Read idege IJeremaya 27 Bible Online

IJeremaya 27 - idege bible

IJeremaya 27

¹Ahahị-ahyaahị nyọlẹ ka Ijọsịah ọnyị nya iSedekaya ri Adịrahụ nya iJuda lẹ, Amkpaa a byim yẹkẹẹ,

²Jaabwọ ká Amkpaa byim a lẹẹlẹ. Ho ogbilo la ochiri nya ugba nya iyo bala ang ije ká ya ju ịlọng o-omyi mẹ.

³Ka du angịnyị ẹrụ ka ẹga nya ịdịrịhụ nya ala Ẹdọm bala ala iMowabụ bala ịTaya bala ala ịSayịdọn mẹ. Alegbeji i-ku ọmwakpa nyaa ịlẹ kị wẹ iJerusalẹm kaka yẹ iSedekaya Adịrahụ-ụ̀ wẹ ā ka ya ẹrụ ọlẹ du tọ ayịbaa anyị lẹ.

⁴Byi angịlẹ ká ka du ẹrụ mẹ, am Amkpaa Agụgụ Ohe Oluhye nya ala Isirẹlụ ya anụ kele kaka byi ayịbanụ anyị yẹkẹẹ,

⁵Bwula ụbwọ-ọngịrị nyam m̄ họ odehe bala angịnyị tụ iyo ọnyị myị ọnyị wuu lẹ. M̀ kaa ya ang ịwẹ ha ọng myị ọng kọ ham.

⁶Am a ya ẹpwụma ịlẹ wuu ji ekpeleji nya ongịrị nya ọnchẹ nyam iNebukadinesa Adịrahụ nya ala ịBabịlọn lẹ. M dọmwụ họ Iyo ịla epwamẹ ị juwa myị ẹrụ họọ ịnyịnyị.

⁷Epwuma wuu ka myị ẹrụ họ bala anyị nyamwụ bala anyị itụma nyamwụ gbee pwụ ụka ọlẹ ka ẹpwụma nyamwụ ka mileji. Ụka ọọwa lẹ, ẹpwụma lụmẹ-lụmẹ bala ịdịrịhụ ịla ịngịrị ịtụka tụka a ka wuaa nya anyịhị lẹlẹ.

⁸“Ma ori ka ẹpwụma lee ipyi adịrahụ ọhẹ-lọhẹ a pwa nyọka hiri kpee ha eji ogbegbe nyamwụ, alẹẹ, m ka yẹ ẹpwụma ọọwa akama la ẹwụ ọdada bala ịmi ọnwụ nwụ bala ẹdụrụ ọjụjụ gbee kam ka họ ka iNebukadinesa ka taa ayịreji wuu. Am Amkpaa a ya ịnyị lẹ.

⁹Chajị nya ọọwa lẹ, anụ a ke ụrụ la angị yẹ ọmwụ nyanụ lee angịlẹ kị ya ịwa nyị je ẹla ola Ịjuju bala angị la ụlaa bala ala ugono bala angịlẹ kị wuru olegu nya agu ịlịpyị kaka. Ịwẹ dunu ju ya anụ a hiri kpẹẹ ha Adịrahụ nya ala ịBabịlọn ka.

¹⁰Ọmwụ iniikịka ịwẹ yẹ junu lẹ, Ị juwa họ kị ka wunu kparụ pyipyi hi ọpyị nyanụ. M ka kunu rụ owa lẹ anụ ka ta ayịreji lẹlẹ.

¹¹Ma ẹpwụma ọnyị myị ọnyị kọ ya ukpurọkọ ju ogbilo nya Adịrahụ nya ala ịBabịlọn kọ myị ẹrụ họọ aalẹ, m ka ba hyaa ị ka kụwa ọpyị nyaa, ịka wu ẹrụ ụ-ụwa. Am Amkpaa a ya ịnyị lẹ.”

¹²Ọgụ-ọgụ ọwẹ m ya ẹla ta iSedekaya Adịrahụ nya ala iJuda lẹ. M byoo yẹkẹẹ, ya ụkpụrọkọ nyang ju ka ogbilo nya Adịrahụ nya ịBabịlọn ka myị ẹrụ họ mẹ a ka chịda.

¹³Ọlịyẹ a tịdu ka ahụ bala angịnyị nyang ka gbu Igu nya ẹwụ ọdada lee nya imyi ọmwụnwụ bala ịnya ẹdụrụ ọjụjụ? Inyi Amkpaa a ya nyị ka họ ta ẹpwụma ịkẹ kị myị ọ ka myị ẹrụ ha Adịrahụ nya ala ịBabịlọn ka lẹ.

¹⁴A ke ụrụ la alọmwụ ịlẹ kị wẹ dung ju káká pwa ọ myị ẹrụ ha Adịrahụ nya ala ịBabịlọn. Ọ me ọnọọkịla ị wẹ yẹ junu lẹ.

¹⁵M da ẹrụ ọhẹ-lọhẹ ka, inyị am Amkpaa a ya lẹ. Ọmwụ Ọnịịkịla ị wẹ yẹ junu la ẹnyị nyam ododu lẹ I juwa họ kam ka kunu bala alọmwụ ịwa rụ hi ẹpwụma ọlẹ chajị kanụ ka ta ayịreji.

¹⁶Ụka ọọwa lẹ, am iJeremaya ya je angịkiliya bala angịnyị wuu jaabwọ ká Amkpaa ya lẹlẹ. M byaa yẹkẹẹ, ịlẹ Amkpaa a byinu lẹ. Anụ ke ụrụ la angị ye omwụ jaabwọ kị wẹ ye ọmwụ yẹkẹẹ, Ahyaahị ịjuwa ka kpa ang abwọ ịla Ube nya Amkpaa nya bwu ịBabịlọn lẹ. Ọmwụ ọnọkịla ị wẹ yẹ junu lẹ.

¹⁷Anụ a kẹ ụrụ laa ka anụ myị ẹrụ ha Adịrahụ nya ala ịBabịlọn chajị kanụ chịda mẹ ọ lịyẹ a tịdu kị ka ta epweji ọlẹ ahirej-i?

¹⁸Ọ ri kị ri angị yẹ ọmwụ ka ịtị wo ẹla bwu iga nya Amkpaa aalẹ, ị rabwo bịlẹ Amkpaa Agụgụ chajị kọ ka ya iwe da ịka go angabwọ ịla ube Igogo nya Amkpaa bala ịla ẹpwa nya Adịrahụ nya ala iJuda ịla iJerusalẹm kpa rụ ka ịBabịlọn kaka mẹ.

¹⁹Ẹla chajị nya ang iweji bala ẹja nya ẹmwụ enyi nya okpoko onyobiri ọlẹ kị wụrụ ihu ọtụka bala ang ị gudayị kọkọ tụ angabwọ ịhihi ịlẹ kị tụbwọ hi epweji

²⁰ang ịlẹ ka iNebukadinesa Adịrahụ nya ala ịBabịlọn a go kpa rụ bwu iJerusalẹm ka ịBabịlọn ụka ọlẹ kọ wu iJehoyachin ọnyị nya iJehoyakim Adịrahụ nya ala iJuda tụ ichiwu nya ala iJuda bala ị nya ala iJerusalẹm kpa ru.

²¹Ke ụrụ la ẹla ọlẹ ká Amkpaa Agụgụ Ohe Oluhye nya ala Isirẹlụ ya chajị nya angabwọ ịlẹ kị hi juwa ube ịgọgọ bala ẹpwa nya Adịrahụ nya ala iJuda bala ụwa iJerusalẹm mẹẹ.

²²Ị ka nwulaa kpa rụ ka ịBabịlọn, I ka chuwa gbee pwụ ụka ọlẹ kam ka ke urụ lanụ, ụka owa lẹ m ka kpaa nya tịrẹkpẹ wẹ ịgẹlẹ lẹlẹ inyị am Amkpaa a ya lẹ.