Read idege IJeremaya 32 Bible Online

IJeremaya 32 - idege bible

IJeremaya 32

¹Ẹla ọlẹ ká Amkpaa ya ta iJeremaya ẹ-ẹpwụ nya ẹka okiriwo nyọlẹ ka iSedekaya ri Adịrahụ nya ala iJuda. iNebukadinesa ri Adịrahụ nya ala ịBabịlọn ẹka iwo kụrụ ineku ụka ọwa lẹ.

²Ụka ọwa angịdẹẹwụ nya Adịrahụ nya ịBabịlọn juwa dẹwụ ta ala iJerusalẹm. Ị wu ọlọmwụ iJeremaya jụka ẹpwụ nya ube ọtụka ọla odehe nya angịgbeji ola ẹpwa nya Adịrahụ nya iJuda ị tụ ugbẹhị kụọ.

³Ụ-ụwa iSedekaya Adịrahụ a wum ju agba, chajị nyọlẹ kam yẹ ọmwụ nyori Amkpaa yẹkẹẹ, “M̀ juwa ka ya epweji nya iJerusalẹm ọlẹ ju adịrahụ nya ala ịBabịlọn ụ-ụbwọ.

⁴ISedekaya Adịrahụ-ụ́ tị ka be bwu ụbwọ nya ala ịBabịlọn myị ka. Ọ ka kpa ẹhị nya ịlọmwụ yẹ adịrahụ nya ala ịBabịlọn, kị ka ya ẹla ta awụlẹ.

⁵Ị ka kpa iSedekaya ka ịBabịlọn kọ ka juwa gbee ká am Amkpaa ka yọọ akama. Ọ́ mwẹla ta ala ịBabịlọn wẹwẹ, ọ́ ka kụrụ myị ka. Am Amkpaa-à ya ịnyị lẹ.”

⁶Amkpaa ya ẹla tam am iJeremaya yẹkẹẹ,

⁷Yẹ mẹẹ, iHanamelu ọnyị nya ọnyịnịna nya adang. Ichamụm juwa warị kaa bing yẹkẹẹ, Ra ọpyị nya ẹnwụ nyam kọ juwa Anatotu ola imwahụ nya ịBenjamin mẹ, chajị ahụ ari ọọnam ọlẹ kọ jum chụẹẹ gụ wuu ka ka jẹ-ẹ̀ rọ lẹlẹ.

⁸Ụka ọwa lẹ iHanamelu a wẹ ẹga nyam jaabwọ ká Amkpaa ya lẹlẹ, ọ warị kaa tọm ẹ-ẹpwụ ọla odehe ọtụka nya ube nya angịgbeji ọ ya tam kam ka ra ọpyị nya ẹrụ nyamwụ lẹlẹ. Ọọwa, m je ya Amkpaa a ya ẹla tam ịnyilehị lẹlẹ.

⁹M ra ọpyị ọwa bwu ẹga nya iHanamelu ọọwa lẹ m me okpoko onyoowuru egbe iwo kụrụ irwiye ẹpwụ họ lẹlẹ.

¹⁰M yụbwọ ju ụpwụ ẹpwụ bala ọ tụ ang gu awụlẹ wuu bala ọ la olibenu ọọwa lẹ m me okpoko ẹpwụ lang ọkpa mang ẹpwụ họ lẹlẹ.

¹¹Ụka ọọwa lẹ m hu ang ọ ju ẹjẹẹ nya opyọ ọrara ọlẹ kahị chị ori bala ụpwụ ọlẹ kahị da ọnụ omyịmyị ju bala ịhwahụrụ ịlẹ kahị nyọnụ ju awụlẹ kahị ka kpahi ju bala ụpwụ nya ọnụ ọmyịmyị ọlẹ wụrụ da dodo.

¹²Ụka ọọwa lẹ m gyaa ha ịBaruku ọnyị nya iNeriya ọlẹ kọ ri ọnyị ọtụma nya iMaaseya lẹlẹ. M ya họọ ịlahị nya ịHanamelụ ayịdang bala alibeenu ịlẹ kị yụbwọ ju ụpwụ ọ ju ẹjẹẹ nya ọpyị orara bala ala Ịjuu ịlẹ kị hụhụ ụwa ube ọtụka olodehe nya angịgbeji.

¹³Ị-ịlahị nyaa wuu, m̄ byi ịBaruku yẹkẹẹ,

¹⁴“Amkpaa Agụgụ Ohe Oluhye nya ala Isirẹlụ yẹkẹẹ, ‘Ye apwụ nya ọpyị ọrara ọlẹ kị tụ ku bala ọlẹ kọ wụrụ da dodo-ò wẹ ká ya jụ ẹ-ẹpwụ nya ọta nya ọpyị, chajị kị ka bịrị ka gbee ẹ-ẹpwụ nya ẹka lụmẹ-lụmẹ mẹ.

¹⁵Am Amkpaa Agụgụ Ohe Oluhye nya ala Isirẹlụ ya ị ka myịmyị-ị̀ ra ẹpwa bala ọpyị nya ẹrụ bala ẹrụ nya alakọnụ am̀ ọ-ọpyị ọlẹ wẹ-ẹ̀.’ ”

¹⁶Ụka ọlẹ kam ya apwụ nya ọpyị ọrara ha ịBaruku ọnyị nya iNeriya kpa lẹ, ọọwa lẹ m raabwọ ha Amkpaa yẹkẹẹ,

¹⁷Ọ Amkpaa Ohe Oluhye, Ahụ a họ uhye-ọgba bala ịpyị, la ongịrị ọtụka bala ụmụẹ nyang lẹ. Ịngịngịhyẹ a lang ujwo lọ họhọ ka.

¹⁸A la ọhaha o-gbe oyi myị oyi ha angịnyị ụnọ okuku ma akaa yẹ anyị akama chajị nya ịhọbịrị nya angị maama. Ọ Ohe Oluhye ọtụka ọlẹ ka la ụmụmẹ, ọlẹ ka ẹnyị nyang ri Amkpaa Agụgụ.

¹⁹Irya nyang lụmẹ ang ịhọhọ nyang ri ịtụka. Ẹhị nyang ka yẹ ang myị ang ịlẹ ka angịnyi ehe wuu ka hị a ka nwụ ong myị ọng uri jaabwọ ka abwẹla nyanwụ la.

²⁰A họ ụkụrwọ ẹbyẹbyị bala ang olahị bwuu ụwa ọpyị nya Ịjipti, à tị jam họ ịnyị pịyọọ daalẹ am ọpyị nya Isirẹlụ bala ụwa ẹpwụma ịkịla. Bwula ọọwa angịnyị ị jẹng iga myị ẹga wuu.

²¹Agba ala Isirẹlụ angịnyị nyang kpehe bwu ọpyị nya Ijipiti bwula ọhọ ang ị ju ẹjẹ bala ụkụrwọ ẹbyẹbyị ịlẹ kị chị uhi ju aluji. A gbee kpehe la ongịrị ọtụka bala ụgbwọ udiyo nyang.

²²A ya ọpyị ọ ju iyo bala ọ ju eyo ọlẹ haa jaabwọ ka myị ọnụ ha adaa igogo anyị.

²³Ma ụka ọlẹ kị warị kaa ye ọpyị ọlẹ. Ị myị kẹ ụrụ la omi nyang lee ọ kpa ehile nyang ka. Ị myị họ ịngịngịhyẹ ịlẹ kaa daa ehile ya nyị họ ka. Inyi adu ka ya iwe da ka ayịreji ọtata ọlẹ wẹ uhye nyaa lẹ.

²⁴“Chi ẹhị ka yẹ ịpyị ịlẹ ka aluji me ba ugulọ ọdagaga ju epweji. Ị juwa ka nuhi epweji lẹ. Aluji juwa dẹwụ ta ala epweji lẹ ẹma nya ẹwụ bala ịmi ọnwụnwụ bala ẹdụrụ ọjụjụ iwa adu ka aluji ka nuhi epweji lẹ. Ẹla ọlẹ ka ahụ Amkpaa ya họ jịra lẹ.

²⁵Ọngọlahị Amkpaa, ahụ à tị́ byim ya am nyị ra ọpyị nya ẹrụ lokpoko ịlahị nya alibeenu lụmẹ-lụmẹ lẹ. Ino ọ-ọriri ka ala ịBabịlọn a juwa ka kụrụ epweji ọlẹ kụrụ.”

²⁶Ụka ọọwa lẹ Amkpaa a byi iJeremaya yẹkẹẹ,

²⁷Am a ri Amkpaa Ohe Oluhye ọlẹ kọ họ ang myịang wuu lẹ. Ịngịngịhyẹ a lam ujwo ka.

²⁸Chajị nya ọọwa lẹ m juwa ka ya epweji ọlẹ ju iNebukadinesa Adịrahụ nya ịBabịlọn bala alẹwụ nyamwụ ụbwọ. Ị ka ye. Inyi am Amkpaa a ya lẹ.

²⁹Alẹwụ nya ala ịBabịlọn ịwẹ kị wẹẹ dẹwụ ta ala epweji ọlẹ ka ju warị ka wuru ila gu am epweji ka rụ ila. I ka chị ẹpwa ịlẹ kị kaa kiliya ha ogiga iBaalụ uhye-ọgba nyaa bala ọ ya ere hụrụ ha ojiga ịBaalụ chajị kọ ka hu agbama jum ịla ịnyịnyị balaa.

³⁰Bwu ọmwụ ọdada pẹtẹẹ ala Isirẹlụ bala ala iJuda họ ẹla ọwụm ẹjẹ bwula abwẹla nyaa pịyọọ dalẹ. Amkpaa a ya ịnyị lẹ.

³¹Bwụka ọlẹ kị nwụ epweji ọlẹ pịyọọ dalẹ, ọ hu agbama bala ịkẹjẹ awụrụ jum chajị nya ọọwa lẹ, m cheje kam ka tọ ayịreji lẹ.

³²Chajị nya ang ịtịpyọ ịhọhọ nya ala iJuda bala ala iJerusalẹm tu Idịrịhụ bala alegbeju bala angịkiliya bala alọmwụ nyaa.

³³Inyi ẹkpẹ dam lẹ, ọriri kam mẹla ja-jẹ, ịịkeụrụ I ka je ang kaka.

³⁴Ị dọmwụ go ekpeku nya ijiga nyaa rịrị ube ịgọgọ ọlẹ kị nwụ ham ọọwa lẹ ị chọọ iri lẹlẹ.

³⁵Ị me ogigi ọkiliya ha ojiga ịBaalụ ụwa Ọkpọọ nya ịHinọm chajị kị ka kpa anyị anyang bala anyị alẹng nyaa ka kiliya ha ojiga ịMọlẹkị ụwa. Amatị ya nyị họ ang ọlịnyị ka. Ẹla ọlịnyị a tị dọmwụ jụka irya nyam nyọka dọmwụ byaa ya ị họ ang ọlịnyị kpụ angịnyị nya ala iJuda ka họ ang onyobyi ka.

³⁶Amkpaa Ohe Oluhye nya ala Isirẹlụ byim yẹkẹẹ, “ịJeremaya angịnyị juwa yẹkẹẹ, ẹwụ ọdada bala imyi onwụnwụ bala edụrụ ojuju ka du adịrawhụ nya ịBabịlọn ka ye epweji ọlẹ.

³⁷Yẹ mẹẹ, m juwa ka taa wuu guru bwu iga myịga ịlẹ kam kụa rụ ka ẹpwụ nya agbama bala ịkẹjẹ awụrụ nyam. M ka kpa nya tịrẹkpẹ myịmyị wẹ ẹgẹlẹ. I ka ku am la ọkpunyii.”

³⁸Ị ka ri angịnyi nyam am tị ka ri Ohe Oluhye nyaa.

³⁹M ka ya irya ụma okpokpo bala ụma nya ohịhị ọlala okpokpo haa. Ị ka jum Ihi ụka wuu chajị nya ọhaha nya ịlaa bala ọhaha nya anyị nyaa.

⁴⁰M ka nwa ịryo ọ gboyi moyi taa chajị kam ka hịnyọ lọ ka họ ang ịnyịla haa ka. M ka ya uhi ọjuju nyam ju ẹpwụ nya ọkịlẹtụ nyaa chajị kị ka hwahị him ka.

⁴¹M ka họ ang inyịla haa la ọkpẹkpẹ nyam ma ka yaa kụ am ọpyị ọlẹ gbe oyi myị-la ọkịlẹtụ bala olegu nyam wuu.

⁴²Ịlẹ Amkpaa a ya lẹ, jaabwọ kam kpa ayịreji ọtata ọtụka ọhẹ wẹ uhye nya, angịlẹ, ịnyị m ka kpa ang ịnyịla ịlẹ ka myị ọnụ lẹẹ chaa ọgụ lẹ.

⁴³Angịnyị wẹẹ yẹkẹẹ, “Ọpyị ọlẹ kpụ egwawụ-egwawụ wuu lẹ. Angịnyị ehe kụ ụwa kụ ka, iyo ịlẹpwamẹ-ẹ́ juwa ji ka. Ala ịBabịlọn tị́ gọọ beji chẹẹchẹẹ wuu lẹ!” Anụ tị yẹ mẹ, ị ka kpa ịpyị ra nyọka kpa họ ang-ẹrụ myịmyị am̀ ẹgẹlẹ ẹnẹhẹ wẹ-ẹ̀.

⁴⁴Angịnyị ka myịmyị-ị̀ ra ọpyị nya ẹrụ ịgẹlẹ la okpoko. I ka yụbwọ ju ụpwụ ẹpwụ nyang o-ju ẹjẹ nya ọpyị ọrara. Ị ka chọọ ori. Angịnyị ka ri ibeenu ụwa ọpyị nya iBenjamịn bala ịkịka nya iJerusalẹm bala epweji nya iJuda e-epweji ịlọmwụ nya ịgbọdọ bala edii nya iJuda chajị m ka tịrị ahị ọwawa nyaa ẹkpẹ haa. Inyị am Amkpaa a ya lẹ.