kpa angịnyị aanamwụ họ ụkụrwọ nya ojeyikpo, ọ́ọ̀ nwaa uri nya ụkụrwọ ọlẹ kị họ họọ ka.

¹⁴Ọ ya i-irya nya ịlọmwụ yẹkẹẹ, “M̀ ka nwụ́ ẹpwa ọtụka-ọtụka ha ịlọm, ẹpwụ iluhye nyaa ka ju ẹpwụ gbamgbam. Ọ chị iwindo ẹ-ẹpwang nyamwụ, ya ene nya ekeji isida kwoo hịla-hịla lido ọnyọmịla.

¹⁵Isida ọ-kpa nwụ ẹpwang gụ ịnya angịkịla du ká ri adịrahụ ọtụka-á? Adang la ọhịhị oludiyo, chajị ọ họ ang opwoku, ọ́ họ ẹla oye-oye ka, ịnyị à du kọ kịlahị ẹ-ẹpwụ nya ang ịlẹ kọ họ wuu lẹ.

¹⁶Ọ leje ha ọlẹbyahị bala okpehika, du ang myị ang ịlẹ kọ họ kịlahị. Ọwẹ à ri ọ-jẹm am Amkpaa jẹ lẹ.

¹⁷À tị ya ẹhị nịrọ ọngịnyị ọ-họ ri bala apyobwuna oyeye nya ịlọng, bala ọ-ka nwụ angị da ẹlẹlẹhẹ ka, ọ-kpa abwẹga tụ angịnyị pyịpyị.”

¹⁸Lẹẹlẹ, Amkpaa ya ẹla chajị nya iJehoyakim ọnyị nya iJosaya Adịrahụ nya ala iJuda yẹkẹẹ, “Ọngọnọhẹ-ẹ́ ka bida chajị nya igu nyamwụ ọ-chị eko yẹkẹẹ, ‘Oligu nyam yẹ wẹẹ, ẹlẹwẹ chakpa tịpyọ! ka.’ Ọngọhẹ-ẹ́ ka chị eko yẹkẹẹ, ‘Ayịbam ee, adịrahụ nyam ee, ka.’

¹⁹Ị ka jwoo eji lala ogu nya obyiyó, ị ka gbiloo kpịla-kpịla kpa ka da kpehe ka odehe nya ogirigba nya iJerusalẹm.”

²⁰Anụ ala iJerusalẹm ee, anụ kele ka iLibanọn, kanụ dakọ, anụ kele ka ịBachan and chị eko, anụ chị eko bwu oye nya iMowabụ mẹ, chajị ị ta alákpa nyanụ wuu ayịreji lẹ.

²¹Am Amkpaa tị́ danụ ọna ụka ká ang há hanụ, anụ pwa ịwa nyị́ ka ke ụrụ ka. Ịịwẹ anụ họ bwu eji-eji bẹdẹẹ lẹ, ánụ myị wo ẹla nyam ẹnẹhẹ lẹka.

²²Igbachịwụ ka da alegbeju nyanụ wuu hụrụ, ị ka go alákpa nyanụ wuu bwu ẹwụ kpa kaka ju agba, oyoyi ka junu, ọnụ ka hiinu pyee, ọọ-lajị nya ang onyobyi ịlẹ wuu kanụ họ.

²³Anụ alẹpwa nya adịrahụ kị kpa isida i-bwu iLibanọn họ ebe nyanụ, ụka ká ang ọjụjụ-ụ́ pwụ eji, anụ ka juwa chị arụ lala ọnyang ọlẹ kọ juwa hya ụma nya ọnyị ọmama.

²⁴“IJehoyachin Adịrahụ nya ala iJuda ee, am Amkpaa jam bying nya ịlẹhị-ịlẹhị ya ó-ri ahụ ri ká ri ọmapẹ ọlụbwọ upwuriri nyam ọlẹ kọ ri ẹjẹẹ nya ọngịrị ọlala nyam wẹwẹ wẹẹ, m̀ ka pwọng deeji.

²⁵M̀ ka pẹ hing ha angịlẹ kị wẹẹ tịtọ nyọka nwụng, ká wẹẹ ju uhi nyaa nya ịlẹhị-ịlẹhị. INebukadinesa Adịrahụ nya ala ịBabịlọn bala angịnyị nyamwụ kpangga m̄ ka yang ha lẹ.

²⁶M̀ ka kung bala ịnang ka ọpyị ọkịla ẹga kanụ ka ri anyịhị. Ụwa-á ri ẹga kị manụ ka. Ụwa anụ angị imimiiye à tị ka gbu lẹ.

²⁷Ọ ka maanụ ma kpá nyọka nyà kpa ẹta kaka chị ọpyị ọlẹ. Anụ tị ka nyà ẹnẹnẹhẹ kaka.”

²⁸Ahyu! IJehoyachin Adịrahụ à wẹ lala ugu-ọta ọlẹ ká ọngọngọhẹ-ẹ́ẹ̀ tịtọ nyamwụ kaka lẹlẹ-ẹ́? Ịyẹ tị́ du kị kpọọ lanyị-lanyị nyamwụ rụ ka ri anyịhị ọ-ọpyị ọlẹ kị jẹjẹ kpong-kpong ka ịnyị-ị̄ị̀?

²⁹Ọpyị ee, ọpyị, ọpyị, wo ẹla ká Amkpaa ya lẹẹ yẹkẹẹ,

³⁰“Anụ da ju ụ-ụpwụ mẹ, ọlẹng ọlẹ kụ abwabwọ nya anyị ọmama lẹ, ọwa-á ka jẹ-ẹ̀ kịlahị myị ẹ-ẹpwụ nya ọhịhị nyamwụ kaka. Ọnyị ọtụma nyamwụ ọhẹ-lọhẹ-ẹ́ ka hụ ẹ-ẹchị-adịrahụ nya iDevidi ri adịrahụ ọ-ọpyị nya iJuda ẹnẹnẹhẹ kaka.”