Read idege IJeremaya 25 Bible Online

IJeremaya 25 - idege bible

IJeremaya 25

¹Ẹẹpwụ nya ẹka ohene nyọlẹ ka Ijehoyakim ọnyị nya iJosaya ri Adịrahụ nya ala iJuda. Amkpaa ya ẹla tam chajị nya ala iJuda (ụka owa ri ẹka ọhọhẹ nyọlẹ ka iNebukadinesa ri Adịrahụ nya ala ịBabịlọn).

²iJeremaya ọlọmwụ ya ẹla ọọwa je angịnyị ịla bala angịlẹ kị juwa iJerusalẹm wuu.

³Bwu ẹka iwo kụrụ ịta nyọlẹ ka iJosaya ọnyị nya Amon ri adịrahụ gbee da wẹ alẹ. Ọ gu ẹka iwo imiiye kụrụ ịta lẹ ká Amkpaa kaa ya ẹla tam. M ka ya ala ịwa jẹnụ pyịyọọ ma anụụ tị myị ke ụrụ ka.

⁴Amkpaa ka du alọmwụ anchẹ nyamwụ ẹrụ tọnụ pyịyọọ ma anụ a myị ka wo ẹla ịịwa lee ọ ke ụrụ ka.

⁵I kaa byinu yẹkẹẹ, Anụ ji kpata hi ugbeyi nya ọhịhị onyobyi nyanụ bala ang onyobyi nyanụ iilẹ kanụ wẹẹ họ chajị kanụ ka la ọpyị ọlẹ ka am Amkpaa ya hanụ bala adịda igogo nyanụ gbe oyi myị oyi mẹ.

⁶“Anụ dịrẹ ihe Ikila nyọka myị ẹrụ bala ọ gbịgba haa kaka. Anụ tị́hu agbama ju Amkpaa bwụla ọ gbịgba ha ekpeku ịlẹ kanụ kpa abwọ nyanụ kọ kaka chajị kam ka hịnyọ lọ yẹnụ akama mẹ.”

⁷Kpọkpọọkpọ, anụ myị ke ụrụ lam ka. Ịnyị am Amkpaa a ya lẹ. Anụ hu agbama jum bwula ekpeku ịlẹ kanụ kpa abwọ nyanụ kọ chajị nya ọọwa adu kanụ kpa akama ọyẹyẹ wẹ uhye nya ịlọnụ lẹ.

⁸Chajị nya owa lẹ, Amkpaa Agụgụ yẹkẹẹ, Nyọlẹ kanụ myị juhi nya ẹla nyam ka lẹ.

⁹M juwa ka du ẹrụ tọ angịnyị ịla oye nya ẹtẹ wuu bala ọnchẹ nyam iNebukadinesa Adịrahụ nya ala ịBabilọn kị ka warị. M juwa kpaa warị kaa dẹwụ ta iJuda bala angịnyị ịlẹ kị kụ-aam tụ angịnyị ịla ẹpwụma ị dagaga ju ịkịla wuu. M ka taa ayịreji gbang gbang. Ọ ka la angịnyị uhihi bala ọ waa ejiri ang ọwa ka la angịnyị ahi bwuugbe oyi myị oyi.

¹⁰M ka kpụ ọmọnyọ ohihi nya uya ọyaya bala ọkẹkẹnị ba. M ka kpụ ọkẹkẹnị nya ahụ oyeye bala ịnya ọrụ-ọrwọrwọ ba. Ongẹhẹ a ka wo la ọmọnyọ nya igo ọ gyaang lee ọyẹ ịla nya otinika kaka.

¹¹Ẹpwụma ọlẹ wuu ka ẹga kọ ba ka ta ayịreji ọ ka kpụ egwawụụ. Ala ẹpwụma ịlẹ wuu ka myị ẹrụ ha Adịrahụ nya ala ịBabilọn ẹ-ẹpwụ nya ẹka iwo iryiwe gbẹgbịlẹ.

¹²Ụka ká ẹka iwo irwiye iwa a họ kpa cheju lẹ, ọwa lẹ m ka yẹ ịBabilọn bala adịrahụ nyaa akama chajị nya ọhọbịrị nyaa lẹlẹ. M ka ta ụwa ayịreji gbang gbang ọka ri egwawụ gbe oyi myị oyi.

¹³M ka yẹ ịBabilọn akama lang myị ang ịlẹ kam ya m ka haa. Ala ịlẹ wuu ka iJeremaya yẹ ọmwụ chajị nyaa kị tị daa ju am ẹpwụ nya ụpwụ ọlẹ yẹkẹẹ, ị ka họ ta ẹpwụma ọnyị myị ọnyị.

¹⁴M ka wu ala ịBabịlọn uri nyang ịlẹ kịị họ. Ẹpwụma lụmẹ-lụmẹ bala ịdịrịhụ ịtuka ịtụka ka waa nya anyịhị.

¹⁵Amkpaa Ohe Oluhye nya ala Isirẹlụ byim yẹkẹẹ, Ye ẹkpẹ nya ere nya agbama nyam ka ya ha ẹpwụma ịlẹ kam dụng ẹrụ tọ wuu kị ya nwa mẹ.

¹⁶Ụka kị nwọọ ọ ka yaa ị ka họ abwẹla opwoku ka chajị nya ẹwụ ọdada ọlẹ kam wẹẹ du ẹrụ chaa ọgụ.

¹⁷Ụka owa lẹ, m ye ẹkpẹ ọọwa bwu ụbwọ nya Amkpaa lẹ, m ya ha epwụma ịlẹ wuu ká Amkpaa ya du ẹrụ ka haa nwa lẹlẹ.

¹⁸M ya ha iJerusalẹm bala epweji ịla iJuda wuu bala Idịrịhụ tụ alegbeju nyaa nwa. Chajị ka ụwa ka ri ugumẹ dụwa uhuhwo. Ẹga ọlẹ ka inyiribyi kpụ. Angịnyị ka chịpyo jwọọ jaabwọ kọ la gbee daalẹ we.

¹⁹M ya ha ipwero Adịrahụ nya Ijipiti bala anche nyamwụ tụ alegbeju itụkụ yọọ bala angịnyị nyamwụ wuu nwaa.

²⁰Angịlẹ kam ya ekpe nya ẹrẹ ọọwa ha nwa ri angịlẹ wuu kị ri ang bala ịdịrịhụ nya ala Uusi wuu. Idirịhụ ịla epweji nya ala iFilisitiya wuu. Achịkelọn bala ịGasa bala Ẹkịrọn ana angịnyị nya ala Achịdọdụ ịlẹ kị hị.

²¹Ala Ẹdọm bala iMowabụ bala ala Amon.

²²Idịrịhụ nya ala Ịtaya wuu bala ịdịrịhụ nya ala ịSayịdọn wuu tụ idịrịhụ ịla epweji ịla ọnụ nya ihu ọtụka wuu kpoye ka ụpa ọkịla nya enyi.

²³Epweji nya iDedan bala ịTẹma bala iBusi bala angịlẹ wuu kị chị inyi ẹpwayịrẹtẹ.

²⁴Ịdịrịhụ nya ala Arebiya wuu bala ịdịrịhụ nya angga ịlẹ kị nẹpwa ụwa ugbileji.

²⁵Idịrịhụ nya ala iSimri wuu bala ịdịrịhụ nya Elam tụ ịdịrịhụ nya iMidiya.

²⁶Idịrịhụ iloye nya ẹtẹ wuu ịlẹ kị ju chwẹẹ bala ọlụrụ wuu ọngọhẹ-ọngọhẹ ẹ-ẹpwụma ilodehe ọlẹ wuu nwa ẹkpẹ nya ere ọọwa. Ohyẹpẹ-ẹkpẹ wuu Adịrahụ nya ala ịBabịlọn ka nwọọ.

²⁷Ụka ọwa lẹ aa byaa yẹkẹẹ, ịịlẹ Am Amkpaa Agụgụ Ohe Oluhye nya ala Isirẹlụ a ya lẹ. Am danụ ehilẹ anụ nwa ẹkpẹ nya ere nya agbama nyam gbee kọ ka yanụ kanụ ka kịkọ anụ ka mileji anụ ka jẹ-ẹ̀ wuleji myị ka chajị nya ẹwụ ọdada ọlẹkam wẹẹ du chịnụ ọgụ.

²⁸Ori kị pwa ẹkpẹ nya ẹrẹ bwu ụbwọ nyang aalẹ aa byaa yẹkẹẹ, Ịịlẹ Amkpaa Agụgụ a ya lẹ! Anụ ka nwọọ pii!

²⁹Am juwa dọmwụ nyang ọ ta ayịreji bwu epweji nya ịlọm. Am myira ya ḿa ka yẹnụ akama kaa? M ka dayi lọka yẹnụ akama-ká chajị m juwa ka du ẹwụ ọdada wẹ uhye nya angịnyị ịlẹpwụ nya odehe wuu. Ịnyị Am Amkpaa Agụgụ a ya lẹ.

³⁰IJeremaya ee, aa ya ẹrụ ịlẹ kam dung wuu jaa pii mẹ. Ịịlẹ a ka byaa lẹ. Amkpaa ka kpụ-ịkata bwu uhye-ọgba. Bwu iga ẹga ịgogọ ọlẹ kọ kụ ọ ka gu-arụ. Ọ ka kpụ angịnyị nyamwụ ịkata ọtụka-ọtụka. Ọ ka ya ẹla gboo lala ọngọlẹ kọ juwa chị egbe nya ekeji ata. Ọ ka kpụ ala odehe wuu ịkata.

³¹Ịkata ọlẹ kọ ka kpụ ka myị eko dọọ juka ọbaba nya odehe wuu. Chajị Amkpaa kpa eje ta ala odehe. Ọ ka la ọng myị ọng wuu eje. Angịlẹ kị ri ala ịhịbịrị ẹwụ ka ryaa. Am Amkpaa a ya ịnyị lẹ.

³²Ịịlẹ Amkpaa Agụgụ a ya lẹ ayịreji ọtata wẹẹ pyẹ bwu ẹpwụma ọhẹ ka juka ẹpwụma ọkịla. Igbachịwụ ọtụka-ọtụka juwa kpehe bwu ọbaba nya odehe.

³³Ẹnụtụrụ ọọwa angịlẹ ká Amkpaa ka nwụ ka chị pata-pata-pata bwu ọbaba nya odehe ọhẹ ka juka ọbaba ọkịla. Ọngọhẹ a ka jida jwaa lee ọtaa guru lee ọ jwa eji ka. Ị ka chụwa gbee kị ka ri ọtẹẹwụ wọwọ ju ịpyị.

³⁴Anụ alegbeju nya angịnyị nyam, anụ jida, kanụ chị eko gboo mẹ. Anụ rebilo ị-ịpyị. Ẹnụ kị ka nwụnụ pwụ eji lẹ. Anụ ka chabwọ ka bene yịgẹ-yịgẹ lala ịja ịlahịchịng.

³⁵Alegbeju nya angịnyị nyam a ka ye ẹgẹgẹhẹ rụnyẹ kā-ká.

³⁶Wo ka alegbeju nya angịnyị nyam la jida ị jida chajị Amkpaa ta edamẹ nyaa ayịreji lẹ.

³⁷Epwụmẹ ọlẹ kọ kpunyii da hwọọ wuu chajị nya ịkẹjẹ awụrụ nya Amkpaa lẹ.

³⁸Amkpaa rụ hi angịnyị nyamwụ lala ugẹbẹ ọlẹ kọọ rụ hi ụgbụ nyamụ lẹ. Epweji nyaa ye ri egwaau chajị nya ẹma nyẹẹwụ ọjẹ ahyẹẹrwẹrwa ka bala Ikeje awụrụ otlụka nya Amkpaa lẹ.