Read idege IJeremaya 31 Bible Online

IJeremaya 31 - idege bible

IJeremaya 31

¹Amkpaa yẹkẹẹ, Ụka juwa warị kam ka ri Ohe Oluhye nya ala Isirẹlụ. Iwa tị ka ri angịnyị nyam ịnyịnyị.

²Ịlẹ Amkpaa a ya lẹ. Angịlẹ kị be igu nya ẹwụ kị juwa ugbeilẹji, m yẹ ahyẹẹrwẹrwa nyaa ụ-ụwa. Ụka ká Isirẹlụ tịtọ nyọka la okpunyi,

³Amkpaa chị ịlọmwụ ehe haa bwu ẹga ọlurụ. Anụ ala Isirẹlụ ee, anụ ham gbe oyi myị oyi ịnyị a du kam kaa kịnyaa juwa la ọhaha ọkpẹẹkpẹẹ ẹ-ẹga nyanụ pyịyọọ lẹ.

⁴M ka maanụ nwụ́ myịmyị. Ọọwa lẹ, anụ ka ri nwụ rịrị lẹlẹ. Ụka ọọwa, ahụ Isirẹlụ à ka hu ịchẹchẹ juwa chewo nya ọkẹkẹnị lẹlẹ.

⁵A ka myịmyị-ị̀ ya egbe nya ekeji nyang tọ ịgbodo nya Isamerịa. Angịlẹ kị ya egbe iiwa tọ ka ri egbe nyaa.

⁶Ẹnụtụrụ ọhe juwa warị ọlẹ ka angịgbeji ka be ẹkọ bwu Ọgbọdọ nya Ifurem yẹkẹẹ, “Anụ kẹwa kahị wule ka ịSayọn ka ẹga nya Amkpaa Ohe Oluhye nyahị.”

⁷Amkpaa yẹkẹẹ, Mwu eje la ọkẹkenị gboo ha Isirẹlụ. Ẹpwụma ịla ọngịrị ịtịka gụgụ mwu eje nya ogbo nyanụ yẹkẹẹ Amkpaa chị angịnyị nyamwụ angị hihi nya ala Isirẹlụ da lẹ.

⁸M juwa ka kpaa tịrẹkpẹ nya bwu ẹpwụma ịla ẹtẹ. M ka taa gụrụ bwu ọbaba nya odehe ọlẹ wuu. M ka kpa alidu bala ala oku ku nya bala. M ka kpa anyang Ijẹnyị bala alẹnyị ịlẹ ka ang nya ọnyị juwa haa naya ịnyịnyị. I ka tịrẹkpẹ ka ri ẹpwụma ọtụka-ọtụka.

⁹Ị ka nya la ida ojeje bala abwọ ọrịrị. M ka kpaa ka ẹmwụ nya enyị Am a ri adịda nya Isirẹlụ lẹ. Ifurem a tị ri ọnyị ọlẹng ọgbahị nyam lẹ.

¹⁰Amkpaa yẹkẹẹ, Anụ epwụma wuu anụ ke ụrụ lam kanụ ya ẹla nyam dodehe jụka ọnụka nya ihu ị pyipyi. M nyi angịnyị nyam epepe ma m ka taa guru. M ka kpẹhị rị raa jaabwọ ka ọngọgbikpịlọ ka kpẹhị rịrị ịkpịlọ nyamwụ.

¹¹M gba ala Isirẹlụ kpehe bwu ụbwọ nya ẹpwụma ịlẹ kị la ọngịrị kịla kịla-lẹ.

¹²Ị ka wẹ kaa mwu eje nya ọkẹkẹni uhye nya Ọgbọdọ nya ịSayọn. Ẹhị nyaa ka hụ kpang-kpang la ọkẹkẹnị ochịchị chajị nyang ịlẹ ká Amkpaa ya gaa ahị. Ahị ọgaga nya egbe nya ang-ẹrụ, bala ere bala ida. Ị ka chị okẹkẹnị chajị nya ahị ọgaga nya iyo ileji. Angịnyị nyam ka la la egbe nya ana ịla ẹrụ ọlẹ ka ẹnyị ka juwa ha ụka wuu ị ka la ọjụjụ kaka.

¹³Ọọwa lẹ, anjwo ịyang a juwa chewo la ọkẹlẹnị lẹ, anjwo ikolobya tu angịgbahị a juwa yuya lẹle. M ka yẹ ida ọbaba nyaa kpata ka ri ọkẹkẹnị. M ka kpaa ẹjẹ m ka ya okẹkẹnị ochịchị ha ọkọkọ nya ọjụjụ ọlala.

¹⁴M ka yang orịrị ịlẹ kị hagụ wuu ha anagịkiliya. M ka họ obaba nya angịnyị nyam haa wu wua ẹpwụ. Am Amkpaa a ya ịnyịyị lẹ.

¹⁵Amkpaa yẹkẹẹ, Ị wo omi nya ida ojeje ịRama. Omi nya ida obaba onyujujwo ịRichẹlụ juwa jida chajị nya anyị nyamwụ. Ọ pwa nyọka ye ẹjẹ okpụkpụ chajị nya anyị nyamwụ. Anyị nyamwụ a ji kaka.

¹⁶Amkpaa yẹkẹẹ, Kpuba la ida ojeje hịlẹ egbeji da hi ahị nyang. Ang ịlẹ wuu ka họ uhye nya anyị nyang ịka nwụng uri nyaa. Ị ka nya tịrẹkpẹ bwu ọpyị nya oluyi nyang.

¹⁷Ẹhị ọrị-rịrịrị ji hang ịlahị. Anyị nyang ka nya tịrẹkpẹ we ẹpwa wẹẹ. Amkpaa a ya ịnyi lẹ.

¹⁸M wo myịmyị ka ala Isirẹlụ juwa mweru yẹkẹẹ, A mẹla jẹhị ahi jela lẹ. Ohị lala ugba nya ẹna ọlẹ kị mwụọ ẹnẹnẹhẹ lẹka. Kpahị nyà tịrẹkpẹ mẹ, ahị nwụlanọ nyọka nyà lẹ ahu ari Amkpaa Ohe Oluhye nyahị lẹ.

¹⁹Ụka ọlẹ kahị hwahị rụ hịng kpa ahịyirya da ụka ká mẹla jehi kpa. Ahị ya ubwọ nyi ọkịlẹtụ chajị ọ tọhị olujwo. Ọ lahị oyoyi, ahịla ẹpẹpẹ lẹ. Chajị ahị hobịrị bwụka kahị ri anjwo.

²⁰Isirẹlụ, a ri ọnyị oham ha lụmẹ, ọnyị ọlẹ kam ka chọkẹkẹni ju. UKa myị ụka kam gu ẹnyị nyang, m ka kpịtịya nyang pyịyọọ. Ọkịlẹtụ kaa gum gbịla chajị nyang m ka yẹ ahyẹẹrwẹrwa nyang.

²¹Ya ang ịju ụgbẹjị ẹjẹẹ ju eji mẹ, ju ẹga ẹjẹẹ ha ịlong. Ya ẹhị rịrị ugbẹyị ọtụka kpakpakpa ụgbẹyị ọlẹ ka bwu chajị ka nya tịrẹkpẹ mẹ, ahụ onjwo ịyang Isirẹlụ nya tịrẹkpẹ we epwejị nyang ịlẹ mẹ.

²²A tị ka ga kele, warị ka pwụ ụka oyina. Ọ ahụ ọnyị ọnyang ọlẹ ka la kpẹkpẹka. Amkpaa họ ang onyewe odehe lẹ. Ang ọwa ri ang onyewe jaabwọ ka ọnyang ọkpẹhị rịrị ọlẹng ri ẹla onyewe.

²³Amkpaa Agụgụ, ohe nya ala Isirẹlụ yẹkẹẹ, ụka ọlẹ kam kpa angịnyị nya tịrẹkpẹ wẹ ọpyị. Ị ka myịmyị ya ọpyị nya iJuda bala epweji ịlụwa yẹkẹẹ, Amkpaa, wahi kụrụ ẹpwa nyang. Ọgbọdọ ịgọgọ ọlẹ ka nẹpwa.

²⁴Angịnyị ka nẹpwa ụwa iJuda bala epweji ịkịla ịlụwa wuu. Alẹrụ bala angịgbikpịlọ ka juwa wuu tụ iyo ileji nyaa.

²⁵M ka ya ongịrị ha angịlẹ kị la dẹwụ dẹwụ. M ka yang ọrịrị ha angịlẹ kị kpịbwọ ị ka ri wu-ẹpwụ.

²⁶Ụka ọọwa lẹ angịnyị a ka yẹkẹẹ, m ka nune m chahị lọ kpu ịlọm ịpyọ.

²⁷Amkpaa yẹkẹẹ, Ụka juwa warị kam ka họ ọlẹ ka angịnyị bala iyo ka myị ọpyị nya Isirẹlụ.

²⁸Jaabwọ kam dohụ pịlẹ kam hunu deji latẹ-latẹ bala ọ guru cheji bala ọ tanụ ayịreji bala ọ họnụ ang ịtịpyọ ịnyịnyị ma ka dohụ pịlẹ m ka nwụnụ bala ọ yanụ tọ lẹ.

²⁹Ụka ọwa lẹ ọngọhẹ a juwa ga kpa. “Angị manyị ri egbe nya ekeji ị lẹkpọ angịrị gbu anyị nyaa kaka.”

³⁰Ma ọng myị ọng ka gbu uhye nya ọhọbịrị ọlẹ kọ họ ongmyọng ọlẹ kọ ri ugbe nya okoji ọ lukpo lukpo owa angịrị a ka gbu lẹ.

³¹Amkpaa yẹkẹẹ, ụka juwa warị kam ka nwa iro onyewe ta angịnyị nya ala iJuda bala ala Isirẹlụ.

³²Iro ọnwanwa ọwa ka datị hi ụma nya iro ọlẹ kam nwa ta adaa igogo lọ yụbwọ chaa gbaa kpehe bwu ọpyị nya ala Ijipiti. Ịnọ m ri ayịbaba nyaa ma ị tị bịrị ehile nyam. Amkpaa a ya ịnyị lẹ.

³³Amkpaa yẹkẹẹ, Iro onyewe ọlẹ kam kam nwaa bala angịnyị nyam alẹẹ lẹ, m ka ya ehile nyam ju ka ẹpwụ nyaa. M ka dọ baa ẹpwụ nya ọkịla m ka ri Ohe Oluhye nyaa ị tị ka ri angịnyị nyam.

³⁴Ọ ka baba ọngọhẹ ka mẹjẹ ọngọkịla ya jẹ Amkpaa ohe ine kala chajị ọng myị ọng ka jem lịlọmwụ wuu bwu angịnyị ichiche kaa jụka angịtụka. M ka hịnyọhi ọhọbịrị nyaa. M ka kpịtịya nyang inyibyi ịlẹ kị họ kaka.

³⁵Ịlẹ Amkpaa a ya lẹ, Amkpaa ọlẹ kọ họ ẹnụ kọ kaa chị ka ahịgboo ka ji bala ọ họ oya bala ịdịchụ ịlẹ kị kaa ya ahịgboo ha la odu. Amkpaa ọlẹ kọ họ ka Ihu ọtụka gu agbụ. Ẹnyị nyamwụ a ri Amkpaa Agụgụ lẹ.

³⁶Ụka ọlẹ kẹnẹ kẹne ka ang ịwẹ ka Am Amkpaa họ wẹ a ji kaka lẹ, ọọwa lẹ angịnyi nya ala Isirẹlụ a ka ri angịnyị nyam kaka lẹlẹ.

³⁷Ịlẹ Amkpaa a ya lẹ. Ọ ri kẹnẹ-kẹnẹ kị ka jẹ-ẹ̀ me uhye-ọgba ori, lee ọ wula itiwe nya odehe yẹ kpa myị wuu lẹ, ụka ọwa m ka nyẹẹkpẹ da anyị ịtụma nyam ala Isirẹlụ lẹlẹ.

³⁸Amkpaa yẹkẹẹ, “Ụka juwa warị kị ka ma iJerusalẹm wuu nwụ bwu Ube Oluhye nya ịHananẹlụ ọlọmwẹnụ-obyi kaka ka pwụ Ogirigba Ọlọtụpịrịhyo.

³⁹Oyi nya ọpyị ka kịnyaa bwu ụwa kaka ju ka ikiti nya ịGarẹbụ kpoye bwu ụwa ka iGowa.

⁴⁰Ọkpọọ ọlẹ wuu kị kaa ju egu eji bala o-go agbụ chị ka, bala ịgbajị nya ikpirigidi ịlẹ kị juwa kaka pwụ Ọkpọọ nya iKidirọn lalaala ka pwụ Ogirigba nya Ụnyịrẹ koye nya ọmwẹnụ-ụtụrụ wuu ka lịgọgọ ham am Amkpaa. Ị́ ka gu epweji ọwẹ cheji lee ọ-tọọ ayịreji myịmyị kaka.”