Read idege IJeremaya 24 Bible Online

IJeremaya 24 - idege bible

IJeremaya 24

¹Amkpaa mẹ edo nya egbe nya ikiledu imiiye jẹm kị rụwa ịlahị nya Ube nya Amkpaa. Ụka ọlẹ ri ụka ka iNebukadinesa Adịrahụ nya ala ịBabịlọn wu iJehoyachin ọnyị nya iJehoyakim Adịrahụ nya ala iJuda kpa rụ bwu iJerusalẹm kele ka ịBabilọn nya ọlagba. Adịrahụ iNebukadinesa wọọ bala alegbeju nya ala iJuda bala angị je ịbańg bala angị-ị hya ụdụwa kpa rụ ka agba.

²Udo ọhọhẹ ju egbe nya ikiledu ịnyịịla-ịnyịịla ịlẹ kị ga lẹ, ma udo ọheye ju egbe nya ikiledu ịtịpyo-ịtịpyo. Ịịwa tịpyọ kpoye nyọka ya ri.

³Amkpaa tọm wo yẹkẹẹ, “IJeremaya ee, ịyẹ a tị́ yẹ-ẹ̀ wẹẹ?” M wọọ yẹkẹẹ, “Ikiledu ịnyị. Ịnyịịla nyaa há yẹẹyẹẹ, ịtịpyọ nyaa tịpyọ kpoye nya oyi, kịla oriri kịla.”

⁴Owa lẹ, Amkpaa a byim yẹkẹẹ,

⁵Ịịlẹ Am Amkpaa Ohe Oluhye nya ala Isirẹlụ a ya lẹ. “M yẹ angịnyị nya ala iJuda ịlẹ ka alẹwụ wu kparụ ka ọpyị nya ala ịBabilọn lala ekeji ikiledu ịwẹ kị hiigụ.

⁶M ka kpẹhị rịraa bala ọ kpaa nya tịrẹkpẹ wẹ ọpyị ọlẹ. M ka nwaa nwụ́, ḿ ka tụrwaa ju eji ka. M ka yaa yeji, ḿ ka hwaa deeji ka.

⁷M ka ya irya ọlẹ kị ka jẹ ya am a ri Amkpaa lẹ jwaa ẹẹpwụ.

⁸Ma am Amkpaa yẹkẹẹ, Jaabwọ ka ikiledu ịlẹ kị tịpyọ kị há oriri ka ịwẹ la wẹẹ, ịnyịnyị m ka họ iSedekaya Adịrahụ nya ala iJuda bala alegbeju ịtụkụ yọọ bala angịnyị nya ala iJerusalẹm ịlẹ ka alẹwụ a wu kparụ ka tụ angịlẹ kị kụ ụwa ọpyị nya Ijipiti lẹlẹ.

⁹M ka kpa ayịreji wẹ uhye nyaa. Ọ ka wu ẹpwụma ilodehe wuu ejiri. Angịnyị ka kpaa họ bala hụlahụ jwaa bala ọ chaa arụ. Ị ka ri angịnyị nya inyiribyi ẹga myi ẹga ịlẹ kam nyaa epepe ka.

¹⁰M ka kpa ẹwụ ọdada bala imyi ọnwụnwụ bala ẹdụrụ ojuju chaa ọgụ gbee ka ịwa wuu ka ta ayịreji hi ọpyị ọlẹ kam ya haa bala adaa Igogo anyị.”