Read idege IJeremaya 26 Bible Online

IJeremaya 26 - idege bible

IJeremaya 26

¹Ahyahị-ahyaahị nyọlẹ ka iJehoyakim ọnyị nya iJosaya ri Adịrahụ nya ala iJuda. Amkpaa a ya ẹla ọlẹ ta iJeremaya yẹkẹẹ,

²Ịịlẹ Amkpaa a byim lẹ: Godayị ụ-ụwa ẹ-ẹpwụ ọla odehe nya Ube nya Amkpaa ka ya ala ịlẹ je ala epweji nya iJuda wuu ịlẹ kị wẹ ka gbịgba am ube Igogo nya Amkpaa. A ya ala ịwa wuu jaa, a chị ẹlẹlẹhẹ deji ka.

³Ori a ya jaa, ọhẹ ka ị ka mi ke ụrụ lang, ị ka kpụba lang inyibyi ịhọhọ chajị kam ka hịnyọ lọ taa ayịreji ọlẹ kam mirya uhye nyaa kọ ri kị hwabwọ lọ hang inyibyi ka.

⁴Amkpaa byim ya am nyị byaa yẹkẹẹ, Ịịlẹ Am Amkpaa a ya lẹ. Ori kanụ myị ke ụrụ lam ka bala ọ kpa ehile nya ịlẹ kam danụ ka

⁵bala ọke ụrụ la ala nya anche nyam alọmwụ ịlẹ kam daa tanụ wẹ la agaga ka. Ọ ri nya ịlẹhị anụ a kaa myị ke ụrụ lam ẹnẹhẹ wẹwẹ ka.

⁶Chajị nya ọọwa lẹ, m ka họ ube ịgọgọ ọlẹ ọ ka la-la iChilo bala ọ họ ka epwụma ọlẹ ka ri inyiribyi ha ẹpwụma ilodehe wuu.

⁷Angịkiliya bala alọmwụ bala angịnyị ịlẹ wuu kị juwa ube ịgọgọ wo ka iJeremaya juwa ya ala ịwẹ.

⁸Ụka ọlẹ kọ ya ala ịwa kpa cheju lẹ, angikiliya bala alamwụ bala angịnyị ịlẹ kị juwa wuu a woo lẹ ị byoo yẹkẹẹ, “Ahị ka nwụng chajị nya ẹla ọlẹ pii lẹ.”

⁹Oolịyẹ atịdu ka yẹ ọmwụ lẹnyị nya Amkpaa yẹkẹẹ, ube ịgọgọ ọlẹ ka lala iChilo bala ẹpwụma ọlẹ ọ ka ri egwawụ dụwa uhuhwo? Ụka owa lẹ angịnyị wuu a dagaga ju iJeremaya ụ-ụwa ube ịgọgọ lẹlẹ.

¹⁰Ụka ká ịgabwọ nya ala iJuda wo ala ịlẹ lẹ, ị kpehe bwu ẹpwa nya adịrahụ warị wẹ Ube nya Amkpaa ọọwa lẹ, Ị yang da huhu ụuwa ọnang nya Ube nya Amkpaa ọlẹ kị wụrụ new-gate lẹlẹ.

¹¹Ụka owa lẹ, angịkiliya bala alọmwụ a byi ịgabwọ bala angịnyị wuu yẹkẹẹ, Ọngọlẹ pwoku kị ka chị eje nya igu ogbugbu jwoo chajị nyọlẹ kọ yẹ ọmwụ tụ epwụma ọlẹ pyịpyị anụ tị wo wuu la ụrụ nya ịlọnụ.

¹²Ụka owa lẹ, iJeremaya a byi ịgabwọ bala angịnyị wuu yẹkẹẹ, “Amkpaa a dum ẹrụm kam ka ye ọmwụ tu ube ịgọgọ ọlẹ bala ẹpwụma ọlẹ pyịpyị jaabwọ kanụ wẹẹ wo lẹ.

¹³Chajị nya ọọwa lẹ anụ yẹ irya da bwu ọhịhị ịtịpyọ bala ang ịtịpyọ ịlẹ kanụ wẹẹ họ mẹ kanụ ju ihi nya omi nya Amkpaa Ohe Oluhye nyanụ mẹ aalẹ, Amkpaa ka kpụba lọ ka tanụ ayịreji jaabwọ kọọ wẹẹ ya.”

¹⁴Am lẹ, m jam ẹpwụtubwọ nyanụ lẹẹ. Ang myị ang ọlẹ kọ hanụ lẹ, anụ họm mẹ.

¹⁵Anụ a tịị je myịmyị mẹẹ. Ori kanụ nwụm aalẹ, iwo nyam ka ya eje wunu anụ angịlẹ bala angịnyị ịla ẹpwụma ọlẹ wuu tu epweji ọle lẹpwụ-lẹpwụ. Chajị Amkpaa a dum ẹrụ nya ịlẹhị nyọka ya ala ịwẹ jenu lẹ.

¹⁶Ụka owa lẹ, ịgabwọ bala angịnyi wuu a byi angịkiliya bala alọmwụ yẹkẹẹ, “Ọlẹng ọlẹ a họ ẹla kpu ị ka chị eje nya Igu ogbugbu jwọọ ka chajị ọ ya ẹla tahị la ẹnyị nya Amkpaa.”

¹⁷Igabwọ nya epweji ịhyẹ wuleji lẹ ị byi angịnyị ịlẹ wuu kị tu guru yẹkẹẹ,

¹⁸Ụka ká iHesekaịah ri Adịrahụ nya ala iJuda lẹ, Imaika ọlọmwụ ọlẹ kọ bwu Imorechetị a byi ala iJuda ya Amkpaa nyị yẹkẹẹ, Nyị ka bwuru ịSayọn jaabwọ kinyi wu eru: iJerusalẹm nyị ka yẹ ri ugbewu nya ọtẹẹwụ bala ori ọgbọdọ nya Ube nya Amkpaa nyị ka ri ipinu kaa.

¹⁹Adịrahụ iHesekaya bala angịnyị nya ala iJuda nwụ ọlọmwụ Imaika tọọwa? Ehe, ọkọkọ nya ọọwa lẹ, Ihejekaịah juihi nya Amkpaa. Ọ bịlẹ Amkpaa kọ ka yọọ ahyẹẹrwẹrwa ụka owa lẹ, Amkpaa a hwabwọ lọ ka taa ayịreji jaabwọ ọlẹ kọ ya ine lẹlẹ yẹ mẹẹ, ahị jam ka kpa ayịreji ọtata ọtụka wẹ ịlọhị lẹẹ.

²⁰Ọlẹng ọkịla ọhe ri Uriah ọnyị nya Ichemaịah ọ bwu epweji nya Ikiriyati-iJarim. Ọ yẹ ọmwụ tu epweji ọlẹ bala ẹpwụma ọlẹ pyịpyị jaabwọ ka iJeremaya ya kpang-gaa.

²¹Ụka ká iJehoyakim bala angịdẹwụ ịkpịra-kpịra nyamwụ bala alegbeju ịtụkụ yoo wo ọmwụ ọyẹyẹ nya Uriya ọọwa. Adịrahụ tịtọ kọka mwuọọ ma Uriya jẹ ọọwa lẹ ọ lọọ uhi-uhi lẹ, ọ rụ kaa kpịbaa ụ-ụwa ọ-ọpyị nya Ijipiti lẹlẹ.

²²Adịrahụ iJehoyakim du Elinatan ọnyị nya Achịbọ bala alẹng ịhyẹ kele ka Ijipiti.

²³Ị kpoo nya wẹ adịrahụ iJehoyakim. Ọọwa, ọ nwọọ lẹ, ọ hụ ogu nyamwụ daka iworu nya angịnyị ịlẹ kị la ẹnyị lẹlẹ.

²⁴Ma chajị nyọlẹ ka Ahikam ịnyị nya ịChafan myị ẹla ju iJeremaya lẹ, Ị tụbwọ hịoo ju angịnyị ụ-ụbwọ ị nwọọ ka.