Read idege IJeremaya 3 Bible Online

IJeremaya 3 - idege bible

IJeremaya 3

¹Amkpaa yẹkẹẹ, “Ọlẹng-ńg pwa ahụ nyamwụ, ká ọnyang ọọwa-à kaka rụrwọ ọleng ọkịla, ọrụ olene ka myịmyị-ị̀ yọọ tịrẹkpẹ koko. Ọlịnyị ka kpa ibyi wẹ ọpyị. Isirẹlụ ee, à tị họ akpara ta angị háng há datị-datị lẹ, ọọwa, ā wẹẹ tịtọ nyọka tịrẹkpẹ wẹ ẹga nyam-m̀ wẹ lẹka le?

²Yẹ ọyị ka ikiti wẹẹ, ẹgẹhẹ ji ká họ ụya nya ijiga ọ-kpụ eteji ha ka-á? À godayị ụ-ụgbẹyị lala ọlakpara gbe angị ka tịtọ nyang lala ala Arabụ à kụ ịnya gbe angịnyị u-ugbileji. Bwula akpara ọhọhọ nyang du ká kpa ibyi wẹ ọpyị ọlẹ wuu.

³Ịnyị à du ká enyi-í do ka, ká enyi nya ọgbanyẹ-ẹ́ dọmwụ dọ ka-à wẹ lẹ. Á tị jẹ oyoyi nya ang ọlẹ ká họ ka jaabwọ ká ọlakpara-á kaa ju oyi nya ịngịngịhyẹ ka.

⁴À tị juwa byim am Amkpaa yẹkẹẹ, ‘À ri adam, à ri oligu nyam bwu enjwo-enjwo nyam,

⁵á ka ju agbama tam pyịyọọ ka, ikẹjẹ-awụrụ nyang ọwẹ ka cheju.’ Ahụ Isirẹlụ à ya ẹlẹwẹ lẹ, à tị họ ang ịtịpyọ ịlẹ wuu ká ka jụ họ myị.”

⁶Ụka ká iJosaya ri adịrahụ, Amkpaa byim yẹkẹẹ, “À tị́ yẹ ang ọlẹ ká Isirẹlụ họ-ọ̀ wẹ lẹ. Isirẹlụ kpụ eteji ha ijiga i-ikiti ọnyị myị ọnyị bala ọ-ọmwụ nya okoji ọ-kpụ ụrụrụ ọnyị myị ọnyị lala ọnyang ọ-họ kpẹẹkpẹẹ ka ẹ-ẹga nya ọrụmwụ.

⁷M̀ me irya kpá nyori ụka kọ họ nwa ịlọmwụ wuu, ọ ka tịrẹkpẹ wẹ ẹga nyam. Ọ́ tị myị nyà ka, iJuda ọọnamwụ ọnyang ọ-la kpẹẹkpẹẹ-ka tị yẹ ọhọhọ nyamwụ ọwẹ wuu.

⁸IJuda yẹ kam pwa Isirẹlụ, kwọọ rụ ajị nya ọ-họ kpẹẹkpẹẹ-ka nyamwụ. IJuda ọọnamwụ ọnyang ọkpẹẹkpẹẹ-ka ọwẹ-ẹ́ tị ju uhi ka. Ọ hu ang nya akpara ọhọhọ ịnyịnyị.

⁹Akpara ọhọhọ-ọ́ ryọọ ẹla ka lẹ, ọ kpa ibyi wẹ ọpyị, juwa họ akpara bwula ọ-kpụ eteji ha ajwọ bala ekeji.

¹⁰Ẹ-ẹpwụ nya ẹlẹwẹ wuu, iJuda ọkpẹẹkpẹẹ-ka ọọnịna ọnyang nya Isirẹlụ-ụ́ nyà tịrẹkpẹ chịm am Amkpaa ọgụ lọkịlẹtụ ookpokpo ka. Ihwirihwa kem ọ họ lẹ.”

¹¹Ọọwa, Amkpaa-à byim yẹkẹẹ,“Isirẹlụ-ụ́ họhọ kpẹẹkpẹẹ ka lẹ, ịnyamwụ hagụ ịnya iJuda lẹ-ẹ̄.

¹²Kele ka ya ẹla ọlẹ ta ala Isirẹlụ mẹ,” Ahu Isirẹlụ ọ-la kpẹẹkpẹẹ-ka ee, nyà tịrẹkpẹ chịm ọgụ mẹ, m̀ ri ọlahyẹẹrwẹrwa, ḿ ka wụ ẹjẹ tang kaka, ḿ ka ju agbama tang kịlahị pyịyọọ kaka.

¹³Ọkẹnẹ-kẹnẹ ri, myị abyị nyang nyori à la egbeju-ọngịrị tam kpụ eteji ha ijiga nya alẹpwụma ịkịla ọ-ọmwụ nya okoji ọnyị myị ọnyị, bala o-ri á ju ehile nyam ihi kaka mẹ.

¹⁴Anụ angịnyị ị-la kpẹẹkpẹẹ ka, anụ nyà mẹ, am à lanụ lẹ. M̀ ka kpa ọngọ ookpokpo-ookpokpo nyanụ bwu epweji ọnyọnyọọnyị bala angị imiiye-imiiye bwu ogang-ogang nyà tịrẹkpẹ wẹ Ọgbọdọ nya ịSayọn.

¹⁵M̀ ka chụ alegbeju ịlẹ ịlẹ kị ka ju ihi nyam, kị ka kpẹhị rịrịịnụ lẹla ọjẹjẹ bala ang ọjẹjẹ.

¹⁶Ụka kanụ pyẹ ju iru lụmẹ-lụmẹ ọ-ọpyị ọọwa, angịnyị á ka myịmyị-ị̀ ya ẹla rụ Akpa nya Iro nyam kaka. Ị́ ka wu iwoo nyamwụ lee ọ-kpịtịya nyamwụ lee ọ-dọmwụ ka họ Akpa nya Iro ọkịla kaka.

¹⁷Lụka ọọwa, ị ka wụrụ iJerusalẹm nya Ẹchi-adịrahụ nya Amkpaa. Ẹpwụma ọnyị myị ọnyị ka tụguru ụ-ụwa nyọka gbịgba ham am Amkpaa. Angịnyị-ị́ tụtụm ka họ ẹla dịrẹ irya onyobyi nyaa kaka.

¹⁸Lụka ọọwa, ala Isirẹlụ bala ala iJuda a ka nyà bwu agba lawụlẹ bwu ọpyị ọlẹtẹ wẹ ọpyị ọlẹ kam ya ha adanụ igogo anyị nyọka ri ang ọlala nyaa lụbwọ-lẹta.

¹⁹Amkpaa yẹkẹẹ, “Isirẹlụ ee, m̀ me kpá nyọka kpang kini-kini nya ọnyị nyam, kam ka ya ọpyị ọchẹhị gbọgbọ ọlẹ kọ hagụ ịpyị ilodehe ọlẹ wuu hang. M̀ me kpá ká ka wụrụm nya adang, ká ka nyẹẹkpẹ dam ẹnẹnẹhẹ kaka.

²⁰Anụ ala Isirẹlụ ee, anụ tị yẹ-ẹ̀ wẹ mẹ, jaabwọ ká ahụ ọ-la kpẹẹkẹẹ-ka ẹ-ẹga nya ọrụmwụ kaa họ, ịnyịnyị anụ la kpẹẹkpẹẹ ka ẹ-ẹga nyam lẹ. Am Amkpaa-à ya ịnyị lẹ.”

²¹Iru juwa tọ u-uhye nya ikiti: Ala Isirẹlụ à lalẹẹ jida bala ọbịlẹ-bịlẹ lẹ, chajị ị họ ịhọbịrị lụmẹ, ị nyẹẹkpa da Amkpaa Ohe Oluhye nyaa.

²²Anụ angị nyẹẹkpẹ dam am Amkpaa ee, anụ nyà tịrẹkpẹ mẹ, m̀ ka họnụ uda kanụ ka la kpẹẹkpẹẹ. Anụ myị kpụ anụ wẹẹ yẹkẹẹ, “Ee ahị wẹẹ nyà chịng ọgụ lẹ, chajị ahụ à ri Amkpaa Ohe Oluhye nyahị lẹ.

²³Ijiga ịlẹ kahị-ị̀ kpụ i-ikiti bala ọmọnyọ ọlụwa ri ịlọhị ọ-da lụgbaa. Ịnyịlẹhị lẹ, ẹ-ẹga nya Amkpaa ohe Oluhye nyahị kẹnẹ-kẹnẹ ala Isirẹlụ à ka ye ọchịda bwu lẹ.

²⁴Bwu ụka-ụka nya adahị igogo anyị, ahị kpụ eteji ha ojiga ịBaalụ oloyi-oyi ọwẹ. Ọhọhọ ọọwa myịịhị ịmwụ bala ịna tụ anyị alẹng bala anyị anyang ịlẹ ká adahị igogo anyị họ akama ju wuu lẹ!

²⁵Āhị hị nune loyi mọmbọọ, kahị kpa olo nya oyi ọọwa mẹ. Ahị bala adahị igogo anyị họ ọhọbịrị ba Amkpaa Ohe Oluhye nyahị, bwu eji-eji bẹdẹẹ daalẹ, áhị ju ihi nya ehile nyamwụ ka.”