Read idege IJeremaya 30 Bible Online

IJeremaya 30 - idege bible

IJeremaya 30

¹Amkpaa ya ẹla ta iJeremaya ụka ọkịla ọhẹ ịịlẹ.

²Amkpaa Ohe Oluhye nya ala Ịsirẹlụ yẹkẹẹ, da ala ịlẹ wuu kam ya tang ju ụpwụ.

³Ẹnụtụrụ juwa warị kam ka kpa angịnyị nyam ala Ịsirẹlụ bala ala iJuda nya tịrẹkpẹ bwu ẹga kị waa kpa rụ ka hụ lala anyịhị. M ka ya ọpyị ọlẹ kam ya ha adaa igogo anyị haa tịrẹkpẹ kị ka kụ ụwa.

⁴Ala ịlẹ Amkpaa a ya chajị nya Ịsirelụ bala iJuda lẹ.

⁵Amkpaa yẹkẹẹ, m wo ida ká angịnyị juwa je. I juwa ẹ-ẹpwwụ nya okpunyi ka.

⁶Tịtọ wo ka ku ẹhị yẹ wẹẹ, ọleng kaa hya ụma nya ọnyị? Ịyẹ à tị́ kam yẹ ọlẹng ọnyị myị ọnyị kọ yụbwọ ba ẹpwụ lala ọnyang ọlẹ ka ang nya ọnyị juwa họọ? Ọlịyẹ atịdu ka ongmyong juwa ju uhi?

⁷Ẹnụtụrụ oluhihi ọtụka juwa warị ẹnụtụrụ ọhẹ-lọhẹ a ji ịjẹka chụ moo ka. Ụka ọwa ka ri ụka nya akama ha anyị ịtụma nya iJekọbụ, angịnyị nyam. Ma m tị ka chaa da lụka ọọwa.

⁸Ịlẹ Amkpaa Agụgụ a ya lẹ. Ẹnụtụrụ ọwa, m ka họ angịnyị nyam ka la ịlaa. Ị ka ri anyịhi nya alẹpwụma ịkịla kaka.

⁹Ma ị ka myị ẹrụ ham am Amkpaa Ohe Oluhye nyaa. Ị ka myị ẹrụ ha ọnyị ọtụma nya iDevidi kam ka hu adịrahụ.

¹⁰Angịnyị nyam ẹẹ, anụ a juhi ka. Anụ ala Isirẹlụ uko a chịnụ ka. M juwa ka gbanụ kpehe bwu ọpyị ọlụrụ-lụrụ, bwu ọpyị ọlẹ kị wu anyị ịtụma nyanụ kaa ju agba. Anụ ka nya tịrẹkpẹ wẹ ọpyị nyanụ. Anụ ka ku am lokpunyi ọngọngọhẹ a ka junu uhuhi ka.

¹¹Chajị m juwa tanụ, m ka chịnụ da, ịnyi Amkpaa a ya lẹ. Ẹpwuma ọnyị myị ọnyị ịlẹ kam nyịnụ epepe ku wuu, m ka tụwa ayịreji. Ma, m tị ka tanụ anụ angịnyị nyam ayịreji ka. M ka hịnyọ lọ yẹnụ akama kọọ ma m tị ka mẹ ẹla jẹẹnụ ẹ-ẹpwụ nya ahyerwẹrwa.

¹²Amkpaa yẹkẹẹ, Ẹdụrụ nyanụ ju uda ọhọhọ ka Ẹbẹ nyanụ ka jẹ-ẹ̀ myị̀ kaka.

¹³Ọngọngọhẹ a ji ọ ka kpẹhẹ jụnụ ka. Ẹbẹ ochịchị nyanụ a la utoji ka. Ụda ọhọhọ a ji hanụ ka.

¹⁴Angịlẹ kị hanụ wuu deeri hunu lẹ. Ẹla nyanụ a ryaa ẹla kpongkpong kaka. M mwẹla tanụ jaabwọ kam ka mwẹla ta oluji nyam. M yẹnụ akama ụma nyọlẹ kị ka yẹ ọlọkwọ chajị ang onyobyi ịlẹ kanụ họ lụmẹ bala Ihịbịrị nyanụ jwiru.

¹⁵Ọ lịyẹ atịdu kanụ juwa jida chajị nyang ịlẹ kị họnụ? Ijẹka họ ang ọlẹ kọ wẹ jụnụ utoji ka. Chajị nyọlẹ ka ang onyobyi ịhọhọ nyanụ lụmẹ bala ọhọbịrị. Ịhọhọ nyanụ ju iru a du kam họnụ ang ịwẹ lẹ.

¹⁶Ma angịlẹ wuu kị tanụ ayịreji ị ka ta angịịwa ayịreji ịnyịnyị. Ị ka wu aluji nyanụ wuu ka agba nya ẹwụ. Angịlẹ wu ang nyanụ wụ ịka wu ang nyaa wụ ịnyịnyị. Angịlẹ kị go ang abwọ nyanụ kparụ ị ka go ang abwọ nyaa kpa rụ ịnyịnyị.

¹⁷M ka họ anụ ka myịmyị la gogo. M ka họ ẹbẹ ochịchị nyanụ uda. Ọ rịnyịlehị, aluji nyanụ yẹkẹẹ, ịSayọn ri ẹga ọlẹ kị nyẹẹkpẹ da lẹ. Ẹla nyanụ a ri ọngọngọhẹ ẹla kaka ịnyị Amkpaa a ya lẹ.

¹⁸Amkpaa yẹkẹẹ, M juwa ka tịrị angịnyị nyam anyị ịtụma nya iJekọbụ ẹkpẹ ka ịhwahụrụ ọlẹ kị la ene. M ka kpa nya wẹ ọpyị nyaa bala la ahyẹẹrwẹrwa nya ọdọda ẹpwa ọnyị myị ọnyị. Anụ ka ma iJerusalẹm nwụ. Ẹpwa nya adịrahụ ka ji iiga kọ pwọku.

¹⁹Angịnyị ịlẹ kị nẹpwa ụwa ka gwogbo ha Amkpaa I ka hyọmọnyọ nya ụya ọyaya. M ka họ ị ka jwiru, Ị ka byẹhị ka. M ka họ ị ka la ịhị angịnyị ā ka ya ẹhị daa bwue ka.

²⁰Anyị nyaa ka la jaabwọ kị la ụka onyogo. Angịnyị nyaa ka juwa chahị jum pịyọọ. Ọng myị ọng kọ taa pyịpyị m ka yaa akama.

²¹Ịdirihụ nyaa ka bwu ẹpwụ nya angịnyị nyaa. Alegbeju ị kpẹhị rịraa tị ka ri angịnyị-angịnyị nyaa. Ọ ka wẹ ịlahị nyam ụka kam tịtọ nyamwụ. Oowo kpaà tị́ka je jum chwẹẹ myị kọ ri kam tịtọ nyamwụ ine kaa? Amkpaa a ya ịnyị lẹ.

²²Anụ ka ri angịnyị nyam. M tị ka ri Ohe Oluhye nyanụ.

²³Yẹ mẹẹ, Igba chiu nya agbama nya Amkpaa ka da hụrụ hụrụ uuhye nya egbeju nya alọkwọ.

²⁴Agbama ọtụka nya Amkpaa a ka kpụba ka gbee pwụ ụka ọlẹ kọ ka họ ẹla ọ lẹpwụ nya Irya nyam kpa cheju. Ụka ọhyẹ ịlahị anụ ka jẹ ang odudu.