Read idege IJeremaya 33 Bible Online

IJeremaya 33 - idege bible

IJeremaya 33

¹Amkpaa ya ẹla ta iJeremaya myịmyị ugbabwọ oheye ụka kọ juwa agba ụwa ẹpwụ nya ube ọtụka ola odehe nya angịgbeji.

²Amkpaa ọlẹ kọ họ odehe kọ ya yeji ya ẹla tam. Ẹnyị nyamwụ a ri Amkpaa lẹ.

³Bẹkọ wụrụm mẹ, m ka wẹng. M ka ya ang ịla ẹbyebyị bala ang ị lahị bwuu ịlẹ ka jẹ ka jeng.

⁴Ịlẹ Amkpaa Ohe Oluhye nya ala Isirẹlụ a ya chajị nya ẹpwa ịla iJerusalẹm bala ẹwpa nya adịrahụ nya ala iJuda ịlẹ kị tụrụ chajị kị ka kpa tụ ugbẹyị ku alẹwụ nya ala ịBabịlọn ịlẹ kị me ipyi ba ụgụlọ nya epweji kị ka jẹ-ẹ̀ bwụwa ka dẹwụ lẹ.

⁵Ala ịBabịlọn juwa warị ka dẹwụ. Ị ka nwụka egu nya angịnyị ịlẹ kam ka nwụ la agbama abala ịkeje awụrụ nyam myị ẹpwa ịlẹ wuu. M nyẹẹkpẹ da epweji ọlẹ chajị nya ọhọbịrị nyaa lẹ.

⁶Ma m juwa ka ya ịnyịrọ ogogo bala uda ọhọhọ ha epweji ọlẹ. M ka họ ị ka la okpunyi ọtụka-ọtụka bala ọ họ ị ka kpẹhị ju ịlaa giri-giri.

⁷M ka tịrị ahị ọwawa nya ala iJuda bala ala Isirẹlụ ịlẹ kị gwaa byi lụka ịkẹkpẹnya tịrẹkpẹ haa. M ka ma nwụa ị ka myịmyị la jaabwọ kịla ụka nya ọgbanyẹ.

⁸M ka hua kpeng kpeng bwu ẹpwụ nya ọhọbịrị ịlẹ kị họ bam wuu. M ka hịnyọhi ọhọbịrị ịlẹ kị họ bam wuu bala egbeju onyịngịrị nya ọlala haa.

⁹ịJerusalẹm ka ri ẹgẹlẹ ka ụya ọyaya bala ihi ọlala bala ogbo ọlala ka bwu chị ẹpwụma ọnyị myị ọnyị ilodehe wuu ọgụ. Angịnyị ka wo ang ịnyịla ịlẹ kam họ haa wuu. Ị ka juhi bala ọ che kpakpakpa chajị nya iru nya ụdụ nyang ịlẹ kam ya haa.

¹⁰Ịlẹ Amkpaa a ya lẹ, “Angịnyị juwa yẹkẹẹ, ịgẹlẹ lala ọpyị ọchọrụ lẹ, angịnyị bala Iyo ịleji a jiam kaka?” Ela ọlẹ ka angịnyị ya wẹ la ịnyị ịlehị. Ma epweji ịla iJuda bala opeje ịla iJerusalẹm ịlẹ kị da huo wẹẹ, ka angịnyị lee iyo ịleji a juwa ka wẹẹ. Anụ juwa ka myịmyị wo ụwa.

¹¹Ọmọnyọ nya ụya ọyaya bala ọkẹkẹnị ọchịchị. Anụ ka wo omyi nya ọrwahụ bala ahụ ọnyẹwẹ. Angịnyị ka yẹkẹẹ, gwogbo ha Amkpaa Agụgụ chajị ọ hiigu ọhọhọ ọkpori-kpori nyamwụ juwa gbe oyi myị oyi. M ka myịmyị-ị̀ tịrị a hyọwawa nya epweji ọlẹ ẹkpẹ kaa la lala ịnya ọgbanyẹ. Amkpaa a ya ịnyị lẹ.

¹²Amkpaa Agụgụ yẹkẹẹ, Ọpyị ọlẹ kọ lẹẹ lala ọpyị ọchọrụ ọlẹ ka angịnyị lee iyo ịleji a jam ka. M ka họ edamẹ ka myịmyị am ju ọlẹ kị ka kpa iyo ri wẹẹ.

¹³Uwa epweji ịla uhye nya Igbọdọ bala epweji ịla uteji nya igbọdọ bala ịnẹgẹb ọla imwahụ nya iBenjamịn bala epweji ịlẹ kị dagaga ju iJerusalẹm bala epweji nya ala iJuda. Angịgbe ịlepịlọ ka myịmyị wa ikpịlọ nyaa ụwa wẹẹ.

¹⁴Amkpaa yẹkẹẹ, ụka juwa warị m ka họ ọnụ ọmyịmyị nyam ọlẹ kam myị ha angịnyị nya ala iJuda bala ala Isirẹlụ jịrya.

¹⁵Ẹpwụ nya ẹnụtụrụ ịwa bala lụka ọwa kpangga, m ka chụ ọnyị ọtụma nya iDevidi ọlẹ kọ la kpẹẹkpẹẹ ri adịrahụ. Adịrahụ ọwa ka họ abwẹla ọkpẹkpẹ bala abwẹla ọnyịla am ọpyị ọlẹ.

¹⁶Lụka ọwa, iJuda bala iJerusalẹm ka la ọlaaị ka juwa lokpunyi. Ẹnyị ọlẹ kị ka wuraa ri Amkpaa a ri abwẹla ọnyịịla nyahị lẹ.

¹⁷Am Amkpaa myị ọnụ yẹkẹẹ, ọnyị ọtụma nya iDevidi ka ji pyịpyọọ kọ ka ku ọmwakpa nyamwụ ri adịrahụ am ọpyị nya Isirẹlụ.

¹⁸Myịmyị ọngọkiliya ọlẹ kọ bwu imwawụ nya iLivayị ka ji pyịyọọ jụwa nyẹrụ ham bala okiliya ọ rwila kpobi bala ọhaha nya egbe nyang ẹrụ bala iya ịkịlaakịla datị-datị ịlahị nyam.

¹⁹Amkpaa byim yẹkẹẹ,

²⁰Ọ ri ka iro ọlẹ kam nwa ta odu ohihi bala ahị ọpyẹpyẹ a bịrị ọlẹ ka odu ohịhị bala ahị ọpyẹpyẹ a ka ji ụka kaka nyaa kaka lẹ.

²¹Ọọwa kẹnẹ-kẹnẹ iro ọlẹ kam nwa ta iDevidi ọnchẹ nyam nyọka la ọnyị ọlẹng bwu ugbiyegu nyamwụ ọlẹ kọ ka ri adịrahụ ku ọmwakpa nyamwụ bala iro ọlẹ kam nwa ta angịkiliya ịlẹ kị myị ẹrụ ham bwu imwawụ nya iLivayị a ka bịriịlẹlẹ.

²²M ka họ anyị ịtụma nya iDevidi ọnchẹ nyam bala angịkiliya ị bwu ugbiyegu nya ilibwai ka pyẹ lụmẹ-lụmẹ lala Idichụ ịluhye-ọgba bala egburuja ịlẹpwụ nya ihụ.

²³Amkpaa yẹla tam yẹkẹẹ,

²⁴A wo ẹla ọlẹ ka angịnyị wẹ ya yẹkẹẹ, ọdọdẹpwa imiiye ịlẹ ka am Amkpaa chụ nyọ ka ri ịnyam lẹ, am nyị pwaa lẹ? Chajị nyowa lẹ, Ị juwa hu ẹpẹpẹ ju angịnyị nyam. I hwaa lala ori ị ri ẹpwụma kaka.

²⁵Am Amkpaa yẹkẹẹ, Kẹnẹ-kẹnẹ o-ri kam nwa iro ta odu ohihi bala ahi ọpyẹpye, lee ọ hu ụka nyang myị ang ọlẹ kọ ka họ nọ ụwa uhye-ọgba bala odehe kaka mẹ-nyị.

²⁶Ọ ri nyi ka aalẹ, m ka pwa ala Isirẹlụ bala anyị ịtụma nya iDevidi ọnchẹ nyam lẹẹ ọ chụ ọnyị ọtụma nyamwụ ri Adịrahụ nya anyị ịtụma nya Ebiraham bala Ayịsiki bala iJekọbụ ka. M ka tịrị ahowawa nyaa ẹkpẹ bala ọ yẹ ahyẹẹrwẹrwa nyaa.