Read idege IJeremaya 29 Bible Online

IJeremaya 29 - idege bible

IJeremaya 29

¹Ala ịlẹ a juwa ẹpwụ nya ilẹta ọlẹ ka iJeremaya da bwu iJerusalẹm du kịla Ịgabwo bala angịkiliya bala alọmwụ bala angịnyị wuu ịlẹ ka adịrahụ inebukadinẹja wu kpa kaa ju aba nyẹẹwụ ụwa ịBabịlọn lẹ.

²Ụka owa ri ẹkpẹ nyọlẹ kị wu adịrahụ iJehoyachin bala ịnịna nya adịrahụ bala alegbeju ihehe bala ịgabwọ nya ala iJuda bala inya iJerusalẹm bala angị họ ụkụrwọ nya ịbang bala angị hya ụdụwa kpa rụ bwu iJerusalẹm.

³Angịlẹ kị ya ilẹta ọwa du ẹrụ ri Elasah ọnyị nya Shaphan bala iJeremaya ọnyị nya Ihilkiah. Angịlẹ ka iSedekaya adịrahụ nya ala iJuda du ẹrụ to iNebukadinesa Adịrahụ nya ala ịBabịlọn.

⁴Ịlẹ Amkpaa Agụgụ Ohe Oluhye nya ala Isirẹlụ a byi angịnyị ịlẹ wuu kọ ya iwe da ka alẹwụ wua kparụ bwu iJerusalẹm ka ịBabịlọn lẹ.

⁵Anụ nwụ ẹpwa kanụ ku ụwa ẹpwa nyanụ. Anụ ya egbe nya ekeji tọ chajị ka hya egbe nyaa ri.

⁶Anụ ye ịhụ chajị kanụ ma anyị alẹng bala anyang. Anụ ye ịhụ ha anyị alẹng nyanụ kanụ ya anyị anyang nyanụ da ọrụ chajị kiwa ka ma anyị alẹng bala anyang. Anụ pyẹ lụmẹ-lụmẹ, anụ a gbile hi ka.

⁷Ma arụ tịtọ nya ọhaha ọlala nya ẹpwụma ọlẹ ka kunu ka wẹ. Anụ ri abwọ ha Amkpaa chajị nya ụwa chajị bwula lọhaha ọlẹ ka ẹpwụma ọwẹ a la anụ ka ye ọhaha nyanụ lẹ.

⁸Ịlẹ Amkpaa Agụgụ, Ohe Oluhye nya ala Isirẹlụ a ya lẹ, anụ a myị ka alọmwụ bala ala ugono bala angị la ulaa iwe kịwẹ epwarịrị nyanụ a pirinụ ju ka.

⁹Ọmwụ ọnọkịla ịwẹ yẹ junụ ka ẹnyị nyam lẹ, am Amkpaa a dịaa ẹrụ ka. Inyi am Amkpaa a ya lẹ.

¹⁰Amkpaa yẹkẹẹ, ụka ka ẹka ohwịla kụrụ iwo nya ịBabịlọn a họ kpa lẹ, owa lẹ, m ka junu uga lẹ, ma ka họ ọnụ mịị nyam ọlẹ kam myị nyọka kpanụ nya tịrẹkpẹ chẹju lẹlẹ.

¹¹Am Amkpaa je irya ọlẹ kam la chajị nyanụ. M la irya nya ọhaha nyanụ, m la irya nyọka tanụ ayịreji ka. M al irya ka ijuju nyanụ ka higụ.

¹²Chajị nyowa lẹ, ụka kanụ beko wụrụm kanụ ri abwọ ham m ka wo abwọ ọrịrị nyanụ.

¹³Ọ ri kanụ tịtọ nyam anụ ka yẹm ụka ọlẹ kanụ tịtọ nyam anụ ka yẹm la ọkịlẹtụ nyanụ wuu.

¹⁴Ẹẹ m ka họ anụ ka yem, Inyi am Amkpaa a ye lẹ, m ka tịrị iwe-ahụrụ nyanụ ịlẹ kị bịrị ẹkpẹ hanụ, m ka tụnụ gụrụ ụwa epwoja ọnyị myọnyị bala iga myịga ịlẹ kam nyinụ epepe ka, m ka kpanụ nya tịrẹkpẹ we ọpyị ọlẹ kị wunu ku kpa rụ ka agba nyẹẹwụ Am Amkpaa a ya ịnyị lẹ.

¹⁵Chajị nyọlẹ kanụ yẹkẹẹ, Amkpaa ya alọmwụ hahị am ịBabịlọn wẹlẹ.

¹⁶Ịlẹ Amkpaa a ya chajị nya adịrawhụ ọlẹ kọ ku ọmwuẹkpẹ hụwa ẹhcị Adịrahụ nya iDevid bala angịnyị ịlẹ kị juwa wuu epweji anyịnanụ ịlẹ kị hi kị wu kpa ka agba nyeewu ka lẹ.

¹⁷Amkpaa Agụgụ yẹkẹẹ, m ka kpa ẹwụ ọdada bala imyi ọnwụnụ bala ẹdụrụ ọjụjụ chịa ọgụ. M ka họ ị ka la laa egbe nya okoji ifig ịlẹ kịị mama gbee ka ọngịnyị a jeka ryaa ka.

¹⁸M ka kwaa la ẹwụ ọdada bala imyi ọnwụ nwụ bala ẹdụrụ ọjụjụ ọ ka wu ẹpwụma ilodehe wuu ejiri ụka kịị yaa. Iga myịga ịlẹ kam nyịa epepe ka, angịnyị a yaa ọ ka pyaa ọnụ bala ọ laa uhuhị bala ọ laa ahị bwuu. Angịnyị ka kpaa họ. I ka golo la ẹnyị nyaa.

¹⁹Angịlẹ wuu ka họ taa chajị wuu ka họ taa chajị ịmị ke ụrụ la ẹrụ ịlẹ kam ka du anchẹ nyam alọmwụ taa ka. Inyị am Amkpaa a ya lẹ.

²⁰Angịlẹ wuu kị wu kparụ ka agba nyẹẹwụ bwu iJerusalẹm ka ọpyị nya ịBabịlọn anụ ke ụrụ la ẹla ọle ká Amkpaa wẹ ya meẹ.

²¹Ịlẹ Amkpaa Agụgụ Ohe Oluhye nya ala Isirẹlụ a ya chajị Ehabụ ọnyị nya Ikolaịah bala iSedekaya ọnyị nya Imaaseiah ịlẹ kị wẹ ye ọmwụ ịnịkịla junu la ẹnyị nyam lẹ. M ka yaa ju iNebukadinesa Adịrahụ nya ala ịBabịlọn ụbwọ ọ ka nwuaa ịlahị nyanụ.

²²Ụka ká angịlẹ kị wu nya agba nyẹẹwụ bwu iJerusalẹm ka ịBabịlọn a tịlọ kị ka golo ju ọngịnyị. Ị ka kpa ẹnyị nyaa gọlọ yẹkẹẹ, Ka Amkpaa a họng ka la laa iSedekaya bala Ehabụ ịlẹ ka Adịrahụ nya ala ịBabịlọn hya i-ila lahị lahị.

²³Chajị nya ohobịrị ịtụka ọlẹ kị họ ụwa ọpyị nya Isirẹlụ. Aa nịna kaa nọ ta ịhụ nya awụlẹ bala ọ yẹ ọwmụ ọnọnkịla la ẹnyị nyam ụka ọlẹ kam dọmwụ da ẹrụ du ka. Am ahịdang kpangaa a je lẹ, amà tị́ri Ibeenu lẹ. Amkpaa a ya ịnyị lẹ.

²⁴Amkpaa Agụgụ Ohe Oluhye nya ala Isirẹlụ dum ẹrụ ta Ichemaiah yẹkẹẹ,

²⁵Ịlẹ Am Amkpaa Agụgụ Ohe Oluhye nya ala Isirẹlụ a ya lẹ. A da ịlẹta la ẹnyị nya ịlọng du kịla angịnyị ịla iJerusalẹm bala ọngọliliya iSẹfanịya ọnyị nya Imaaseiah bala angị kiliya ịkịla wuu yẹkẹẹ,

²⁶Amkpaa lịlọmwụ hung ri ọngọkiliya ku omwẹkpẹ nya Ijehoiada lẹ, ahụ a ri olegbeju ọ kụ ịlahị wuu ọ kpẹhị rịrị ube ịgọgọ nya Ohe Oluhye lẹlẹ. Ujụrwọ nyang ọrị ka ka ya agbịyẹ ju ang olojoje da ọlụla ọnyị myị ọnyị kọ byi ịlọmwụ ya ọwa nyị ri ọlọmwụ ukuroko lẹ.

²⁷Chajị nya ọọwa lẹ ọlọyẹà tị́du ka yalibyi ta iJeremaya ọla Anatotu ọlẹ kọ wẹ yẹ ọmwụ junu kaa?

²⁸Ọ du ẹrụ tohị am ịBabịlọn yẹkẹẹ, “Ahị ka ri ala agba nya ẹwụ tata. Ụwa ịBabịlọn lẹ, ahị nyị nwụ ẹpwa bala ọ ya egbe nya ekeji tọ ka hị nyị ka inya egbe nya rị.”

²⁹Ọngọnkiliya iSẹfanịya wa ịlẹta ọọwa ịlahị nya ọlọmwụ iJeremaya.

³⁰Ụka ọọwa, Amkpaa ya ẹla ta iJeremaya yẹkẹẹ,

³¹“Du ẹrụ kaa ya je angịlẹ wuu kị wu kpa rụ ka agba jaabwọ kam Am Amkpaa ya chajị nya iChemaya ọla iNehẹlẹm mẹ. Ajị nyọlẹ kọ yẹ ọmwụ junụ ọlẹ kam a dọ ẹrụ ka, kọ họ kanụ myị ju ọnọọkịla lẹ.

³²M̀ juwa ka yọọ bala anyị ịtụma nyamwụ akama. Ọngọngọhẹ a kị hi bwu ọdọdẹpwa nyamwụ ọ ka yẹ ang ịnyịla ịlẹ kam juwa ka họ hanụ anụ angịnyị nyam kaka. Chajị ọ pịrịịnụ ju du kanụ la egbeju-ọngịrị tam am Amkpaa. Am Amkpaa a ya ẹlẹwẹ lẹ.”