Read idege IJeremaya 23 Bible Online

IJeremaya 23 - idege bible

IJeremaya 23

¹Alegbeju ịlẹ kị wẹẹ ta angịnyị nya Amkpaa ayịreji, nyaa epepe-è wẹẹ, ị ri enyi gu obyi!

²Lẹẹlẹ, Amkpaa Ohe Oluhye nya ala Isirẹlụ ya ẹla rụụnụ anụ alegbeju ịkpẹhị rịrị angịnyị nyamwụ yẹkẹẹ, “Ajị nyọlẹ kanụ nyi angịnyị nyam epepe, kwaa rụ hi ịlọnụ, kanụ myị kpẹhị rịraa kaka lẹ, m̀ juwa ka yẹnụ akama u-uhye nya ang onyobyi ọlẹ kanụ họ ẹ-ẹga nyaa lẹ.

³M̀ juwa ka tụ angị ihihi nya angịnyị nyam dalawụlẹ bwu ọpyị myị ọpyị kam nyaa epepe chịka, kam ka kpaa nyà tịrẹkpẹ wẹ ọpyị nya ịlaa. Ọọwa, ị ka pyebile ju iru lụmẹ-lụmẹ lẹlẹ.

⁴M̀ ka chụ alegbeju ịlẹ kị ka kpẹhị rịraa. Ị́ tụtụm ka ju uhi myịmyị kaka. Ọngọngọhẹ lẹpwụ nyaa-á ka byi ka. Am Amkpaa-à ya ẹlẹwẹ lẹ.”

⁵Amkpaa yẹkẹẹ, “Ụka wẹẹ wẹ kam ka hu ọngọ ọnyịịla ọhẹ nya anyị ịtụma nya iDevidi ri adịrahụ. Ọngọọwa ka kpẹhị rịrị ọpyị lẹla ọjẹjẹ. Ọ ka họ ang ọlẹ kọ hiigu bala ọ-la kpakpa ẹ-ẹga myị ẹga nya ọpyị nyamwụ.

⁶Lụka nya adịrahụ oriri nyamwụ, ala iJuda ka chịda, ala Isirẹlụ ka hụ lokpunyi. Ị ka wụrụ ẹnyị nyamwụ ‘Amkpaa ri Abwẹla Ọnyịịla nyahị’.

⁷“Ụka juwa wẹ ká angịnyị á tụtụm ka nwa iro lẹnyị nyam lala Ohe Oluhye ọlẹ kọ gba ala Isirẹlụ kpehe bwu ọpyị nya Ijipiti kaka.

⁸Ọkọkọ nya ọọwa, ị ka nwa iro lẹnyị nyam lala Ohe Oluhye ọlẹ kọ gba ala Isirẹlụ kpehe bwu ọpyị ọlẹtẹ bala ẹpwụma ịkịla ịlẹ wuu kam nyaa epepe chịka. Ụka ọọwa, ị ka kụ ọ-ọpyị nya ịlaa lụbwọ lẹta.”

⁹Olujwo tọm ọ-ọkịlẹtụ ekpinegu nyam wuu hụ́ lẹtẹ-lẹtẹ. Ajị nya Amkpaa lịlọmwụ bala ẹla ọlẹ kọ ya tụ alọmwụ pyịpyị lẹ, m̀ yata lala olere ọlẹ kọ nwa ere kpụ ere.

¹⁰Angị la kpẹẹkpẹẹ ẹ-ẹga nya Amkpaa ka pyẹ myị ọpyị ọlẹ wuu lẹ. Ang onyobyi kem alọmwụ ịwẹ à kaa họ lẹ, ị kpa ọngịrị nyaa họ ẹla ọkịrọrọ. Ajị nya ọlọ ọlẹ ká Amkpaa ga lẹ, ọpyị lịlọmwụ juwa bida, apwụ bala amẹ nwọnwụ bwụgẹ-bwụgẹ.

¹¹Amkpaa yẹkẹẹ, “Alọmwụ tụ angịkiliya wuu ri angị họ ang ọtịpyọ bam, ẹ-ẹpwụ nya Ube Ịgọgọ nyam wẹwẹ, m̀ waa itinabwọ lang onyobyi ịlẹ kịị họ.

¹²Lẹẹlẹ, m̀ ka họ ụgbẹyị nyaa ka pyịpyị bala ochowu, m̀ ka họ kị ka chị achụụ mileji, m̀ ka kpa akama warị chaa ọgụ, ụka ká ụka nya akama ọyẹyẹ nyaa-á pwụ. Am Amkpaa-à ya ẹlẹwẹ lẹ.

¹³M̀ yẹ ang onyobyi ọlẹ ká alọmwụ ịla ịSameriya kaa họ— ịị yẹ ọmwụ lẹnyị nya ojiga ịBaalụ, juwa kpa ala Isirẹlụ angịnyị nyam hwahị.

¹⁴M̀ tị yẹ ang onyobyi ọ-gụ ọọwa gụ ọlẹ ká alọmwụ ịla iJerusalẹm kaa họ— ịị họ ụya họ, ịị me ọnọọkịla mẹ, ịị ya ori chị angị họ ang onyobyi ẹ-ẹgọ, du ká ọngọngọhẹ-ẹ́ myị hu abwọ lang onyobyi ọhọhọ kaka. Alọmwụ ịwẹ ri angịnyị inyibyi lala ala ịSọdọm, ala iJerusalẹm byịbyị lala ala iGomora.

¹⁵“Lẹẹlẹ, ẹla ọlẹ ká Am Amkpaa Agụgụ ya chajị nya alọmwụ ịla iJerusalẹm ri— M̀ ka ya ang olujujwo haa-a ri, m̀ ka ya ẹhwa haa-a nwà, chajị ịwa-à ri angịlẹ kị kpa ang onyobyi ọhọhọ pyebile tụ ẹga myị ẹga nya ọpyị ọlẹ da wuu lẹ.”

¹⁶Amkpaa Agụgụ juwa byi ala iJerusalẹm yẹkẹẹ, “Ānụ ke ụrụ lọmwụ ọyẹyẹ nya alọmwụ ịwẹ koo. Ị juwa họ ká ahị ka tụụnụ hyoóó kem ịnyị-ị̄. Ẹla olirya nya ịlaa ị wẹẹ ya jenu lẹ, ẹẹla nyam am Amkpaa koo.

¹⁷Ị wẹẹ byi angịlẹ kị pwa ẹla nyam deeji ya ang wuu nyị ka há haa. Angịlẹ kị la egbeju ọngịrị wẹwẹ, ị wẹẹ byaa akama ọhẹ nyị́ juwa ka wẹ chaa ọgụ ka.”

¹⁸Am Amkpaa tị jam byinu yẹkẹẹ, “Ọngọngọhẹ nya alọmwụ ịwẹ-ẹ́ wẹ ka godayị wo obyi omeme nyam ẹnẹhẹ lẹka. Ọngọhẹ nyaa-á dọmwụ wo ẹla nyam lee ọ-jẹ ẹrụ ọlẹ kam juwa du kpụ ị myị hiri ụrụ kpẹẹ nyọka wo ẹla ọọwa kpong-kpong ka.

¹⁹Lẹẹlẹ, agbama nyam wẹẹ wẹ lọngịrị-ọngịrị lala igbachịwụ ọtụka wẹ uhye-egbeju nya angị inyibyi ịwẹ lẹ.

²⁰Agbama nyam-á ka pwuru ka gbee kam ka họ ang ịlẹ wuu kam tịtọ cheju. Ị-ịlahị anụ ka jẹ ẹlẹwẹ wuu gede-gede.”

²¹Amkpaa yẹkẹẹ, “Ḿ du alọmwụ ịwẹ ẹrụ dudu ka, ị tị hu ang kele. Ḿ ya ẹlẹlẹhẹ ya jaa ka, ị tị yẹ ọmwụ lẹnyị nyam.

²²Ị́ jẹ irya ọlẹpwụ nyam lẹẹ ịnọ, ị tị ka ya ẹrụ nyam je angịnyị nyam, jaa ahị kpata hi ọhịhị ọtịpyọ nyaa bala ang onyobyi ọlẹ kị wẹẹ họ.

²³“Am Ohe Oluhye ji ẹga myị ẹga, m̀ ji ọnaabwọ ji, m̀ ji ẹga ọhwẹ̀ẹẹ ji.

²⁴Oowo à tị ka ya ịlọmwụ kpịbaa kpịrẹ-kpịrẹ kam ka jẹ-ẹ̀ yọọ myị ka lẹẹ-ẹ̀? Ánụ jẹ kam ji ẹga myị ẹga u-uhye-ọgba tụ odehe ọlẹ ka-á?

²⁵“M̀ jẹ jaabwọ ká alọmwụ ịwẹ kaa byinu wuu. Ị́ họ, ị ya ịwa nyị la ụlaa, ịwa nyị la ụlaa. Ọọwa, ị me ịnịịkịla lẹnyị nyam lẹlẹ.

²⁶Ahyu! Anyị alọmwụ ịwẹ à tị ka kịnyaa lọnọọkịla omeme tata ka ba-à? Ị juwa pịrị angịnyị ju lịnịịkịla ịlẹ kịịwa ayịdang kaa kpa kpehe bwu irya nya ịlaa.

²⁷Ị me ká alaa ịwẹ kịị wa je awụlẹ ka họ ká angịnyị nyam ka deeri nyam jaabwọ ká adaa igogo anyị nyẹẹkpẹ dam rụ kaka kpụ eteji ha ịBaalụ.

²⁸Ọlọmwụ ọ-la ụlaa ā juwa wa ụlaa ba ụụlaa kem mẹ. Ọlẹrụ nyam ā tị ya ẹla nyam dodehe kpẹẹkpẹẹ mẹ. Ewoo nya ang tị́ datị hi ajẹ ịlam-ịlam.

²⁹Ẹla nyam kaa rụ ang lala ila, ọ la ọngịrị lala ọjị ọ-hya ụwa ọlẹ kọọ be ajwọ ene yịgẹ-yịgẹ.

³⁰M̀ jam kpa ẹla ta alọmwụ ịlẹ kị wẹẹ wo ẹla bwu ẹga nya awụlẹ kpa kaka ya lala am nyaa daa ẹrụ.

³¹Alọmwụ ịnịịkịla ịwẹ kaa ya ẹla nya ịlaa. Ị tị kaa ya ọmwụ ọyẹyẹ nyaa nyị bwu ẹga nyam am Amkpaa.

³²M̀ jam kpa ẹla ta alọmwụ ị-la alaa nya ịnịịkịla. Ị juwa wa alaa nyaa kpa angịnyị nyam hwahị bwula ịnịịkịla nyaa. Ḿ chwaa-a chụ kà kpịla o-daa ẹrụ du kpong-kpong ka. Ẹla oyaya nyaa-á ju apyobwuna nya ịngịngịhyẹ ha angịnyị ka. Am Amkpaa-à ya ẹlẹwẹ lẹ.”

³³Amkpaa byim yẹkẹẹ, “IJeremaya ee, ụka ká ọngọhẹ nya angịnyị nyam lee ọlọmwụ lee ọngọkiliya ọhẹ-ẹ́ tọng wo yẹkẹẹ, ‘Ịyẹ tị́ ri olo nya Amkpaa kpá-à wẹẹ?’ Aa wẹ byi ọngọọwa yẹkẹẹ, ‘Ahụ kpangga-à ri olo nyamwụ lẹ, ọ tị juwa ka gung gbaa daarụ hi ịlọmwụ lẹ.’

³⁴Ọngọngọhẹ nya angịnyị nyam lee ọlọmwụ lee ọngọkiliya kọ ka hu ọnụ ya ẹla rụ ‘olo nya Amkpaa’ aalẹ, m̀ ka yẹ ọngọọwa bala alugbiyegu nyamwụ wuu akama.

³⁵Ẹla ọlẹ kị ka ya ka ri o-juwa tọ aligu bala aanaa wo yẹkẹẹ, ‘Anyị Amkpaa-à tị́ wẹ ẹla wẹ ene-è?’ lee Anyị Amkpaa-à tị́ ya?

³⁶Ị́ ka gu ẹnyị nya ‘olo nya Amkpaa’ ẹnẹnẹhẹ kaka, chajị ẹla nya ịlọnụ ịlẹ kanụ la anụ kaa ya lẹ. Anụ juwa chị ẹla ọyaya nya Amkpaa Agụgụ Ohe Oluhye nyahị ọlẹ kọ juwa hịhị bwula ọyaya nyanụ ịịwa.

³⁷IJeremaya, aa tọ alọmwụ wo yẹkẹẹ, ‘Anyị Amkpaa-à tị́ wẹẹnụ ẹla-a? Anyị Amkpaa a tị́ ya?’

³⁸Ma, ó-ri kị ju ihi nya omyi nya ẹla ọlẹ kam ya ka kị juwa yẹkẹẹ, ‘olo nya Amkpaa’ nyọlẹ kpá kam byaa ya ị ka ya ịnyị ka aalẹ, aa byaa mẹ,

³⁹Am Amkpaa ka go angịịwa bala epweji ọlẹ kam ya ha adaa igogo anyị chịịrụ hi ịlahị nya ịlọm.

⁴⁰M ka hu ẹpẹpẹ bala oyoyi o-gbe oyi myị oyi jwaa. Ị́ ka jẹ-ẹ̀ deeri nya oyoyi ọọwa ẹnẹnẹhẹ kaka.”